Lonyangu ko, etena kakamonge l’ɛnɔnyi dikumi l’ɛmɔtshi, diɔtɔnganelo dia dimɛna diaki lam’asami la Jehowa diakakitakita. Akɛnamaka di’asekami wa la kalasa waki la lotshungɔ laki komonga l’elelo ndo dimi lawɔ lakalangaka monga la lotshungɔ la ngasɔ. Lakafɔnyaka di’ɛlɛmbɛ w’ambutshi ami ndo atɔndɔ w’Akristo wamboleka wotsho, ndo lakafɔnyaka di’awui wa lo nyuma wamboleka wolo. Kaanga mbele ndooko lushi lakamadje taamu ɔnɛ Jehowa ekɔ, lonyuma lami lakayotatɛ nkitakita.

Koko, dimi kɔmbɔla lo nyuma ndo lakakambɛka Jehowa paka yema tshitshɛ. Etena kakamatshɔka l’esambishelo, dimi kondjalɔngɔsɔlaka, diakɔ diele laki l’okakatanu dia ntatɛ ndo ntetemala la sawo. Diakɔ diele, dimi komonga l’etombelo w’ɛlɔlɔ l’esambishelo ndo komonga l’ɔngɛnɔngɛnɔ ndo dui sɔ diakatalekaka fudiɛmi tokanyi ta kɔlɔ. Lakayambola ɔnɛ: ‘Ngande wakoka onto ntetemala nsambisha lomingu la lomingu kana ngɔndɔ la ngɔndɔ lo yoho shɔ?’

Lam’akamonge l’ɛnɔnyi 17, lakonge la nsaki k’efula ka monga la dipanda. Diakɔ diele lakalɔngɛ etshumu ami, lakamɔ oma la ngelo ndo lakoonɔ l’Australie. Etena kakawamɛnyi lotamɔ oma la ngelo,  ambutshi ami waki la lonyangu l’efula. Vɔ wakayakiyanya efula, koko vɔ wakafɔnya ɔnɛ dimi layototetemala la mbekelo yami ya lo nyuma.

L’Australie, lonyuma lami lakaleke nkitakita. Lakɔtɔka nsanganya lo pai. Lakɔtɔ lɔngɛnyi l’esekaseka waki oko dimi, wakalangaka mbɔtɔ losanganya l’otsho ɔmɔtshi, oma laasɔ ntshɔ dia tɔnɔ wanu ndo tɔnɔ lokombe lo waa barɛ l’otsho okina. Etena kohɔmi awui asɔ, dimi shihodiaka dia laki lokolo lɔmɔtshi l’akambo wa mɛtɛ ndo lokolo lokina l’andja ɔnɛ, koko dimi komonga l’ɔngɛnɔngɛnɔ l’ahole akɔ ahende.

Ɛnɔnyi oko ehende l’ɔkɔngɔ, lakahomana la kadiyɛso kɛmɔtshi kele aha la nde mbeya, akakimanyiya dia nkanyiya woho wa lɔsɛnɔ lakamasɛnaka. Lakadjasɛka lo luudu lɔmɔtshi kaamɛ l’akadiyɛso atanu w’enyemba, ndo taketawɔ di’omendji w’otshimbedi la wadɛnde, Tamara ndjodjasɛ la so lo luudu lakɔ l’edja ka lomingu. Etena kakasalaka omɛnde awui wendana l’etshumanelo, Tamara aketshaka wenya kaamɛ la so esekaseka ndo akɔlaka kaamɛ laso. Lakangɛnangɛnaka dui sɔ. Nde akadjaka anto yimba ndo akongaka dui dia wɔdu nsawola la nde. Lakaambe efula dia mɛna onto lele la lonyuma la wolo ko salaka l’anto shɛkɛsɛkɛ ya ngasɔ.

Tamara aki l’osalosalo efula. Anto wakookoyaka ngandji kakandokaka akambo wa mɛtɛ ndo olimu w’esambishelo. Nde aki l’ɔngɛnɔngɛnɔ nɛ dia nde akashaka Jehowa kɛnɛ kakaleke ɔlɔlɔ le nde, koko dimi komonga l’ɔngɛnɔngɛnɔ nɛ dia lakookambɛka yema tshitshɛ. Nde akɛnaka akambo la sso di’ɔlɔlɔ ndo woho wakinde l’ɔngɛnɔngɛnɔ wa mɛtɛ aki la shɛngiya y’efula lo lɔsɛnɔ lami. Ɛnyɛlɔ kande kakakotola yambalo yami lo dui dia mɛtɛ di’ohomba dia l’Afundelo nɛ: Jehowa nangaka dia sho tshɛ mbokambɛ “l’ɔngɛnɔngɛnɔ” ndo la “ekoko w’ɔngɛnɔngɛnɔ.”​—Os. 100:2.

Lakalangaka monga la woho w’ɔngɛnɔngɛnɔ waki la Tamara, koko dia monga la wɔ, lakahombaka nsala etshikitanu ɛmɔtshi wa weke. Akɔshi etena k’otale, koko l’ekomelo lakayotatɛ nsala etshikitanu wa totshitshɛ. Lakayotatɛ ndjalɔngɔsɔla dikambo di’olimu w’esambishelo ndo lakayotatɛ nkamba olimu w’ombatshi mboka wa tshanda tena  la tena. Dui sɔ diakakimanyiya dia minya wɔma waki la mi ndo ndeka monga la dihonga. Oko wakamatakambaka la Bible mbala efula l’esambishelo, mbakamatalekaka nanga esambishelo kakɔ. Kombeta edja, lakayotatɛ nkamba olimu w’ombatshi mboka wa tshanda ngɔndɔ tshɛ.

Lakayotatɛ mbɔtɔ lɔngɛnyi l’anto wele l’ɛnɔnyi wotshikitanyi wakashaka Jehowa kɛnɛ kakaleke ɔlɔlɔ le wɔ ndo wakangɛnangɛnaka mbokambɛ. Ɛnyɛlɔ kawɔ ka dimɛna kakakimanyiya dia menda akambo wakametshaka la ntondo ndo monga la mbekelo y’amɛna ya lo nyuma. Lakayoleka ngɛnangɛna olimu w’esambishelo ndo l’ɔkɔngɔ diko lakayotatɛ nkamba oko ombatshi mboka wa pondjo. Ɔsɔ ekɔ mbala ka ntondo l’ɔkɔngɔ w’ɛnɔnyi efula, kakamonge shikaa, l’ɔngɛnɔngɛnɔ ndo kakamayaoke dimɛna l’etshumanelo.

L’ɔkɔngɔ w’ɔnɔnyi ɔtɔi lakɛnana la Alex, nde aki onto ɔlɔlɔ, aki la losembwe ndo akalangaka Jehowa ndo olimu w’esambishelo. Nde aki okambi wakimanyiya ndo akakambe oko ombatshi mboka l’edja k’ɛnɔnyi esamalo. Alex akakambe l’etena kɛmɔtshi lɛnɛ akiwɔ l’ohomba efula w’apandjudi lo Malawi. Lɛkɔ, nde akatonga kaamɛ la waa misiɔnɛrɛ wakonge la shɛngiya ya dimɛna le nde ndo wakookeketsha dia ntetemala mbetsha wahɔ wa Diolelo lo dihole dia ntondo.

Lo 2003, dimi la Alex takatshukana, ndo oma k’etena kɛsɔ takatetemala nkamba olimu wa lo tena tshɛ. Takakondja wetshelo efula wa diambo ndo Jehowa akatɔtshɔkɔla lo toho efula.

Lo 2009, wakatotome dia tokamba oko waa misiɔnɛrɛ lo Timor-Oriental, wodja wa tshitshɛ wa lo archipel lo Indonésie. Takaambe, takonge l’ɔngɛnɔngɛnɔ ndo takonge la wɔma l’etena kakɔ kaamɛ. Ngɔndɔ tshanu l’ɔkɔngɔ, takakome lo Dili lele kapitalɛ ka wodja.

Wonwelo wakatɔlɔmbɛ dia nsala etshikitanu wa weke lo lɔsɛnɔ laso. Takahombe ndjaekesanyiya la mbekelo y’eyoyo, ɔtɛkɛta, mbo ya ndɛ ndo yoho ya  lɔsɛnɔ ya lɛkɔ. L’esambishelo, mbala efula takɛnaka anto waki wola w’efula, wakeke mukanda yema tshitshɛ kana kombeka mukanda ndo wakahɛnyahɛnyamaka. Ndo takɛnaka anto efula waki l’ekakatanu wa lo demba ndo wa lo yimba l’ɔtɛ w’ata ndo w’awui wa ngala. *

Esambishelo aki dui dia diambo! Ɛnyɛlɔ, mbala kɛmɔtshi lakahomana la ɔna womoto l’ɛnɔnyi 13 lokombo lande Maria laki la lonyangu. * Nyango akavu ɛnɔnyi ɛmɔtshi la ntondo ka laasɔ, ndo nde akɛnanaka la she paka lo pai. L’ɛnyɛlɔ k’ana efula wa lo lɔlɔnga la nde, Maria komonga l’onto lawɔlɔmbɔla lo lɔsɛnɔ. Dimi mbohɔka diaaso dimɔtshi diakandalelaka dia nkɛnɛmɔla tokanyi tande. Koko, dimi koshihodiaka kɛnɛ kakandataka nɛ dia dimi kɔtɛkɛtaka ɔtɛkɛta ande dimɛna. Lakalɔmbɛ Jehowa dia nde kimanyiyami dia dimi mbokeketsha ndo oma laasɔ lakatatɛ mbadiyɛ avɛsa w’ekeketshelo. L’ɛnɔnyi engana wakayelana, lakɛnyi woho wakatshikitanya akambo wa mɛtɛ lɔkɛwɔ, ɛnamelo ndo lɔsɛnɔ la Maria. Nde akabatizama ndo nshi nyɛ nde eka l’ambeki ande ndamɛ Bible. Ɛlɔ kɛnɛ, Maria ekɔ la nkumbo ka woke ka lo nyuma ndo ooka dia nde olangema.

Jehowa ekɔ lo ntshɔkɔla olimu lo Timor-Oriental. Kaanga mbele apandjudi efula wakabatizama paka l’ɛnɔnyi dikumi weke kambeta, efula wekɔ ambatshi mboka, ekambi wakimanyiya kana dikumanyi. Akina wekɔ lo nkamba lo biro k’okadimwelo ndo wekɔ lo nkimanyiya dia ntondja mbo ya ndɛ ya lo nyuma l’ɛtɛkɛta wa lɛnɛ ewɔ. Dimi ngɛnangɛnaka etena kawaɛnami wemba lo nsanganya, wele l’ɔngɛnɔngɛnɔ lo dungi diawɔ ndo watahame lo nyuma.

Lɔsɛnɔ la lo Timor-Oriental lakatshikitana efula la lɔsɛnɔ la l’Australie, koko dimi kɔfɔnyaka ɔnɛ tayonga la lɔsɛnɔ l’ɔngɛnɔngɛnɔ la ngasɔ. Lo tena dimɔtshi, takɔtɔka lo bisi ya tshitshɛ anto efula ndo nse yamboma ndo afuki la djɛsɛ y’oma lo lobingu la lɛkɔ. Nshi mɔtshi, takekaka l’onto ɔmɔtshi Bible lo luudu la tshitshɛ laki la laaladi ndo la mindo l’odihe ndo nkɔkɔ yaketetaka laleso. Kaanga mbaki ekakatanu ɛsɔ, mbala efula lakataka ɔnɛ: ‘Ɔnɛ ekɔ dui dia diambo!’

Lo mbohɔ awui wakete asɔ, lekɔ la lowando le ambutshi ami lo woho wakawasale tshɛ dia mbetshami mboka ya Jehowa ndo sukɛmi, kaanga l’etena kakimi l’okakatanu lam’akimi l’ɛnɔnyi dikumi l’ɛmɔtshi. Tokedi 22:6 mɛnyaka mɛtɛ ka dui sɔ lo dikambo diami. Papa la mama wekɔ l’ofunu lo dikambo diami dimi la Alex; vɔ wekɔ l’ɔngɛnɔngɛnɔ dia mɛna woho wakamba Jehowa la so. Oma lo 2016 takatatɛ nkamba olimu w’otshimbedi lo ɛtshi ka nkɛtɛ ka filialɛ ka Australasie.

Mɛnamaka dia ekɔ wolo mbetawɔ dia l’etena kɛmɔtshi, dimi kɔngɛnangɛnaka olimu w’esambishelo. Kakianɛ dimi loolanga olimu w’esambishelo! Lamboshihodia dia oyadi awui akɔna wakoka komɛmi lo lɔsɛnɔ, ɔngɛnɔngɛnɔ wa mɛtɛ ndjaka paka lo kambɛ Nzambi l’otema ɔtɔi. Lo mɛtɛ, ɛnɔnyi 18 wetshi wakatakambɛka Jehowa dimi la Alex wakonge ɛnɔnyi wakaleke ɔngɛnɔngɛnɔ lo lɔsɛnɔ lami. Kakianɛ lamboshihodia mɛtɛ ka kɛnɛ kakate omembi w’esambo Davidɛ lo dikambo dia Jehowa ate: “Wanɛ tshɛ wayanga eshamelo le yɛ wayɔngɛnangɛna; vɔ wayodaka ekoko w’ɔngɛnɔngɛnɔ tena tshɛ. . . . Ndo wanɛ walanga lokombo layɛ wayɔngɛnangɛna le yɛ.”​—Os. 5:11.