LAKOTƆ la Wichita, Kansas, l’États-Unis Ngɔndɔ ka dikumi l’ahende 10, 1936, laki ɔna l’enondo lo ana anɛi wakatotɔ. William nde la Jean, ambutshi ami, waki ekambi wa Jehowa wa kɔlamelo. Papa aki okambi w’olui, welamɛ nshi nyɛ ɔnɔmbɔdi w’olui wa dikumanyi. Mama akeke akambo wa mɛtɛ oma le Emma Wagner, nyango. Emma aketsha anto efula akambo wa mɛtɛ, mbidja ndo Gertrude Steele, ɔnɛ lakayonga misiɔnɛrɛ la Porto Rico. * (Enda nɔtɛ ka l’ɛse ka dikatshi.) Diakɔ diele, laki la bɛnyɛlɔ di’amɛna efula dia mbokoya.

Lushi la samalo lɔmɔtshi la dikɔlɔ etena kakimi l’ɛnɔnyi etanu, dimi la papa takashaka anto waketetaka lo shinga Tshoto y’Etangelo ndo Consolation (elamɛ Réveillez-vous !) L’etena kɛsɔ, wodja wakadiɛnɛka la Ta dia hende di’andja w’otondo. Koko papa akatshikala lomangemange. Dɔkɔtɛlɛ dimɔtshi diaki ombidjɔki akaye ko akayoofunda ɔnɛ nde ekɔ ɔhɔdu ndo akasha tɛkɛ nɛndɛ di’aha ntshɔ lo ta. Dɔkɔtɛlɛ diakɔ, akasukana la papa ko akawotɛ ate: “Wɛ hiɔduhɔdu y’ɛnɔndɔ nyɛ, lande kahayankɔmɔla!” Lakoke wɔma efula, koko lakandola papa. Nde akatetemala mbisha anto wakawaendaka periodikɛ. Oma laasɔ ɔsɔlayi ɔmɔtshi akatetaka, ko dɔkɔtɛlɛ diakɔ akate la dui dia wolo ate: “Nyosale hiɔduhɔdu y’ɛnɔndɔ nyɛ dui dimɔtshi!” Ɔsɔlayi akɔ akashihodia ɔnɛ dɔkɔtɛlɛ akadjwe wanu, ko nde akawotɛ ate: “Tshɔka la ngelo kele wanu watondɔ!” Vɔ akɔ ahende wakatshu. Lekɔ la lowando l’efula le Jehowa l’ɔtɛ wakandasha papa dihonga. Nde aki la mvudu hiende yakawanyaka anto divo la Wichita ndo dɔkɔtɛlɛ diakɔ aki kidiya kande!

Lam’akimi l’ɛnɔnyi enanɛi, ambutshi ami wakasondja mvudu ndo makashinyi awɔ ko wakatoka luudu la tshitshɛ l’etshimbi. Oma laasɔ, takonɔ la Colorado, suke la Grand Junction, dia tosha lonya lɛnɛ aki ohomba efula w’apandjudi. Ambutshi ami waki ambatshi mboka ndo  wakakambaka olimu wenya ɛmɔtshi, wakalongaka waa nyama ndo diangɔ dikina. Diɛsɛ l’ɛtshɔkɔ wa Jehowa ndo ohetoheto awɔ l’olimu, etshumanelo kakakengama. Lo Ngɔndɔ ka samalo 20, 1948, papa akabatiza lo kiɔkɔ y’ashi ya lo dikona, kaamɛ l’anto akina waketawɔ akambo wa mɛtɛ ndo Billie Nichols la wadɛnde. L’ɔkɔngɔ diko, vɔ wakayokamba l’otshimbedi ndo kɛsɔ mbakasale ɔnawɔ nde la wadɛnde.

Takɔtɔ lɔngɛnyi l’oshika l’anto efula wakayashaka l’olimu wa Jehowa, djekoleko ase nkumbo kaki Steele anɛ: Don la Earlene, Dave la Julia, ndo Si la Martha. Takakɛtshanyaka la wɔ akambo wa lo Bible ndo vɔ wakonge la shɛngiya y’efula lo lɔsɛnɔ la mi. Vɔ wakamɛnya ɔnɛ lɔsɛnɔ laso mongaka l’oyango wa mɛtɛ ndo l’ɔngɛnɔngɛnɔ etena ketshaso Diolelo lo dihole dia ntondo.

Lam’akimi l’ɛnɔnyi 19, Bud Hasty, ɔngɛnyi ami wa lo nkumbo kaso akambelɛ dia tokamba oko ombatshi mboka kaamɛ la nde lo sidɛ k’États-Unis. Omendji w’otshimbedi akatɔlɔmbɛ dia monɔ la Ruston, Louisiana, lɛnɛ akayonga Ɛmɛnyi wa Jehowa efula wambɔla. Nde akatotɛ dia nɔmbɔlaka nsanganya tshɛ lomingu tshɛ kaanga naka ndooko onto okina loye. Takatane dihole dia salaka nsanganya ko takadilɔngɔsɔla. Takasalaka nsanganya tshɛ, koko tena dimɔtshi taki paka sho ahende ato. Takengɔnyaka, ɔmɔtshi alɔmbɔla etenyi kɛmɔtshi ka losanganya, okina asha ekadimwelo lo ambola tshɛ. Naka sawo dimɔtshi diekɔ la wɛnyɛlɔ, sho akɔ ahende takayalaka lo lɔyɛnga aha la ndooko ompokami monga! L’ekomelo, kadiyɛso kɛmɔtshi k’opalanga akayotatɛ ndja lo nsanganya. Yema yema, ambeki wa Bible ndo apandjudi amɔtshi wakɔlɛ wakayotatɛ ndja lo nsanganya ndo kombeta edja takayala tshondo y’etshumanelo.

Lushi lɔmɔtshi, dimi la Bud takahomana la pastɛrɛ kɛmɔtshi ka lo Église du Christ, ko nde akatotɛ awui wa lo avɛsa amɔtshi wakimi kombeyaka. Dui sɔ diakatshindja wɔɔngɔ ndo diakakonya dia nkanyiya efula lo dikambo dia dietawɔ diami. L’edja ka lomingu, lakekaka polo l’atei a deke otsho tshɛ dia ntana ekadimwelo lo ambola ande. Dui sɔ diakakimanyiya mɛtɛ dia nkeketsha diɔtɔnganelo diaki lam’asami la Jehowa ndo lakatatɛ nomɔlomɔ dia mɛnana la osambisha okina.

Kombeta edja oma laasɔ, omendji w’otshimbedi akanɔmbɛ dia monɔ la Eldorado, Arkansas, dia tokimanyiya etshumanelo ka lɛkɔ. Etena kakimi lɛkɔ, lakakalolaka mbala efula la Colorado dia tɛnama lo biro kakawɔsaka anto l’olimu w’ɔsɔlayi, mbuta ate kɔmite kakashikikɛka anto wakahombaka monga asɔlayi. Etena kakamatandaka lɔkɛndɔ lɔmɔtshi, ambatshi mboka akina wakatatshɔka kaamɛ la mi, ndo takasale aksida la Texas  ko mutuka ami wakalana vwa. Takelɛ ɔnangɛso ɔmɔtshi, ko nde akayotɔsa otsha lakande ndo oma laasɔ otsha lo losanganya. Lɛkɔ, wakasha diewoyelo diendana la aksida wakatasale, ko la ngandji tshɛ anangɛso wakatosha yema ya falanga. Ɔnangɛso akɔ akasondja mutuka ami lo dɔlara 25.

Kɛsɔ akatokimanyiya dia ntetemala la lɔkɛndɔ otsha la Wichita. E. F. McCartney, ɔngɛnyi ami wa ma ma wa lo nkumbo kaso wakatelɛka Doc, aki ombatshi mboka lɛkɔ. Frank la Francis, anande wa waasa w’apami, wekɔ angɛnyi ami w’eshika. Vɔ waki la mutuka w’omusu wakawansondja lo dɔlara 25, lofulo la falanga lakawambisha l’ɔtɛ wa mutuka ami wakahandjɔ. Ɔsɔ mbaki mbala ka ntondo kakamɛnyi hwe ɔnɛ lam’ele laketshaka Diolelo lo dihole dia ntondo lo lɔsɛnɔ lami, Jehowa akambisha ɛngɔ kakimi l’ohomba. Lo wembwelo ande ɔsɔ, McCartneys akamɛnyanya la Bethel Crane, kadiyɛso kakokanaka ngandji. Ruth, nyango, aki Ɔmɛnyi wa Jehowa w’ohetoheto waki la Wellington, Kansas, nde aki ombatshi mboka polo lam’akandakotsha ɛnɔnyi 90 l’ɛmɔtshi. Dimi la Bethel takatshukana suke l’ɔnɔnyi ɔtɔi l’ɔkɔngɔ, lo 1958 ndo takatatɛ nkamba oko ambatshi mboka kaamɛ la Eldorado.

Takalangaka mbokoya bɛnyɛlɔ di’amɛna di’anto wa lɛnɛ akatole, diakɔ diakatɔshi yɛdikɔ y’ɔnɛ tayetawɔka leeta tshɛ l’oma l’okongamelo wa Jehowa. Wakatotome oko ambatshi mboka wa laande la Walnut Ridge, la Arkansas. Oma laasɔ lo 1962, takangɛnangɛna efula dia nongola leeta la tɔtɔ Kalasa ka Ngiliyadɛ ka 37. Taki l’ɔngɛnɔngɛnɔ efula dia mboka ɔnɛ, Don Steele ayonga la so lo kalasa kakɔ kaamɛ. L’ɔkɔngɔ wa sho nongola apɔlɔmɛ, wakatotome dimi la Bethel la Nairobi, la Kenya. Taki la lonyangu dia mimɔ oma la New York, koko taki l’ɔngɛnɔngɛnɔ efula etena kakatakome lo sɛkɛ di’aviyɔ dia la Nairobi ndo kakatɛnyi anangɛso wakaye dia ndjotolongola!

Kombeta nshi efula dia sho ntatɛ ngɛnangɛna Kenya ndo nsambisha lɛkɔ. Chris nde la Mary Kanaiya mbaki ambeki aso wa Bible wa ntondo wakonge apandjudi. Vɔ wekekɔ l’olimu wa lo tena tshɛ la Kenya. Ɔnɔnyi wakayelana, takalɔmbama dia ntshɔ la Kampala, l’Uganda. Sho mbaki waa misiɔnɛrɛ wa ntondo lo wodja ɔsɔ. Ɔsɔ aki tena di’ɔngɛnɔngɛnɔ efula, nɛ dia anto efula wakalangaka mbeka akambo wa mɛtɛ wa lo Bible ndo vɔ wakayala anangɛso l’akadiyɛso. Koko l’ɔkɔngɔ w’ɛnɔnyi esato l’etenyi wa monga l’Afrikɛ, takakalola l’États-Unis dia tokenga nkumbo. Takoke nkandji efula lushi lakatamɔ oma l’Afrikɛ ndeka lushi lakatamɔ oma la New York. Takokaka anto wa l’Afrikɛ ngandji efula ndo taki l’elongamelo ɔnɛ tayokalola lushi lɔmɔtshi.

Takonɔ l’owɛstɛ wa Colorado, lɛnɛ akadjasɛka ambutshi ami. Yema tshitshɛ l’ɔkɔngɔ, Kimberly ɔnaso la womoto la ntondo akotɔ ndo ngɔndɔ 17 l’ɔkɔngɔ, Stephany akotɔ. Ɔkɛndɛ aso w’oyoyo oko ambutshi waki ohomba efula le so. Takasalaka la wolo dia mbetsha anaso wa wamato w’elangala akambo wa mɛtɛ. Takalangaka mbokoya bɛnyɛlɔ di’amɛna diakatotshikɛ anto akina. Takeyaka ɔnɛ, ɛnyɛlɔ ka dimɛna kokaka monga la shɛngiya y’efula le ana, koko aha dui sɔ nto mbashikikɛ ɔnɛ vɔ wayokambɛ Jehowa etena kayowola. Lonyangu ko, kosɛmi ka pami la ka womoto wakatshike akambo wa mɛtɛ. Tekɔ l’elongamelo ɔnɛ vɔ wayokoya nto bɛnyɛlɔ di’amɛna diakaweyaka.

Takangɛnangɛna mɛtɛ dia mbodia anaso ndo takasalaka la wolo tena tshɛ dia nsala akambo lo nkumbo. Lam’ele takadjasɛka suke la Aspen, la  Colorado, takeke kɛnyɔ ya mbahema lo dibaya ko tetetaka l’ashi kana lo loonge dia sho kɛnyaka tena dimɔtshi kaamɛ. Dui sɔ diakatosha diaaso dia sawolaka l’anaso etena kakatasalaka kɛnyɔ shɔ kaamɛ. Takatshɔka la wɔ nto dia tɛngɔlaka ndo takasawolaka la wɔ dimɛma etena kakatokaka dja. Kaanga mbakiwɔ akɛnda, vɔ wakatokaka ambola, ɛnyɛlɔ ɔnɛ: “Kakɔna kayomosala lam’ayomola?” ndo “Onto la ngande layontshuka?” Takasalaka la wolo dia mbetsha anaso wa wamato dia vɔ nanga Jehowa. Tena tshɛ, takawakeketshaka dia ndjadjɛ oyango wa nkamba olimu wa lo tena tshɛ ndo tshukama paka l’onto lele l’oyango akɔ waamɛ. Takawakimanyiya nto dia nshihodia ɔnɛ bu dimɛna tshukama etena kekewɔ akɛnda efula. Mbala efula takawatɛka ɔnɛ: “Tanyotshukamake paka nyambokotsha ɛnɔnyi 23.”

Takokoyaka ɛnyɛlɔ k’ambutshi aso ndo takasalaka la wolo dia mbɔtɔka lo nsanganya ndo tshɔka l’esambishelo mbala la mbala kaamɛ lo nkumbo. Takɔshi yɛdikɔ di’ekambi ɛmɔtshi wa lo tena tshɛ mbidjasɛka lakaso. Ndo nto, takasawolaka mbala efula dia mɛnya woho wakatalangaka olimu wa misiɔnɛrɛ. Taki l’elongamelo ɔnɛ, lushi lɔmɔtshi sho akɔ anɛi tayotshɔ l’Afrikɛ kaamɛ. Anaso wakalangaka mɛtɛ nsala dui sɔ.

Takasalaka wekelo wa lo nkumbo mbala la mbala. Takayalaka oko anto woka ambola wakokawɔ towaoka la kalasa, ko anaso wakayalaka oko Ɛmɛnyi wa Jehowa mbakadimola ambola. Vɔ wakakondjaka wetshelo lo nsala akambo oko lo tɔkɛnyɔ ndo wakongaka l’eshikikelo. Koko etena kakawayolaka, vɔ wakayoyakiyanya lo tena dimɔtshi lo dikambo dia wekelo wa lo nkumbo. Lushi lɔmɔtshi, lakakɔmɔ efula ko lakawatɛ dia vɔ ntshɔ lo mvudu yawɔ ya ndala ndo ɔnɛ hatotosala wekelo. Vɔ wakanandema ko wakatatɛ ndela wata ɔnɛ sho nangaka mbeka. Oma laasɔ, takashihodia ɔnɛ takawakimanyiya mɛtɛ dia ngɛnangɛna mbeka akambo wendana la Jehowa. Oko wakatetaka nshi, vɔ wakayɔngɛnangɛna wekelo ndo wakayotatɛ totɛ tokanyi ndo nsaki yawɔ dimɛna. Lo tena dimɔtshi taki la lonyangu dia mbaoka wata ɔnɛ, vɔ hawetawɔ wetshelo ɔmɔtshi wa lo Bible. Koko, takeyaka woho wakawayaokaka mɛtɛ. L’ɔkɔngɔ wa sho nkana yimba la wɔ, vɔ wakayetawɔ atɔndɔ wa Jehowa.

Ɛnɔnyi wakatetsha dia mbodia anaso wakete esadi esadi. L’ekimanyielo ndo ɛlɔmbwɛlɔ k’okongamelo wa Nzambi, takasale kɛnɛ tshɛ kakatakoke nsala dia mbaodia dia nanga Jehowa. Takangɛnangɛna efula etena kakatatɛ anaso tshɛ nkamba oko ambatshi mboka l’ɔkɔngɔ wa vɔ nshidiya kalasa ka sekɔndɛrɛ ndo vɔ wakeke elimu dia ndjasɛnyaka. Vɔ wakonɔ la Cleveland, Tennessee kaamɛ l’akadiyɛso akina ahende dia tosha lonya lɛnɛ aki ohomba efula w’apandjudi. Taki l’olengolengo efula dia nkakitɔna la wɔ, koko taki l’ɔngɛnɔngɛnɔ nɛ dia vɔ wakakambe la nsɛnɔ yawɔ l’olimu wa lo tena tshɛ. Oma laasɔ, dimi la Bethel takonge ambatshi mboka nto ndo l’ɔtɛ wa dui sɔ, lakayonga la diaaso dia monga ɔhɛna wa omendji w’otshimbedi ndo nkamba lo losanganya la woke.

Ntondo k’anaso monɔ la Tennessee, vɔ wakatshu la Londres, la Angleterre dia tembola Bɛtɛlɛ. Oma laasɔ, Stephany laki l’ɛnɔnyi 19 akɛnana la ɔlɔngɔlɔngɔ w’ose nkumbo ka Bɛtɛlɛ welɛwɔ Paul Norton. Etena kakawayonda lɔkɛndɔ lɔmɔtshi l’ɔkɔngɔ wa laasɔ, Kimberly akɛnana la Brian Llewellyn, osekande ɔmɔtshi la l’olimu. Etena kakakotsha Stephany ɛnɔnyi 23, nde akatshukama la Paul. L’ɔnɔnyi wakayelana, etena kakakotsha Kimberly ɛnɔnyi 25, nde akatshukama la Brian. Ɔnkɔnɛ, vɔ wakayotshukama paka lam’akawakotsha ɛnɔnyi 23. Taki l’ɔngɛnɔngɛnɔ efula l’ɔtɛ w’elonganyi wakawasɔnɛ.

Anaso wakatotɛ ɔnɛ ɛnyɛlɔ kaso ndo ka watshɛwɔ kakaakimanyiya dia ‘ntetemala nyanga ntondo Diolelo dia Nzambi,’ kaanga etena kakiwɔ l’ekakatanu wendana l’ekondjelo. (Mateo 6:33) Lo Ngɔndɔ ka nɛi 1998, Paul nde la Stephany wakelamɛ lo kalasa ka Ngiliadɛ ka 105, ndo vɔ wakatomama dia tokamba la Malawi, l’Afrikɛ. Etena kakɔ kaamɛ, Brian nde la Kimberly wakalɔmbama dia tokamba lo Bɛtɛlɛ ka la Londres ndo l’ɔkɔngɔ diko, vɔ wakatomama lo Bɛtɛlɛ ka la Malawi. Taki l’ɔngɛnɔngɛnɔ wa mamba nɛ dia anaso wakakambaka la nsɛnɔ yawɔ lo yoho yoleki dimɛna.

Lo Ngɔndɔ ka ntondo 2001, wakambelɛ lo telefɔnɛ oko wakamaditshi oma l’etatelo. Ɔnangɛso  Marais, omendji wa Departɛma di’okadimwelo, akambitɛ ɔnɛ anangɛso wekɔ lo nɔngɔsɔla olowanyelo wayokimanyiya akadimudi wa l’andja w’otondo dia ndeka nshihodia awui wofundami l’Angɛlɛ. Kaanga mbakimi l’ɛnɔnyi 64, wakalange ndowanyami dia monga ombetsha ɔmɔtshi. Dimi la Bethel takasale dɔmbɛlɔ lo dikambo sɔ ndo takasawola l’anyangɛso dia vɔ tosha alako. Kaanga mbakiwɔ esombe ndo mbakawahombe ntshikala aha l’ekimanyielo kaso, vɔ akɔ ahende wakalange dia sho ntshɔ. Lakakadimola lo leeta lakawambete lo telefɔnɛ dia mbatɛ ɔnɛ tekɔ l’ɔngɛnɔngɛnɔ efula dia mbetawɔ ɔkɛndɛ wa diambo ɔsɔ.

Oma laasɔ, wakayoshola mama la kansɛrɛ. Lakawotɛ ɔnɛ tayanga tokotshikala dia nkimanyiya kadiyɛmi Linda dia nde mbokokɛka. Mama akatone ndo akate ate: “Hemɔ kami kayoleka mpeka naka hanyotshwe.” Linda akayaoke woho akɔ waamɛ. Taki la lowando l’ɔtɛ wakawetawɔ ndjahondja ngasɔ ndo taki la lowando nto lo ekimanyielo kakatosha anangɛso l’akadiyɛso wa lɛkɔ. La wedi a pindju wa sho monɛ otsha lo dihole diasalema Kalasa ka Ngiliyadɛ la Patterson, Linda akatotɛ lo telefɔnɛ ɔnɛ mama akavwe. Oko wakandatokeketsha dia nsala, takatetemala nkamba olimu aso w’oyoyo.

Takangɛnangɛna dia mbeya ɔnɛ wambototoma lo Bɛtɛlɛ ka la Malawi, lɛnɛ akakambaka anaso la waomɛwɔ. Aki dui dia diambo efula dia sho monga kaamɛ nto. Oma laasɔ, takatshu dia tosha olowanyelo la Zimbabwe ndo l’ɔkɔngɔ la Zambie. L’ɔkɔngɔ wa mbisha olowanyelo l’edja k’ɛnɔnyi esato l’etenyi, takakalola la Malawi dia tofunda awui wakakomɛ Ɛmɛnyi wa Jehowa wa lɛkɔ wakahɛnyahɛnyamaka l’ɔtɛ wa lomangemange lawɔ l’Akristo. *​—Enda nɔtɛ ka l’ɛse ka dikatshi.

Lo 2005, taki nto la nkandji k’efula dia mimɔ oma l’Afrikɛ. Takakalola lakaso la Basalt, la Colorado, lɛnɛ atetemalami dimi la Bethel nkamba oko ambatshi mboka. Lo 2006, Brian la Kimberly wakonɔ ko wakayodjasɛ lo luusu lɔmɔtshi suke la so dia mbodia anawɔ ahende wa wamato, Mackenzie nde la Elizabeth. Paul la Stephany wekekɔ la Malawi, lɛnɛ ele Paul ose kɔmite ka filialɛ. Ɛlɔ kɛnɛ, laya l’ɛnɔnyi 80 ndo lekɔ l’ɔngɛnɔngɛnɔ efula dia mɛna ɛlɔngɔlɔngɔ wakakambaka kaamɛ lami wakotsha ɛkɛndɛ waki la mi. Dia ana ndo ekana aso nkondja wahɔ, takasale la wolo dia mbokoya bɛnyɛlɔ di’amɛna di’anto akina. Dui sɔ diakatela ɔlɔ ndo ɔngɛnɔngɛnɔ w’efula.