SAWO DIA WEKELO 21
OSAMBO 107 Ɛnyɛlɔ ka ngandji kakatosha Nzambi
Woho wakokayɛ ntana olonganyi
“Akɔna akoka ntana wadi l’oshika? Nɛmɔ diande ndeka kɔrai la fwa.”—TOK. 31:10.
KƐNƐ KAYOTEKA
Sawo nɛ diayotɛnya atɔndɔ wa lo Bible wakoka nkimanyiya onto dia ntana olonganyi w’oshika ndo woho wakoka anto akina wa l’etshumanelo nsukɛ enyemba wakombola dia ntshukana.
1-2. a) Awui akɔna wahomba Akristo w’enyemba mbidja yimba la ntondo ka ntatɛ diembwanelo? b) Kakɔna kalembetshiya “diembwanelo”? (Enda “Elembetshielo wa tɔtɛkɛta.”)
ONDE wɛ kombolaka ntshukana? Kaanga mbele aha paka diwala mbasha ɔngɛnɔngɛnɔ, enyemba efula w’Akristo, ɛlɔngɔlɔngɔ kana epalanga, nyangaka dia nkondja olonganyi. Koko, la ntondo ka membwana, wɛ pombaka monga la dikuta, monga suke lo nyuma ndo lo yimba dia tshuki. a (1 Kɔr. 7:36) Kɛsɔ ayokokimanyia dia ntondoya lo diwala.
2 Koko, hatongaka nshi tshɛ wɔdu dia ntana olonganyi w’oshika. (Tok. 31:10) Ndo kaanga etena katanayɛ onto ɔmɔtshi lakombolayɛ mbeya dimɛna ondo hatonga dui dia wɔdu dia ntatɛ membwana lande. b Lo sawo nɛ, tayɔkɛtshanya kɛnɛ kakoka nkimanyiya Akristo w’enyemba dia ntana olonganyi w’oshika ndo ntatɛ diembwanelo. Tayeka nto woho wakoka anto akina wa l’etshumanelo nsukɛ wanɛ wakombola ntshukana.
WOHO WA NTANA OLONGANYI W’OSHIKA
3. Awui akɔna wahomba Okristo w’onyemba mbidja yimba etena kayangande olonganyi?
3 Naka wɛ kombolaka ntshukana, kete wɛ pombaka mbeya waonga wakombolayɛ di’olonganyi ayɛ monga la wɔ la ntondo ka nyu ntatɛ membwana. c Naka aha ngasɔ, kete wɛ koka ndjohandja olonganyi w’oshika kana membwana l’onto lahatonga olonganyi w’oshika. Onto lalangayɛ membwana la nde pombaka monga Okristo wambobatizama. (1 Kɔr. 7:39) Koko aha onto tshɛ lambobatizama mbele olonganyi wa dimɛna le yɛ. Diakɔ diele wɛ koka ndjambola ɔnɛ: ‘Eyango akɔna wele lami lo lɔsɛnɔ? Waonga akɔna w’ohomba wakombolami di’olonganyi ami monga la wɔ? Onde lekɔ la wɛdimo lo kɛnɛ kalongamɛmi?’
4. Awui akɔna wakalɔmbɛ anto amɔtshi dia ntana olonganyi w’oshika?
4 Aha la taamu, wɛ akalɔmbɛ dia ntana olonganyi w’oshika. (Flpɛ. 4:6) Lo mɛtɛ, Jehowa halake dia sɔnɛ onto olonganyi. Koko nde ndjakiyanyaka lo dikambo di’ehomba ndo nsaki yayɛ ndo nde koka kokimanyiya dia ntana olonganyi w’oshika. Laasɔ, ntetemala mbotɛka nsaki ndo kɛnɛ kakombolayɛ. (Os. 62:8) Lɔmba dia monga la solo dia lotutsha ndo la lomba. (Jak. 1:5) John, d ɔnangɛso ɔmɔtshi l’onyemba ladjasɛ lo États-Unis mbutaka kɛnɛ kakandadjaka l’alɔmbɛlɔ ande ate: “Lakatɛka Jehowa waonga wakombolami di’olonganyi ami monga la wɔ. Lakalɔmbaka dia ntana waaso wa mpomana l’olonganyi w’oshika. Lakalɔmbɛ Jehowa nto dia kimanyiyami dia nkɛnɛmɔla waonga wayombetɛ omi l’oshika.” Tanya, kadiyɛso kɛmɔtshi kadjasɛ la Sri Lanka, mbutaka ate: “Etena kakamayangaka olonganyi w’oshika, lakalɔmbaka Jehowa dia kimanyiyami dia ntetemala monga la kɔlamelo, mɛna akambo la sso di’ɔlɔlɔ ndo monga l’ɔngɛnɔngɛnɔ.” Kaanga naka wɛ atatane olonganyi w’oshika, Jehowa ndakaka dia nde ayotetemala kokotshɛ ehomba ayɛ wa l’emunyi ndo wa longandji.—Os. 55:22.
5. Waaso akɔna wakoka Akristo w’enyemba mpomana l’onto loka Jehowa ngandji? (1 Kɔrɛtɔ 15:58) (Enda ndo osato.)
5 Bible tokeketshaka dia monga la “akambo efula wa nsala l’olimu wa Nkumadiɔndjɔ.” (Adia 1 Kɔrɛtɔ 15:58.) Naka wɛ ntetemala ndjasha efula l’olimu wa Jehowa ndo mbetshaka wenya kaamɛ l’anangɛso l’akadiyɛso wotshikitanyi, kete wɛ hatɔngɛnangɛna tsho dia monga kaamɛ lawɔ koko wɛ ayonga nto la waaso wa mpomana l’enyemba ekina wele oko wɛ wayasha tshɛ l’olimu wa Jehowa. Ndo etena kasalayɛ tshɛ dia ngɛnyangɛnya Jehowa, wɛ ayonga l’ɔlɔ wa mɛtɛ.
Naka wɛ ntetemala ndjasha efula l’olimu wa Jehowa ndo mbetshaka wenya l’asekayɛ Akristo wotshikitanyi, kete wɛ koka tɛnana l’anto akina walanga ndo vɔ lawɔ ntshukana (Enda odingɔ 5)
6. Kakɔna kahomba Akristo w’enyemba mbohɔka etena kayangawɔ elonganyi?
6 Koko, onga la yewo, diaha oyangelo w’olonganyi ndjokoma dui dioleki ohomba lo lɔsɛnɔ layɛ. (Flpɛ. 1:10) Ɔngɛnɔngɛnɔ wa mɛtɛ halemanɛ la ntshukana kana ntshikala onyemba, koko nemanɛka la diɔtɔnganelo diasayɛ la Jehowa. (Mat. 5:3) Ndo etena kekeyɛ onyemba, wɛ mbeyaka monga la lotshungɔ l’efula la mpamia olimu ayɛ w’esambishelo. (1 Kɔr. 7:32, 33) Kamba dimɛna l’etena kekeyɛ onyemba. Jessica, kadiyɛso kɛmɔtshi kadjasɛ l’États-Unis kamboyotshukana aya l’ɛnɔnyi suke la 40 mbutaka ate: “Lakaleke ndjasha l’olimu w’esambishelo ndo dui sɔ diakakimanyiya dia monga l’ɔngɛnɔngɛnɔ kaanga mbakimi la nsaki ka tshukama.”
ƆSA ETENA KA MBEYA ONTO DIMƐNA
7. Lande na kele ekɔ dui dia lomba dia nsɛdingola onto la ntondo ka ndjowotɛ dia wɛ ndjashaka le nde? (Tokedi 13:16)
7 Kakɔna kafɔnyayɛ naka wɛ ambɛna di’onto ɔmɔtshi ayonga olonganyi w’oshika? Onde wɛ pombaka mbotɛ mbala kakɔ ɔtɔi awui wa diwala? Bible mbutaka dia kanga lomba kondjaka ewo la ntondo ka nsala dui dimɔtshi. (Adia Tokedi 13:16.) Ɔnkɔnɛ, ayonga dui dia lomba dia nsɛdingola onto ɔsɔ lo woshɛshɛ l’etena kɛmɔtshi la ntondo ka wɛ ndjosawola la nde dia diwala. Aschwin, ladjasɛ lo Pays-Bas mbutaka ate: “Nsaki koka mpama esadi esadi ndo yɔ koka nshila esadi esadi. Ɔnkɔnɛ, etena kɔsayɛ etena ka tokɔsɛdingola onto ɔmɔtshi, wɛ hatotatɛ membwana la nde l’esasesase.” Ndo nto, etena kasɛdingolayɛ onto, wɛ mbeyaka mbishola di’onto ɔsɔ bu olonganyi w’oshika le yɛ.
8. Ngande wakoka onyemba nsɛdingola onto dia membwana? (Enda ndo osato.)
8 Ngande wakokayɛ nsɛdingola onto lo woshɛshɛ? Lo nsanganya ya l’etshumanelo kana etena ketshanyu wenya kaamɛ, wɛ mbeyaka mbishola awui wendana la lonyuma, waonga ndo lɔkɛwɔ l’onto akɔ. Anto akɔna wele angɛnyi ande ndo ngande wele asawo ande? (Luka 6:45) Onde eyango ande mbɔtɔnɛka la wayɛ? Wɛ mbeyaka nsawola la dikumanyi dia l’etshumanelo kande kana Akristo akina wambotshunda lo nyuma waweya dimɛna. (Tok. 20:18) Wɛ koka mimbola lokumu lele l’onto akɔ ndo waonga ande. (Ruta 2:11) Etena kasɛdingolayɛ onto akɔ, yashikikɛ diaha mbokonya diaha nde ndjaoka dimɛna. Lɛmiya nsaki yande, awui ande wa toseke ndo etena kahandalange monga l’anto akina.
La ntondo ka wɛ ndjotɛ onto dia wɛ kombolaka membwana la nde, ɔsa etena ka mbɔsɛdingola lo woshɛshɛ (Enda odingɔ 7-8)
9. Kakɔna kahombayɛ ndjashikikɛ la ntondo ka ntatɛ diembwanelo?
9 Edja ka ngande kahombayɛ nsɛdingola onto la ntondo ka wɛ ndjowotɛ dia nyu membwana? Naka wɛ ambowotɛ l’esasesase, kete nde mbeyaka ndjɔfɔnya dia wɛ hakane yimba dimɛna la ntondo ka mbɔsa tɛdikɔ. (Tok. 29:20) Lo wedi okina, naka wɛ ntaloya etena k’otale amboleka, kete nde koka ndjɔsa dia wɛ hɔshi yɛdikɔ la wonya, djekoleko naka nde mɛnaka dia wɛ ndjashaka le nde. (Ond. 11:4) Ohɔ dia, la ntondo ka wɛ mbutɛ onto dia diwala, bu ohomba ndjashikikɛ dia nyayotshukana ndooko onyake. Koko wɛ pombaka ndjashikikɛ dia wɛ aya suke dia diwala ndo onto akɔ ekɔ olonganyi wa dimɛna.
10. Kakɔna kahombayɛ nsala naka wɛ mɛnaka di’onto ɔmɔtshi kombolaka membwana la yɛ koko wɛ halange?
10 Kakɔna kayoyosala naka wɛ ambeya dia onto ɔmɔtshi ekɔ lo ndjasha le yɛ? Naka wɛ halange membwana la nde, kete etsha ayɛ wɛnya hwe dui sɔ. Ayonga dui dia kɔlɔ monɛ kanyi ya ntshukana l’onto etena kele wɛ bu suke dia ntshukana la nde.—1 Kɔr. 10:24; Ɛf. 4:25.
11. Lo wedja walɔngɔsɔla anto akina diembwanelo ndo diwala, awui akɔna wahomba mbidjama yimba?
11 Lo wedja ɛmɔtshi, ambutshi kana epalanga mbasɔnɛ ewotɔ awɔ weke enyemba elonganyi. Lo wedja ekina, ase nkumbo kana angɛnyi mbayangɛ onto leke onyemba olonganyi ndo oma laasɔ vɔ kongɛka dia pami la womoto mpomana dia menda kana wayokoka ntatɛ membwana. Naka wambokɔlɔmba dia nkongɛ di’enyemba membwana kana ntshukana, kete kodje yimba lo kɛnɛ kakombola pami ndo womoto ndo kɛnɛ kewɔ l’ohomba. Naka wɛ ambotanɛ onyemba onto la membwana la nde, kete sala la wolo dia mbeya lonto lande dimɛna, waonga ande ndo laadiko dia tshɛ, lonyuma lande. Diɔtɔnganelo dia ma ma la Jehowa ndeka falanga, kalasa kana dihole diele l’onto lo tshunda la fwa. Ohɔka di’ɔnangɛso l’onyemba la kadiyɛso k’onyemba kahomba mbɔsa yɛdikɔ y’ekomelo dia kana wayotshukana.—Ngal. 6:5.
WOHO WA NTATƐ DIEMBWANELO
12. Naka wɛ kombolaka dia ntetemala membwana l’onto ɔmɔtshi, ngande wakokayɛ mbutɛ onto akɔ dia wɛ nangaka dia nyu membwana?
12 Naka wɛ ambolanga ntatɛ membwana l’onto ɔmɔtshi, ngande wakokayɛ mbotɛ? e Wɛ koka nkongɛ dia nsawola l’onto ɔsɔ, okoko l’okoko kana lo telefɔnɛ. Tɛnde hwe dia wɛ nangaka membwana la nde ndo ndeka mbeeya dimɛna. (1 Kɔr. 14:9) Naka kokaka, sha onto akɔ etena ka nde nkana yimba la ntondo ka nde ndjokosha okadimwelo. (Tok. 15:28) Ndo naka onto halange membwana la yɛ, kete lɛmiya nsaki yande.
13. Kakɔna kakokayɛ nsala naka onto ɔmɔtshi ambokotɛ dia nde nangaka nyu membwana? (Kɔlɔsayi 4:6)
13 Kakɔna kayoyosala naka onto akɔ ambokotɛ dia membwana la yɛ? Nɔmbaka di’onto ɔsɔ monga la dihonga dia nde kotɛ, laasɔ onga ɔlɔlɔ ndo la dilɛmiɛlɔ. (Adia Kɔlɔsayi 4:6.) Naka wɛ ekɔ l’ohomba w’etena ka tokana yimba, kete tɛnde dui sɔ. Koko nsala la wolo dia mbokadimola l’etena ka mondo. (Tok. 13:12) Naka wɛ halange, tɛnde l’ɔlɔlɔ tshɛ ndo la ɛtɛkɛta wa hwe. Tende woho wakakadimola Hans, ɔnangɛso ladjasɛ l’Autriche, etena kakawotɛ kadiyɛso kɛmɔtshi dia nde nangaka vɔ ntshukana. Nde mbutaka ate: “Lakawotɛ yɛdikɔ yami la loshilambo tshɛ ndo l’ɛtɛkɛta wokɛma hwe. Lakasale dui sɔ aha la ntshimbatshimba diaha mbosha elongamelo ka kashi. L’ɔkɔkɔ akɔ waamɛ, lakonge nto la shɛnɔdi diaha mbuta kana nsala dui diakoka mbokonya dia nde mfɔnya dia layotshikitanya kanyi.” Lo wedi okina, naka wɛ ambetawɔ membwana l’onto akɔ, kete nyɔkɛtshanya dikambo dia nsaki yayɛ ndo woho wayonyembwanaka. Kɛnɛ kalongamɛ onto l’onto koka ntshikitana lo ndjela mbekelo yanyu kana akambo akina.
NGANDE WAKOKA ANTO AKINA NSUKƐ AKRISTO W’ENYEMBA?
14. Ngande wakokaso nsukɛ Akristo w’enyemba oma l’ɛtɛkɛta aso?
14 Ngande wakokaso sho tshɛ nsukɛ Akristo w’enyemba wakombola ntshukana? Yoho mɔtshi ele lo menda ɔlɔlɔ kɛnɛ kataso. (Ɛf. 4:29) Sho koka ndjambola ɔnɛ: ‘Onde dimi mbɔlaka wanɛ walanga ntshukana? Etena kɛnami ɔnangɛso l’onyemba asawola la kadiyɛso k’onyemba, onde dimi fɔnyaka dia vɔ wekɔ la nsaki ka ntatɛ membwana?’ (1 Tim. 5:13) Ndo nto, hatohombe pondjo nkonya Okristo w’onyemba dia nde ndjaoka dia nde bu la nɛmɔ efula l’ɔtɛ wende atatshukana. Hans, lakatatɛkɛtshi dikambo diande l’etatelo mbutaka ate: “Anangɛso amɔtshi mbutaka ɔnɛ: ‘Lande na keyɛ hatshuke? Wɛ aya bu nto dikɛnda.’ Ɛtɛkɛta wa ngasɔ koka nkonya enyemba dia ndjaoka diele oko vɔ bu la nɛmɔ ndo kɛsɔ fudiaka nsaki kawɔ ka ntshukana.” Ayoleka monga dimɛna nyangaka waaso wa mandola Akristo w’enyemba!—1 Tɛs. 5:11.
15. a) Lo ndjela tɔndɔ dia lo Rɔmɔ 15:2, kakɔna kahombaso mbidja yimba ntondo ka nkimanyiya onto ɔmɔtshi dia ntana olonganyi? (Enda ndo osato.) b) Wetshelo akɔna w’ohomba wamboyokondja oma lo vidɛo nyɛ?
15 Ko kayotota naka tambɛna di’ɔnangɛso shisha la kadiyɛso djɛndɛ koka ntshukana? Bible totɛka dia sho nɛmiya nsaki y’anto akina. (Adia Rɔmɔ 15:2.) Enyemba efula hawokombola di’anto akina mbayangɛ elonganyi ndo sho pombaka nɛmiya nsaki yawɔ. (2 Tɛs. 3:11) Akina mbeyaka ngɛnangɛna di’anto akina mbakimanyiya, koko hatohombe mbɔtɔ l’awui awɔ aha la vɔ tɔlɔmba. f (Tok. 3:27) Enyemba ɛmɔtshi hawolange di’anto mbahomanya l’onto la membola. Lydia, kadiyɛso kadjasɛ l’Allemagne mbutaka ate: “Wɛ koka mbelɛ ɔnangɛso ndo kadiyɛso l’olui w’anto. Nkongɛ yema ya diaaso di’ɔnangɛso la kadiyɛso mpomana kaamɛ ndo tshikawɔ vɔamɛ wasawole.”
Otshumanelo w’anangɛso ambosha Akristo w’enyemba diaaso dia mpomana (Enda odingɔ 15)
16. Kakɔna kahomba Akristo w’enyemba mbohɔka?
16 Sho tshɛ, oyadi enyemba kana atshukanyi koka monga la lɔsɛnɔ l’ɔngɛnɔngɛnɔ ndo la dimɛna! (Os. 128:1) Ɔnkɔnɛ naka wɛ kombolaka ntshuka, koko wɛ atatane olonganyi, kete ntetemala ndjasha l’olimu wa Jehowa. Kadiyɛso kadjasɛ la Macao kelɛwɔ Sin Yi mbutaka ate: “Naka wɛ mbɛdika etena kayoyetsha l’olonganyi ayɛ lo Paradiso, kete etena kamboyetsha oko onyemba kekɔ tshitshɛ. Ngɛnangɛna l’etena k’onyemba ndo nkamba la tɔ dimɛna.” Ko ayoyosala naka wɛ ambotana olonganyi w’oshika ndo nyambotatɛ membwana? Lo sawo diayela, tayɔkɛtshanya woho wakokanyu membwana dimɛna.
OSAMBO 137 Akadiyɛso w’Akristo wekɔ wamato wa kɔlamelo
a Dia kokimanyiya dia nshikikɛ kana wɛ aya suke dia ntshukana, enda sawo diele lo jw.org diele l’ɔtɛ a dui ɔnɛ: “Fréquenter (partie 1) : Suis-je prêt ?”
b ELEMBETSHIELO WA TƆTƐKƐTA: Lo sawo nɛ ndo lo sawo diayela, diembwanelo mendanaka l’etena k’etsha pami la womoto dia mbekana nkɛwɔ dimɛna ndo nshikikɛ dia kana vɔ wayokoka ntshukana. Lo wedja ɛmɔtshi, etena kɛsɔ ekɔ etena ka mbeya onto ɔmɔtshi. Diembwanelo tatɛka etena katanɛ pami la womoto dia vɔ kombolaka ntshukana ndo diɔ tetemalaka polo lo diwala kana etena kɔsawɔ yɛdikɔ ya nkomiya diembwanelo.
c Lo yoho ya wɔdu, lo edingɔ wayela, tayɔtɛkɛta di’onto layanga olonganyi oko ɔnangɛso. Atɔndɔ asɔ kambemaka ndo le akadiyɛso.
d Nkombo mɔtshi yakatshikitanyema.
e Lo mbekelo mɔtshi, ɔnangɛso mbatɛ kadiyɛso dia vɔ membwana. Koko, kaanga kadiyɛso koka nsala dui sɔ. (Ruta 3:1-13) Dia mbeya awui akina, enda sawo diele lo Emɔ! ka Ngɔndɔ ka dikumi 22, 2004 diele l’ɔtɛ a dui ɔnɛ: “Les jeunes s’interrogent . . . Comment lui dire ce que je ressens pour lui?”
f Enda lo jw.org vidɛo yele l’ɔtɛ a dui ɔnɛ: Wanɛ walɔ ta dia dimɛna dikambo dia mbetawɔ—Akristo w’enyemba.