1. Kakɔna kayanga nsala Yeso keema edja?

 TEKƆ lo nsɛna l’etena kayanga salema etshikitanu wa diambo! Keema edja, Yeso ayanga nombosha onto tshɛ lele la nkɛtɛ. Yeso akatɛkɛta di’etena kayokonya lo kilombo kɛsɔ lo mbisha ambeki ande “djembetelo” ya prɔfɛsiya yayɛnya woongelo ande wahɛnama ndo “ekomelo ka dikongɛ di’akambo.” (Mat. 24:3) Prɔfɛsiya kɛsɔ kekɔ lo Mateo tshapita 24 la 25 ndo l’ɛkɔndɔ wafɔna wele lo Makɔ tshapita 13 ndo Luka tshapita 21.

2. Kakɔna kayangaso nsɛdingola lo sawo nɛ ndo ngande wayotokimanyiya dui sɔ?

² Yeso akasha ɛhɛmwɛlɔ w’ohomba efula lo nkamba la wɛɛla esato. Wɛɛla w’ɛkɔkɔ la mbudi, w’esekaseka wa dimuma wa tɔkɛsɔ la wa dinginya ndo wa talata. Wɛɛla tshɛ tokimanyiyaka dia nshihodia woho wayonga dionga diaso la shɛngiya lo woho wayotolombosha Yeso. Etena kayangaso nsɛdingola wɛɛla ɛsɔ, tende wetshelo wakondjaso ndo woho wa nkamba la wetshelo akɔ. Wɛɛla wa ntondo wayangaso nsɛdingola ele w’ɛkɔkɔ la mbudi.

ƐKƆKƆ LA MBUDI

3. Etena kakɔna kayokakitola Yeso anto?

³ Lo wɛɛla w’ɛkɔkɔ la mbudi, Yeso akatɛkɛta dia kilombo k’anto wayonga la diɛsɛ dia mbetawɔ lokumu l’ɔlɔlɔ ndo nsukɛ anango Yeso w’akitami. (Mat. 25:​31-​46) Lo “mfɔnu ka woke,” nde ayoshikikɛ wanɛ wele ɛkɔkɔ la wanɛ wele mbudi la ntondo ka Aramangɛdɔna. (Mat. 24:​21) Oko watokakitolaka olami w’ɛkɔkɔ, ɛkɔkɔ la mbudi, Yeso ayokakitola wanɛ wasukɛ la kɔlamelo tshɛ ambeki ande w’akitami la wanɛ wahasale dui sɔ.

4. Lo ndjela Isaya 11:​3, 4, lande na kahombaso monga l’eshikikelo dia Yeso ayolombosha la losembwe tshɛ? (Enda ndo lo lohoso.)

 ⁴ Prɔfɛsiya ka lo Bible mɛnyaka dia oko wende Shushi yakasɔnama oma le Jehowa, Yeso ayolombosha la losembwe tshɛ. (Adia Isaya 11:​3, 4.) Nde ekɔ lo nsɛdingola lɔkɛwɔ, dionga ndo ɛtɛkɛta w’anto mbidja ndo woho wasalɛwɔ anango w’akitami akambo. (Mat. 12:​36, 37; 25:​40) Yeso ayeya wanɛ wakasukɛ anango w’akitami ndo olimu awɔ. a Yoho mɔtshi yasukɛ wanɛ wele oko ɛkɔkɔ anango Kristo ele, lo mbakimanyiya l’olimu w’esambishelo. Wanɛ washa ekimanyielo kɛsɔ wayɔsama oko “anto w’ɛlɔlɔ” ndo wayokondja “lɔsɛnɔ la pondjo” la nkɛtɛ. (Mat. 25:​46; Ɛny. 7:​16, 17) Ɔsɔ mɛtɛ ayonga difuto dia dimɛna efula le wanɛ walama olowanyi awɔ! Lo ntshikala la kɔlamelo lo mfɔnu ka woke, nkombo yawɔ yayolamema “lo dibuku dia lɔsɛnɔ.”​—Ɛny. 20:15.

5. Wetshelo akɔna wele lo wɛɛla w’ɛkɔkɔ la mbudi, ndo waa na wakondja wahɔ lɔkɔ?

⁵ Onga la mbetawɔ ndo la kɔlamelo. Wɛɛla wa Yeso w’ɛkɔkɔ la mbudi tɛkɛtaka ntondotondo dikambo dia wanɛ wele l’elongamelo ka nsɛna la nkɛtɛ. Vɔ mɛnyaka mbetawɔ kawɔ aha tsho lo nsukɛ anango Kristo l’esambishelo, koko ndo lo mbetawɔ la kɔlamelo tshɛ ɛlɔmbwɛlɔ ka djui y’akitami yakasɔnama oma le Yeso. (Mat. 24:​45) Koko, wanɛ wele l’elongamelo ka tɔsɛna l’olongo vɔ lawɔ koka mbidja yimba l’ɔhɛmwɛlɔ wele lo wɛɛla akɔ. Lande na? Nɛ dia Yeso ekɔ lo mbidja yimba lo lɔkɛwɔ lawɔ, dionga diawɔ ndo ɛtɛkɛta awɔ. Ndo vɔ mbahomba nama kɔlamelo yawɔ. Yeso akasha wɛɛla ekina ehende wele l’ɛhɛmwɛlɔ watɔlɔnganɛ l’akitami. Sho lawɔ tanaka wɛɛla akɔ lo Mateo tshapita 25. Tɔkɛtshanya wɛɛla w’esekaseka wa dimuma wa tɔkɛsɔ la wa dinginya.

ESEKASEKA WA DIMUMA WA TƆKƐSƆ LA WA DINGINYA

6. Ngande wakɛnya esekaseka etanu wa dimuma dia vɔ waki tɔkɛsɔ? (Mateo 25:​6-​10)

⁶ Lo wɛɛla w’esekaseka wa dimuma, Yeso akatɛkɛta dikambo di’esekaseka dikumi wa dimuma wakakongaka otshuki a wadi. (Mat. 25:​1-4) Vɔ tshɛ wakakongaka dia ntshindɛ otshuki a wadi lo fɛtɛ ka diwala. Yeso akate dia esekaseka etanu wa l’atei awɔ waki “tɔkɛsɔ” ndo etanu ekina waki “dinginya.” Esekaseka wa tɔkɛsɔ wakayalɔngɔsɔla dimɛna ndo waki la shɛnɔdi. Vɔ waki suke dia nkongɛɛ otshuki a wadi oyadi nde akahombe nkoma l’asa deke. Diakɔ diele, vɔ wakela esɔ efula di’atala awɔ ntetemala mpɛta. Vɔ wakela ndo esɔ kekina kakawahombe ndjokamba la tɔ naka otshuki a wadi amboviya. Laasɔ, vɔ wakayalɔngɔsɔla di’atala awɔ ntetemala mpɛta. (Adia Mateo 25:​6-​10.) Etena kakakome otshuki a wadi, esekaseka wa dimuma wa tɔkɛsɔ wakatshu la nde lo fɛtɛ ka diwala. Woho akɔ wamɛ mbele, Akristo w’akitami wayotetemala nsungukala ndo ntshikala la kɔlamelo polo lo oyelo wa Kristo wayɔsama dia ntshɔ l’otshuki a wadi Yeso, lo Diolelo diande dia l’olongo. b (Ɛny. 7:​1-3) Ko kakɔna kakakomɛ esekaseka wa dimuma etanu wa dinginya?

7. Kakɔna kakakomɛ esekaseka etanu wa dinginya ndo lande na?

⁷ Otshikitanyi l’esekaseka wa dimuma wa tɔkɛsɔ, esekaseka wa dimuma etanu wa dinginya komonga suke etena kakakome otshuki a wadi. Atala waki suke la dimala ndo vɔ kombela esɔ efula. Etena kakawoke dia otshuki  a wadi aya suke la nkoma, vɔ wakahombe ntshɔ dia tosomba esɔ. Vɔ komonga laawɔ etena kakaye otshuki a wadi. Etena kɛsɔ, “esekaseka wa dimuma waki laawɔ wakɔtɔ la nde lo fɛtɛ ka diwala ko lokuke lakadihama.” (Mat. 25:​10) Oma laasɔ, etena kakaye esakaseka wa dimuma wa dinginya ndo kakawalange mbɔtɔ, otshuki a wadi akawatɛ ate: “Dimi halanyeye.” (Mat. 25:​11, 12) Esekaseka wa dimuma wa dinginya ɛsɔ kondjalɔngɔsɔla dimɛna dia nkonga otshuki a wadi l’edja tshɛ kaki dui sɔ ohomba. Wetshelo akɔna wakondja akitami?

8-9. Wetshelo akɔna wakoka akitami nkondja oma lo wɛɛla w’esekaseka wa dimuma? (Enda ndo osato.)

⁸ Yalɔngɔsɔla ndo ambalɛka. Yeso kombita dia ayonga elui ehende w’akitami, mbuta ate ɔmɔtshi wakayalɔngɔsɔla dia nkonga polo l’ekomelo ka dikongɛ nɛ dia akambo ndo okina waki kondjalɔngɔsɔla. Koko nde akalembetshiya kɛnɛ kakahombe nkomɛ akitami naka vɔ howoyalɔngɔsɔdi dia mbikikɛ la kɔlamelo tshɛ polo l’ekomelo. Naka vɔ hawosadi dikambo sɔ, kete hawolongola difuto diawɔ. (Jni. 14:​3, 4) Ɔsɔ ekɔ dikambo dia wolo efula! Oyadi tekɔ l’elongamelo ka tɔsɛna l’olongo kana la nkɛtɛ, sho tshɛ pombaka mbidja yimba l’ɔhɛmwɛlɔ wele lo wɛɛla w’esekaseka wa dimuma. Sho tshɛ pombaka nsungukala, ndjalɔngɔsɔla ndo monga suke dia mbikikɛ polo l’ekomelo.​—Mat. 24:13.

⁹ L’ɔkɔngɔ wa nde nkɔndɔla wɛɛla w’esekaseka wa dimuma dia mɛnya ohomba wa ndjalɔngɔsɔla ndo nsungukala, Yeso akakɔndɔla wɛɛla wa talata. Wɛɛla ɔsɔ mɛnyaka ohomba wa nkamba olimu wolo.

TALATA

10. Woho akɔna wakɛnya ase olimu ahende kɔlamelo? (Mateo 25:​19-​23)

¹⁰ Lo wɛɛla wa talata, Yeso akatɛkɛta di’ase olimu ahende waki la kɔlamelo le owandji awɔ ndo dia ɔnɛ laki komonga la kɔlamelo. (Mat. 25:​14-​18) Ase olimu ahende wakɛnya kɔlamelo yawɔ lo nkamba olimu wolo dia mfudia falanga y’owandji awɔ. La ntondo ka nde mɛngɔla lo wodja okina, nde akawasha talata,  mbuta ate falanga efula. Ase olimu ahende wa kɔlamelo wakakambaka olimu wolo ndo wakakambe la falanga la lomba. Etombelo akɔna waki la dui sɔ? Etena kakakalola owandji awɔ, vɔ wakalodia kɛnɛ kakandawasha l’ahende. Owandji akawawandola ndo wakɔtɔ lo “ɔngɛnɔngɛnɔ w’owandji [awɔ].” (Adia Mateo 25:​19-​23.) Ko kayotota lo dikambo dia ose olimu wa sato? Kakɔna kakandasale la falanga yakawosha owandji ande?

11. Kakɔna kakakomɛ ose olimu wa “nɛndɛ” ndo lande na?

¹¹ Ose olimu wa sato akalongola lotalata ɔtɔi koko nde aki “nɛndɛ.” Owandji ande akalongamɛka dia nde nkamba la lotalata lɔsɔ la lomba. Lo dihole dia nsala ngasɔ, nde akalikundɛ. Etena kakakalola owandji ande, ose olimu ɔnɛ komonga ndooko l’ɛngɔ kekina laadiko kakandahombe mbosha. Ose olimu komonga l’ekanelo ka yimba k’ɔlɔlɔ. Lo dihole dia nɔmba edimanyielo l’ɔtɛ wakinde komonga l’akoka wa mfudia falanga y’owandji ande, ose olimu akelɛ owandji ande ɔnɛ “kanga awui wolo.” Ose olimu ɔnɛ kombetawɔma le owandji ande. Laadiko dia laasɔ, wakɔhɔtɔla lotalata lakɔ ndo wakawotshanya oma lo luudu l’owandji ande.​—Mat. 25:​24, 26-​30.

12. Alembetshiya ase olimu ahende wa kɔlamelo ɛlɔ kɛnɛ?

¹² Ase olimu ahende wa kɔlamelo nembetshiyaka Akristo w’akitami. Owandji, Yeso, mbaelɛka dia ‘mbɔtɔ lo ɔngɛnɔngɛnɔ w’owandji awɔ.’ Vɔ nongolaka difuto diawɔ dia l’olongo, eolwelo ka ntondo. (Mat. 25:​21, 23; Ɛny. 20:5b) Lo wedi okina, ɛnyɛlɔ ka kɔlɔ k’ose olimu wa nɛndɛ mbishaka akitami ɔhɛmwɛlɔ. Lo woho akɔna?

13-14. Wetshelo akɔna wakondja akitami oma lo wɛɛla wa talata? (Enda ndo osato.)

¹³ Kambaka olimu wolo ndo onga l’etete. Lo wɛɛla wa talata ndo w’esekaseka wa dimuma, Yeso kombuta di’akitami wayoyokoma akanga wa nɛndɛ. Koko nde akalembetshiyaka kɛnɛ kakahombe ndjotomba naka vɔ nshisha ohetoheto awɔ. Hawotonga l’akoka wa nkukutɛ diɛsɛ “diele la [wɔ] dia mbelamɛ ndo sɔnama,” ndo hawotetawɔma dia mbɔtɔ lo Diolelo dia l’olongo.​—2 Pe. 1:​10.

 ¹⁴ Wɛɛla wa Yeso w’esekaseka wa dimuma ndo wa talata mɛnyaka hwe di’Akristo w’akitami pombaka ndjalɔngɔsɔla, monga la yambalo, nkamba olimu wolo ndo monga l’etete. Ko onde Yeso akate dui dikina dia mpɛmɔla akitami? Eelo, nde akate! Kɛnɛ kakate Yeso katanema lo Mateo 24:​40, 41 mɛnyaka nto kilombo k’ekomelo k’akitami.

WAA NA ‘WAYƆSAMA’?

15-16. Ngande wɛnya Mateo 24:​40, 41 dia akitami pombaka nsungukala?

¹⁵ La ntondo ka mbuta wɛɛla akɔ esato, Yeso akalembetshiya ɔnɛ kilombo k’ekomelo k’akitami kayɛnya wanɛ waketawɔma. Nde akatɛkɛta dia apami ahende wakamba l’ekambɔ ndo dia wamato ahende wahɛla lo dive di’ɔhɛlɔ. Lo dikambo la dikambo, mɛnamaka dia vɔ akɔ ahende wekɔ lo nsala olimu waamɛ, koko Yeso akate dia “wayɔsa ɔmɔtshi ko ntshika okina.” (Adia Mateo 24:​40, 41.) Nde akahɛmɔla ambeki ande ate: “Ɔnkɔnɛ, nyosungukalake, nɛ dia hanyeye lushi layoya Nkumɛnyu.” (Mat. 24:​42) Yeso akate dui dimɔtshi diafɔna la sɔ l’ɔkɔngɔ wa nde mbuta wɛɛla w’esekaseka wa dimuma. (Mat. 25:​13) Onde ɛtɛkɛta ɛsɔ mbɔtɔnɛka? Mɛnamaka dia ekɔ ngasɔ. Paka akitami wa mɛtɛ wa kɔlamelo ato ‘mbayɔsama’ ndo mbayolongɔma oma le Yeso lo Dielelo dia l’olongo.​—Jni. 14:3.

¹⁶ Sungukalaka. Okitami tshɛ wahatetemala nsungukala, hatotshumanyema kaamɛ la “asɔnami.” (Mat. 24:​31) Ekambi wa Nzambi tshɛ, oyadi elongamelo kakɔna kele la wɔ, pombaka mbɔsa ɛtɛkɛta wa Yeso oko ɔhɛmwɛlɔ dia nsungukala ndo ntshikala la kɔlamelo.

17. Lande na kahatahombe ndjakiyanya naka Jehowa ambɔsɔna dia nkita anto amɔtshi wa kɔlamelo esɔ ɛlɔ kɛnɛ?

¹⁷ Sho takeye Jehowa dimɛna ndo sho ndjashikikɛka ɔnɛ kɛnɛ tshɛ kasalande kekɔ losembwe. Hatohombe ndjakiyanya naka Jehowa ambɔsɔna dia nkita anto wa kɔlamelo esɔ ɛlɔ kɛnɛ. c Sho mbohɔka kɛnɛ kakate Yeso lo dikambo di’ase olimu wakaye lo wonya wa 11 lo wɛɛla ande wa ekambɔ ka vinyɔ. (Mat. 20:​1-​16) Wanɛ wakelamɛ l’ɔkɔngɔ dia tokamba l’ekambɔ ka vinyɔ, wakalongola difuto diakɔ diamɛ la wanɛ wakatatɛ nkamba la pindju. Woho akɔ wamɛ mbele, oyadi etena kakɔna tshɛ kasɔnama akitami, vɔ wayolongola difuto diawɔ dia l’olongo naka vɔ ntshikala la kɔlamelo.

DJA YIMBA LO ƐHƐMWƐLƆ

18-19. Kakɔna kamboteka lo wɛɛla ɛnɛ?

¹⁸ Kakɔna kamboteka? Le wanɛ wele l’elongamelo ka nsɛna pondjo pondjo la nkɛtɛ, wɛɛla w’ɛkɔkɔ la mbudi mɛnyaka ohomba wa monga la mbetawɔ ndo la kɔlamelo le Jehowa oma ko kakianɛ ndo l’etena ka mfɔnu ka woke kayaye. L’etena kayaye kɛsɔ, Yeso ayolombosha anto wa kɔlamelo oko wanɛ watatshu “lo lɔsɛnɔ la pondjo.”​—Mat. 25:46.

¹⁹ Takasɛdingodi nto wɛɛla ehende washa akitami ɛhɛmwɛlɔ. Lo wɛɛla waki Yeso w’esekaseka wa dimuma wa tɔkɛsɔ ndo wa dinginya, etanu wakɛnya dia vɔ waki la tomba. Vɔ wakayalɔngɔsɔla ndo wakambalɛka, wele suke dia nkonga otshuki a wadi l’edja tshɛ kaki dui sɔ ohomba. Koko esekaseka wa dimuma wa dinginya kondjalɔngɔsɔla. Laasɔ otshuki a wadi akatone dia vɔ mbɔtɔ lo fɛtɛ ka diwala. Sho lawɔ pombaka ndjalɔngɔsɔla dia nkonga polo etena kayokomiya Yeso dikongɛ nɛ di’akambo. Ndo nto, lo wɛɛla wa Yeso wa talata, takasɛdingodi ase olimu ahende wa kɔlamelo wakakambaka olimu wolo ndo l’etete. Vɔ wakakambe wolo lo wahɔ w’owandji awɔ ndo waketawɔma  le nde. Koko, ose olimu wa nɛndɛ akatshanyema. Wetshelo akɔna wakokaso nkondja? Sho pombaka monga l’awui efula wa nsala l’olimu wa Jehowa polo l’ekomelo. L’ekomelo, tamboyɔsɛdingola lande na kahomba akitami ntetemala nsungukala l’oyango wa vɔ ‘mbɔsama’ oma le Yeso diatokondja difuto diawɔ dia l’olongo. Vɔ wekɔ lo nomɔlomɔ dia ‘sanganyema dia monga kaamɛ’ la Yeso l’olongo. L’ɔkɔngɔ wa ta dia Aramangɛdɔna, vɔ wayonga otshukami waki Yeso lo diwala dia Ɔna Ɔkɔkɔ.​—2 Tɛs. 2:1; Ɛny. 19:9.

20. Kakɔna kayosalɛ Jehowa wanɛ wadja yimba l’ɛhɛmwɛlɔ ande?

²⁰ Kaanga mbele kilombo kamboleka nsukana, sho keema l’ɔkɔkɔ wa mboka wɔma. Naka sho ntshikala la kɔlamelo, kete Shɛso ka ngandji kele l’olongo ayotosha “wolo woleki wɔnɛ wokongaka l’onto” l’oyango wa sho ‘ndjohanda ndo ndjemala la ntondo k’Ɔna onto.’ (2 Kɔr. 4:7; Luka 21:​36) Oyadi elongamelo kaso kekɔ ka nsɛna l’olongo kana ka nsɛna la nkɛtɛ, tayɔngɛnyangɛnya Shɛso naka sho mbidja yimba l’ɛhɛmwɛlɔ watanema lo wɛɛla wa Yeso. L’ɔtɛ wa ɔlɔlɔ waheyama mbɛdika wa Jehowa, nkombo yaso ‘yayotanema mfundama lo dibuku’ dia lɔsɛnɔ.​—Dan. 12:1; Ɛny. 3:5.