1. Ngande wakayaɛnya Jehowa le Mɔsɛ? Lande na kele dui sɔ ohomba?

LO DIAASO dimɔtshi, Nzambi akayaɛnya le Mɔsɛ dia mbotɛ lokombo Lande ndo waonga Ande amɔtshi. Jehowa akakoke ndeka ntɛkɛta dia wolo kana lomba lande, koko lo dihole dia nsala ngasɔ, nde akatɛkɛta ntondo dia kɛtshi kande ndo woho wokanande kandji. (Adia Etombelo 34:5-7.) Mɔsɛ akalange mbeya dia kana Jehowa ayowosukɛ. Diakɔ diele, Jehowa akaleke ntɛkɛta dia waonga ande wɛnya dia nde mɛtɛ nangaka nkimanyiya ekambi ande. (Eto. 33:13) Ngande wayaokayɛ lo mbeya dia Jehowa ndjakiyanyaka efula lo dikambo diayɛ? Sawo nɛ diayoleka ntɛkɛta dia mbokana kandji, mbuta ate mboka anto akina wasowa kɛtshi ndo monga la nsaki ka mbakimanyiya.

2, 3. a) Kakɔna kɛnya dia oma ko mbotwelo anto mbokanaka kandji? b) Lande na kahombayɛ mbidja yimba lo kɛnɛ kata Bible lo kɛnɛ kendana la mbokana kandji?

² Jehowa mbokanaka kandji ndo anto wakatongama l’efanelo kande. Diakɔ diele oma ko mbotwelo, anto ndjakiyanyaka di’anto akina. Mbala efula kaanga wanɛ waheye Jehowa mbokanaka  kandji. (Eta. 1:27) Lo Bible, sho tanaka ɛkɔndɔ efula w’anto wakokanaka kandji. Ɛnyɛlɔ, etena kakalange Sɔlɔmɔna mbeya lo wamato amɔtshi ahende ɔnɛ laki nyango ɔna, nde akaahembe lo mbuta dia vɔ mbata ɔna l’ahende. Nyango ɔna akoke ɔnande kandji k’efula, ko nde akasɛngasɛnga nkumekanga dia mbosha womoto okina. (1 Ku. 3:23-27) Ɛnyɛlɔ kekina k’onto lakokanaka kandji ele k’ɔna Farawɔ la womoto. Lam’akandashola Mɔsɛ eke ashashi, nde akashihodia ɔnɛ ɔnakɔ aki ose Hɛbɛru ndo akahombe ndjakema. Koko “nde akawoke kɛtshi,” ndo nde akɔshi yɛdikɔ ya mboodia oko ɔnande hita.​—Eto. 2:5, 6.

³ Lande na kahombaso mbeka akambo efula wendana la mbokana kandji? Nɛ dia Jehowa nangaka sho mbookoya. (Ɛf. 5:1) Kaanga mbele takatongama dia mbokana kandji, sho keema kokele ndo mongaka la lokaki. Lo tena dimɔtshi hatongaka dui dia wɔdu dia sho nshikikɛ kana sho kokaka nkimanyiya anto akina kana mbidja yimba paka lo dikambo diaso. Kakɔna kakoka tokimanyiya dia ndeka ndjasha le anto akina? Dui dia ntondo, tayanga nsɛdingola woho wakɛnya Jehowa ndo anto akina dia vɔ mbokanaka kandji. Dui dia hende, tayanga mɛna woho wakokaso mbokoya Nzambi lo mbokana kandji ndo lande na kele ekɔ dimɛna dia sho nsala dui sɔ.

4. a) Lande na kakatome Jehowa andjelo la Sɔdɔma? b) Wetshelo akɔna wakondjaso oma lo kɛnɛ kakakomɛ nkumbo ka Lɔta?

⁴ Bible kekɔ la bɛnyɛlɔ efula diɛnya dia Jehowa mbokanaka kandji. Ɛnyɛlɔ, tokanyiya kɛnɛ kakandasalɛ Lɔta. Lɔta aki onto ɔlɔlɔ laki la “lonyangu l’efula” l’ɔtɛ w’anto wakasalaka awui wa mindo la Sɔdɔma la Ngɔmɔra. Anto asɔ kɔnɛmiyaka Nzambi kaanga yema, ko Jehowa akɔshi yɛdikɔ dia vɔ ndjakema. (2 Pe. 2:7, 8) Jehowa akatome andjelo le Lɔta dia mbotɛ ɔnɛ Sɔdɔma la Ngɔmɔra wayolanyema ndo nde pombaka ndawɔ. Bible mbutaka ɔnɛ: “Lam’ele [Lɔta] akatshimbatshimbaka, a[ndjelo] asɔ wakookimɛ lo lonya nde la wadɛnde la anande 2 l’ɔtɛ wa kɛtshi kakawoke Jehowa, ko wakaatondja l’andja w’osomba.” (Eta. 19:16) Paka oko wakashihodia Jehowa okakatanu waki la Lɔta, sho koka monga l’eshikikelo dia nde shihodiaka okakatanu tshɛ wahomana la so.​—Isa. 63:7-9; Jak. 5:11, nɔtɛ; 2 Pe. 2:9.

5. Ngande watetsha Ɔtɛkɛta wa Nzambi woho wa mbokana kandji?

⁵ Jehowa aketsha nto ekambi ande dia vɔ la wɔ mbokana kandji. Tokanyiya dikambo dia ɔlɛmbɛ ɔmɔtshi wakandadjɛ ase Isariyɛlɛ. Naka onto ɔmɔtshi ambɔsɔmba falanga le ɔsɔndjanyi, kete ɔsɔndjanyi akakokaka mbɔsa dihɔndɔ di’onto ɔsɔ oko ɔkɔlɛ dia nshikikɛ ɔnɛ nde ayofuta falanga yande. (Adia Etombelo 22:26, 27.) Koko ɔsɔndjanyi akahombaka nkaloya dihɔndɔ di’onto ɔsɔ la dikɔlɔ di’onto akɔ ndjokomba l’otsho. Onto laki kombokanaka kandji akakokaka ntona dia nkaloya dihɔndɔ sɔ, koko Jehowa aketsha ekambi ande dia mbokana kandji. Wetshelo akɔna wakondjaso oma lo tɔndɔ diele ledia k’ɔlɛmbɛ ɔsɔ? Tatonyake pondjo yimba oma l’ehomba w’osekaso Okristo. Naka tekɔ l’akoka wa nkimanyiya ɔnangɛso kana kadiyɛso kasowa, kete tosale dui sɔ.​—Kɔl. 3:12; Jak. 2:15, 16; adia 1 Joani 3:17.

6. Wetshelo akɔna wakondjaso oma lo woho wakokaka Jehowa ase Isariyɛlɛ wakasalaka pɛkato kandji?

⁶ Jehowa akokaka ase Isariyɛlɛ kandji kaanga etena kakawosalɛka pɛkato. Sho mbadiaka ɔnɛ: “Jehowa Nzambi ka watshɛwɔ  akatetemala mbahɛmɔla lo tshimbo y’akɛndji ande, awahɛmɔla mbala ko mbala, nɛ dia nde akokaka wodja ande ndo dihole dia edjaselo kande kɛtshi.” (2 Ɛk. 36:15) Woho akɔ waamɛ mbele, sho pombaka mboka wanɛ wahateye Jehowa koko wakoka ndjatshumoya ndo monga angɛnyi ande kandji. Jehowa halange kaanga onto ɔtɔi ndjolanyema lo kilombo kayaye. (2 Pe. 3:9) Diakɔ diele kam’ekeso l’etena, sho nangaka nsambisha anto tshɛ wakokaso nsambisha losango lande l’ɔhɛmwɛlɔ ndo nkimanyiya anto efula dia nkondja wahɔ oma lo woho wawaoka Jehowa kandji.

7, 8. Lande na kaketawɔ nkumbo kɛmɔtshi dia Jehowa akawaoke kandji?

⁷ Ɛlɔ kɛnɛ, ekambi wa Jehowa efula wambɛna woho wokanande kandji. Ɛnyɛlɔ, lo ɛnɔnyi 1990 la Bosnie, waoho wotshikitanyi wakalɔshana ndo wakadiakana. Milan ɔna pami laki l’ɛnɔnyi 12 aki lo nkumbo kɛmɔtshi kakadjasɛka lɛkɔ. Milan, ɔnango, ambutshi ande ndo Ɛmɛnyi ekina wakande lɔkɛndɔ lo mutuka oma la Bosnie otsha la Serbie. Vɔ wakatatshɔka lo losanganya la woke, lakahombe ambutshi wa Milan tobatizama. Etena kakawakome l’olelo, asɔlayi amɔtshi wakashihodia dia nkumbo kɛsɔ waki dioho dikina ndo wakaaholoya oma lo mutuka. Oma laasɔ, vɔ wakatshike anangɛso akina lo mutuka dia vɔ ntetemala la lɔkɛndɔ lawɔ. L’edja ka nshi hiende, asɔlayi kokimɔ nkumbo kɛsɔ dia vɔ ntshɔ. L’ekomelo, kɔmanda akelɛ owandji awɔ ndo akawombola kɛnɛ kakawahombe nsala la wɔ. Nkumbo kɛsɔ kakemala laawɔ ndo wakakoke mboka kɛnɛ kakakadimola owandji akɔ ɔnɛ: “Nyowatondja kele nyowakande!”

⁸ Etena kakasawolaka asɔlayi, anto akina ahende wakasukana lale nkumbo kɛsɔ. Vɔ wakawatɛ ɔnɛ vɔ la wɔ wekɔ Ɛmɛnyi wa Jehowa ndo ɔnɛ anangɛso wakatshu lo mutuka wakawatɛ kɛnɛ kakatombe. Ɛmɛnyi wa Jehowa ehende ɛsɔ wakatɛ Milan nde l’ɔnango dia mbɔtɔ lo mutuka awɔ dia mbalekanya olelo nɛ dia asɔlayi komimbolaka ana ekanda wa lɛɛta. Oma laasɔ anangɛso wakatɛ ambutshi dia nkɛndakɛnda l’omamu w’olelo dia vɔ tohomana lo wedi okina. Milan aki la wɔma w’efula woho wele nde kombeyaka kɛnɛ ka nsala mbɔla kana ndela. Ambutshi ande wakambola ɔnɛ: “Onde wɛ fɔnyaka dia vɔ wekɔ l’oyango wa tolawoya?” Koko etena kakawatalawɔka, ekɔ oko asɔlayi kombaɛna. Milan nde l’ɔnango wakatotana ambutshi awɔ lo wedi okina w’olelo ndo vɔ wakatshu lo losanganya la woke. Vɔ waki l’eshikikelo dia Jehowa akakadimola alɔmbɛlɔ awɔ! Sho mbeyaka l’ekimanyielo ka Bible dia aha mbala tshɛ mbakokɛ Jehowa ekambi ande mbala kakɔ ɔtɔi lo yoho shɔ. (Ets. 7:58-60) Koko lo kɛnɛ kendana la dui sɔ, Milan akate ate: “Lakɛnyi oko andjelo mbakadihe washo w’asɔlayi ndo Jehowa mbakatotsha.”​—Os. 97:10.

9. Ngande wakayaoke Yeso lo dikambo di’elui w’anto wakawoyele? (Enda osato wele lo mbɔtwɛlɔ.)

⁹ Yeso aki ɛnyɛlɔ ka dimɛna efula k’onto lakokanaka kandji. Nde akoke anto kɛtshi nɛ dia nde akawaɛnyi dia “vɔ wakahɛnyahɛnyamaka ndo komonga la okimanyedi oko ɛkɔkɔ waha la olami.” Ko kakɔna kakandasale? “Nde akatatɛ mbaetsha akambo efula.” (Mat. 9:36; adia Makɔ 6:34.) Lo yoho yotshikitanyi, Afarisɛ kombokaka anto kandji ndo konangaka mbakimanyiya. (Mat. 12:9-14; 23:4; Jni. 7:49) L’ɛnyɛlɔ ka Yeso, onde wɛ ekɔ la nsaki k’efula ka nkimanyiya anto akina ndo mbaetsha akambo wendana la Jehowa?

10, 11. Onde ekɔ ohomba mbokana kandji tena tshɛ? Lembetshiya.

¹⁰ Dui sɔ halembetshiya ɔnɛ ekɔ ohomba  mbokana kandji tena tshɛ. Ɛnyɛlɔ, ondo nkumekanga Saolo akafɔnya dia naka nde hadiaki Anganga laki nkumekanga k’ase Amalɛka ndo otunyi w’ekambi wa Nzambi, kete nde ambowoka kandji. Ndo nto Saolo kondjaka nyama tshɛ y’ase Amalɛka. Koko Jehowa akatɛ Saolo dia ndjaka ase Amalɛka ndo nyama yawɔ tshɛ. L’ɔtɛ w’ohindodi wa Saolo, Jehowa akawotone diaha monga nkumekanga. (1 Sa. 15:3, 9, 15, nɔtɛ) Jehowa ekɔ Shushi ya losembwe. Nde koka mbeya kɛnɛ kele l’etema w’anto ndo nde mbeyaka etena kahandakoke mboka anto kandji. (Del. 2:17; Ɛzk. 5:11) Kema edja nde ayela kilombo le wanɛ tshɛ watona mbokitanyiya. (2 Tɛs. 1:6-10) Ɔsɔ hatonga etena ka Jehowa mboka akanga wa kɔlɔ kandji. Koko lo mbalanya, nde ayoka anto w’ɛlɔlɔ wayondoshimbɛ kandji.

¹¹ Lo mɛtɛ, aha sho mbele la lotshungɔ la nshikikɛ ɔnɛ kapanda ayoka kana ayovɔ. Lo dihole dia nsala ngasɔ, sho pombaka nsala kɛnɛ tshɛ kakokaso nsala dia nkimanyiya anto. Naa toho tɔmɔtshi shikaa takokaso mboka anto akina kandji? Toho tɔmɔtshi tɔ tɔnɛ.

12. Ngande wakokayɛ mɛnya dia wɛ mbokanaka kandji lo woho wasalɛyɛ anto akina akambo?

¹² Tokimanyiyake anto lushi tshɛ. Jehowa nɔmbaka Akristo dia mboka asukanyi ndo anangɛwɔ kandji. (Jni. 13:34, 35; 1 Pe. 3:8) Kitshimudi mɔtshi y’etelo k’ɔnɛ mbokana kandji ele “nsowa kaamɛ.” Onto lokana kandji salaka la wolo dia nkimanyiya wanɛ wasowa. Diakɔ diele sho pombaka nyanga waaso wa nkimanyiya anto akina, ɛnyɛlɔ mbalɔmba dia mbasalɛ elimu ɛmɔtshi w’ohomba kana ntshɔ dia towasombɛ diangɔ.—Mat. 7:12.

13. Kakɔna kasala ekambi wa Nzambi l’ɔkɔngɔ wa mpokoso k’oma lo diangɔ diakatongama?

¹³ Tosha lonya l’olimu wa nkimanyiya. Etena kɛnaso anto wasowa l’ɔtɛ wa mpokoso kɛmɔtshi, towaɛnya dia sho mbaokaka kandji. Ekambi wa Jehowa mbeyamaka dimɛna l’ɔtɛ wakimanyiyawɔ anto akina lo tena dia ngasɔ. (1 Pe. 2:17) Ɛnyɛlɔ, kadiyɛso kɛmɔtshi k’ose Japon akadjasɛka l’ɛtshi ka nkɛtɛ kakalanyema lo 2011 la didimu dia nkɛtɛ ndo tsunami. Nde akate ɔnɛ nde “akakeketshama ndo akasambema efula” etena kakandɛnyi  anangɛso wakayakimɔ la lolango wakaye oma l’ahole wotshikitanyi wa la Japon ndo oma lo wedja ekina dia ndjɔlɔngɔsɔla mvudu ndo Mbalasa ya Diolelo. Nde akakotsha ate: “Dui sɔ diakakimanyiya dia nshihodia dia Jehowa ndjakiyanya dikambo diaso. Ndo asekaso Ɛmɛnyi ndjakiyanyaka dikambo di’onto l’onto. Anangɛso l’akadiyɛso efula wa l’andja w’otondo nɔmbaka lo dikambo diaso.”

14. Ngande wakokayɛ nkimanyiya wanɛ wele la hemɔ ndo esombe?

¹⁴ Tokimanyiya wanɛ wele la hemɔ ndo esombe. Etena kɛnaso anto wasowa la hemɔ ndo lotshundu, sho mbaokaka kandji. Tekɔ lo nomɔlomɔ dia mɛna ekomelo k’akambo asɔ, diakɔ dialɔmbaso dia Diolelo dia Nzambi ndja. Koko l’etena kɛnɛ, sho salaka kɛnɛ tshɛ kakokaso nsala dia nkimanyiya wanɛ wele la hemɔ ndo esombe. Ofundji ɔmɔtshi akafunde ɔnɛ lushi lɔmɔtshi osombe wa nyango waki la hemɔ ka Alzheimer, akadje ahɔndɔ ande mindo. Etena kakandalange mbasola, ngunga ka lokuke lande kakalele. Ɛmɛnyi wa Jehowa ehende wakawembolaka mbala la mbala mbakaye. Akadiyɛso wakɔlɔmbɛ dia mbokimanyiya. Mama kakɔ akate ate: “Ekɔ nsɔnyi, koko nyokimanyiya.” Akadiyɛso wakookimanyiya la nsola. Oma laasɔ vɔ wakosalɛ tshayi ko wakatatɛ nsawola la nde. Ɔnande la pami akawaoke losaka l’efula ndo akate ɔnɛ Ɛmɛnyi wa Jehowa “kambaka la kɛnɛ kasambishawɔ.” Onde woho wokayɛ wanɛ wele la hemɔ ndo esombe kandji kotshutshuyaka dia nsala kɛnɛ tshɛ kakokayɛ nsala dia mbakimanyiya?​—Flpɛ. 2:3, 4.

15. Ngande wakimanyiya olimu aso w’esambishelo anto akina?

¹⁵ Tokimanyiya anto dia mbeya Jehowa. Yoho yoleki dimɛna yakokaso nkimanyiya anto ele mbasambisha akambo wendana la Nzambi ndo Diolelo diande. Yoho kina ele mbakimanyiya dia mbeya lande na kele nkitanyiya atɔndɔ wa Jehowa ekɔ dia wahɔ awɔ. (Isa. 48:17, 18) Esambishelo ekɔ yoho ya dimɛna efula ya ntombola Jehowa ndo mɛnya anto akina dia sho mbaokaka kandji. Shi wɛ koka ndeka ndjasha l’esambishelo?​—1 Tim. 2:3, 4.

16. Ɛlɔlɔ akɔna wayotokondja naka sho mbokanaka kandji?

¹⁶ Tomanyi ta l’awui wendana la hemɔ ya lo wɔɔngɔ mbutaka dia mbokana kandji kokaka ndowanya yoonge yaso ndo diɔtɔnganelo diasaso l’anto akina. Naka wɛ nkimanyiya wanɛ wasowa, kete wɛ ayoleka monga l’ɔngɛnɔngɛnɔ, l’elongamelo, holeka ndjaoka opoko ndo holeka monga la tokanyi ta kɔlɔ. Mbokana kandji ekɔ ohomba le yɛ. (Ɛf. 4:31, 32) Etena katotshutshuya ngandji dia nkimanyiya anto akina, sho mongaka la nkum’otema ka dimɛna nɛ dia sho mbeyaka ɔnɛ tekɔ lo nsala kɛnɛ kalanga Jehowa dia sho nsala. Mbokana kandji ayotokimanyiya dia monga ambutshi w’ɛlɔlɔ, elonganyi w’ɛlɔlɔ ndo angɛnyi w’ɛlɔlɔ. Laadiko dia laasɔ, mbala efula wanɛ woka anto akina kandji kondjaka ekimanyielo etena kewɔ l’ohomba atɔ.​—Adia Mateo 5:7; Luka 6:38.

17. Lande na kalangayɛ mbokana kandji?

¹⁷ Kaanga mbele mbokana kandji ekɔ ohomba le so, ɔkɔkɔ woleki woke wokanaso kandji ele nɛ dia sho nangaka mbokoya Jehowa ndo mbosha lotombo. Nde kele Kiɔkɔ ya ngandji ndo kɛtshi. (Tok. 14:31) Nde toshaka ɛnyɛlɔ ka kokele. Ɔnkɔnɛ, nyɛsɔ tosale kɛnɛ tshɛ kakokaso nsala dia mbokoya Nzambi lo mbokanaka kandji. Lo nsala ngasɔ tayoleka monga kaamɛ l’anangɛso la akadiyɛso ndo tayoleka monga la diɔtɔnganelo dia dimɛna l’anto wotodingi.​—Ngal. 6:10; 1 Jni. 4:16.