SAWO DIA WEKELO 47
OSAMBO 103 Alami wekɔ apami wele oko weshasha
Anangɛso le—Onde nyekɔ lo nkotsha kɛnɛ kalɔmbama dia nkamba oko dikumanyi?
“Naka onto ekɔ lo nkombola dia monga omendji, nde ekɔ lo nkombola olimu w’ɔlɔlɔ.”—1 TIM. 3:1.
KƐNƐ KAYOTEKA
Sawo nɛ diayɛnya kɛnɛ kalɔmba Bible di’ɔnangɛso nkotsha dia nkamba oko ekumanyi.
1-2. Naa “olimu w’ɔlɔlɔ” wakamba ekumanyi?
NAKA wɛ ambokamba oko okambi wakimanyiya l’etena kɛmɔtshi, kete ondo wɛ ɔkɛnɛmɔla waonga walɔmbama dia nkamba oko ekumanyi. Onde wɛ nangaka nkamba “olimu w’ɔlɔlɔ” ɔsɔ?—1 Tim. 3:1.
2 Elimu akɔna wakamba ekumanyi? Nde mbishaka ɛnyɛlɔ l’olimu w’esambishelo, kambaka wolo l’olimu wa wembwelo w’ɛkɔkɔ, lo wetshelo ndo keketshaka etshumanelo oma l’ɛtɛkɛta ndo oma lo kɛnɛ kasalande. Diakɔ diele Bible mbelɛka dikumanyi sɔ diakamba olimu wa wolo ɔnɛ “apami wele oko weshasha.”—Ɛf. 4:8.
3. Kakɔna kakoka ɔnangɛso nsala dia nkamba oko ekumanyi? (1 Timɔte 3:1-7; Tito 1:5-9)
3 Kakɔna kakokayɛ nsala dia nkamba oko ekumanyi? Nkotsha kɛnɛ kalɔmbama dia nkamba oko ekumanyi bu woho akɔ waamɛ oko nkamba olimu ɔmɔtshi wa lo demba. Mbala efula l’andja ɔnɛ, naka wɛ ekɔ la diewo diayanga owandji w’olimu, kete wɛ koka nkondja olimu. Koko otshikitanyi la wɔ, naka wɛ ekɔ lo nkombola dia sɔnama oko ekumanyi kete wɛ nɔmbamaka nsala akambo efula oleki tsho monga la diewo dia nsambisha ndo mbetsha. Wɛ pombaka nkotsha kɛnɛ kalɔmbama l’Afundelo le ekumanyi kofundami lo 1 Timɔte 3:1-7 ndo lo Tito 1:5-9. (Adia.) Sawo nɛ diayɛnya awui asato w’ohomba walɔmbama dia dikumanyi nkotsha: Monga la lokumu l’ɔlɔlɔ oyadi l’andja kana l’etei k’etshumanelo, mbisha ɛnyɛlɔ ka dimɛna oko ɔtɛ wa nkumbo ndo monga suke dia kambɛ etshumanelo.
MONGA LA LOKUMU L’ƆLƆLƆ
4. Kakɔna kalembetshiya “monga aha l’onongo”?
4 Dia nkamba oko ekumanyi, wɛ pombaka “monga aha l’onongo,” mbuta ate, monga la lokumu la dimɛna l’etshumanelo nɛ dia ndooko onto lakoka mvɔ lɔkɛwɔ layɛ tshɔdia. Ndo nto, wɛ pombaka monga la “lokumu l’ɔlɔlɔ ndo le anto wa l’andja.” Wanɛ waha bu ambetawudi koka mɔnyɔla dietawɔ diayɛ di’Okristo, koko hawohombe monga kaanga l’ɔkɔkɔ ɔtɔi wa mbidja taamu lo losembwe kana lo lɔkɛwɔ layɛ. (Dan. 6:4, 5) Yambola wate: ‘Onde lekɔ la lokumu l’ɔlɔlɔ oyadi l’etei kana l’andja w’etshumanelo?’
5. Ngande wakokayɛ mɛnya dia wɛ ekɔ “onangi w’akambo w’ɛlɔlɔ”?
5 Naka wɛ ekɔ “onangi w’akambo w’ɛlɔlɔ,” kete wɛ ayoyanga kɛnɛ kele ɔlɔlɔ le anto akina ndo ayowawandola l’ɔtɛ wa waonga awɔ w’amɛna. Wɛ ayonga nto l’ɔngɛnɔngɛnɔ dia salɛ anto akina awui w’ɛlɔlɔ oleki ndo kɛnɛ kalɔmbama. (1 Tɛs. 2:8) Lande na kele dionga nɛ ohomba le dikumanyi? Nɛ dia vɔ kambaka efula la wenya awɔ dia membola ɛkɔkɔ wa l’etshumanelo ndo kotshaka ɛkɛndɛ awɔ. (1 Pe. 5:1-3) Kaanga mbediɔ ngasɔ, ɔngɛnɔngɛnɔ waya lo kambɛ anto akina ndeka kɛnɛ tshɛ kayahondjaso la fwa.—Ets. 20:35.
6. Kakɔna kalembetshiya onto ‘lalongɔna’? (Hɛbɛru 13:2, 16; enda ndo osato.)
6 Wɛ ‘nongɔnaka’ etena kasalɛyɛ anto akina akambo w’amɛna mbidja ndo wanɛ waha bu angɛnyi ayɛ wa ma ma. (1 Pe. 4:9) Dibuku dimɔtshi nembetshiyaka onto lalongɔna lo yoho nyɛ: “Lokuke la luudu lande—ndo l’otema ande—pombaka ndjihɔ dikambo di’angɛndangɛnda.” Yambola wate: ‘Lokumu lakɔna lele la mi lo kɛnɛ kendana la nongola angɛndangɛnda?’ (Adia Hɛbɛru 13:2, 16.) Onto lalongɔna kahanaka kɛnɛ kele la nde l’angɛndangɛnda mbidja ndo ase wola, atɛkɛtshi w’angɛndangɛnda ndo l’anto akina wakamba wolo dia nkeketsha anangɛso l’akadiyɛso, ɛnyɛlɔ oko emendji w’etshimbedi.—Eta. 18:2-8; Tok. 3:27; Luka 14:13, 14; Ets. 16:15; Rɔmɔ 12:13.
Atshukanyi amɔtshi w’Akristo wambɛnya lokaho lawɔ lo nongola omendji w’otshimbedi la wadɛnde (Enda odingɔ 6)
7. Ngande wɛnya ekumanyi dia nde ‘bu onangi wa falanga’?
7 “Aha onangi wa falanga.” Kɛsɔ nangaka nembetshiya ɔnɛ wɛ hayasha lo oyangelo wa lomombo la l’emunyi. Oyadi wɛ ekɔ ose ɔngɔnyi kana ose wola, wɛ mbetshaka wahɔ wa Diolelo lo dihole dia ntondo lo lɔsɛnɔ layɛ. (Mat. 6:33) Kamba la wenya, wolo ndo diangɔ diele la yɛ dia ntɛmɔla Jehowa, dia nkotsha ehomba w’ase nkumbo kayɛ ndo dia kambɛ etshumanelo. (Mat. 6:24; 1 Jni. 2:15-17) Yambola wate: ‘Ngande wɔsami falanga? Onde dimi ngɛnangɛnaka la diangɔ dioleki ohomba le mi dia nsɛna? Kana onde dimi ndeka ndjasha l’oyango wa falanga ndo kombolaka dia monga la lomombo efula la l’emunyi?’—1 Tim. 6:6, 17-19.
8. Toho takɔna tɔmɔtshi tɛnya dia wɛ ekɔ onto “lasala akambo la wɛdimo” ndo lele la “ndjakimɛ”?
8 Naka wɛ ekɔ onto “lasala akambo la wɛdimo” ndo lele la “ndjakimɛ,” kete wɛ ekɔ la wɛdimo l’oseka dui tshɛ dia lo lɔsɛnɔ layɛ. Kɛsɔ mendanaka ndo la mbewɔ awui wa tshamba ndeko wendana la deshi, ɔnwɛlɔ wa wanu, ɔlɔtɔ ndo ɔlɔngɔswɛlɔ wa divo ndo ɔkɔkwɛlɔ wa demba. Wɛ bu ɔhɔmbɔ wa mbekelo ya l’andja ɔnɛ. (Luka 21:34; Jak. 4:4) Tshikala ki etena kakosalɛwɔ kɔlɔ kana kakosolawɔ. Wɛ ‘bu ombidjɔki wa wanu’; kana wɛ bu la lokumu lɔmɔtshi oko ɔnɔshi wa wanu. Yambola wate: ‘Onde yoho yami ya lɔsɛnɔ mɛnyaka dia dimi lekɔ la wɛdimo lo woho wasalami akambo ndo lekɔ la ndjakimɛ?’
9. Kakɔna kalembetshiya monga onto lele la “yimba y’ɔlɔlɔ” ndo “ladja akambo l’ɔnɔngɔ”?
9 Naka wɛ ekɔ la “yimba y’ɔlɔlɔ,” kete wɛ ayɔsɛdingolaka akambo la yambalo tshɛ lo ndjela atɔndɔ wa lo Bible. Wɛ akakanyiya efula lo dikambo di’atɔndɔ asɔ ndo dui sɔ diakakosha lomba dia mbɔsa tɛdikɔ ta lomba. Wɛ hasale akambo l’esasesase. Lo dihole dia nsala ngasɔ, wɛ ndjashikikɛka dia wɛ ekɔ l’awui tshɛ wele la yɛ ohomba. (Tok. 18:13) Etombelo wele la dui sɔ ele, wɛ mbɔsaka tɛdikɔ tele la wɛdimo takɛnɛmɔla lomba la Jehowa. Naka wɛ ekɔ onto “ladja akambo l’ɔnɔngɔ,” kete wɛ mbidjaka akambo l’ɔnɔngɔ ndo nɛmiyaka wonya. Wɛ mbeyamaka oko onto lakokawɔ mbɛkɛ otema ndo layela ɛlɔmbwɛlɔ. Waonga asɔ wayonga la shɛngiya lo lokumu layɛ l’ɔlɔlɔ. Kakianɛ, nyɛsɔ tɔsɛdingole woho wa nkotsha kɛnɛ kalɔmbama l’Afundelo dia monga ɔtɛ wa nkumbo washa ɛnyɛlɔ ka dimɛna.
SHA ƐNYƐLƆ KA DIMƐNA OKO ƆTƐ WA NKUMBO
10. Ngande wakoka onto ‘nɔmbɔla ase luudu lande lo yoho ya dimɛna’?
10 Naka wɛ ekɔ omi ndo nangaka nkotsha kɛnɛ kalɔmbama dia monga ekumanyi, kete eya dia lokumu l’ase nkumbo kayɛ lekɔ la shɛngiya. Ɔnkɔnɛ, wɛ pombaka ‘nɔmbɔla ase luudu layɛ lo yoho ya dimɛna.’ Wɛ pombaka monga la lokumu l’ɔlɔlɔ dia monga ɔtɛ wa nkumbo wele la ngandji ndo wakotsha ehomba w’ase nkumbo. Kɛsɔ mendanaka ndo la mbisha ɛnyɛlɔ ka dimɛna lo oseka dikambo tshɛ diendana l’ɔtɛmwɛlɔ aso. Lande na kele dui sɔ ohomba efula? Ɔpɔstɔlɔ Pɔɔlɔ akakane yimba lo yoho nyɛ ate: “Naka onto heye nɔmbɔla ase luudu lande, ngande wayondokoka nama etshumanelo kaki Nzambi?”—1 Tim. 3:5.
11-12. Shɛngiya yakɔna yele la lɔkɛwɔ l’ase nkumbo le papa naka nde nangaka nkamba oko ekumanyi? (Enda ndo osato.)
11 Naka wɛ ekɔ papa, kete wɛ pombaka nsala dia ‘anayɛ monga l’okitanyiya la kɛnɛmɔ tshɛ.’ Wɛ pombaka mbaetsha ndo mbalowanya la ngandji tshɛ. Lo mɛtɛ oko ana tshɛ, vɔ wayonga l’ɔngɛnɔngɛnɔ wa mbɔlaka ndo kɛnyaka kaamɛ la yɛ. Koko lam’ele wɛ ekɔ lo mbalowanya lo yoho ya dimɛna, vɔ wayonga l’okitanyiya, la dilɛmiɛlɔ ndo la lɔkɛwɔ la dimɛna. Ndo nto, wɛ pombaka nsala kɛnɛ kakokayɛ nsala dia nkimanyiya anayɛ dia vɔ monga la diɔtɔnganelo dia dimɛna la Jehowa, nsɛna lo ndjela atɔndɔ wa lo Bible ndo mpama polo lo batisimu.
12 “Kele la ana wele ambetawudi ndo wahawafunde dia wekɔ la lɔkɛwɔ la mindo ndo atɔmbɔki.” Naka ɔna lele ombetawudi amboyaɛndja onongo l’ɔtɛ wamondosala pɛkato ka woke, etombelo akɔna wakoka monga la dui sɔ le she? Naka papa hadjisha yimba dia ndowanya ndo mingola ɔnande, kete nde mbeyaka monga ko hakotsha kɛnɛ kalɔmbama dia nkamba oko ekumanyi.—Enda sawo diele lo Tshoto y’Etangelo ya Ngɔndɔ ka dikumi l’ɔtɔi 1, 1996, lk. 17, od. 6-7.
Ɛtɛ wa nkumbo walowanya anawɔ lo monga kaamɛ la wɔ lo elimu wotshikitanyi w’ekila (Enda odingɔ 11)
KAMBƐ ETSHUMANELO
13. Ngande wakokayɛ mɛnya dia wɛ ekɔ onto lele “l’ekanelo k’ɔlɔlɔ,” ndo “laha ɔtɛ wolo”?
13 Anangɛso wakɛnɛmɔla waonga w’amɛna w’Okristo wekɔ ohomba l’etshumanelo. Onto lele la “ekanelo k’ɔlɔlɔ” mbesaka wɔladi. Naka wɛ nangaka mbeyama oko onto lele l’ekanelo k’ɔlɔlɔ, kete hokamɛka anto akina ndo etawɔka tokanyi tawɔ. Lo losanganya, onde wɛ hakoke nsukɛ yɛdikɔ y’olui naka ndooko ɔlɛmbɛ kana tɔndɔ dia lo Bible diatona dui diakɔ? “Laha ɔtɛ wolo” nembetshiyaka dia wɛ hahombe ntshininala lo nsala awui lo yoho yalangayɛ. Wɛ mbetawɔka tokanyi t’anto akina. (Eta. 13:8, 9; Tok. 15:22) Wɛ ‘bu kanga ewanu’ kana onto “lahomala esadi.” Lo dihole dia monga kanga awui wolo kana onto lahetawɔ tokanyi t’anto akina, wɛ ekɔ ɔlɔlɔ ndo l’ɔkɔmi. Oko onto lalanga wɔladi, wɛ mbɔsaka yɛdikɔ ya mbidja wɔladi oyadi l’etena kele dui sɔ wolo disala. (Jak. 3:17, 18) Ɛtɛkɛta ayɛ w’amɛna koka ntutsha nkɛlɛ kayɛ ndo k’anto akina, mbidja ndo k’atunyi ayɛ.—Emb. 8:1-3; Tok. 20:3; 25:15; Mat. 5:23, 24.
14. Kakɔna kalembetshiya “aha onto leke kakoma ombetawudi” ndo lele la “kɔlamelo”?
14 Ɔnangɛso lakotsha kɛnɛ kalɔmbama dia nkamba oko ekumanyi ‘hakoke monga onto leke kakoma ombetawudi.’ Lam’ele wɛ atabatizama ɛnɔnyi efula, wɛ ekɔ l’ohomba w’etena dia nkoma Okristo wambotshunda lo nyuma. La ntondo ka wɛ sɔnama oko ekumanyi, wɛ pombaka mɛnya oko Yeso dia wɛ ekɔ l’okitshakitsha ndo mendɛ le Jehowa l’oseka ɔkɛndɛ tshɛ wakokande kosha. (Mat. 20:23; Flpɛ. 2:5-8) Wɛ koka mɛnya dia wɛ ekɔ la “kɔlamelo” lo shikimala le Jehowa ndo l’atɔndɔ ande wosembwe ndo lo ndjela ɛlɔmbwɛlɔ katoshande lo tshimbo y’okongamelo ande.—1 Tim. 4:15.
15. Onde ekumanyi pombaka monga ɔtɛkɛtshi wa manamana? Lembetshiya.
15 Afundelo mɛnyaka hwe di’emendji pombaka monga “l’akoka wa mbetsha.” Onde kɛsɔ nangaka nembetshiya ɔnɛ wɛ pombaka monga ɔtɛkɛtshi wa manamana? Ndooko. Dikumanyi efula diele l’akoka, kaanga mbewɔ bu atɛkɛtshi wa tomanamana, sambishaka dimɛna ndo membolaka ɛkɔkɔ. Kaanga mbediɔ ngasɔ, wɛ pombaka nsala la wolo dia ndowanya akoka ayɛ wa mbetsha. Ngande wakokayɛ nkoma ombetsha wa manamana?
16. Ngande wakokayɛ nkoma ombetsha wa manamana? (Enda ndo osato.)
16 “Lakukutɛ ɔtɛkɛta wa kɔlamelo.” Dia ndeka monga ombetsha wa dimɛna, wetshelo ayɛ wa lo sɛkɛ ndo alako ayɛ watombake oma l’Ɔtɛkɛta wa Nzambi. Dia nsala ngasɔ, wɛ pombaka mbekaka Bible ndo ekanda aso dimɛna. (Tok. 15:28; 16:23.) Etena kekayɛ, ɔsaka la yambalo tshɛ nɔtɛ lo woho wa nkamba l’Afundelo. Ndo etena ketshayɛ, sala la wolo dia minanda etema w’anto wetshayɛ. Wɛ kokaka ndjalowanya oko ombetsha naka wɛ nɔmba ndo nkamba la tokanyi t’oma le dikumanyi diambohokɔ akambo. (1 Tim. 5:17) Dikumanyi pombaka monga “l’akoka wa nkeketsha” anangɛwɔ l’akadiyɛwɔ; koko, dikumanyi pombaka lo tena dimɔtshi mbaalaka kana kaanga ‘mbahangwɛ.’ L’oseka dikambo tshɛ, dikumanyi pombaka mongaka nshi tshɛ ɔlɔlɔ. Naka wɛ ekɔ ɔlɔlɔ ndo la ngandji ndo tondjaka wetshelo ayɛ oma l’Ɔtɛkɛta wa Nzambi, kete wɛ ayonga ombetsha wa dimɛna ndo ayokoya Ombetsha wa Woke, Yeso.—Mat. 11:28-30; 2 Tim. 2:24.
Okambi wakimanyiya ɔmɔtshi ambotana diaaso dia mbeka woho wa mbetsha oma lo Bible etena kende kaamɛ l’ekumanyi kɛmɔtshi kambohokɔ akambo. Okambi wakimanyiya ohola sawo diande la ntondo ka talatala (Enda odingɔ 16)
TETEMALA NKOTSHA KƐNƐ KALƆMBAMA
17. a) Kakɔna kakoka nkimanyiya ekambi wakimanyiya dia ntetemala nkotsha kɛnɛ kalɔmbama? b) Kakɔna kahomba dikumanyi namaka lo yimba etena kasɛdingolawɔ anangɛso walangawɔ nsɔna oko dikumanyi? (Enda kiombo yele l’ɔtɛ a dui ɔnɛ: “ Onga la wɛdimo etena kasɛdingolayɛ anto akina.”)
17 L’ɔkɔngɔ wa nsɛdingola kɛnɛ kalɔmbama dia nkamba oko dikumanyi, ekambi wakimanyiya ɛmɔtshi ndjɔfɔnyaka dia vɔ hawokokaki pondjo nkotsha kɛnɛ kalɔmbama dia nkamba oko dikumanyi. Koko ohɔ dia oyadi Jehowa kana okongamelo ande hawolongamɛ dia wɛ nkotsha kɛnɛ kalɔmbama lo yoho ya kokele. (1 Pe. 2:21) Ndo ekɔ wolo wa nyuma ka Jehowa mbakokimanyiya dia wɛ nkotsha kɛnɛ kalɔmbama. (Flpɛ. 2:13) Onde ekɔ dionga dimɔtshi shikaa diakombolayɛ nkɛnɛmɔla? Lɔmba Jehowa lo dikambo diakɔ. Sala eyangelo lo dikambo diakɔ ndo lɔmba ekumanyi kɛmɔtshi tokanyi lo woho wa dikɛnɛmɔla.
18. Kakɔna kakeketshama ekambi wakimanyiya tshɛ dia nsala?
18 Nyɛsɔ sho tshɛ, mbidja ndo wanɛ wakamba oko dikumanyi, totetemale nkɛnɛmɔla waonga wɔtɛkɛtami lo sawo nɛ. (Flpɛ. 3:16) Onde wɛ ekɔ okambi wakimanyiya? Kotsha kɛnɛ kalɔmbama! Lɔmba Jehowa dia kolowanya dia wɛ nyomoleka monga ohomba efula l’olimu ande ndo l’etshumanelo. (Isa. 64:8) Jehowa atshɔkɔlɛ welo wadjayɛ dia nkotsha kɛnɛ kalɔmbama dia nkamba oko ekumanyi.
OSAMBO 101 Tokambe lo kaamɛ
