“Losha tshɛ l’ɔlɔlɔ ndo woshasha tshɛ wa kokele ndjaka oma la diko, polɔka oma le She esase wa l’olongo.” (Jakɔba 1:17) Divɛsa nɛ mɛnyaka dia Jehowa Nzambi Shɛso lele l’olongo ekɔ la lokaho. Koko, l’atei wa weshasha wakasha Nzambi anto, ekɔ woshasha ɔmɔ woleki ekina tshɛ. Woshasha akɔna ɔsɔ? Ɛtɛkɛta waki Yeso weyama dimɛna watanema lo Joani 3:16, totɛka ɔnɛ: “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”

Woshasha wakasha Nzambi lo nkimɔ tshɔi yande y’Ɔna mbele woshasha woleki tshɛ wakoka onto tshɛ la l’atei aso nongola, nɛ dia sho koka tshungɔma oma lo lɔhɔmbɔ la pɛkato la nyɔi. (Osambo 51:5; Joani 8:34) Oyadi kaanga sho kosalaka la wolo akɔna, ndooko kɛnɛ kakokaso nsala kakoka totshungola oma lo lɔhɔmbɔ lɔsɔ. Koko, l’ɔtɛ wa ngandji kande k’efula, Nzambi akakimɔ kɛnɛ kaki ohomba dia ntshungola anto. Lo nkimɔ tshɔi yande y’Ɔna, Yeso Kristo oko oshinga w’etshungwelo, Jehowa Nzambi akasha anto wele l’okitanyiya elongamelo ka lɔsɛnɔ la pondjo. Ko oshinga w’etshungwelo kɛdikɛdi na? Lande na kewɔ ohomba? Ndo ngande wakokaso nkondja wahɔ oma lɔkɔ?

Oshinga w’etshungwelo ekɔ oshinga wafutama dia mfuta ɛngɔ kɛmɔtshi kakashishɔ kana dia ntshungola onto oma lo lokanu. Bible mbutaka dia ambutshi aso wa ntondo, mbuta ate Adama l’Eva, wakatongama aha la pɛkato l’oyango wa sɛnaka pondjo pondjo lo paradiso ka la nkɛtɛ kaamɛ la ana wakawahombe ndjota. (Etatelo 1:26-28) Lonyangu ko, vɔ wakashisha awui asɔ tshɛ lo nsɔna dia mpindolɛ Nzambi ndo wakakome atshi wa pɛkato. Etombelo akɔna waki la dui sɔ? Bible kadimolaka ɔnɛ: “Oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.” (Rɔmɔ 5:12) Lo dihole dia vɔ sambiyɛ anawɔ lɔsɛnɔ la kokele, Adama akaasambiyɛ pɛkato ndo etombelo wele la dui sɔ ele nyɔi.

Lo dikambo di’oshinga w’etshungwelo, kɛnɛ kakafutama pombaka mbɛdima la kɛnɛ kakashishɔ. Lam’akandahindolɛ Nzambi l’okonda tshɛ, Adama akasale pɛkato ndo etombelo waki la dui sɔ ko oshishelo wa lɔsɛnɔ la kokele, mbuta ate lɔsɛnɔ laki Adama. Lo ndjela Bible, dui sɔ akakonya dia tokanula ta Adama monga lo lɔhɔmbɔ la pɛkato la nyɔi. Diakɔ diele, akahombama paka lɔsɛnɔ l’onto okina la kokele, mbuta ate lɔsɛnɔ laki Yeso lakakimɔma oko olambo dia ntshungola anto oma lo lɔhɔmbɔ. (Rɔmɔ 5:19; Ɛfɛsɔ 1:7) Paka l’ɔtɛ wakafute Nzambi la ngandji tshɛ oshinga ɔsɔ w’etshungwelo mbele andja wekɔ l’elongamelo dia nsɛna lɔsɛnɔ lakashisha Adama la Eva, mbuta ate lɔsɛnɔ la pondjo lo paradiso ka la nkɛtɛ.​—Ɛnyɛlɔ 21:3-5.

Lo menda kɛnɛ kambosalema, aha la taamu woshasha waki Nzambi w’oshinga w’etshungwelo wakimanyiya di’anto monga la lɔsɛnɔ la pondjo mbele woshasha woleki tshɛ woke. Dia mbeya nɛmɔ diele la ‘woshasha wa kokele,’ ɛsɔ tende woho wele woshasha ɔsɔ kotshaka awui amɔtshi watokimanyiya dia sho mbeya kana woshasha wekɔ la nɛmɔ oko wakatakɛtshanya lo sawo dietshi.

Vɔ kotshaka nsaki kaso. Sho anto takotɔ la nsaki ka sɛnaka pondjo pondjo. (Ondaki 3:11) Kaanga mbele sho kodjaka welo aso hita hatotokotsha nsaki kɛsɔ, oshinga w’etshungwelo tokimanyiyaka  lo dui sɔ. Bible mbutaka ɔnɛ: “Nɛ dia difuto dia pɛkato ele nyɔi, koko woshasha washa Nzambi ele lɔsɛnɔ la pondjo oma le Kristo Yeso Nkumɛso.”​—Rɔmɔ 6:23.

Vɔ kotshaka ehomba aso. Anto hawokoke nkimɔ oshinga w’etshungwelo. Bible mbutaka ɔnɛ: “Oshinga w’etshungwelo wa nsɛnɔ yawɔ wekɔ la nɛmɔ di’efula diele vɔ hawokokaki pondjo mfuta.” (Osambo 49:8) Ɔnkɔnɛ, sho tekɔ paka l’ohomba w’efula wa ekimanyielo kaki Nzambi dia ntshungɔ oma lo lɔhɔmbɔ la pɛkato la nyɔi. Koko “lo tshimbo y’etshungwelo k’oma l’oshinga w’etshungwelo wakafute Kristo Yeso,” Nzambi akatosha paka kɛnɛ keso l’ohomba.​—Rɔmɔ 3:23, 24.

Wekɔ la etena ka kokele. Bible totɛka ɔnɛ: “Kaanga mbakiso atshi wa pɛkato, Kristo akavu dikambo diaso.” (Rɔmɔ 5:8) Lam’ele vɔ wakafutama “kaanga mbakiso atshi wa pɛkato,” oshinga w’etshungwelo toshikikɛka woke woke wele ngandji ka Nzambi oya le so kaanga mbeso atshi wa pɛkato. Ndo vɔ toshaka elongamelo k’efula, oyadi kaanga tayokikɛ etombelo w’oma lo pɛkato.

Vɔ mɛnyaka oyango wa dimɛna ndo waha la lokaki. Bible mɛnyaka kɛnɛ kakatshutshuya Nzambi dia nkimɔ Ɔnande oko oshinga w’etshungwelo ɔnɛ: “Oma lo dikambo nɛ mbakɛnama ngandji ka Nzambi le so: Nzambi akatome Ɔnande ɛtɔi lakandote l’andja dia sho nkondja lɔsɛnɔ lo tshimbo yande. Lo dikambo sɔ mbele ngandji, aha sho mbakoke Nzambi ngandji, koko nde kakatoke ngandji.”​—1 Joani 4:9, 10.

Ngande wakokayɛ mɛnya dia wɛ ngɛnangɛnaka woshasha woleki ekina tshɛ? Tohɔ ɛtɛkɛta waki Yeso watanema lo Joani 3:16, ɛtɛkɛta wɛnya dia paka ‘onto longa la mbetawɔ’ le nde mbayoshimbamɛ. Lo ndjela Bible, mbetawɔ ekɔ “okongelo wa la eshikikelo tshɛ wa kɛnɛ kalongamɛ onto.” (Hɛbɛru 11:1) Dia monga la eshikikelo kɛsɔ, paka monga la ewo k’oshika. L’ɔtɛ wa dui sɔ, mbakɔlɔmbaso dia wɛ ntshungola etena ka mbeka awui wendana la Jehowa Nzambi, Ombishi wa ‘woshasha wa kokele’ ɔsɔ ndo wɛ mbeya kɛnɛ kahombayɛ nsala dia ndjokondja lɔsɛnɔ la pondjo layotokondja lo tshimbo y’olambo w’oshinga w’etshungwelo waki Yeso.

Wɛ koka mbeka awui asɔ tshɛ lo nsɛdingola awui wa l’Afundelo watanema l’Ɛtɛrnɛtɛ lo www.pr418.com. Ɛmɛnyi wa Jehowa wayonga l’ɔngɛnɔngɛnɔ dia kokimanyiya. Sho tekɔ l’eshikelo dia etena kayoyeka akambo asɔ ndo kayoyokondja wahɔ oma lo woshasha woleki tshɛ ɔsɔ, wɛ ayotshutshuyama lo mbuta ɔnɛ: “Nzambi losaka lo tshimbo ya Yeso Kristo Nkumɛso!”​—Rɔmɔ 7:25.