SAWO DIA WEKELO 33
OSAMBO 130 Todimanyiyanake
Woho walanga Jehowa di’etshumanelo salɛ wanɛ wasala pɛkato ya weke akambo
“Naka onto ɔmɔtshi ambosala pɛkato, tekɔ la okimanyedi.” —1 JNI. 2:1.
KƐNƐ KAYOTEKA
Wetshelo wakondjaso lo woho wakakandɔma dikambo dia pɛkato ka woke lo ntambe ka ntondo l’etshumanelo ka la Kɔrɛtɔ.
1. Kakɔna kalanga Jehowa lo dikambo di’anto tshɛ?
JEHOWA akatonge anto la lotshungɔ la nsɔna. Onto kambaka la woshasha ɔsɔ mbala la mbala etena kɔsande tɛdikɔ. Yɛdikɔ yoleki tshɛ ohomba yakoka onto mbɔsa ele ya ndjakimɔ le Jehowa ndo monga lo nkumbo k’atɛmɔdi Ande. Jehowa nangaka di’onto tshɛ nsala dui sɔ. Lande na? Nɛ dia nde mbokaka anto ngandji ndo mbakombolɛka kɛnɛ koleki dimɛna. Nde nangaka dia vɔ monga angɛnyi ande ndo nsɛna pondjo pondjo.—Eoh. 30:19, 20; Ngal. 6: 7, 8.
2. Kakɔna kakombola Jehowa le atshi wa pɛkato wahatayatshumoya? (1 Jni. 2:1)
2 Koko, Jehowa hatshutshuya anto la wolo dia mbokambɛ. Nde tshikaka onto tshɛ dia ndamɛ mbɔsa yɛdikɔ. Ko kakɔna kayotomba naka Okristo wakabatizama ambosekola ɔlɛmbɛ wa Nzambi ndo ambosala pɛkato ka woke? Naka nde hayatshumoya, kete nde pombaka minyɛma oma l’etshumanelo. (1 Kɔr. 5:13) Koko kaanga l’etena kɛsɔ, Jehowa nomɔlomɔka di’otshi wa pɛkato ndjatshumoya ndo nyomonga la diɔtɔnganelo la Nde. L’ɔkɔkɔ w’ohomba ɔsɔ mbakandakimɔ oshinga w’etshungwelo di’atshi wa pɛkato wayatshumoya dimanyiyama. (Adia 1 Joani 2:1.) Jehowa ekɔ Nzambi ka ngandji ndo kakeketsha atshi wa pɛkato dia ndjatshumoya.—Zɛk. 1:3; Rɔmɔ 2:4; Jak. 4:8.
3. Kakɔna kayotɛna lo sawo nɛ?
3 Jehowa totɛka woho wayaokande lo dikambo dia pɛkato ndo di’atshi wa pɛkato ndo nde nangaka dia sho lawɔ ndjaoka woho akɔ waamɛ. Lo sawo nɛ tayɛna woho wakokaso nsala dui sɔ. Etena kadiayɛ sawo nɛ, enda 1) woho wakakandɔma dui dia pɛkato ka woke lo ntambe ka ntondo l’etshumanelo ka la Kɔrɛtɔ, 2) ɛlɔmbwɛlɔ kakasha ɔpɔstɔlɔ Pɔɔlɔ etena kakayatshumoya otshi wa pɛkato ndo 3) kɛnɛ kɛnya ɔkɔndɔ wa lo Bible ɔsɔ lo woho wayaoka Jehowa etena kasala Okristo pɛkato ka woke.
WOHO WAKAKANDƆMA DUI DIA PƐKATO KA WOKE LO NTAMBE KA NTONDO
4. Kakɔna kakasalema lo ntambe ka ntondo l’etshumanelo ka la Kɔrɛtɔ? (1 Kɔrɛtɔ 5: 1, 2)
4 Adia 1 Kɔrɛtɔ 5:1, 2. Lo lɔkɛndɔ lande la sato la misiɔnɛrɛ, Pɔɔlɔ akoke losango la kɔlɔ efula la dui diakasalema l’etshumanelo k’oyoyo ka la Kɔrɛtɔ. Ɔnangɛsɔ ɔmɔtshi la l’etshumanelo kɛsɔ akasalaka awui wa dieyanelo la wadi a she. Ɔsɔ aki dui dia kɔlɔ efula diele “kaanga ase wedja hawosale”! Koko etshumanelo kakɔsaka di’ɔnangɛso ɔsɔ akakoke ntetemala ntshikala l’etshumanelo. Ondo ase etshumanelo amɔtshi wakɔsaka dia dui sɔ kɛnɛmɔlaka kɛtshi otsha le ɔnangɛso ɔsɔ woho woka Jehowa anto wele bu kokele kɛtshi. Koko Jehowa hetawɔ di’ekambi ande nsala pɛkato. Oma lo lɔkɛwɔ la fumbɔ nsɔnyi lɔsɔ, onto ɔsɔ akalanya lokumu la dimɛna l’etshumanelo. Otondongaka nde akatetemala ntshikala l’etshumanelo, tshike Akristo akina wotokoka ndjowokoya. Laasɔ, kakɔna kakatɛ Pɔɔlɔ ase etshumanelo dia nsala?
5. Kakɔna kakatɛ Pɔɔlɔ ase etshumanelo dia nsala ndo akandalange mbuta? (1 Kɔrɛtɔ 5:13) (Enda ndo osato.)
5 Adia 1 Kɔrɛtɔ 5:13. L’ɛlɔmbwɛlɔ ka nyuma ka Nzambi, Pɔɔlɔ akafundɛ etshumanelo mukanda dia vɔ minya otshi wa pɛkato wahayatshumoya ɔsɔ oma l’etshumanelo. Ngande wakahombe ase etshumanelo mbɔsa onto ɔsɔ? Pɔɔlɔ akawatɛ dia vɔ “ntshika mbekesanɛ” la nde. Akandalange mbuta? Pɔɔlɔ akalembetshiya dia didjango sɔ diakalembetshiyaka nto diaha “ndɛ kaanga ndɛ la onto ɔsɔ.” (1 Kɔr. 5:11) Mbidjasɛ dia ndɛ yangɔ l’onto koka ndjokonya esadi eto lo monga la lɔngɛnyi la nde. Mbokɛmaka hwe dia Pɔɔlɔ akalange mbuta dia ase etshumanelo hawohombe monga la diɔtɔnganelo l’onto ɔsɔ. Kɛsɔ ayokokɛ ase etshumanelo diaha ndjela lɔkɛwɔ lande la kɔlɔ. (1 Kɔr. 5:5-7) Ndo nto, mbewɔ dia monga la losambi l’onto ɔsɔ koka mbokimanyiya dia nde ndeka nshihodia woke woke wa pɛkato kande, koka mbosha nsɔnyi ndo mbotshutshuya dia nde ndjatshumoya.
L’ɛlɔmbwɛlɔ ka nyuma ka Nzambi, Pɔɔlɔ akafundɛ etshumanelo dia minya otshi wa pɛkato wahayatshumoya oma l’etshumanelo (Enda odingɔ 5)
6. Shɛngiya yakɔna yaki la mukanda wa Pɔɔlɔ le ase etshumanelo ndo le otshi wa pɛkato?
6 L’ɔkɔngɔ wa tomɛ Akristo wa la Kɔrɛtɔ mukanda, Pɔɔlɔ akatatɛ ndjambola ngande wayosala etshumanelo lam’ayowadia mukanda akɔ. Oshimu kele edja, Tito akaye la losango lakɔɔngɛnyangɛnya. Ase etshumanelo wakasale kɛnɛ kakaafundɛ Pɔɔlɔ. (2 Kɔr. 7:6, 7) Vɔ wakakambe l’alako wakandawasha. Ndo nto, lo ngɔndɔ yakayele l’ɔkɔngɔ wa Pɔɔlɔ ntoma mukanda, otshi wa pɛkato ɔsɔ akayatshumoya! Nde akatshikitanya dionga ndo lɔkɛwɔ lande ndo akatatɛ nkitanyiya ɛlɛmbɛ wosembwe wa Jehowa. (2 Kɔr. 7:8-11) Kakɔna kakayɔlɔmba Pɔɔlɔ ase etshumanelo dia nsala oma laasɔ?
WOHO WAKASALƐ ETSHUMANELO OTSHI WA PƐKATO WAKAYATSHUMOYA AKAMBO
7. Wonyelo wa pami kakasale pɛkato l’etshumanelo aki l’etombelo akɔna? (2 Kɔrɛtɔ 2:5-8)
7 Adia 2 Kɔrɛtɔ 2:5-8. Pɔɔlɔ akate ate: “Lohango lakandalongola oma le efula ka l’atei anyu lambokoka le onto la ngasɔ.” L’ɛtɛkɛta ekina, lohango lakandalongola lakakotsha oyango alɔ le nde. Oyango akɔna? Dia mbokonya lo ndjatshumoya.—Hɛb. 12:11.
8. Kakɔna kakayotɛka Pɔɔlɔ etshumanelo dia nsala?
8 Pɔɔlɔ akayotɛka etshumanelo ɔnɛ: ‘Nyu pombaka monga suke dia dimanyiya ndo nsamba’ ɔnangɛso lakatakɔ mboka ndo “mboshikikɛ ngandji kawokanyu.” Tolembete dia Pɔɔlɔ kokombola tsho dia pami kɛsɔ kaloyama l’etshumanelo. Pɔɔlɔ akalange di’ase etshumanelo nshikikɛ onto lakayatshumoya ɔsɔ oma l’ɛtɛkɛta, dionga ndo etsha dia vɔ mɛtɛ wamboodimanyiya ndo vɔ mbookaka ngandji. Lo nsala ngasɔ, vɔ wayooshikikɛ dia wambɔngɛnangɛna okalwelo ande l’etshumanelo.
9. Lande na kele ondo aki wolo le anto amɔtshi dia dimanyiya otshi wa pɛkato wakayatshumoya?
9 Onde anto amɔtshi kɔngɛnangɛna lam’akawoke mbala ka ntondo di’otshi wa pɛkato wakayatshumoya ambokaloyama l’etshumanelo? Ɔkɔndɔ hatotɛ dui sɔ, koko ondo aki ngasɔ. Kɛnɛ kakandasale kakafukutanya etshumanelo k’otondo ndo ondo anto amɔtshi waki la nsɔnyi lo dikambo sɔ. Amɔtshi wakakoke mbɔsa dia bu dimɛna dia pami kɛsɔ nongɔma dimɛna nto l’etshumanelo etena kele vɔ wekɔ lo nsala la wolo tshɛ dia monga la lɔkɛwɔ la pudipudi. (Ɛdika la Luka 15:28-30.) Ko lande na kele aki ohomba di’ase etshumanelo mɛnya ɔnangɛso lakakaloyama ɔsɔ ngandji ka l’otema ɔtɔi?
10-11. Kakɔna kotokoka ntomba otondonga dikumanyi diakatone dimanyiya otshi wa pɛkato wakayatshumoya?
10 Ohokakanyiya kɛnɛ kotokoka ntomba otondongaka dikumanyi wakatone dia nkaloya pami kakayatshumoya l’otema ɔtɔi kɛsɔ l’etshumanelo kana naka nde nkalola koko ase etshumanelo ntona mbolongola la ngandji tshɛ. Nde otɔmɛnama la “lonyangu l’efula.” Nde otoyaoka esadi eto dia nde hongaki nto pondjo l’etshumanelo. Nde otokoka nkoma polo ndo lo ndjotshika mbidja welo dia nɔngɔsɔla diɔtɔnganelo diasande la Nzambi.
11 Ndo kɛnɛ koleki tshɛ kɔlɔ ele, otondonga ase etshumanelo wakatotone dia dimanyiya otshi wa pɛkato wakayatshumoya, tshike vɔ wotodja diɔtɔnganelo diele lam’asawɔ la Jehowa lo waale. Lande na? Nɛ dia laasɔ kete vɔ wotɔkɛnɛmɔla aha dionga diele la Jehowa dia dimanyiya atshi wa pɛkato, koko dionga dia kɔlɔ ndo diaha la kɛtshi diele la Satana. Vɔ wotonga ehomɔ kotokamba la Diabolo dia nshimba pami kɛsɔ dia kambɛ Jehowa nto.—2 Kɔr. 2:10, 11; Ɛf. 4:27.
12. Ngande wakakoke etshumanelo mbokoya Jehowa?
12 Ko ngande wakakoke ase etshumanelo ka la Kɔrɛtɔ mbokoya Jehowa, koko aha Satana? Lo dimanyiya atshi wa pɛkato wayatshumoya oko wasala Jehowa. Tende kɛnɛ kakate afundji amɔtshi wa Bible lo dikambo dia Jehowa. Davidɛ akate ate nde “ekɔ ɔlɔlɔ ndo suke dia dimanyiya.” (Os. 86:5) Mika akafunde ɔnɛ: “Ele Nzambi oko wɛ, kadimanyiya munga ndo kohɛ kɔlɔ?” (Mika 7:18) Ndo Isaya akate ate: “Kanga kɔlɔ atshike mboka kande ndo onto a kɔlɔ atshike tokanyi tande; akalole le Jehowa, ko nde ayowoka kɛtshi, ɛɛ, le Nzambi kaso, nɛ dia nde ayowodimanyiya tshɛ lo tshɛ.”—Isa. 55:7.
13. Lande na kele aki dimɛna nkaloya otshi wa pɛkato wakayatshumoya l’etshumanelo? (Enda kiombo yele l’ɔtɛ a dui ɔnɛ: “ Etena kakɔna kakakaloyama pami ka la Kɔrɛtɔ l’etshumanelo?”)
13 Dia mbokoya Jehowa, ase etshumanelo ka la Kɔrɛtɔ wakahombe dimanyiya pami kakayatshumoya kɛsɔ ndo mbɛnya ngandji kawokawɔ. Pɔɔlɔ akate dia naka ase etshumanelo dimanyiya pami kakayatshumoya kɛsɔ, kete vɔ wayɛnya ‘okitanyiya awɔ l’akambo tshɛ.’ (2 Kɔr. 2:9) Ekɔ mɛtɛ dia ngɔndɔ ngana tsho mbakete ntatɛ lam’akandanyɛma, koko ohokwelo wakookonya dia nde ndjatshumoya. Laasɔ takinde nto ohomba dia dikumanyi nyomokonga dia mbokaloya l’etshumanelo.
WOHO WAKOKASO MBOKOYA LOSEMBWE NDO KƐTSHI KA JEHOWA
14-15. Wetshelo akɔna wakondjaso oma lo woho wakakandɔma dui dia pɛkato diakasalema la Kɔrɛtɔ? (2 Petero 3:9) (Enda ndo osato.)
14 Ɔkɔndɔ wa woho wakakandɔma dui dia pɛkato la Kɔrɛtɔ k’edjedja wakafundama ndo wakalamema dia “tosha wetshelo.” (Rɔmɔ 15:4) Ɔkɔndɔ ɔnɛ tɛnyaka dia Jehowa hetawɔ di’atshi wa pɛkato wahayatshumoya ntshikala l’etshumanelo. Nde bu la kanyi y’ɔnɛ atshi wa pɛkato wahayatshumoya pombaka “mbokama kɛtshi” ndo vɔ mbetawɔmaka dia ntetemala monga la diɔtɔnganelo l’atɛmɔdi wele la kɔlamelo. Jehowa mbokanaka kɛtshi, koko nde hadihe washo lo pɛkato; kana kitshakitsha ɛlɛmbɛ ande. (Judɛ 4) Nsala ngasɔ bu kɛtshi nɛ dia kɛsɔ koka mbidja etshumanelo k’otondo lo waale.—Tok. 13:20; 1 Kɔr. 15:33.
15 Koko tambɛna dia Jehowa halange dia kaanga onto ɔtɔi ndanyema. Nde nangaka nsala tshɛ dia nshimbɛ anto. Nde mbokaka anto wakadimola etema ndo walanga nyomɔlɔngɔsɔla diɔtɔnganelo diele lam’asawɔ la nde kɛtshi. (Ɛzk. 33:11; adia 2 Petero 3:9.) Ɔnkɔnɛ, etena kakayatshumoya pami ka la Kɔrɛtɔ ndo kakandatshike lɔkɛwɔ lande la kɔlɔ, Jehowa akakambe la Pɔɔlɔ dia mbewoya etshumanelo dia pami kɛsɔ akahombe dimanyiyama ndo nongɔma dimɛna.
Sho mbokoyaka ngandji ndo kɛtshi ka Jehowa etena kɛnyaso anto wayatshumoya ngandji ndo kaalongolaso (Enda odingɔ 14-15)
16. Ngande wayaokayɛ lo woho wakakandɔma dui dia pɛkato diakasalema la Kɔrɛtɔ?
16 Woho wakakandɔma dui dia pɛkato l’etshumanelo ka la Kɔrɛtɔ tɛnyaka ngandji ka Jehowa, ɔlɔlɔ ande ndo losembwe lande. (Os. 33:5) Onde wɛ hatshutshuyama dia nyomotombola Nzambi l’ɔtɛ wa waonga w’amɛna asɔ? Sho tshɛ tekɔ atshi wa pɛkato ndo tekɔ l’ohomba wa nde todimanyiya. Sho tshɛ tekɔ l’ɔkɔkɔ wa monga la lowando le Jehowa l’ɔtɛ w’oshinga w’etshungwelo wasala dia pɛkato yaso dimanyiyama. Ekɔ mɛtɛ dui di’ekeketshelo ndo dia dimɛna dia mbeya dia Jehowa mɛtɛ nangaka ekambi ande ndo mbakombolɛka kɛnɛ koleki dimɛna!
17. Kakɔna kayotɔkɛtshanya l’asawo wayela?
17 Ko ngande wahomba kandɔma awui wa pɛkato ɛlɔ kɛnɛ? Ngande wakoka dikumanyi nkɛnɛmɔla nsaki kele la Jehowa ka nkonya otshi wa pɛkato lo ndjatshumoya? Kakɔna kahomba ase etshumanelo nsala etena kɔsa dikumanyi yɛdikɔ ya minya kana ya nkaloya onto l’etshumanelo? Ambola asɔ mbayotɔkɛtshanya l’asawo wayela.
OSAMBO 109 Tokane ngandji k’efula oma k’ɛse otema
