Etena kayalɔngɔsɔlaso dia mbeka, sho koka ndjambola ɔnɛ: ‘Kakɔna kalongamɛmi dia mbeka?’ Koko sho pombaka nsala la wolo diaha akambo wele la so tekola yimba lo kɛnɛ kalanga Jehowa tetsha. Ngande wakokaso mpokamɛ kɛnɛ kalanga Jehowa tetsha?

Lɔmba dia nkondja lomba. Lɔmba Jehowa dia nde kokimanyiya dia wɛ nshihodia kɛnɛ kalangayɛ mbeka kakianɛ. (Jak. 1:5) Ewɔ ndjasha paka lo kɛnɛ kokoyeyaka.​—Tok. 3:​5, 6.

Etawɔ di’Ɔtɛkɛta wa Nzambi monga la shɛngiya lo lɔsɛnɔ layɛ. “Ɔtɛkɛta wa Nzambi wekɔ la lɔsɛnɔ.” (Hɛb. 4:​12) “Ɔtɛkɛta” wele la lɔsɛnɔ koka monga la shɛngiya le so lo yoho yotshikitanyi etena tshɛ kadiaso Bible, mbuta ate hatohombe mbeka tsho paka kɛnɛ kokoteyaka, koko sho koka mbeka ndo awui w’eyoyo.

Onga la lowando lo kɛnɛ tshɛ kaketsha Jehowa. Mbo yande ya ndɛ ya lo nyuma yekɔ oko “dambo diele la diangɔ dia ndɛ di’amɛna.” (Isa. 25:6) Ewɔ ntamba awui wahayangɛnangɛna lo wekelo ayɛ. Wɛ ayetawɔ di’Ɔtɛkɛta wa Nzambi kokimanyiya dia wɛ monga onto la dimɛna ndo ngɛnangɛna la kɛnɛ kadiayɛ!