1. Kakɔna kakoshikikɛ di’Ɔtɛkɛta wa Nzambi wekɔ la wolo? (Enda osato wele lo mbɔtwɛlɔ.)

EKAMBI wa Jehowa shikikɛka di’Ɔtɛkɛta ande, losango lande otsha le anto lekɔ “la lɔsɛnɔ ndo la wolo.” (Hɛb. 4:12) Tambɛnaka wolo wele la Bible lo lɔsɛnɔ laso ndo l’anto akina. Ntondo ka monga Ɛmɛnyi wa Jehowa, amɔtshi waki wevi, mfumbe ka didjoyadjoya kana wakayashaka l’awui wa mindo wa dieyanelo. Akina waki la lokumu kana la falanga efula, koko wakokaka dia vɔ bu l’ɛngɔ kɛmɔtshi lo lɔsɛnɔ lawɔ. (Ond. 2:3-11) Diɛsɛ ko, efula wakashisha elongamelo waya l’ɛlɔmbwɛlɔ ndo l’elongamelo. Sho mbadiaka ndo ngɛnangɛnaka bɛnyɛlɔ dia ngasɔ lo Tshoto y’Etangelo lo asawo wele l’ɔtɛ a dui ɔnɛ: “Bible tshikitanyaka nsɛnɔ y’anto.” Ndo kaanga l’ɔkɔngɔ wa monga Akristo, anto pombaka ntetemala nkeketsha diɔtɔnganelo diasawɔ la Jehowa l’ekimanyielo ka Bible.

2. Ngande wakonge wolo wele l’Ɔtɛkɛta wa Nzambi la shɛngiya le anto wa lo ntambe ka ntondo?

² Bu dui dia diambo dia mboka ɔnɛ anto efula wekɔ lo nsala etshikitanu wa weke etena kekawɔ akambo wa mɛtɛ.  Anangɛso l’akadiyɛso wa lo ntambe ka ntondo waki l’elongamelo ka tɔsɛna l’olongo wakasale etshikitanu wa ngasɔ. (Adia 1 Kɔrɛtɔ 6:9-11.) Etena kakatɛkɛta Pɔɔlɔ lo dikambo dia wanɛ wahatokita Diolelo dia Nzambi, nde akakotsha ate: “Ngasɔ mbaki amɔtshi wa l’atei anyu.” Ɔtɛkɛta wa Nzambi ndo nyuma kande k’ekila kakakimanyiya anto asɔ dia ntshikitana. Koko, kaanga l’ɔkɔngɔ wa vɔ monga Akristo, amɔtshi l’atei awɔ wakayosala munga ya weke yakonge la shɛngiya lo diɔtɔnganelo diasawɔ la Jehowa. Ɛnyɛlɔ, Bible shilaka ɔnangɛso ɔmɔtshi l’okitami lakatshanyema. Nde akayosala etshikitanu, ko akayokaloyama l’etshumanelo k’Akristo. (1 Kɔr. 5:1-5; 2 Kɔr. 2:5-8) Ekɔ dui di’ekeketshelo l’ɔtɛ wakonge anangɛso l’akadiyɛso l’akoka wa nsala etshikitanu efula diɛsɛ la wolo wele l’Ɔtɛkɛta wa Nzambi.

3. Kakɔna kayotɛna lo sawo nɛ?

³ Ɔtɛkɛta wa Nzambi wekɔ la wolo wa mamba. Lam’ele Jehowa akatoshawɔ, sho nangaka nsala la wolo dia nkamba la wɔ dimɛna. (2 Tim. 2:15) Sawo nɛ diayɛnya kɛnɛ kakokaso nsala dia wolo wele la Bible nkamba olimu awɔ 1) lo lɔsɛnɔ laso, 2) l’esambishelo, ndo 3) etena ketshaso lo lɔyɛnga. Kɛnɛ kayoteka lo sawo nɛ kayotokimanyiya dia nanga ndo monga la lowando le Shɛso ka l’olongo, ɔnɛ latetsha lo wahɔ aso.​—Isa. 48:17.

4. a) Kakɔna kakokaso nsala dia wolo wele l’Ɔtɛkɛta wa Nzambi monga la shɛngiya le so? b) Etena kakɔna katoyadiaka Bible?

⁴ Dia Ɔtɛkɛta wa Nzambi monga la shɛngiya leso, sho pombaka mbaadiaka mbala la mbala. Sho pombaka nsala la wolo dia mbaadiaka lushi tshɛ. (Jas. 1:8) Efula ka l’atei aso wekɔ l’akambo efula wa nsala, koko tatetawɔke dia dikambo dimɔtshi, mbidja ndo ɛkɛndɛ wele la so toshimba dia mbadiaka Bible. (Adia Ɛfɛsɔ 5:15, 16.) Sho koka mbɔsa etena dia kiadia la lɔkɛsɛ, la yanyi kana la dikɔlɔ di’otsho. Tekɔ la kanyi yakɔ yamɛ yaki l’omembi w’esambo lakafunde ate: “Ande woho walangami ɛlɛmbɛ ayɛ lee! Dimi kanaka yimba la wɔ lushi l’otondo.”​—Os. 119:97.

5, 6. a) Lande na kahombaso kanaka yimba? b) Ngande wakokaso nkondja wahɔ oma l’okanelo wa yimba? c) Ngande wakakokimanyiya wadielo wa Bible ndo okanelo wa yimba?

⁵ Kɛnɛ kele mɛtɛ ele, hatohombe komɛ tsho lo mbadia Bible. Sho pombaka kanaka yimba, mbuta ate kanaka yimba efula la kɛnɛ kadiaso. (Os. 1:1-3) Paka lo nsala ngasɔ, mbayotonga l’akoka wa nkamba l’alako w’oma lo Bible lo lɔsɛnɔ laso. Diakɔ diele,  oyadi tekɔ lo mbadia Bible kakatondjama kana kele lo tablɛtɛ, ɔrdinatɛrɛ kana telefɔnɛ, sho nangaka di’Ɔtɛkɛta wa Nzambi totshikitanya ndo monga la shɛngiya le so.

⁶ Ngande wakokaso nkondja wahɔ oma l’okanelo wa yimba? Etena kadiaso Bible, sho pombaka memalaka yema ko ndjambola ɔnɛ: ‘Dui nɛ ambetshadiɔ lo dikambo dia Jehowa? Ngande watomokambaka la kɛnɛ kadiami lo lɔsɛnɔ lami? Etshikitanu akɔna waakamahombe nsala?’ Naka sho nkana yimba la Ɔtɛkɛta wa Nzambi ndo nɔmba lo dikambo dia kɛnɛ kadiaso, kete tayolanga nkamba la tɔ. Paka lo nsala ngasɔ mbakokaso mɛna wolo wele la Bible lo nsɛnɔ yaso.​—2 Kɔr. 10:4, 5.

7. Ngande wakokaso nkamba l’Ɔtɛkɛta wa Nzambi dimɛna l’esambishelo?

⁷ Ekɔ ohomba dia sho kambaka l’Ɔtɛkɛta wa Nzambi mbala la mbala etena kasambishaso ndo ketshaso. Ɔnangɛso ɔmɔtshi akate ate: “Ohɔsa dia wɛ ekɔ lo tasambisha lo luudu la luudu wɛ la Jehowa, onde wɛ ayamamala l’ɔtɛkɛta kana wɛ ayowosha diaaso dia nde la wɔ ntɛkɛta?” Etena kadiɛso onto ɔmɔtshi Bible, tekɔ lo mbisha Jehowa diaaso dia ntɛkɛta la nde. Ɔsɔnwɛlɔ wa dimɛna w’avɛsa mongaka l’etombelo w’amɛna efula ndeka kɛnɛ tshɛ kakokaso mbuta. (1 Tɛs. 2:13) Etena keyɛ l’esambishelo, onde wɛ salaka la wolo dia mbadia Bible mbala efula yakokayɛ nsala dui sɔ?

8. Lande na kahombaso nsala akambo efula lo dihole dia mbadia tsho avɛsa etena kasambishaso?

⁸ Lo mɛtɛ, hatohombe komɛ tsho lo mbadiɛ wanɛ wasambishaso divɛsa dimɔtshi di’oma lo Bible. Anto efula haweye awui wa lo Bible. Ngasɔ mbakidiɔ lo ntambe ka ntondo ndo nshi nyɛ. (Rɔmɔ 10:2) Tatɔfɔnyake ɔnɛ ompokami aso ekɔ lo nshihodia divɛsa  diambotadia. Sho koka mbokimanyiya lo kalolɛ ɛtɛkɛta kana tokanyi toleki ohomba tele lo divɛsa diakɔ ndo oma laasɔ mbolembetshiya kɛnɛ katadiɔ. Lo nsala ngasɔ mbakoka Ɔtɛkɛta wa Nzambi munanda tokanyi ndo etema w’anto.​—Adia Luka 24:32.

9. Ngande wakokaso nkimanyiya anto dia mbɔsa Bible la nɛmɔ oma lo kɛnɛ kataso ntondo ka mbadia divɛsa dimɔtshi? Sha ɛnyɛlɔ.

⁹ Kɛnɛ kataso ntondo ka mbadia divɛsa, koka nto nkimanyiya ompokami dia mbɔsa Bible la nɛmɔ. Ɛnyɛlɔ, sho koka mbuta ɔnɛ: “Ɛsɔ tende kɛnɛ kata Otungi aso lo dikambo sɔ.” Kana naka tekɔ lo nsawola l’onto l’oma lo dihole diewɔ bu Akristo, kete sho koka mbuta ɔnɛ: “Ɛsɔ tende kɛnɛ katotɛ Efundelo w’ekila.” Naka tambohomana l’onto lahɔshi ɔtɛmwɛ la nɛmɔ, kete sho koka mbombola ɔnɛ: “Onde wɛ atokaka ɛtɛkɛta w’edjedja ɛnɛ?” Naka sho mbohɔ ɔnɛ onto tshɛ akalongola wetshelo wotshikitanyi ndo ekɔ la dietawɔ diande, kete tayosala la wolo dia mbɔtwɛlɔ kaso mbɔngɛnyangɛnya.​—1 Kɔr. 9:22, 23.

10. a) Kakɔna kakasale ɔnangɛso ɔmɔtshi? b) Ngande wakayɛnyi wolo wele l’Ɔtɛkɛta wa Nzambi l’olimu ayɛ w’esambishelo?

¹⁰ Anto efula wakɛnyi dia nkamba l’Ɔtɛkɛta wa Nzambi koka monga la shɛngiya ya wolo le anto wasambishawɔ. Ɛnyɛlɔ, ɔnangɛso ɔmɔtshi akatshu dia tembola pami kɛmɔtshi k’osombe kokadiaka periodikɛ yaso l’edja k’ɛnɔnyi efula. Lushi lɔmɔtshi, lo dihole dia nde mbosha tsho Tshoto y’Etangelo yeke katomba, ɔnangɛso akɔ akawadiɛ divɛsa dimɔtshi. Nde akawadiɛ 2 Kɔrɛtɔ 1:3, 4, wata ɔnɛ: “Shɛso ka kɛtshi ndo Nzambi k’esambelo tshɛ, . .  . ɔnɛ latosamba lo asui aso.” Ɛtɛkɛta ɛsɔ wakananda pami kakɔ efula ko nde akalɔmbɛ ɔnangɛso dia mbaadiɛ avɛsa akɔ nto. Oma laasɔ, pami kakɔ akate ate nde la wadɛnde waki mɛtɛ l’ohomba w’esambelo. L’ɔtɛ wa divɛsa sɔ, nde akalange mbeya awui efula wendana la Bible. Kambaka l’Ɔtɛkɛta wa Nzambi l’esambishelo mongaka la shɛngiya ya wolo!​—Ets. 19:20.

11. Ɔkɛndɛ akɔna wele l’anangɛso wetsha lo lɔyɛnga?

¹¹ Sho nangaka mbɔtɔ nsanganya ya l’etshumanelo ndo ya weke. Ɔkɔkɔ woleki woke wɔtɔso nsanganya ele dia ntɛmɔla Jehowa. Sho kondjaka nto wahɔ oma lo kɛnɛ kekaso. Diakɔ diele, anangɛso wetsha lo lɔyɛnga wekɔ la diɛsɛ ndo ɔkɛndɛ wa woke. (Jak. 3:1) Vɔ pombaka nsala la wolo dia kɛnɛ ketshawɔ pikama l’Ɔtɛkɛta wa Nzambi. Naka wɛ ekɔ la diɛsɛ dia mbetsha, ngande wakokayɛ nsala dia wolo wele la Bible minanda etema w’ampokami ayɛ?

12. Ngande wakoka ɔtɛkɛtshi nsala la wolo dia sawo diande mpikama l’Afundelo?

¹² Afundelo pombaka monga etenyi koleki ohomba ka sawo diakɔna tshɛ. (Jni. 7:16) Ɔnkɔnɛ, onga la yewo y’efula diaha yoho yayɛ ya mbisha asawo ndo bɛnyɛlɔ ndjoleka nkutola yambalo y’anto oleki lo Bible. Ndo nto, tohɛke dia mbadia Bible ntshikitana la mbetsha Bible. Lo mɛtɛ, naka wɛ mbadia avɛsa amboleka efula, kete anto efula wayowaohɛ. Diakɔ diele, nsɔna la yambalo tshɛ avɛsa wayoyolanga nkamba la wɔ. Oma laasɔ, ɔsa etena ka mbadia, nembetshiya, mbisha bɛnyɛlɔ ndo mɛnya woho wakoka anto nkamba la wɔ dimɛna. (Nɛh. 8:8) Naka sawo diekɔ la ekongelo, kete sala la wolo dia mbeka ekongelo kakɔ ndo avɛsa wele lɔkɔ. Sala la wolo dia nshihodia woho wɔtɔnɛ ekongelo kakɔ la avɛsa wele lɔkɔ. Oma laasɔ, kamba l’avɛsa amɔtshi dia mbisha wetshelo wele l’ekongelo  kakɔ. (Wɛ koka ntana alako w’amɛna lo dibuku Kondja wahɔ lo Kalasa k’olimu wa teokrasi dako 21 polo 23.) Ndo kɛnɛ koleki ohomba ele lɔmba Jehowa dia nde kokimanyiya dia mbewoya tokanyi tande t’ohomba t’oma lo Bible.​—Adia Ɛzɛra 7:10; Tokedi 3:13, 14.

13. a) Ngande wakasɛngiyama kadiyɛso kɛmɔtshi la divɛsa diakandoke lo losanganya lɔmɔtshi? b) Ngande wonga yoho yakambawɔ la Bible lo nsanganya yaso la shɛngiya le yɛ?

¹³ Etena kaki kadiyɛso kɛmɔtshi ka l’Australie dikɛnda, akambo efula wa diambo wakokomɛ, ndo kaanga mbakandayeya Jehowa l’ɔkɔngɔ, nde kombetawɔ tshɛ lo tshɛ dia Jehowa mbolangaka. Lo losanganya lɔmɔtshi, kadiyɛso kɛsɔ akoke divɛsa dimɔtshi diakonge la shɛngiya y’efula le nde. Nde akakane yimba ladiɔ ndo akasale eyangelo wakokonya dia mbadia avɛsa akina lo Bible. Nde akayoshikikɛ dia Jehowa akolangaka. * Onde wɛ atokaka divɛsa dimɔtshi lo losanganya la l’etshumanelo lɔmɔtshi kana la woke diakonge la shɛngiya le yɛ lo yoho shɔ?​—Nɛh. 8:12.

14. Ngande wakokaso mɛnya dia sho mbɔsaka Ɔtɛkɛta wa Jehowa la nɛmɔ ndo mbolangaka?

¹⁴ Shi tekɔ la lowando l’efula le Jehowa l’ɔtɛ wakandatosha Ɔtɛkɛta ande Bible? Nde akalake ɔnɛ vɔ wayotshikalaka pondjo ndo nde akakotsha daka sɔ. (1 Pe. 1:24, 25) Ɔnkɔnɛ nyɛsɔ tosale la wolo dia mbadiaka Bible mbala la mbala, nkamba la tɔ lo nsɛnɔ yaso ndo dia nkimanyiya anto akina. Naka sho nsala ngasɔ, kete tayɛnya dia sho nangaka ndo ngɛnangɛnaka ɛngɔ k’oshinga wolo kɛsɔ ndo djekoleko Jehowa Nzambi, Kiɔkɔ yatɔ.