1-2. Kakɔna kasala di’ekambi wa Nzambi monga l’ɔngɛnɔngɛnɔ? (Jakɔba 1: 22-​25)

 JEHOWA la Ɔnande la ngandji efula nangaka dia sho monga l’ɔngɛnɔngɛnɔ. Ofundji w’Osambo 119:2 mbutaka ate: “Ɔngɛnɔngɛnɔ le wanɛ wakitanyiya waohwelo ande, wanɛ wooyanga la otema awɔ tshɛ.” Yeso akate ate: “Ɔngɛnɔngɛnɔ le wanɛ woka ɔtɛkɛta wa Nzambi ndo wawokitanyiya!”​—Luka 11:28.

² Oko weso atɛmɔdi wa Jehowa, sho tekɔ l’ɔngɛnɔngɛnɔ. Lande na? Tekɔ l’ɛkɔkɔ efula, koko ɔkɔkɔ woleki woke ele sho mbadiaka Ɔtɛkɛta wa Nzambi mbala la mbala ndo salaka la wolo dia nkamba la kɛnɛ kekaso.​—Adia Jakɔba 1:​22-​25.

3. Wahɔ akɔna wakondjaso etena kakambaso la kɛnɛ kadiaso l’Ɔtɛkɛta wa Nzambi?

³ Sho kondjaka wahɔ lo toho efula etena ‘kongaso atshi w’ɔtɛkɛta.’ Yoho mɔtshi ele, etena kakambaso la kɛnɛ kekaso oma l’Ɔtɛkɛta wa Nzambi, sho ngɛnyangɛnyaka Jehowa. Ndo kɛsɔ toshaka ɔngɛnɔngɛnɔ. (Ond. 12:​13) Etena kakambaso la kɛnɛ kadiaso oma l’Ɔtɛkɛta wa Nzambi wakasambiyama, sho ndowanyaka lɔsɛnɔ l’ase nkumbo kaso ndo keketshaka diɔtɔnganelo diele lam’asaso l’asekaso ambetawudi. Ondo dui sɔ diambongaka mɛtɛ lo lɔsɛnɔ layɛ. Kɛnɛ koleki tshɛ ele, sho mbewɔka ekakatanu wakomɛ wanɛ watona ndjela mboka ya Jehowa. Aha la taamu, sho mbetawɔka kɛnɛ kakate nkumekanga  Davidɛ. L’ɔkɔngɔ wa nde ntɛkɛta dia ɛlɛmbɛ, wadjango ndo dombwelo dia Jehowa lo osambo, nde akakomiya ate: “Ɔnɛ ladilama nongolaka difuto dia woke.”​—Os. 19:​7-​11.

4. Lande na kele hatongaka nshi tshɛ wɔdu dia nkamba la kɛnɛ kadiaso l’Ɔtɛkɛta wa Nzambi?

⁴ Lo mɛtɛ, hatongaka nshi tshɛ wɔdu dia mbadia Ɔtɛkɛta wa Nzambi ndo nkamba la kɛnɛ kekaso. Sho pombaka ntshungola etena ka mbadiaka ndo mbekaka Ɔtɛkɛta wa Nzambi l’oyango wa sho nshihodia kɛnɛ kalanga Jehowa dia sho nsala. Laasɔ, nyɛsɔ tɔsɛdingole awui amɔtshi wakoka tokimanyiya dia mbadiaka Bible mbala la mbala. Tayɔsɛdingola nto kɛnɛ kayotokimanyiya dia nkana yimba la kɛnɛ kadiaso ndo toho takokaso nkamba la kɛnɛ kekaso lo lɔsɛnɔ laso.

TSHUNGOLA ETENA KA MBADIAKA ƆTƐKƐTA WA NZAMBI

5. Ɛkɛndɛ akɔna waleka tɔsɛ etena?

⁵ Ekambi wa Jehowa wekɔ l’awui efula wa nsala lo nsɛnɔ yawɔ. Sho mbetshaka wenya efula dia nkotsha ɛkɛndɛ wotshikitanyi watɔlɔmba Afundelo. Ɛnyɛlɔ, efula ka l’atei aso kambaka tolimulimu tɔmɔtshi dia nkotsha ehomba aso ndo w’ase nkumbo yaso. (1 Tim. 5:8) Akristo efula wekɔ lo nkokɛ ewotɔ awɔ wele la hemɔ kana waya esombe. Ndo sho tshɛ tekɔ l’ohomba wa nkokɛ yonge yaso ndo dui sɔ mbɔsaka etena. Laadiko di’ɛkɛndɛ ɛsɔ, tekɔ nto l’ɛkɛndɛ ekina l’etshumanelo. Ɔkɛndɛ wa woke wele la so ele wa nsambisha lokumu l’ɔlɔlɔ l’ohetoheto tshɛ. Lo menda ɛkɛndɛ efula wele la yɛ, ngande wakokayɛ ntana etena ka mbadiaka Bible mbala la mbala, ka nkana yimba la kɛnɛ kadiayɛ ndo ka nkamba la kɛnɛ katatɔ?

6. Ngande wakokayɛ mbetɛ wadielo wa Bible lo dihole dia ntondo? (Enda ndo osato.)

⁶ Wadielo wa Bible ekɔ dui dimɔtshi l’atei wa “akambo woleki ohomba” le so sho Akristo, diakɔ diele sho pombaka dietsha lo dihole dia ntondo. (Flpɛ. 1:​10) Lo kɛnɛ kendana la ɔnɛ lele l’ɔngɛnɔngɛnɔ, osambo wa ntondo mbutaka ɔnɛ: “Nde ngɛnangɛnaka lo ɛlɛmbɛ wa Jehowa, ndo nde mbadiaka ɛlɛmbɛ Ande  la dui dia l’ɛse la yanyi ndo l’otsho.” (Os. 1:​1, 2) Mbokɛmaka hwe dia kɛsɔ tɔlɔmbaka dia ndjatshungolɛka etena dia salaka wadielo ɔsɔ. Etena kakɔna koleki dimɛna ka mbadiaka Bible? Okadimwelo koka ntshikitana le onto l’onto. Koko kɛnɛ kele ohomba ele, nsɔna etena kayokokimanyiya dia mbadiaka Bible mbala la mbala. Ɔnangɛso lelɛwɔ Victor mbutaka ate: “Dimi nangaka mbadia Bible la pindju. Kaanga mbemi handoleke memɔ esadi la pindju, awui wekola yimba hawolekaka monga lo wenya ɛsɔ.” Onde dui sɔ diekɔ mɛtɛ ndo le yɛ? Yambola wate: ‘Etena kakɔna koleki dimɛna le mi dia mbadiaka Bible?’

KANA YIMBA LA KƐNƐ KADIAYƐ

7-8. Kakɔna kakoka toshimba dia nkondja wahɔ oma lo kɛnɛ kadiaso? Sha ɛnyɛlɔ.

⁷ Kɛnɛ kele mɛtɛ ele, sho mbeyaka mbadia awui efula aha la nshihodia kɛnɛ kadiaso. Onde wɛ atadiaka dui dimɔtshi ko yema tshitshɛ l’ɔkɔngɔ ko wɛ ambodiohɛ? Dui sɔ diambotokomɛka sho tshɛ. Lonyangu ko, dui sɔ koka tokomɛ ndo etena kadiaso Bible. Ondo takayadjɛ oyango wa mbadiaka lofulo la totshapita ta lo Bible lushi tshɛ. Ɔsɔ ekɔ dui dia dimɛna efula. Sho pombaka ndjadjɛ eyango ndo nsala la wolo dia mbaakotsha. (1 Kɔr. 9:​26) Koko sho pombaka nsala awui efula oleki tsho mbadia Bible, naka sho nangaka nkondja wahɔ efula oma lɔkɔ.

⁸ Tɔshi ɛnyɛlɔ kɛnɛ, esongo wekɔ l’ohomba wa ashi dia nsɛna. Koko naka amvula wamboleka ndɔ, kete nkɛtɛ yayolola l’ashi. Etena kasalema dui sɔ, amvula hawonga ohomba nto le esongo. Mongaka dimɛna etena kahaleke ndɔ amvula nɛ dia kɛsɔ kimanyiyaka di’ashi mbɔtɔ lo nkɛtɛ ndo nkimanyiya di’esongo mbola. Woho akɔ waamɛ mbele, sho pombaka mbewɔ wadielo wa Bible w’esadi esadi, nɛ dia naka sho nsala ngasɔ, kete hatotonga l’akoka wa nkana yimba, mbohɔ ndo nkamba la kɛnɛ kadishaso.​—Jak. 1:​24.

9. Kakɔna kahombaso nsala naka tamboshihodia dia tekɔ lo mbadia Bible esadi esadi?

⁹ Onde wɛ amboshihodia dia wɛ ekɔ lo mbadia Bible paka esadi esadi? Ko ahombayɛ nsala? Adia ɔkɔkɛ. Sala la wolo dia nkana yimba  la kɛnɛ kadiayɛ kana kakayadia. Dui sɔ hadiokoke kootsha wɔma. Wɛ mbeyaka mbɔsa yɛdikɔ ya mbetshaka wenya efula etena kekayɛ l’oyango wa nkana yimba. Lo wedi okina, wɛ mbeyaka nsɔna dia mbadiaka avɛsa yema tshitshɛ ndo nkamba l’etena katshikala dia nkana yimba la kɛnɛ kakayadisha. Victor lakatatɛkɛtshi la diko mbutaka ate: “Dimi salaka la wolo dia wadielo ami wa Bible monga mondo, ondo mbadia tshapita tshɔi. Lam’ele dimi mbadiaka la pindju ka pɛ, dimi mongaka l’akoka wa nkana yimba lushi l’otondo la kɛnɛ kakamadisha. Oyadi yoho yakɔna yayokamba la yɛ, ekɔ ohomba mbadiaka kɛnɛ kayokokimanyiya dia wɛ nkana yimba ndo nkamba la kɛnɛ kadiayɛ.​—Os. 119:​97; enda kiombo yele l’ɔtɛ a dui ɔnɛ: “ Ambola wa nsɛdingola.”

10. Sha ɛnyɛlɔ kɛnya woho wakokayɛ nkamba la kɛnɛ kekayɛ. (1 Tɛsalɔnika 5:​17, 18)

¹⁰ Oyadi etena kana wonya akɔna wayoyɔsɔna dia mbadiaka Bible, yashikikɛ dia nyanga toho ta nkamba la kɛnɛ kadishayɛ. Etena kadiayɛ etenyi kɛmɔtshi k’Ɔtɛkɛta wa Nzambi, yambola wate: ‘Ngande wakokami nkamba l’awui anɛ kakianɛ kana lo nshi yayaye?’ Ɛnyɛlɔ, tɔshi dia wadielo ayɛ wa Bible wekɔ lo 1 Tɛsalɔnika 5:​17, 18. (Adia.) L’ɔkɔngɔ wa mbadia avɛsa ahende asɔ, wɛ koka mbɔsa yema y’etena dia nkana yimba lo mbala ngana yalɔmbayɛ ndo lo woho walɔmbayɛ. Ndo nto, wɛ koka nkanyiya awui amɔtshi wakokayɛ mɛnya lowando. Ondo wɛ koka mbɔsa yɛdikɔ ya mboka Jehowa losaka l’awui asato shikaa. Naka wɛ mbɔsa yema y’etena dia nkana yimba la wetshelo w’oma lo Bible, kete kɛsɔ ayokokimanyiya dia mboka ndo nshihodia Ɔtɛkɛta wa Nzambi ndo nsala kɛnɛ katatɔ. Ndo naka wɛ kambaka la kɛnɛ tshɛ kadiayɛ oma lo Bible, kete l’edjedja ka wonya wɛ ayokoma okambi w’oshika wa Jehowa. Ko, kakɔna kahombayɛ nsala naka mɛnamaka dia wɛ eke l’awui efula wahombayɛ ndjalowanya?

YADJƐ EYANGO WAKOKAYƐ NKOTSHA

11. Lande na kakokayɛ nkɔmɔ lo tena dimɔtshi? Sha ɛnyɛlɔ.

¹¹ Etena kadiayɛ Bible ndo kayangayɛ toho ta nkamba la kɛnɛ katatɔ, wɛ mbeyaka nkɔmɔ tena dimɔtshi. Tɔshi ɛnyɛlɔ, ohɔsa dia lushi lɔmɔtshi wadielo ayɛ wa Bible wekɔ la dako diɛnya dia wɛ pombaka mbewɔ shɔnɔdi. (Jak. 2:​1-8) Wɛ ambɛna dia wɛ pombaka ndowanya yoho yayɛ ya salɛ anto akina akambo, ko wɛ ambɔsa yɛdikɔ ya nsala etshikitanu ɛmɔtshi. Ekɔ dui dia dimɛna efula! Oma laasɔ, loyi wadielo ayɛ wambɛnya ohomba wa sɛdingolaka ɛtɛkɛta ayɛ. (Jak. 3:​1-​12) Wɛ amboshihodia dia l’etena kɛmɔtshi wɛ akatondjaka ɛtɛkɛta wa kɔlɔ ndo wakɔmɔla. Ɔnkɔnɛ, wɛ  amboyashikikɛ dia tondjaka ɛtɛkɛta w’amɛna ndo wakeketsha. Wadielo ayɛ wa Bible wa lushi lokina mendanaka ndo l’ɔhɛmwɛlɔ waha monga ɔngɛnyi w’andja ɔnɛ. (Jak. 4:​4-​12) Wɛ ambɛna dia wɛ pomboka monga la yambalo l’ɔsɔnwɛlɔ ayɛ wa tɔkɛnyɔ. Lo lushi la nɛi, wɛ mbeyaka mɛna dia ekɔ wolo dia wɛ nsala etshikitanu ɛsɔ tshɛ.

12. Lande na kahayahombe nkɔmɔ naka wadielo ayɛ wa Bible wambɛnya dia wɛ pombaka nsala etshikitanu ɛmɔtshi? (Enda ndo nɔtɛ.)

¹² Naka wɛ pombaka ndjaalowanya ndo nsala etshikitanu ɛmɔtshi, kete tɔkɔmɔke. Kɛsɔ mɛnyaka dia wɛ ekɔ l’okitshakitsha. Onto lele l’okitshakitsha ndo la losembwe mbadiaka afundelo ndo nyangaka lɛnɛ ahombande nsala etshikitanu. a Ohɔka nto dia sho pombaka ntetemala ndɔta “lonto l’oyoyo.” (Kɔl. 3:​10) Kakɔna kayokokimanyiya dia ntetemala monga otshi w’Ɔtɛkɛta wa Nzambi?

13. Yoho yakɔna yoleki dimɛna yakokayɛ nkamba la kɛnɛ kekayɛ? (Enda ndo osato.)

¹³ Lo dihole dia nsala la wolo dia nkamba la kɛnɛ tshɛ kadiayɛ mbala kakɔ ɔtɔi, wɛ koka nsala la wolo dia nkamba la dui ɔtɔi kana ahende. (Tok. 11:2) Hemba dui nɛ: Funda listɛ l’awui wahombayɛ nsala etshikitanu, ndo oma laasɔ, sɔna dui ɔtɔi kana ahende wahombayɛ ntatɛ nsala etshikitanu ko wɛ ndjosala awui akina l’ɔkɔngɔ. Ko lende ahombayɛ ntatɛ?

14. Lo awui akɔna wakokayɛ ntatɛ?

¹⁴ Wɛ mbeyaka mbɔsa yɛdikɔ ya ntatɛ la dui dioleki wɔdu le yɛ dia nkotsha. Kana wɛ koka nsala etshikitanu lo dui diɛnayɛ ɔnɛ diɔ mboleki ohomba le yɛ. Etena kashikikɛyɛ dui diahombayɛ nsala etshikitanu, sala eyangelo l’ekanda aso, ondo lo nkamba la Index des publications des témoins de Jéhovah kana la Dibuku  di’eyangelo di’Ɛmɛnyi wa Jehowa. Lɔmba Jehowa dia nde kosha “nsaki la wolo wa nsala akambo.” (Filpɛ. 2:​13) Oma laasɔ, sala la wolo dia nkamba la kɛnɛ kakayeke. Etena kakotshayɛ oyango ayɛ wa ntondo, wɛ ayotshutshuyama dia nkotsha ekina. Lo mɛtɛ, etena kayalowanyayɛ lo dui dimɔtshi dia lo lɔsɛnɔ l’Okristo, kana lo dionga dimɔtshi di’Okristo, wɛ ayɛna dia ekɔ wɔdu le yɛ dia nsala etshikitanu lo awui akina.

NYETAWƆ DI’ƆTƐKƐTA WA NZAMBI MONGA LA “SHƐNGIYA YA WOLO LE NYU”

15. Ngande wotshikitanyi ekambi wa Jehowa l’anto akina wadia Bible? (1 Tɛsalɔnika 2:​13)

¹⁵ Anto amɔtshi mbutaka dia wambadiaka Bible mbala efula. Ko onde vɔ mbetawɔka mɛtɛ kɛnɛ ketsha Bible? Onde vɔ kambaka la kɛnɛ ketshatɔ kana mbetawɔka dia tɔ monga la shɛngiya lo nsɛnɔ yawɔ? Ndooko, anto efula hawoyele alako watanema lo Bible. Ande woho wotshikitanyiwɔ l’ekambi wa Jehowa lee! Oko Akristo wa lo ntambe ka ntondo, sho mbetawɔka Bible ‘oko wetɔ mɛtɛ, oko ɔtɛkɛta wa Nzambi.’ Kɛnɛ koleki tshɛ ele, sho salaka kɛnɛ kakokaso nsala dia nkamba l’alako wa lo Bible lo lɔsɛnɔ laso.​—Adia 1 Tɛsalɔnika 2:​13.

16. Kakɔna kakoka tokimanyiya dia monga atshi w’Ɔtɛkɛta?

¹⁶ Bu ɔtɔmbɔ l’esɔ dia mbadiaka ndo kambaka l’Ɔtɛkɛta wa Nzambi nshi tshɛ. Sho koka monga l’okakatanu dia ntana etena ka mbadia. Kana sho mbeyaka mbadia esadi esadi ko hatongi l’akoka wa nkana yimba la kɛnɛ kadishaso. Kana sho mbeyaka nkɔmɔ l’ɔtɛ w’awui efula wahombaso nsala etshikitanu. Oyadi okakatanu akɔna wele la yɛ, ndooko wɔnɛ wahayakoke ntondoya. L’ekimanyielo ka Jehowa, wɛ koka mbotondoya. Toyashikikɛ dia mbetawɔ ekimanyielo kande ndo nkoma atshi w’Ɔtɛkɛta koko aha tsho amboki. Aha la taamu, lam’ayototalekaka mbadia Ɔtɛkɛta wa Nzambi ndo nkamba la kɛnɛ katatɔ lo lɔsɛnɔ laso, mbayototalekaka monga l’ɔngɛnɔngɛnɔ.​—Jak. 1:​25.