SAWO DIA WEKELO 20
OSAMBO 67 “Sambishaka Ɔtɛkɛta”
Ngandji kakotshutshuya dia ntetemala nsambisha!
“Lokumu l’ɔlɔlɔ pombaka ntondo sambishama lo wedja tshɛ.”—MAKƆ 13:10.
KƐNƐ KAYOTEKA
Woho watotshutshuya ngandji dia monga l’ohetoheto ndo ndjasha l’anima aso tshɛ l’olimu w’esambishelo.
1. Kakɔna kakateke lo losanganya la l’ɔnɔnyi wa 2023?
LO LOSANGANYA la l’ɔnɔnyi wa 2023, a takalongola elembetshielo w’eyoyo wendana la dietawɔ diaso ndo takoke waewoyelo w’amɛna wendana l’esambishelo. Ɛnyɛlɔ, takeke dia ondo anto amɔtshi wayokondja diaaso dia mbeta lo wedi w’ekambi wa Jehowa kaanga l’ɔkɔngɔ wa Babilɔna ka Woke ndanyema. Takeke nto dia ntatɛ Ngɔndɔ ka dikumi l’ɔtɔi 2023, apandjudi wa Diolelo hawoyɔlɔmbama dia kimɔka awui tshɛ tshɛ wendana l’alapɔlɔ awɔ w’esambishelo. Onde etshikitanu ɛsɔ wamboleka nkitshakitsha ohomba w’olimu aso w’esambishelo, waya bu dui dia wanyandja oko wakidiɔ ntondo? Ndooko kaanga yema!
2. Lande na kataleke monga olimu aso w’esambishelo wanyandja lushi la lushi? (Makɔ 13:10)
2 Lushi tshɛ leta, olimu aso w’esambishelo wekɔ lo taleke nkoma dui dia wanyandja. Lande na? Nɛ dia etena kambotshikala kaya mondo. Tende kɛnɛ kakate Yeso lo dikambo di’olimu w’esambishelo lo nshi y’ekomelo. (Adia Makɔ 13:10.) Lo yoho yɔtɔnɛ l’ɔkɔndɔ wa lo Mateo, Yeso akate dia lokumu l’ɔlɔlɔ layohomba sambishama lo nkɛtɛ k’otondo la ntondo “k’ekomelo” ndja. (Mat. 24:14) Etelo kɛsɔ mendanaka la ekomelo tshɛ tshɛ ka dikongɛ di’akambo dia kɔlɔ dia Satana. Jehowa akashikikɛ ‘lushi kana wonya’ wayanga salema awui wakatatami asɔ. (Mat. 24:36; 25:13; Ets. 1:7) Lushi tshɛ leta lekɔ lo taleke tosukanya la lushi lakɔ. (Rɔmɔ 13:11) Etena kaakatakonge lushi lɔsɔ, sho pombaka ntetemala nsambisha polo lam’ayoya ekomelo.
3. Kakɔna katotshutshuya dia nsambisha?
3 Etena kakanaso yimba l’olimu aso w’esambishelo, ayonga dui dia lomba dia nkana yimba lo dimbola di’ohomba nɛ: Lande na kasambishaso lokumu l’ɔlɔlɔ? Lo tshena pe, ngandji mbatotshutshuya dia nsambisha. Kɛnɛ kasalaso l’olimu w’esambishelo kɛnɛmɔlaka ngandji kaso, mbuta ate ngandji ka lokumu l’ɔlɔlɔ, ngandji kokaso anto ndo kɛnɛ koleki tshɛ ele ngandji kokaso Jehowa ndo lokombo lande. Tɔsɛdingole awui asɔ ɔtɔi l’ɔtɔi.
SHO SAMBISHAKA NƐ DIA SHO NANGAKA LOKUMU L’ƆLƆLƆ
4. Atotosalaka etena kalongolaso losango l’ɔlɔlɔ?
4 Onde wɛ koka mbohɔ woho wakayayaoke etena kakayalongola lokumu l’ɔlɔlɔ lɔmɔtshi, ondo etena kakotɔ ɔna ɔmɔtshi lo nkumbo kanyu kana kakayakondja olimu ɔmɔtshi wakiyɛ l’ohomba? Aha la taamu, wɛ akalomɔlomɔ dia nkahana lokumu l’ɔlɔlɔ lɔsɔ l’ase nkumbo ndo l’angɛnyi ayɛ. Onde dui dimɔtshi dia woho akɔ waamɛ diakatombe etena kakayoke losango loleki tshɛ dimɛna, mbuta ate lokumu l’ɔlɔlɔ la Diolelo dia Nzambi?
5. Ngande wakayayaoke etena kakayeke mbala ka ntondo akambo wa mɛtɛ oma l’Ɔtɛkɛta wa Nzambi? (Enda ndo esato.)
5 Ohokanyiya woho wakayayaoke etena kakayatatɛ mboka akambo wa mɛtɛ w’oma l’Ɔtɛkɛta wa Nzambi. Wɛ akeke dia Shɔ lele l’olongo kokaka ngandji, diakɔ dialangande wɛ monga ɔmɔtshi la lo nkumbo k’atɛmɔdi ande, diakandalake dia nkomiya paa ndo asui ndo ɔnɛ wɛ koka nongamɛ dia ndjɛnana la wakiyɛ wa ngandji wakavu l’andja w’oyoyo ndo awui akina efula. (Makɔ 10:29, 30; Jni. 5:28, 29; Rɔmɔ 8:38, 39; Ɛny. 21:3, 4) Akambo wa mɛtɛ asɔ wakananda otema ayɛ. (Luka 24:32) Wɛ akalange kɛnɛ kakayeke ndo wɛ konanga nama akambo wa mɛtɛ w’ohomba asɔ leyɛ wɛmɛ!—Ɛdika la Jɛrɛmiya 20:9.
Etena kakateke mbala ka ntondo lokumu l’ɔlɔlɔ, sho kotetemala momba akambo wa mɛtɛ wa nɛmɔ asɔ lo dikambo diaso shoamɛ! (Enda odingɔ 5)
6. Wetshelo akɔna wamboyokondja oma l’ɛnyɛlɔ ka Ernest nde la Rose?
6 Tɔsɛdingole ɛnyɛlɔ kɛmɔtshi. Ɔnangɛso lelɛwɔ Ernest b akavusha she etena kakinde l’ɛnɔnyi oko dikumi. Ernest mbutaka ate: “Lakayambolaka nte: ‘Onde papa akatshu l’olongo? Kana onde nde ambovɔ pondjo?’ Lakakɔmiyaka ana waki la washɛwɔ.” Ernest akatshɔka mbala la mbala lo diombo dia she, akakaka adwe ndo akalɔmbaka ate: “Nzambi le, lam’alangayɛ, dimi nangaka mbeya lɛnɛ ele papa.” Ɛnɔnyi oko 17 l’ɔkɔngɔ wa she mvɔ, wakalɔmbɛ Ernest dia nde mbeka Bible ndo nde aketawɔ aha la ntshimbatshimba. Nde aki l’ɔngɛnɔngɛnɔ dia mbeka dia wanɛ wambovɔ haweye ndooko dikambo, ekɔ oko wanɛ woladi djɔ ya baku ndo Bible ndakaka dia eolwelo kekɔ lo nshi yayaye. (Ond. 9:5, 10; Ets. 24:15) L’ekomelo, nde akayotanaka ekadimwelo lo ambola wakotshindjaka wɔɔngɔ l’etena k’otale! Ernest akangɛnangɛna efula akambo wa mɛtɛ wakandeke lo Bible. Rose wa wadɛnde akayotatɛka mbeka nde lawɔ ndo akangɛnangɛnaka mbutɛ anto akina losango la Diolelo lɔsɔ. Vɔ wakalongola batisimu lo 1978. Vɔ wakasambisha l’ohetoheto tshɛ ase nkumbo yawɔ, angɛnyi awɔ ndo anto akina akambo wa mɛtɛ w’ohomba efula wakawekaka. Etombelo waki la dui sɔ ele, Ernest nde la Rose wakakimanyiya anto ndekana 70 polo lo batisimu.
7. Kakɔna katomba etena kaka ngandji k’akambo wa mɛtɛ wa lo Bible edio l’etema aso? (Luka 6:45)
7 Eelo, etena kaka ngandji k’akambo wa mɛtɛ edio l’etema aso, hatokokokaki pondjo diha enyɔ aha la mbaewoya anto akina. (Adia Luka 6:45.) Sho ndjaokaka oko ambeki wa Yeso wa lo ntambe ka ntondo wakate ɔnɛ: “Sho hatototshika mbuta akambo wakatɛnyi ndo wakatoke.” (Ets. 4:20) Sho nangaka akambo wa mɛtɛ lo yɛdikɔ y’efula ndo sho kombolaka mbasambisha anto efula.
SHO SAMBISHAKA L’ƆTƐ WA NGANDJI KOKASO ANTO
8. Kakɔna katotshutshuya dia nsambisha anto akina lokumu l’ɔlɔlɔ? (Enda kiombo yele l’ɔtɛ a dui ɔnɛ: “ Toke anto ngandji —Ndo towaetɛ ambeki.”) (Enda ndo osato.)
8 L’ɛnyɛlɔ ka Jehowa la Ɔnande, sho mbokaka anto ngandji. (Tok. 8:31; Jni. 3:16) Sho mbokaka anto “[w]aha la Nzambi” ndo ‘waha l’elongamelo’ kɛtshi k’efula. (Ɛf. 2:12) L’ɔtɛ w’ekakatanu wele lawɔ, vɔ mbeyaka ndjoyaoka oko anto wele lo difuku di’ɔhɔngɔ. Koko sho tekɔ l’ɔkɔdi wakoka mbatondja oma lɔkɔ: lokumu l’ɔlɔlɔ la Diolelo dia Nzambi. Ngandji ndo kɛtshi kaso k’efula totshutshuyaka dia mbidja welo dia nsambisha anto asɔ lokumu l’ɔlɔlɔ. Losango la nɛmɔ efula lɔsɔ koka ndodia etema awɔ l’elongamelo, mbakimanyiya dia monga la lɔsɛnɔ loleki dimɛna oma ko kakianɛ ndo mbasha elongamelo ka “lɔsɛnɔ l’oshika,” mbuta ate lɔsɛnɔ la pondjo l’andja w’oyoyo waki Nzambi.—1 Tim. 6:19.
Ngandji ndo kɛtshi kokaso anto totshutshuyaka dia mbidja welo tshɛ dia mbasambisha lokumu l’ɔlɔlɔ (Enda odingɔ 8)
9. Ɔhɛmwɛlɔ akɔna washaso lo kɛnɛ kendana la nshi yayaye ndo lande na? (Ɛzɛkiyɛlɛ 33:7, 8)
9 Ngandji kokaso anto totshutshuyaka nto dia mbahɛmɔla lo kɛnɛ kendana l’ekomelo k’andja wa kɔlɔ ɔnɛ kaya suke. (Adia Ɛzɛkiyɛlɛ 33:7, 8.) Sho ndjakiyanyaka dikambo di’asukanyi ndo ase nkumbo yaso wele bu ambetawudi. Efula kawɔ wekɔ lo ndjasha l’elimu awɔ wa lushi la lushi aha la mbeya ɔnɛ “mfɔnu ka woke kayoyala woho wahatayalaka oma ko etatelo k’andja polo ndo kakianɛ ndo woho wahayalaki nto.” (Mat. 24:21) Sho nangaka vɔ mbeya kɛnɛ kayosalema l’etena ka kilombo, mbuta ate kayonyɛma ɛtɛmwɛlɔ wa kashi ndo kayolanyema dikongɛ di’otondo dia kɔlɔ lo Aramangɛdɔna. (Ɛny. 16:14, 16; 17:16, 17; 19:11, 19, 20) Sho nɔmbaka di’anto efula mbetawɔ ɔhɛmwɛlɔ ɔsɔ ndo monga kaamɛ la so kakianɛ l’ɔtɛmwɛlɔ wa pudipudi. Ko kayotota lo dikambo dia wanɛ wahadje yimba l’ɔhɛmwɛlɔ ɔsɔ l’etena kɛnɛ, mbidja ndo ase nkumbo yaso wokaso ngandji?
10. Lande na kele ekɔ dui dia wanyandja dia sho ntetemala mbewola anto?
10 Oko wakadialembetshiyama lo sawo dietshi, mɛnamaka dia lolango la Jehowa ele dia nshimbɛ anto wayonga la diaaso dia nkadimola etema etena kayowɛna elanyelo ka Babilɔna ka Woke. Naka ngasɔ mbediɔ, kete amboleka monga ohomba mbewoya anto la shamanya. Tɔsɛdingole dui nɛ: Kɛnɛ kawatɛso l’etena kɛnɛ mbeyaka mbasha dui dimɔtshi diahombawɔ ndjohɔ. (Ɛdika la Ɛzɛkiyɛlɛ 33:33.) Ondo vɔ koka ndjooka ɔhɛmwɛlɔ wakatahɛmɔlaka ndo ndjotshutshuyama dia monga kaamɛ la so l’ɔtɛmwɛlɔ wa pudipudi la ntondo ka ndjohɔ okanga a kɔngɔla wanyu wamboshila. L’ɛnyɛlɔ k’olami wa lokanu wa la Filipɛ wakayokadimolaka otema paka l’ɔkɔngɔ wa nde mboka ‘didimu dia nkɛtɛ,’ ondo amɔtshi wahakadimola etema awɔ etena kɛnɛ koka ndjosala dui sɔ l’ɔkɔngɔ wa Babilɔna ka Woke ndanyema.—Ets. 16:25-34.
SHO SAMBISHAKA L’ƆTƐ WA NGANDJI KOKASO JEHOWA NDO LOKOMBO LANDE
11. Ngande washaso Jehowa lotombo, kɛnɛmɔ ndo wolo? (Ɛnyɛlɔ 4:11) (Enda ndo esato.)
11 Ɔkɔkɔ woleki tshɛ wasambishaso lokumu l’ɔlɔlɔ ele nɛ dia sho mbokaka Jehowa Nzambi ndo lokombo lande l’ekila ngandji. Sho mbɔsaka esambishelo kaso oko yoho mɔtshi ya ntombola Nzambi kokaso ngandji. (Adia Ɛnyɛlɔ 4:11.) Sho mbetawɔka l’otema ɔtɔi ɔnɛ: Jehowa Nzambi mbasungana nongola lotombo, kɛnɛmɔ ndo wolo oma le atɛmɔdi ande wa kɔlamelo. Sho mboshaka lotombo ndo kɛnɛmɔ etena kewoyaso anto akina tolembetelo tɛnya dia nde “mbakatonge diangɔ tshɛ” ndo nde mbakatosha lɔsɛnɔ. Sho mbishaka Jehowa wolo aso etena kakambaso la wenya, wolo ndo diangɔ diaso l’oyango wa nsambisha efula lo ndjela akoka aso. (Mat. 6:33; Luka 13:24; Kɔl. 3:23) Lo tshena pe, sho ngɛnangɛnaka ntɛkɛta akambo wendana la Nzambi kaso ka ngandji. Sho tshutshuyamaka nto dia mbutɛ anto akina akambo wendana la lokombo lande ndo woho wa Nzambi kende. Lande na?
Sho mbishaka Jehowa wolo aso etena kakambaso la wenya, wolo ndo diangɔ diaso dia ndjasha tshɛ l’esambishelo lo ndjela akoka aso (Enda odingɔ 11)
12. Ngande wakidiaso lokombo la Jehowa l’esambishelo?
12 Ngandji kokaso Jehowa totshutshuyaka dia nkidia lokombo lande. (Mat. 6:9) Sho nangaka mbutɛ anto akina di’akambo wa kɔlɔ efula wakate Satana lo dikambo dia Jehowa wekɔ kashi. (Eta. 3:1-5; Jɔbɔ 2:4; Jni. 8:44) L’olimu aso w’esambishelo, sho nomɔlomɔka dia mamɛ Nzambi kaso, lo mbutɛ anto tshɛ watohokamɛ awui wa mɛtɛ wendana la nde. Sho kombolaka di’onto tshɛ mbeya dia dionga diande dioleki woke ele ngandji ndo yoho yande ya nɔmbɔla yekɔ ɔlɔlɔ ndo losembwe, ndo Diolelo diande diayanga nkomiya keem’edja asui tshɛ, diayanga mbela wɔladi ndo ɔngɛnɔngɛnɔ le anto. (Os. 37:10, 11, 29; 1 Jni. 4:8) Etena kaamɛso lokumu la Jehowa l’esambishelo, sho kidiaka lokombo lande. Sho mongaka nto l’ɔngɛnɔngɛnɔ wa mbeya dia tekɔ lo nsɛna lo yoho yɔtɔnɛ la lokombo laso. Lande na kataso ngasɔ?
13. Lande na keso l’ofunu dia mbelamɛ Ɛmɛnyi wa Jehowa? (Isaya 43:10-12)
13 Jehowa akatɔsɔnɛ dia monga “ɛmɛnyi” ande. (Adia Isaya 43:10-12.) Ambeta ɛnɔnyi ɛmɔtshi, mukanda ɔmɔtshi wakaye oma le Olui-walɔmbɔla wakate ɔnɛ: “Nɛmɔ dioleki tshɛ diele la so ele mbelamɛ Ɛmɛnyi wa Jehowa.” c Lande na kataso ngasɔ? Tɔshi ɛnyɛlɔ kɛmɔtshi. Naka wɛ ekɔ l’ohomba w’onto ɔmɔtshi lahomba monga ɔmɛnyi lo dikambo diayɛ lo tominadi, kete wɛ ayɔsɔna onto leyayɛ dimɛna ndo layaɛkɛyɛ le nde, onto leyama dia nde mbutaka mɛtɛ. Lo tɔsɔna oko Ɛmɛnyi ande, Jehowa mɛnyaka dia nde teyaka dimɛna ndo nde ndjaɛkɛka le so dia sho mbutɛ anto akina dia paka ndamɛ mbele Nzambi ɔtɔi ka mɛtɛ. Sho ndjaokaka dia tekɔ la nɛmɔ dia monga Ɛmɛnyi ande diakɔ diakambaso la diaaso tshɛ dia mbeyanya lokombo lande ndo ndɔsha kashi tshɛ yatawɔ lo dikambo diande. Lo nsala ngasɔ, sho sɛnaka lo yoho yɔtɔnɛ la lokombo lɔsaso la nɛmɔ di’efula, mbuta ate Ɛmɛnyi wa Jehowa!—Os. 83:18; Rɔmɔ 10:13-15.
TAYOTETEMALA NSAMBISHA POLO L’EKOMELO
14. Awui akɔna w’amɛna efula wakongɛɛso?
14 Tekɔ lo nongamɛ mɛtɛ awui w’amɛna efula! Diɛsɛ l’ekimanyielo ka Jehowa, tekɔ lo nongamɛ di’anto efula wayetawɔ akambo wa mɛtɛ la ntondo ka mfɔnu ka woke ntatɛ. Ndo nto, tekɔ l’ɔlɔ w’efula lo woho wele kaanga l’etena koleki tshɛ kɔlɔ ka l’ɔkɔndɔ w’ana w’anto, mbuta ate lo mfɔnu ka woke, tayɛna anto efula wayoka andja wa Satana ɔkɔngɔ ndo wayosangana la so dia ntombola Jehowa!—Ets. 13:48.
15-16. Kakɔna kayototetemala nsala ndo polo l’etena kakɔna?
15 Etena kaakatakonge dui sɔ, tekɔ l’olimu wa nsala. Olimu wele hatosalaki nto, mbuta ate nsambisha lokumu l’ɔlɔlɔ la Diolelo dia Nzambi lo nkɛtɛ k’otondo. L’etena kakɔ kaamɛ, sho pombaka ntetemala mpɛmɔla anto lo kɛnɛ kayanga salema keema edja. Anto pombaka mbeya di’ekomelo ka dikongɛ di’akambo dia kɔlɔ nɛ kekɔ lo ndjasukana esadi esadi. Laasɔ etena kayoya kilombo, vɔ wayeya dia takasambishaka losango loye oma le Jehowa Nzambi.—Ɛzk. 38:23.
16 Ko kakɔna kambotoyashikikɛ dia nsala? Lo tshutshuyama la ngandji, mbuta ate ngandji ka lokumu l’ɔlɔlɔ, ngandji kokaso anto ndo kɛnɛ koleki tshɛ, ngandji kokaso Jehowa Nzambi ndo lokombo lande, tayotetemala nsambisha l’etete, la shamanya ndo l’ohetoheto polo lam’ayota Jehowa ate “ambokoka!”
OSAMBO 54 “Mboka tɔ kɛnɛ”
a Losanganya la l’ɔnɔnyi lakasalema lo Ngɔndɔ ka dikumi 7, 2023, lo Mbalasa ka nsanganya ya weke k’Ɛmɛnyi wa Jehowa ka la Newburgh la New York l’États-Unis d’Amérique. Ekongelo k’otondo ka losanganya lɔsɔ kakayotomba lo JW Televiziɔ—Etenyi 1 lo Ngɔndɔ ka dikumi l’ɔtɔi 2023 ndo Etenyi 2 lo Ngɔndɔ ka ntondo 2024.
b Enda sawo diele l’ɔtɛ a dui ɔnɛ: “Bible tshikitanyaka nsɛnɔ y’anto—Lakambiyama oma l’ekadimwelo wokɛma hwe ndo w’eshika w’oma lo Bible,” diakatondjama lo sawo dia Tshoto y’Etangelo ya Ngɔndɔ ka hende 1, 2015.