“WOMOTO.” Ɔsɔ ekɔ yoho yakelɛka Yeso onto laki komonga pami oko nde. Ɛnyɛlɔ, etena kakandakɔnɔla onto ɔmɔtshi laki l’ɛkɔmɔ, lakakotama kota l’edja k’ɛnɔnyi 18, nde akawotɛ ate: “Womoto, wɛ ambotshungɔ oma l’ɔlɛmbɛlɔ ayɛ.” (Luka 13:10-13) Yeso akakambe la mbekelo ka mbelɛ kɛsɔ etena kakandatɛkɛtaka la nyango hita, yoho yakɛnyaka loshilambo lo nshi yakafundamaka Bible. (Joani 19:26; 20:13) Koko, aki tshɛkɛta kina yakaleke mɛnya loshilambo oleki shɔ.

Bible kambaka la tshɛkɛta kina ya laande yakɛnɛmɔla ɔlɔlɔ ndo kɛtshi etena katɛkɛtatɔ dikambo dia wamato amɔtshi. Yeso akakambe la yɔ etena kakandatɛkɛta la womoto lakadiɛnɛka la ɛkɛlɛlɔ ka dikila l’edja k’ɛnɔnyi 12. Yoho yakandasukana la Yeso yaki kɔlɔ efula lo ndjela Ɛlɛmbɛ waki Nzambi, wakataka ɔnɛ onto la ngasɔ aki mindo. Akeyamaka dia womoto ɔsɔ akahombaka ndjakakitola l’anto akina l’ɔtɛ wa hɛmɔ kande. (Akambo w’ase Lɛwi 15:19-27) Koko nde akashisha elongamelo. Lo mɛtɛ, “nde akadiɛnɛ efula lo anya wa enganga efula ndo akamane diangɔ tshɛ diaki la nde le wɔ, koko hemɔ kande koshila, tɔ kakatalekaka monga wolo.”—Makɔ 5:25, 26.

Womoto akɔ akasɔsɔmɛ ɔkɔkɛ l’atei w’olui w’anto, akasukana la Yeso oma l’ɔkɔngɔ ndo akananda ohembo wa dihɔndɔ diande dia laadiko. Ɛkɛlɛlɔ kande ka dikila kakashile mbala kakɔ ɔtɔi! Womoto akɔ akafɔnyaka dia ndooko onto layeya kɛnɛ kamondosala, koko Yeso akambola ate: “Ominandji?” (Luka 8:45-47) L’etena kɛsɔ, womoto akɔ akoke wɔma ndo akasake lokomba, ko akakɔ la ntondo ka Yeso “ko akawotɛ awui tshɛ mɛtɛ.”—Makɔ 5:33.

Dia nsamba womoto akɔ, la ngandji tshɛ Yeso akawotɛ ate: “Ɔna womoto, tokake wɔma!” (Mateo 9:22) Lo ndjela nomb’ewo y’awui wa lo Bible, etelo ka lo Hɛbɛru la Grɛkɛ kakadimɔma ɔnɛ “ɔna womoto” koka kambema lo yoho ya didjidji dia mɛnya “ɔlɔlɔ ndo kɛtshi.” Yeso akaleke mboshikikɛ lo mbotɛ ɔnɛ: “Mbetawɔ kayɛ kambokɔkɔnɔla. Tshɔka la ki ndo ɔkɔnɔ oma lo hemɔ kayɛ ka wolo.”—Makɔ 5:34.

“Ɔna womoto.” Ɔsɔ kele etelo kakakambe la Bɔaza kanga ɔngɔnyi k’ose Isariyɛlɛ dia ntɛkɛta dikambo dia Ruta w’ose Mɔaba. Ruta nde la wɔ kokoka monga l’eshikikelo lo dikambo diande, nɛ dia nde akatakɔdiakɔdiaka asami l’ekambɔ ka pami kakinde kombeyaka. Bɔaza akate ate: “Ompokame yema, ɔnami.” Oma laasɔ, nde akakeketsha Ruta dia ntetemala nkɔdiakɔdia l’ekambɔ kande. Ruta akayakɔsha ekukumadi la ntondo ka Bɔaza ndo akawombola lande na kamondowosalɛ ɔlɔlɔ wa ngasɔ, nde ɔngɛndangɛnda. Bɔaza akawokadimola lo mboshikikɛ nto ɔnɛ: “Wakambutɛ kɛnɛ tshɛ kakayasalɛ okilo ayɛ wa womoto [Naɔmi wadi aki odo] . . . Jehowa akɔtshɔkɔlɛ l’ɔtɛ wa kɛnɛ kakayasale.”—Ruta 2:8-12.

Ande ɛnyɛlɔ ka dimɛna kakatshikɛ Yeso ndo Bɔaza dikumanyi di’Akristo lee! Lo tena dimɔtshi, dikumanyi pende koka nsawola la womoto l’Okristo lele l’ohomba w’ekimanyielo ndo ekeketshelo k’oma l’Afundelo. L’ɔkɔngɔ wa vɔ nyanga ɛlɔmbwɛlɔ ka Jehowa lo nsala dɔmbɛlɔ ndo mpokamɛ la yambalo tshɛ kɛnɛ kata kadiyɛwɔ, ayonga ohomba dia dikumanyi mboshikikɛ ndo mbosamba la awui w’oma l’Ɔtɛkɛta wa Nzambi.—Rɔmɔ 15:4.