1, 2. a) Ekakatanu akɔna wele l’angɛndangɛnda efula ɛlɔ kɛnɛ? (Enda osato wele lo mbɔtwɛlɔ.) b) Wohwelo akɔna wakasha ɔpɔstɔlɔ Pɔɔlɔ, ndo ambola akɔna wayotɔsɛdingola?

AMBETA ɛnɔnyi ndekana 30, Osei, laki atonge Ɔmɛnyi wa Jehowa akonɔ oma lakawɔ la Ghana dia todjasɛ l’Erɔpɛ. ^[1] (Enda nɔtɛ ka la koma.) Nde mbutaka ate: “Kombeta edja, lakashihodia ɔnɛ anto efula kondjakiyanyaka dikambo diami. Eongelo k’anto asɔ kakanyangiya yema. Lam’akamamɔ oma lo sɛkɛ dia ndɛkɛ, lakoke tshitshi mbala ka ntondo lo lɔsɛnɔ lami, ko lakatatɛ ndela.” Lam’ele aki tshondo y’okakatanu le Osei dia mbeka ɔtɛkɛta, akete ndekana ɔnɔnyi w’otondo dia nde nkondja olimu wa dimɛna. Ndo lam’ele nde akangana etale efula la lakawɔ, nde kɔmɛnanaka la nkumbo kande ndo akayaokaka ompoko.

² Kanyiya yema woho wotoyolanga vɔ kosalɛ akambo otondonga wɛ mbakahomana la dui dia ngasɔ. Aha la taamu, wɛ otɔngɛnangɛna dia nongɔma la waasaso lo Mbalasa ka Diolelo oma le anto wakoka ngandji oyadi wodja kana lokoho layɛ la demba. Lo mɛtɛ, Bible mbutɛka Akristo wa mɛtɛ ɔnɛ: “Tanyohɛke salɛka angɛndangɛnda  ɔlɔlɔ.” (Hɛbɛru 13:2, nɔtɛ) Ɔnkɔnɛ, nyɛsɔ tɔsɛdingole ambola wayela anɛ: Kanyi yakɔna yele la Jehowa lo dikambo di’angɛndangɛnda? Onde sho pombaka ntshikitanya kanyi yaso lo dikambo di’angɛndangɛnda? Ndo ngande wakokaso nkimanyiya onto ɔmɔtshi l’oma lo wodja okina dia ndjaoka dia nde ambolongɔma l’etshumanelo kaso?

3, 4. Lo ndjela Etombelo 23:9, ngande wakalangaka Nzambi di’ase Isariyɛlɛ salɛka angɛndangɛnda akambo, ndo lande na?

³ L’ɔkɔngɔ wa Jehowa ntshungola wodja ande oma lo lɔhɔmbɔ l’Edjibito, nde akawasha ɛlɛmbɛ wakawalɔmbaka dia salɛ angɛndangɛnda wakatshu la wɔ ɔlɔlɔ. (Etombelo 12:38, 49; 22:21) Lam’ele lɔsɛnɔ komongaka mbala tshɛ wɔdu le angɛndangɛnda, Jehowa akawakokɛka la ngandji tshɛ. Ɛnyɛlɔ, vɔ wakakokaka nkɔdiakɔdia mbo ya ndɛ yakatatshikaka amunyi l’ɔkɔngɔ.​—Akambo w’ase Lɛwi 19:9, 10.

⁴ Lo dihole dia mbidjangɛ tsho ase Isariyɛlɛ dia nɛmiya angɛndangɛnda, Jehowa akalange dia vɔ mbohɔ kɛnɛ kelɛwɔ monga ɔngɛndangɛnda. (Adia Etombelo 23:9.) Kaanga la ntondo k’ase Isariyɛlɛ monga mfumbe l’Edjibito, ase Edjibito kombalangaka nɛ dia vɔ wakatshikitana la wɔ. (Etatelo 43:32; 46:34; Etombelo 1:11-14) Ase Isariyɛlɛ waki la lɔsɛnɔ la paa l’ɔtɛ wakiwɔ angɛndangɛnda. Jehowa akalange dia vɔ mbohɔka dui sɔ ndo salɛka angɛndangɛnda wakadjasɛka l’atei awɔ ɔlɔlɔ.​—Akambo w’ase Lɛwi 19:33, 34.

5. Kakɔna kayotokimanyiya dia salɛka angɛndangɛnda ɔlɔlɔ oko waasalɛ Jehowa?

⁵ Jehowa atatshikitana. Diakɔ diele, etena kaya angɛndangɛnda l’etshumanelo kaso, hatohombe mbohɛ ɔnɛ Jehowa tetemalaka salɛ anto asɔ ɔlɔlɔ. (Eohwelo k’Ɛlɛmbɛ 10:17-19; Malaki 3:5, 6) Ɔsa etena ka nkanyiya ekakatanu wakoka angɛndangɛnda monga la wɔ. Ɛnyɛlɔ, mbeyaka monga ko vɔ haweye ɔtɛkɛta wa lɛnɛ ambowokoma ndo mbeyaka monga ko wekɔ lo mbasalɛ akambo aha la losembwe. Nyɛsɔ todje welo dia mbakimanyiya ndo mbasalɛ ɔlɔlɔ.​—1 Petero 3:8.

6, 7. Kakɔna kɛnya di’Akristo w’ase Juda wa lo ntambe ka ntondo wakasale la wolo dia nkandola okakatanu wa kanɛ anto akina kɔlɔ?

⁶ Akristo wa lo ntambe ka ntondo wakasale la wolo dia minya mbekelo ka kananɛ kɔlɔ kakakokanɛ le ase Juda. Lo Pɛntɛkɔsta ka l’ɔnɔnyi wa 33, Akristo w’ase Juda wakadjasɛka la Jɛrusalɛma wakalongola ndo wakayakiyanya la ngandji tshɛ lo dikambo di’ambetawudi w’eyoyo wakaye oma lo wedja wotshikitanyi. (Etsha 2:5, 44-47) Dui sɔ diakɛnya dia Akristo w’ase Juda wakashihodiaka kɛnɛ kalembetshiya “nongola angɛndangɛnda,” mbuta ate “salɛka angɛndangɛnda ɔlɔlɔ.”

⁷ Koko l’etena kɛsɔ, dui dimɔtshi diakatombe. Ase Juda wakatɛkɛtaka Grɛkɛ wakangunanguna nɛ dia wakasalɛka wadi waki edo awɔ akambo aha la losembwe. (Etsha 6:1) Dia nkandola okakatanu ɔsɔ, apɔstɔlɔ wakasɔnɛ apami esambele dia vɔ ntshɔ dia tɔsɛna wolo dia vɔ salɛ onto tshɛ akambo la losembwe. Apɔstɔlɔ wakasɔnɛ apami waki la nkombo y’ase Ngirika ondo dia nkimanyiya wadi waki edo asɔ dia vɔ ndeka ndjaoka dimɛna.​—Etsha 6:2-6.

8, 9. a) Ambola akɔna wayotokimanyiya dia mbeya kana sho kanɛka anto akina kɔlɔ? b) Ahombaso minya? (1 Petero 1:22)

⁸ Oyadi sho mbeya kana bu, sho tshɛ sɛngiyamaka efula oma lo mbekelo yaso. (Rɔmɔ 12:2) Ndo nto, sho koka mboka asukanyi, asekaso wa l’olimu kana asekaso wa la kalasa wata awui wa kɔlɔ lo dikambo di’anto w’oma lo dihole dikina, dioho kana lokoho lokina la demba. Polo lo yɛdikɔ yakɔna yasɛngiyamaso oma lo tokanyi ta kɔlɔ tɔsɔ? Kana ngande  watotosalaka etena katɔsɔka onto ɔmɔtshi l’ɔtɛ wa wodja aso kana awui amɔtshi wendana la mbekelo yaso?

⁹ L’etena kɛmɔtshi, ɔpɔstɔlɔ Petero aki la tokanyi ta kɔlɔ lo dikambo di’anto waki komonga ase Juda. Koko yema yema, nde akeke dia minya tokanyi ta kɔlɔ tɔsɔ. (Etsha 10:28, 34, 35; Ngalatiya 2:11-14) Woho akɔ waamɛ mbele, naka tamboshihodia dia tekɔ kaanga la yema ya kanyi ya kɔlɔ otsha le anto akina kana la otako l’ɔtɛ wa lokoho laso la demba, sho pombaka nsala la wolo dia minya tshɛ lo tshɛ. (Adia 1 Petero 1:22.) Kakɔna kakoka tokimanyiya dia nsala dui sɔ? Tatohɛke dia sho tshɛ keema kokele, oyadi ose wodja akɔna weso ndo ndooko onto l’atei aso lasungana shimbamɛ. (Rɔmɔ 3:9, 10, 21-24) Diakɔ diele, sho bu ndooko l’ɔkɔkɔ wa mfɔnya ɔnɛ sho ndeka anto akina! (1 Kɔrɛtɔ 4:7) Sho pombaka ndjaoka oko wakayaoke ɔpɔstɔlɔ Pɔɔlɔ. Nde akatɛ asekande Akristo ɔnɛ “nyu nyaya bu angɛndangɛnda ndo ambetshi a mboka,” koko “nyaya ase luudu la Nzambi.” (Ɛfɛsɔ 2:19) Sho tshɛ pombaka nsala la wolo dia minya oseka kanyi ya kɔlɔ tshɛ yele la so otsha le anto akina lo ndɔta lonto l’oyoyo.​—Kɔlɔsayi 3:10, 11.

10, 11. Ngande wakokoya Bɔaza kanyi ya Jehowa lo dikambo di’angɛndangɛnda?

¹⁰ Bɔaza pami ka kɔlamelo akokoya kanyi ya Jehowa lo dikambo di’angɛndangɛnda. Lo woho akɔna? Etena kakatshu Bɔaza dia tenda ekambɔ kande lo nshi ya dinela, nde akɛnyi Ruta, womoto l’ɔngɛndangɛnda lakaye oma lo nkɛtɛ ya Mɔaba. Nde akakambaka olimu wa wolo wa tatɔngɔnaka ntɔngɔ oma lo nkɛtɛ. Lo ndjela Ɛlɛmbɛ wa Mɔsɛ, Ruta aki la lotshungɔ la nkɔdiakɔdia. Koko etena kakeye Bɔaza dia nde akalɔmbɛ lotshungɔ la nkɔdiakɔdia l’ekambɔ kande, nde akambe efula ndo aketawɔ dia nde nkɔdiakɔdia kaanga washa.​—Adia Ruta 2:5-7, 15, 16.

¹¹ Kɛnɛ kakayotomba oma laasɔ akɛnya hwe dia Bɔaza akayakiyanyaka dikambo dia Ruta ndo di’ekakatanu wa wolo waki la nde oko ɔngɛndangɛnda. Bɔaza akawotɛ dia nde mongaka kaamɛ la olui w’ekambi ande wa wamato diaha apami wakakambaka l’ekambɔ mbosalɛ kɔlɔ. Bɔaza akayashikikɛka dia Ruta ayokondja mbo ya ndɛ ndo ashi wahombama, paka oko ekambi ande hita. Bɔaza akalɛmiya womoto la wola l’ɔngɛndangɛnda ɔsɔ ndo akookeketsha.—Ruta 2:8-10, 13, 14.

12. Salɛ angɛndangɛnda ɔlɔlɔ koka monga la shɛngiya yakɔna le wɔ?

¹² Bɔaza akasalɛ Ruta ɔlɔlɔ aha tsho l’ɔtɛ wa ngandji ka kɔlamelo kakandokaka okilo ande Naɔmi, koko ndo l’ɔtɛ wakatatɛ Ruta kambɛ Jehowa ndo mendɛ le Nde dia mbokokɛ. Etena kakasalɛ Bɔaza Ruta ɔlɔlɔ, nde mɛtɛ akokoyaka ngandji ka kɔlamelo ka Jehowa. (Ruta 2:12, 20; Tokedi 19:17) Woho akɔ wamɛ mbele ɛlɔ kɛnɛ, naka tekɔ ɛlɔlɔ, sho koka nkimanyiya “weho w’anto tshɛ” dia mbeka akambo wa mɛtɛ ndo nshihodia ɔnɛ Jehowa mbaokaka ngandji k’efula.​—1 Timɔte 2:3, 4.

13, 14. a) Lande na kahombaso mbishaka angɛndangɛnda mɔyɔ lo Mbalasa ka Diolelo? b) Kakɔna kakoka kokimanyiya dia nsawola l’onto ɔmɔtshi lele la mbekelo kina aha l’okakatanu?

¹³ Sho koka salɛ angɛndangɛnda ɔlɔlɔ lo mbasha mɔyɔ la waangasanu tshɛ lo Mbalasa ka Diolelo. Mbala mɔtshi, anto w’oma l’ahole akina weke kodikomaka lo wodja aso mbeyaka mboka nsɔnyi kana ndjatshikalɛ vɔamɛ. L’ɔtɛ wa mbekelo kana dihole diele la wɔ lo tshunda, vɔ koka mfɔnya di’anto wele la lokoho la demba lokina kana w’oma lo wedja ekina mbaleka. Diakɔ diele, sho pombaka monga anto wa ntondo wa mbasha mɔyɔ, mbasalɛ ɔlɔlɔ ndo ndjasha l’otema ɔtɔi le wɔ. Naka application JW Language wekɔ l’ɔtɛkɛta ayɛ, vɔ koka kokimanyiya dia mbeka woho wa mbisha anto mɔyɔ l’ɔtɛkɛta awɔ.​—Adia Filipɛ 2:3, 4.

 ¹⁴ Mbeyaka monga ko wɛ ekɔ l’okakatanu dia nsawola l’onto ɔmɔtshi lele la mbekelo kina. Dia ntondoya dui sɔ, wɛ koka mbutɛ onto ɔsɔ dui dimɔtshi diendana la yɛ. Oma laasɔ, wɛ koka nshihodia ɔnɛ nyekɔ l’awui amɔtshi wafɔnanyu ndeka woho wafɔnyayɛ. Tohɛke dia mbekelo tshɛ kekɔ la awui amɔtshi w’amɛna ndo wa kɔlɔ.

15. Kakɔna kayotokimanyiya dia ndjadja lo dihole dia wanɛ wamboya lo wodja w’oyoyo?

¹⁵ Dia nkimanyiya anto akina dia ndjaoka ɔnɛ wambolongɔma l’etshumanelo, yambola l’otema ɔtɔi ɔnɛ: ‘Naka lambotshɔ lo wodja okina, ngande wayomokombola vɔ salɛmi akambo?’ (Mateo 7:12) Onga la solo dia lotutsha otsha le wanɛ wasala la wolo dia ndjaekesanyiya la wodja w’oyoyo. L’etatelo, mbeyaka monga ko hatoshihodia tshɛ lo tshɛ yoho yawɔ ya nkana yimba kana ya nsala akambo. Koko lo dihole dia nongamɛ dia vɔ nkanyiya ndo nsala akambo oko anto wele la mbekelo yaso, shi ayonga ɔlɔlɔ sho mbaetawɔ paka woho wewɔ?​—Adia Rɔmɔ 15:7, nɔtɛ.

16, 17. a) Akokaso nsala dia ndeka mbɔtɔnganɛ la wanɛ wele la mbekelo kina? b) Ekimanyielo kakɔna shikaa kakokaso mbisha wanɛ waya oma l’ahole akina oya l’etshumanelo kaso?

¹⁶ Naka sho mbɔsa etena ka mbeka awui wendana la wodja ndo mbekelo y’angɛndangɛnda, kete hatonga dui dia wolo dia sho mbaeya. Etena kasalaso ɔtɛmwɛlɔ wa lo nkumbo, sho koka nsala eyangelo ɛmɔtshi lo dikambo dia mbekelo ya wanɛ waya oma l’ahole akina oya l’etshumanelo kana lo ɛtshi kaso ka nkɛtɛ. Yoho kina ya ndeka mbɔtɔnɛ l’anto w’oma l’ahole akina ele mbaelɛ lakaso dia ndjɔlɛ yangɔ. Jehowa “akadiholɛ ase wedja lokuke dia vɔ monga la mbetawɔ,” diakɔ diele sho pombaka mbookoya ndo ndjihola luudu laso dikambo di’angɛndangɛnda wanɛ “wotɔ la so lo mbetawɔ.”​—Etsha 14:27; Ngalatiya 6:10; Jɔbɔ 31:32.

¹⁷ Naka sho nsawola la nkumbo kɛmɔtshi kakaye oma lo dihole dikina, dui sɔ diayotokimanyiya dia nshihodia ndo mbɔsa la nɛmɔ welo wadjawɔ dia ndjaekesanyiya la mbekelo yaso. Sho koka nshihodia ɔnɛ vɔ wekɔ l’ohomba w’ekimanyielo dia mbeka ɔtɛkɛta. Sho koka nto  mbalɔmbɔla otsha lo atshunda wakoka mbakimanyiya dia nkondja luudu kana olimu wa dimɛna. Ekimanyielo ka shikaa kɛsɔ mbeyaka nkimanyiya dia anangɛso l’akadiyɛso nsala etshikitanu w’efula.​—Tokedi 3:27.

18. Ɛnyɛlɔ kakɔna ka dilɛmiɛlɔ ndo ka lowando kakoka wanɛ waya oma l’ahole akina mbokoya ɛlɔ kɛnɛ?

¹⁸ Lo mɛtɛ, wanɛ waya oma l’ahole akina wayolanga nsala kɛnɛ tshɛ kakokawɔ nsala dia ndjaekesanyiya la mbekelo yele lo wodja w’oyoyo. Ruta akatshike ɛnyɛlɔ k’ɔlɔlɔ lo dui sɔ. Ntondotondo, nde akalɛmiya mbekelo ya lo wodja ande w’oyoyo lo nɔmba dikimɔ dia nkɔdiakɔdia. (Ruta 2:7) Nde kɔmbɔsa lotshungɔ lɔsɔ oko ɛngɔ kakandashile nkondja kana mfɔnya ɔnɛ anto akina wakahombaka mbosha ɛngɔ kɛmɔtshi. Dui dia hende ele, aha la ntshimbatshimba, nde akatɛ anto akina ɔnɛ nde aki la lowando l’efula l’ɔtɛ wakawoosalɛ ɔlɔlɔ. (Ruta 2:13) Etena kakɛnɛmɔla anto w’oma l’ahole akina dionga dia dimɛna dia ngasɔ, ondo anangɛwɔ la akadiyɛwɔ ndo anto akina wa lo dihole sɔ wayoleka mbalɛmiya.

19. Ɛkɔkɔ akɔna wele la so wa nsala di’angɛndangɛnda ndjaoka ɔnɛ wambolongɔma?

¹⁹ Ɔnkɔnɛ, tekɔ l’ɔngɛnɔngɛnɔ w’efula woho watosalɛ Jehowa ɔlɔlɔ waheyama mbɛdika ndo woho wetawɔnde di’anto tshɛ mpokamɛ lokumu l’ɔlɔlɔ. Mbeyaka monga ko etena kakiwɔ lo wedja awɔ, anto amɔtshi komonga l’akoka wa mbeka Bible kana ntshɔ lo nsanganya kaamɛ la ekambi wa Jehowa. Koko kakianɛ etena kayawɔ la diaaso dia nsangana kaamɛ la so, sho pombaka mbakimanyiya diaha vɔ ndjoyaoka oko angɛndangɛnda. Mbeyaka monga ko sho bu la falanga efula kana bu l’akoka wa mbakimanyiya efula, koko naka sho salɛ angɛndangɛnda ɔlɔlɔ, kete tekɔ lo mbokoya Jehowa lo ngandji kawaokande. Ɔnkɔnɛ, oko weso anto ‘wokoya Nzambi,’ nyɛsɔ tosale kɛnɛ tshɛ kakokaso nsala dia nongolaka angɛndangɛnda waya l’atei aso!​—Ɛfɛsɔ 5:1, 2.