1. Wetshelo akɔna w’esambelo waketsha Jehowa Abrahama?

 ƆSƆ aki sawo diele Abrahama kodiohɛ pondjo. Lo tshimbo y’ondjelo, Nzambi akatɛ Abrahama dia Nde ayanga nshila wodja wa Sɔdɔma la Ngɔmɔra oshiki. Pami ka kɔlamelo kɛsɔ akatshimbe wɔɔngɔ. Nde akambola ate: “Onde mɛtɛ wɛ ayolanya anto w’ɛlɔlɔ kaamɛ [l’akanga] wa kɔlɔ? . . . Onde Shushi ya nkɛtɛ k’otondo hatosala akambo la losembwe?” La solo dia lotutsha tshɛ, Jehowa akasha ɔngɛnyi ande wakandokaka ngandji wetshelo wele ohomba le so ndo watokeketsha sho tshɛ ɔnɛ: Nzambi halanyaki pondjo anto w’ɛlɔlɔ.—Eta. 18:​23, 33.

2. Kakɔna katoshikikɛ dia dombwelo dia Jehowa diekɔ la losembwe ndo la kɛtshi?

² Ngande wakokaso nshikikɛ dia kilombo ka Jehowa kekɔ la losembwe ndo la kɛtshi? Nɛ dia sho mbeyaka dia “Jehowa mɛnaka l’etei k’otema” w’onto. (1 Sa. 16:7) Lo mɛtɛ, nde mbeyaka “otema w’onto tshɛ.” (1 Nku. 8:39; 1 Ɛk. 28:9) Ɔsɔ mɛtɛ ekɔ dui dia diambo. Dombwelo dia Jehowa ndeka la fwa kɛnɛ kakokaso nshihodia. Diakɔ diele, l’ekimanyielo ka nyuma k’ekila, ɔpɔstɔlɔ Pɔɔlɔ akate lo dikambo dia Jehowa Nzambi ɔnɛ: “Dombwelo diande hadiomanema mfundo!”—Rɔmɔ 11:33.

3-4. Ambola akɔna ondo wakokaso ndjambolaka lo tena dimɔtshi ndo kakɔna kayotɔsɛdingola lo sawo nɛ? (Joani 5:​28, 29)

³ Koko, sho lawɔ mbeyaka lo tena dimɔtshi ndjaoka ambola wa woho akɔ waamɛ oko wakambola Abrahama. Sho mbeyaka ndjambola ɔnɛ: ‘Onde anto wakadiake Jehowa, ɛnyɛlɔ oko ase Sɔdɔma la Ngɔmɔra, wayolɔ? Onde amɔtshi l’atei awɔ wayonga lo “eolwelo k’anto . . . wa kɔlɔ”?’—Ets. 24:15.

 ⁴ Nyɛsɔ tende awui weyaso lo dikambo dia eolwelo. Atete edja, teke oma la nongola elembetshielo wa hwe wendana la “eolwelo ka lɔsɛnɔ” ndo “eolwelo ka kilombo.” a (Adia Joani 5:​28, 29.) Elembetshielo ɛsɔ wakakonya lo etshikitanu ekina wayotɔkɛtshanya lo sawo nɛ ndo diayela. Lo dikambo dia dombwelo diosembwe diaki Jehowa, tayɔsɛdingola ntondo awui wahateye ndo oma laasɔ awui weyaso.

AWUI WAHATEYE

5. Kakɔna kakataka ekanda aso lo nshi y’edjedja lo dikambo di’ase Sɔdɔma la Ngɔmɔra?

⁵ Lo nshi yakete, ekanda aso wakɛnyaka kɛnɛ kayokomɛ anto wayolomboshama oma le Jehowa oko anto wa kɔlɔ. Takataka di’anto wakadiakema oma le Jehowa, ɛnyɛlɔ oko ase Sɔdɔma la Ngɔmɔra, hawotolɔ. Koko l’ɔkɔngɔ wa sho mbeka ndo nɔmba la yambalo tshɛ lo dikambo sɔ, akayɛnamaka hwe dia hatokoke ntɛkɛta dui sɔ l’eshikikelo tshɛ. Lande na?

6. Bɛnyɛlɔ diakɔna dimɔtshi dia woho wakalombosha Jehowa atshi wa kɔlɔ ndo awui akɔna wahateye?

⁶ Tɔsɛdingole ambola amɔtshi wɔtɔnɛ la dui sɔ. Ekɔ ɛkɔndɔ efula wa lo Bible watetsha awui wendana la dombwelo dia Jehowa lo dikambo di’anto wa kɔlɔ. Ɛnyɛlɔ, Jehowa akadiake anto tshɛ lo Mvula k’elola onyake Nɔa la nkumbo kande. Ndo nto, nde akakambe l’ase Isariyɛlɛ dia ndjaka anto wa lo wedja esambele wakadjasɛka lo Nkɛtɛ ya daka. Ndo nde akakambe la ondjelo ɔtɔi dia ndjaka asɔlayi w’ase Asuriya 185000 l’otsho ɔtɔi. (Eta. 7:23; Eoh. 7:​1-3; Isa. 37:​36, 37) Lo ndjela akambo asɔ, onde Bible totɛka hwe dia Jehowa akɔshi yɛdikɔ ya ndjaka onto tshɛ la l’atei w’anto asɔ pondjo aha l’elongamelo ka eolwelo? Ndooko, aha ngasɔ. Lande na kataso ngasɔ?

7. Kakɔna kahateye lo dikambo di’anto wakalanyema la Mvula k’elola kana anto wakalanyema etena kakalɔsha ase Isariyɛlɛ wodja wa Kanana? (Enda osato wa lo lohoso.)

⁷ Hateye woho wakalombosha Jehowa onto l’onto l’atei w’anto asɔ; ndo hateye kana anto wakadiakema asɔ wakakondja diaaso dia mbeka akambo wendana la Jehowa ndo ndjatshumoya. Lo kɛnɛ kendana l’etena ka Mvula k’elola, Bible mbutaka dia Nɔa aki “osambisha w’akambo w’ɛlɔlɔ.” (2 Pe. 2:5) Koko tɔ hate dia l’etena kakandasɛlaka waato wa luudu, Nɔa akasambisha anto tshɛ wa lo nkɛtɛ k’otondo lo dikambo di’elanyelo ka la Mvula k’elola. Woho akɔ waamɛ mbele, hateye kana anto tshɛ wa kɔlɔ wakasɛnaka lo wodja wa Kanana wakakondja diaaso dia mbeka akambo wendana la Jehowa ndo wakatshikitanya nkɛwɔ yawɔ.

8. Awui akɔna wahateye lo dikambo di’ase Sɔdɔma la Ngɔmɔra?

⁸ Kayotota di’anto wakadiakema la Sɔdɔma la Ngɔmɔra? Onto ɔlɔlɔ lakawelɛka Lɔta, akadjasɛka l’ase Sɔdɔma. Ko onde sho mbeyaka dia kana Lɔta akaasambisha vɔ tshɛ? Ndooko. Onde onto tshɛ la lɛkɔ akeyaka kɛnɛ kele ɔlɔlɔ la kɛnɛ kele kɔlɔ? Tohɔ dia olui w’apami wa l’osomba ɔsɔ wakayange dia mbeyana la wolo l’angɛndangɛnda wakaye laka Lɔta. Bible mbutaka di’olui w’anto ɔsɔ waki “ntatɛ oma le akɛnda polo ndo le esombe.” (Eta. 19:4; 2 Pe. 2:7) Onde mɛtɛ sho shikikɛka dia Jehowa, Nzambi ka kɛtshi, akɔshi yɛdikɔ yaha kaanga onto ɔtɔi l’atei w’anto asɔ mbolɔ? Ndooko, hatokoke mbuta ngasɔ. Jehowa akashikikɛ Abrahama dia hakoki kaanga anto w’ɛlɔlɔ dikumi l’osomba ɔsɔ. (Eta. 18:32) Ɔnkɔnɛ, vɔ waki anto wa kɔlɔ ndo la losembwe tshɛ, Jehowa akawafute lo ndjela etsha awɔ. Ko onde sho koka mbuta  l’eshikikelo tshɛ dia ndooko kaanga onto ɔtɔi l’atei awɔ layolɔ lo “eolwelo k’anto . . . wa kɔlɔ”? Ndooko, hatokoke nshikikɛ dui sɔ!

9. Kakɔna kahateye lo dikambo dia Sɔlɔmɔna?

⁹ Lo wedi okina, ɛkɔndɔ ɛmɔtshi wa lo Bible mɛnyaka di’anto amɔtshi w’ɛlɔlɔ wakayokomaka anto wa kɔlɔ. Ɛnyɛlɔ oko nkumekanga Sɔlɔmɔna. Nde aketshama dimɛna mboka ya Nzambi ndo akatshɔkwama efula oma le Jehowa; koko, nde akayowoka ɔkɔngɔ lo ntɛmɔla tozambizambi ta kashi. Dui sɔ diakomadia Jehowa ndo diakela etombelo wa kɔlɔ l’edja ka nkama y’ɛnɔnyi. Kɛnɛ kele mɛtɛ ele, Afundelo mbutaka dia Sɔlɔmɔna “aketama dia momuya kaamɛ la watshɛnde,” mbidja ndo apami wa kɔlamelo ɛnyɛlɔ oko nkumekanga Davidɛ. (1 Nku. 11:​5-9, 43; 2 Nku. 23:13) Ko onde yoho yakandakundɛma ekɔ djembetelo yɛnya dia nde ayolɔ? Bible hate ndooko dui. Anto amɔtshi mbeyaka mfɔnya dia Sɔlɔmɔna ayolɔ nɛ dia Bible mbutaka dia “onto lambovɔ ambotshungɔ oma lo pɛkato yande.” (Rɔmɔ 6:7) Ekɔ ngasɔ, koko kɛsɔ halembetshiya di’onto tshɛ lakavu ayolɔ, nɛ dia aha ɔnɛ naka onto akavu kete ndooko onyake nde ayolɔ. Eolwelo ekɔ woshasha w’oma le Nzambi ka ngandji. Nde mbishaka onto tshɛ lalangande woshasha ɔsɔ dia mbokambɛka pondjo pondjo. (Jɔbɔ 14:​13, 14; Jni. 6:44) Onde Sɔlɔmɔna ayolongola woshasha ɔsɔ? Jehowa keya okadimwelo; sho hateye. Kɛnɛ keyaso ele Jehowa ayosala kɛnɛ kele ɔlɔlɔ.

AWUI WEYASO

10. Ngande wayaoka Jehowa lo kɛnɛ kendana la ndjaka anto? (Ɛzɛkiyɛlɛ 33:11) (Enda ndo osato.)

¹⁰ Adia Ɛzɛkiyɛlɛ 33:11. Jehowa totɛka woho wayaokande lo kɛnɛ kendana la nombosha anto. Ɔpɔstɔlɔ Petero akasambiyama la nyuma k’ekila dia mfunda kɛnɛ kakate omvutshi Ɛzɛkiyɛlɛ, lo mbuta ɔnɛ: “Jehowa . . . halange kaanga onto 1 ndanyema.” (2 Pe. 3:9) Lo ndjela dui dia mɛtɛ sɔ, sho mbeyaka dia Jehowa hasasɛ dia ndjaka onto naka aha l’ɛkɔkɔ w’eshika. Nde ekɔ la kɛtshi k’efula ndo nde mɛnyaka kɛtshi kɛsɔ etena tshɛ konga dui sɔ ohomba.

11. Anto akɔna wele hawotolɔ ndo ngande weyaso dui sɔ?

¹¹ Awui akɔna weyaso lo dikambo di’anto wayolɔ? Bible shilaka paka bɛnyɛlɔ dingana nto. b Yeso akɛnya dia Judasɛ Iskariyɔtɛ hatolɔ. (Makɔ 14:21; enda ndo Joani 17:12 ndo nɔtɛ ka wekelo lo Falase.) La lolango ndo l’okonda tshɛ, Judasɛ akasale dui diaki kɔngɛnyangɛnya Jehowa Nzambi nde l’Ɔnande. (Enda Makɔ 3:29 ndo w07 8/1 lk. 6-7.) Woho akɔ waamɛ mbele, Yeso akate di’ewandji ɛmɔtshi w’ɛtɛmwɛlɔ wakalɔshanaka la nde wakahombe mvɔ aha l’elongamelo ka eolwelo. (Mat. 23:33) Ndo ɔpɔstɔlɔ Pɔɔlɔ akate dia waa apɔsta wahayatshumoya hawotolɔ.—Hɛb. 6:​4-8; 10:29.

12. Kakɔna keyaso lo dikambo dia kɛtshi ka Jehowa? Sha bɛnyɛlɔ.

¹² Laasɔ, kakɔna keyaso lo dikambo dia kɛtshi ka Jehowa? Ngande wakandɛnya dia nde “halange kaanga onto 1 ndanyema”? Tɔsɛdingole kɛtshi kande otsha le anto amɔtshi wakasale pɛkato ya weke. Nkumekanga Davidɛ akasale pɛkato ya weke efula, ɛnyɛlɔ akasale loseka ndo akadiake. Koko Davidɛ akayatshumoya, ko Jehowa akodimanyiya la kɛtshi tshɛ. (2 Sa. 12:​1-13) Nkumekanga Manase akasale awui wa kɔlɔ efula lo lɔsɛnɔ lande. Kaanga mbakandasale awui wa kɔlɔ asɔ, Jehowa akɛnya Manase kɛtshi ndo akodimanyiya  l’ɔtɛ wakandayatshumoya. (2 Ɛk. 33:​9-16) Bɛnyɛlɔ sɔ toholaka dia Jehowa mɛnyaka kɛtshi kande etena kɛnande dia ɛkɔkɔ wekɔ wa nsala dui sɔ. Nde ayolola anto asɔ, nɛ dia vɔ wakeye dia wakasale pɛkato ya weke ndo wakayatshumoya.

13. a) Lande na kakoke Jehowa ase Niniva kɛtshi? b) Kakɔna kakayotaka Yeso l’ɔkɔngɔ lo dikambo di’ase Niniva?

¹³ Sho mbeyaka nto woho wakoke Jehowa ase Niniva kɛtshi. Nzambi akatɛ Jɔna ate: “Kɔlɔ kawɔ kambokoma le mi.” Koko etena kakawayatshumoya oma lo pɛkato yawɔ, Jehowa akaadimanyiya l’ɔlɔlɔ tshɛ. Nde aki la kɛtshi efula oleki Jɔna. Nzambi akohola omvutshi waki la nkɛlɛ ɔsɔ dia ase Niniva kombeyaka “kaanga ntshikitanya ɔlɔlɔ la kɔlɔ.” (Jɔna 1:​1, 2; 3:10; 4:​9-11) L’ɔkɔngɔ diko, Yeso akayokambaka l’ɛnyɛlɔ kakɔ dia mbetsha awui wendana la losembwe ndo kɛtshi ka Jehowa. Yeso akate dia ase Niniva wakayatshumoya “wayemala lo kilombo.”—Mat. 12:41.

14. Kakɔna kayolembetshiya “eolwelo ka kilombo” le ase Niniva?

¹⁴ Ko kakɔna kalembetshiya ɔnɛ ase Niniva “wayemala lo kilombo”? Yeso aketshaka dikambo dia “eolwelo ka kilombo” ka lo nshi yayaye. (Jni. 5:29) Nde akatɛkɛtaka dikambo dia Ɛlɔmbwɛlɔ kande k’ɛnɔnyi kinunu, l’etena kɛsɔ oyadi ‘anto w’ɛlɔlɔ kana wa kɔlɔ’ wayolɔ. (Ets. 24:15) Le anto wa kɔlɔ, ayonga “eolwelo ka kilombo.” Dui sɔ nembetshiyaka dia l’ɔkɔngɔ w’anto asɔ mbolɔ, Jehowa nde la Yeso wayenda kana vɔ wekɔ l’okitanyiya ndo wekɔ lo nkamba la kɛnɛ kekawɔ. Naka ose Niniva ɔmɔtshi layolɔ amboyotona ntɛmɔla Jehowa, kete Jehowa hatetawɔ di’onto ɔsɔ ntshikala la lɔsɛnɔ. (Isa. 65:20) Koko le wanɛ tshɛ wayɔsɔna dia ntɛmɔla Jehowa la kɔlamelo tshɛ, kilombo kawɔ kayonga ka dimɛna. Vɔ wayonga l’elongamelo ka nsɛna pondjo pondjo!—Dan. 12:2.

15. a) Lande na kahombaso mbewɔ mbuta ɔnɛ anto wakalanyema la Sɔdɔma la Ngɔmɔra hawotolɔ? b) Ngande ondo wakokaso nshihodia kɛnɛ kɔtɛkɛtami lo Judɛ 7? (Enda kiombo yele l’ɔtɛ a dui ɔnɛ: “ Kakɔna kakalange Judɛ mbuta?”)

¹⁵ Etena kakandatɛkɛtaka dikambo di’ase Sɔdɔma la Ngɔmɔra, Yeso akate dia vɔ wayonga dimɛna lo “Lushi la Kilombo” oleki anto wakootone oyadi nde kana wetshelo  ande. (Mat. 10:​14, 15; 11:​23, 24; Luka 10:12) Kakɔna kakandalange mbuta? Sho koka mfɔnya dia Yeso akadje oshimu ɛsɔ lanɛ. Koko aha ngasɔ mbɛdiɔ oko wakidiɔ etena kakandatɛkɛtaka dikambo di’ase Niniva. c Koko, mɛnamaka dia kɛnɛ kakate Yeso kayosalema mɛtɛ. “Lushi la Kilombo” lakandatɛkɛtaka lanɛ laki mɛtɛ dui diakɔ diaamɛ diakandatɛkɛtaka lo dikambo di’ase Niniva. Oko ase Niniva, ase Sɔdɔma ndo Ngɔmɔra wakasalaka awui wa kɔlɔ. Koko ase Niniva wakakondja diaaso dia ndjatshumoya. Ndo nto, tohɔ kɛnɛ kakate Yeso lo dikambo dia “eolwelo ka kilombo.” Dui sɔ mendanaka la “wanɛ wakasalaka akambo wa kɔlɔ.” (Jni. 5:29) Ɔnkɔnɛ, dui sɔ mɛnyaka ondo dia yema y’elongamelo kekɔ lo dikambo di’ase Sɔdɔma la Ngɔmɔra. Ondo anto amɔtshi l’atei awɔ wayolɔ ndo tayokondja diɛsɛ dia mbaetsha akambo wendana la Jehowa ndo la Yeso Kristo.

16. Kakɔna keyaso lo woho wayɔsa Jehowa yɛdikɔ y’anto wayondolola? (Jɛrɛmiya 17:10)

¹⁶ Adia Jɛrɛmiya 17:10. Lo divɛsa nɛ, sho mbadiaka kɛnɛ keyaso lo kɛnɛ kendana la woho walombosha Jehowa: Jehowa okongaka tena tshɛ ɔnɛ ‘lashishima otema, ndo latɔsɛdingolaka tokanyi t’oma k’ɛse otema.’ Etena kayosalema eolwelo ka lo nshi yayaye, oko wokondosalaka, nde ‘ayofuta onto l’onto oko wele mboka yande.’ Jehowa ayotshikala nge etena kele dui sɔ ohomba koko ayɛnya kɛtshi etena kakoka dui sɔ salema. Ɔnkɔnɛ, hatohombe mbuta l’eshikikelo tshɛ ɔnɛ onto kapanda hatolɔ onyake naka sho keyi dui sɔ!

“SHUSHI YA NKƐTƐ K’OTONDO” AYOSALA “AKAMBO LA LOSEMBWE”

17. Elongamelo kakɔna ka lo nshi yayaye kele l’anto wakavu?

¹⁷ Oma ko etena kakayele Adama l’Eva Satana ndo kakawatɔmbɔkwɛ Jehowa Nzambi, miliyara y’anto yekɔ lo mvɔ. ‘Nyɔi ekɔ otunyi’ wa kɔlɔ efula! (1 Kɔr. 15:26) Kakɔna kayokomɛ anto asɔ tshɛ? Lofulo la tshitshɛ l’anto 144000 wele vɔ tshɛ wekɔ ambeki wa  Kristo wa kɔlamelo wayolɔ dia tɔsɛna lɔsɛnɔ lahavɔki l’olongo. (Ɛny. 14:1) Olui a woke w’apami la wamato wele la kɔlamelo woka Jehowa ngandji wayolɔ lo “eolwelo . . . k’anto w’ɛlɔlɔ” ndo vɔ wayɔsɛna pondjo pondjo la nkɛtɛ naka vɔ ntetemala ntshikala anto w’ɛlɔlɔ l’Ɛlɔmbwɛlɔ ka Kristo k’Ɛnɔnyi kinunu ndo l’etena k’ohemba w’ekomelo. (Dan. 12:13; Hɛb. 12:1) Ndo lo Ɛlɔmbwɛlɔ k’ɛnɔnyi kinunu, “anto w’ɛlɔlɔ,” mbidja ndo wanɛ waki kokambɛ Jehowa kana wanɛ “wakasalaka akambo wa kɔlɔ,” wayokondja diaaso dia nsala etshikitanu ndo nkoma anto wa kɔlamelo. (Luka 23:​42, 43) Koko, anto amɔsthi waki anto wa kɔlɔ, wakɔshi yɛdikɔ ya tɔmbɔkwɛ Jehowa ndo sangwelo diande, diakɔ diakandɔshi yɛdikɔ yaha mbolola anto asɔ.—Luka 12:​4, 5.

18-19. a) Lande na kakokaso ndjaɛkɛ lo woho wayolombosha Jehowa anto wakavu? (Isaya 55:​8, 9) b) Kakɔna kayotɔsɛdingola lo sawo diayela?

¹⁸ Onde sho koka mɛtɛ monga l’eshikikelo tshɛ di’ɔnɛ etena tshɛ kalombosha Jehowa anto, nde mbɔsaka nshi tshɛ yɛdikɔ ya dimɛna? Eelo! Oko wakashihodia Abrahama dimɛna, Jehowa ekɔ kokele, kanga lomba tshɛ, “Shushi ya nkɛtɛ k’otondo” yele la kɛtshi k’efula. Nde akalowanya Ɔnande ndo akawosha ɔkɛndɛ wa nombosha anto tshɛ. (Jni. 5:22) Jehowa nde la Yeso wekɔ l’akoka wa mbeya kɛnɛ kele l’otema w’onto tshɛ. (Mat. 9:4) Ɔnkɔnɛ, etena kalomboshawɔ onto l’onto, vɔ salaka nshi tshɛ “kɛnɛ kele ɔlɔlɔ”!

¹⁹ Nyɛsɔ totetemale ndjaɛkɛ le Jehowa ndo lo tɛdikɔ tande tshɛ. Sho mbeyaka dia sho bu l’akoka wa nombosha, koko nde ekɔ l’akoka wa nombosha! (Adia Isaya 55:​8, 9.) Ɔnkɔnɛ, sho tshikaka kilomblo tshɛ l’anya Ande ndo w’Ɔnande, Nkumekanga kakɛnɛmɔla lo yoho ya kokele losembwe ndo kɛtshi ka She. (Isa. 11:​3, 4) Ko akokaso mbuta lo dikambo dia dombwelo dia Nzambi lo kɛnɛ kendana la mfɔnu ka woke? Awui akɔna wahateye? Ndo awui akɔna weyaso? Sawo diaso diayela diayokadimola lo ambola asɔ.