Lande na kakashile Yeso ɛtɛkɛta wa Davidɛ wele lo Osambo 22:1 yema tshitshɛ la ntondo ka nyɔi kande?

L’atei w’ɛtɛkɛta w’ekomelo wakate Yeso la ntondo ka nyɔi kande mbaki ndo ɛtɛkɛta wele lo Mateo 27:46 wata ɔnɛ: “Nzambi kami le, Nzambi kami le, lande na kamboyɔnsɛka?” Lo mbuta ɛtɛkɛta ɛsɔ, Yeso akakotsha ɛtɛkɛta w’omembi w’esambo Davidɛ wele lo Osambo 22:1. (Makɔ 15:34) Ayonga kɔlɔ dia sho mbuta ɔnɛ Yeso akashile ɛtɛkɛta ɛsɔ l’ɔtɛ wakandɛmbɛ ɛkɔndjɔ kana l’ɔtɛ wakandayonga aya bu la mbetawɔ lo tshanda mɔtshi. Yeso akashihodiaka tshɛ lo tshɛ ɔkɔkɔ wakandahombe mvɔ ndo nde aketawɔ nsala dui sɔ. (Mat. 16:21; 20:28) Nde akeyaka nto dia l’etena ka nyɔi kande, Jehowa akahombe minya “lokombo l’ekokelo” oma le nde. (Jɔbɔ 1:10) Jehowa aketawɔ dia Yeso mvɔ dia nde mɛnya aha la taamu dia nde ayotshikala la kɔlamelo oyadi woho wa nyɔi ka ngande kakahombe mbokomɛ.​—Makɔ 14:35, 36.

Ko laasɔ, lande na kakate Yeso ɛtɛkɛta ɛsɔ wa lo osambo? Kaanga mbele hateye l’eshikikelo, nyɛsɔ tɔsɛdingole ɛkɔkɔ ɛmɔtshi ondo wakandate ɛtɛkɛta ɛsɔ. *

Lo mbuta ɛtɛkɛta ɛsɔ, ondo Yeso aki lo tɔtɔmiya dia Jehowa ayekɛ lonya diaha nde ndjakema. Yeso akahombe mfuta oshinga w’etshungwelo aha la Jehowa mbokimanyiya. Nde aki onto ndo akahombe mvɔ  dia “nde alɛtɛ nyɔi dikambo di’oseka onto tshɛ.”​—Hɛb. 2:9.

Lo nshila ɛtɛkɛta ɛmɔtshi wele l’osambo ɔsɔ, ondo Yeso akakotola yambalo y’anto l’osambo ɔsɔ w’otondo. Ase Juda wa lo nshi shɔ waki la mbekelo ka kimɛka esambo efula lo yimba. Etena kakawokaka divɛsa ɔtɔi di’oma l’osambo ɔmɔtshi, vɔ wakakanyiyaka mbala kakɔ ɔtɔi lo dikambo di’osambo w’otondo. Naka kɛsɔ mbakalange Yeso nsala, kete nde akalange nkimanyiya ambeki ande w’ase Juda dia vɔ mbohɔ prɔfɛsiya efula yele l’osambo ɔsɔ yendana l’awui wakendanaka la nyɔi kande. (Os. 22:7, 8, 15, 16, 18, 24) Ndo nto, avɛsa w’ekomelo wa l’osambo ɔsɔ tombolaka Jehowa ndo mɛnyaka dia nde ekɔ Nkumekanga laadiko dia nkɛtɛ k’otondo.​—Os. 22:27-31.

Lo nshila ɛtɛkɛta ɛsɔ wa Davidɛ, ondo Yeso aki lo mbika epole ɔsɛkɛ lo woho wakinde komonga l’onongo. La ntondo ka Yeso ndjakema, Tominadi ta laadiko takoosandja aha la ndjela ɛlɛmbɛ ndo wakate dia nde akatɛngɛ Nzambi. (Mat. 26:65, 66) Tominadi ta laadiko takasangana esadi esadi l’otsho wa kati ndo takoosandja aha la ndjela kɛnɛ kakataka ɛlɛmbɛ. (Mat. 26:59; Makɔ 14:56-59) Lo nshila ɛtɛkɛta ɛsɔ wele oko dimbola diahalɔmbɛ onto nkadimola, ondo Yeso akakotola yambalo y’anto lo woho wele nde kosala ndooko dui diakandahombe nongola dilanya dia ngasɔ.

Ondo Yeso aki lo mbohola anto akina nto ɔnɛ kaanga mbele Davidɛ laki ofundji w’osambo ɔsɔ akasowe, dui sɔ komɛnya dia Davidɛ akayonga ko hayetawɔma le Jehowa. Dimbola diakoke Davidɛ kɔmɛnyaka dia nde kondjonga la mbetawɔ. L’ɔkɔngɔ wa nde mboka dimbola sɔ, nde akɛnya wɛkamu waki la nde lo wolo wele la Jehowa wa nshimbɛ anto, ndo Jehowa akatetemala mbɔtshɔkɔla. (Os. 22:23, 24, 27) Woho akɔ waamɛ mbele, kaanga mbele Yeso, “Ɔna Davidɛ” akasowe l’otamba w’asui, dui sɔ kɔmɛnya dia Yeso hayetawɔma nto le Jehowa.​—Mat. 21:9.

Ondo Yeso akakɛnɛmɔla ɔkɛyi w’efula waki la nde l’ɔtɛ wakatshike Jehowa mbokokɛ l’oyango wa nde mɛnya olowanyi ande tshɛ lo tshɛ. Jehowa kosangoya oma k’etatelo dia Ɔnande ndjosowa ndo ndjovɔ. Dui sɔ diakayonga ohomba paka l’ɔkɔngɔ w’ɔtɔmbɔkwɛlɔ wa ntondo ndjala. Yeso kosala ndooko dui dia kɔlɔ, koko nde akahombe nsowa ndo mvɔ l’oyango wa mbisha okadimwelo lo ambola wakonyiya Satana ndo nkimɔ oshinga w’etshungwelo waki ohomba dia mfuta kɛnɛ kakashisha anto. (Makɔ 8:31; 1 Pe. 2:21-24) Dui sɔ diakakoke salema paka naka Jehowa aketawɔ ntshika nkokɛ Yeso lo tshanda mɔtshi mbala ka ntondo lo lɔsɛnɔ lande.

Ondo Yeso aki lo nkimanyiya ambeki ande dia vɔ mbika washo lo ɔkɔkɔ waketawɔ Jehowa dia nde mvɔ lo yoho shɔ. * Yeso akeyaka dia mvɔ woho wa nyɔi kɛsɔ kele oko otshi wa kɔlɔ l’otamba w’asui, ayotakanya anto efula. (1 Kɔr. 1:23) Naka ambeki ande ndeka mbidja yimba lo ɔkɔkɔ wa mɛtɛ wakandahombe mvɔ, kete vɔ wayoshihodia kitshimudi ya mɛtɛ ya dui sɔ. (Ngal. 3:13, 14) Oma laasɔ vɔ wayowɔsa oko Oshimbedi awɔ, koko aha oko otshi wa kɔlɔ.

Oyadi ɔkɔkɔ akɔna wakakonya Yeso dia nshila ɛtɛkɛta ɛsɔ, nde akashihodia dia kɛnɛ kakokomɛ kaki etenyi kɛmɔtshi ka lolango la Jehowa le nde. Yema tshitshɛ l’ɔkɔngɔ wa nde nshila ɛtɛkɛta wa l’osambo ɛsɔ, Yeso akate ate: “Diambokotshama!” (Jni. 19:30; Luka 22:37) Eelo, woho wakatshike Jehowa dia nkimanyiya Yeso lo tshanda mɔtshi, akakimanyiya Yeso dia nkotsha tshɛ lo tshɛ awui tshɛ wakandotome dia ndjosala la nkɛtɛ. Dui sɔ diakokimanyiya nto dia nkotsha awui tshɛ wakafundama lo dikambo diande “lo Ɛlɛmbɛ wa Mɔsɛ, lo Amvutshi ndo lo Esambo.”​—Luka 24:44.