Onde wɛ akadia la yambalo tshɛ numɛlɔ tshɛ ya Tshoto y’Etangelo y’ɔnɔnyi ɔnɛ? Laasɔ, enda kana wɛ koka nkadimola lo ambola wayela anɛ:

Ɛnyɛlɔ kakɔna kakatotshikɛ Jehowa lo woho wa salɛ wamato akambo?

Nde mbasalɛka akambo aha la shɔnɔdi, aha la mbɔsa dia apami ndeka wamato. Nzambi pokamɛka wamato, ndjashaka lo nsaki yawɔ ndo mbakotshɛka ehomba awɔ. Ndo nde ndjaɛkɛka le wɔ dia nkamba olimu ande.—w24.01, lk. 15-16.

Ngande wakokaso nkamba la Ɛfɛsɔ 5:​7, diata ɔnɛ: “Tanyongake la diɔtɔnganelo la wɔ”?

Ɔpɔstɔlɔ Pɔɔlɔ akatɔhɛmɔla diaha mbekesanɛ l’onto lahotokimanyiya dia nkitanyiya ɛlɛmbɛ wa Nzambi. Diɔtɔnganelo dia ngasɔ mendanaka la wanɛ wetsha la so wenya okoko l’okoko kana wasawola la so lo tshimbo ya rɛzo sɔsio.—w24.03, lk. 22-23.

Oma lo weho akɔna w’ɛkɔndɔ wa kashi wahombaso ndjaalama?

Sho pombaka monga la yewo lo ɛkɔndɔ wahatamane mfundo woye oma le anangɛso l’akadiyɛso, mɛsajɛ weso hatɔlɔmbi w’oma le onto lahateye ndo ɔkɛtshanyielo w’akambo wa mɛtɛ kaamɛ la waa apɔsta wɛnama oko vɔ ndjashaka lo losango laso.—w24.04, lk. 12.

Awui akɔna weyaso ndo awui akɔna wahateye lo kɛnɛ kendana la woho wayolombosha Jehowa nkumekanga Sɔlɔmɔna, wanɛ wakadiakema lo Sɔdɔma la Ngɔmɔra ndo wanɛ wakadiakema lo Mvula k’elola?

Sho hateye shikaa dia kana Jehowa akɔshi yɛdikɔ ya mbalanya lo pondjo. Koko, sho mbeyaka dia nde mbeyaka towuiwui tshɛ ndo nde ekɔ la kɛtshi k’efula.—w24.05, lk. 3-4.

Woho wele Nzambi “Dive” toshaka eshikikelo kakɔna? (Eoh. 32:4)

Sho koka nyanga eshamelo le Jehowa. Nde ekɔ onto lakokaso mbɛkɛ otema, nɛ dia nde kotshaka nshi tshɛ alaka ande. Ndo nde hatshikitana, nde tshikalaka mɛtɛ lo lonto lande ndo lo asangwelo ande.—w24.06, lk. 26-28.

Kakɔna kakoka kokimanyiya dia ndjaekesanyiya l’etshumanelo k’oyoyo?

Yaɛkɛ le Jehowa dia kokimanyiya oko wakandakimanyiya ekambi ande wa lo nshi yakete. Ewɔ mbɛdika etshumanelo kayɛ k’oyoyo la k’edjedja. Onga l’akambo efula wa nsala lo etshumanelo kayɛ k’oyoyo ndo nsala la wolo dia monga l’angɛnyi w’eyoyo.—w24.07, lk. 26-28.

Wetshelo akɔna wakondjaso oma lo wɛɛla esato wa Yeso watanema lo Mateo 25?

Wɛɛla w’ɛkɔkɔ la mbudi mbikaka epole ɔsɛkɛ l’ohomba wa monga la mbetawɔ ndo la kɔlamelo. Wɛɛla w’esekaseka wa dimuma wa tɔkɛsɔ la wa dinginya mɛnyaka ohomba wa ndjalɔngɔsɔlaka ndo wa mambalɛka. Ndo wɛɛla wa talata tɔtɔmiyaka ohomba wa nkamba olimu wolo ndo monga l’ohetoheto.—w24.09, lk. 20-24.

Otale wa ngande waki tshoto y’otale ya tɛmpɛlɔ ka Sɔlɔmɔna?

Lo 2 Ɛkɔndɔ 3:​4, efundelo ɛmɔtshi wa l’anya w’edjedja mbutaka dia aki “kubita 120,” mbuta ate tshoto y’otale yaki la ntanga dia mɛtrɛ 53. Koko efundelo ekina wayaɛkɛso lɔkɔ mbutaka dia aki “kubita 20,” mbuta ate otale wa mɛtrɛ divwa. Kɛsɔ fɔnaka la woke wa mpele dia tɛmpɛlɔ.—w24.10, lk. 31.

Kakɔna kalembetshiya etelo k’ɔnɛ okambi wakimanyiya pombaka monga ‘omi lele la wadi ɔtɔi’? (1 Tim. 3:12)

Kɛsɔ nembetshiyaka dia nde pombaka ntshukana paka la womoto ɔtɔi ndo hahombe nsala awui wa mindo wa dieyanelo. Ndo nto, nde hahombe ndjasha lo yoho ya kɔlɔ le wamato akina.—w24.11, lk. 19.

Lande na kakokaso mbuta dia Joani 6:53 komonga ɛnyɛlɔ ka kɛnɛ kakahombe salema lo Dambo dia dikɔlɔ dia Nkumadiɔndjɔ?

Joani 6:53 tɛkɛtaka di’ohomba wa ndɛ demba la nnɔ dikila dia Yeso. Yeso akate ɛtɛkɛta ɛsɔ lo 32 T.D., la Ngalileya le ase Juda wakahombe monga la mbetawɔ le nde. Koko, Yeso akahɔhɔla Dambo dia dikɔlɔ dia Nkumadiɔndjɔ ɔnɔnyi ɔtɔi l’ɔkɔngɔ la Jɛrusalɛma. Lɛkɔ, Yeso akatɛkɛta lo dikambo dia wanɛ wakahombe mbolɛ kaamɛ la nde l’olongo.—w24.12, lk. 10-11.