Onde wɛ akeyaka?
Onde wakakambaka l’atɔndɔ wa lo Ɛlɛmbɛ wa Mɔsɛ dia mpembola enongo lo Isariyɛlɛ w’edjedja?
LO TENA dimɔtshi eelo. Tɔshi ɛnyɛlɔ. Eohwelo k’Ɛlɛmbɛ 24:14, 15 mbutaka ɔnɛ: “Tokesake dia mbiva ose olimu wele lo dihombo ndo wele ose wola, oyadi nde ekɔ ɔnanyɔ kana ɔngɛndangɛnda wele lo wodja anyu, lo esomba anyu . . . Naka wɛ hasadi ngasɔ, kete nde ayolelɛ Jehowa lo dikambo diayɛ, ko wɛ ayonga la onongo wa pɛkato.”
Ɛtshi ka diwomba kakawafunde ɔsɛngɔsɛngɔ w’okambi w’ekambɔ
Awui wendana la kilombo ka ngasɔ wakafundama lo ntambe k’esambele N.T.D. Vɔ wakashɔma suke la Ashidɔdɛ. Efundelo ɛsɔ wakafundama ondo lo dikambo di’okambi wa dikambɔ wakawamamatanyɛ ɔnɛ kokimɔ lofulo la ntɔngɔ lakashikikɛma, vɔ wakafundama lo ɛtshi ka diwomba ɔnɛ: “L’ɔkɔngɔ w’okambi ayɛ [ɔnɛ lakɔsɛngasɛnga] nshidiya momba diangɔ dia dinela ambeta nshi ngana, Hoshayahu ɔna Shobay akaye ndo akayɔsa dihɔndɔ di’okambi ayɛ. . . . Asekami tshɛ wakanaka la mi lo yanyi ya tɛɛ wayoshikikɛ dia . . . kɛnɛ kakamate kekɔ mɛtɛ. Dimi bu l’onongo kaanga yema. . . . Naka nguvɛrnɛrɛ atakotsha ɔkɛndɛ ande wa kaloyɛ okambi ande dihɔndɔ diande, kete asale dui sɔ l’ɔtɛ wa kɛtshi! Wɛ hahombe ntshikala ki etena kele okambi ayɛ bu la dihɔndɔ diande.”
Simon Schama lele ombeyi w’ɛkɔndɔ mbutaka dia ɔsɛngɔsɛngɔ ɔsɔ “tetshaka akambo efula aha tsho woho wakashisha okambi wa dikambɔ elongamelo dia vɔ mbokaloyɛ [dihɔndɔ diande]. Vɔ mɛnyaka nto dia ɔnɛ lakasɛngasɛngaka akeyaka awui amɔtshi wendana la ɛlɛmbɛ wa lo Bible, lo yoho ya laande didjango diele lo Akambo w’ase Lɛwi ndo Eohwelo k’Ɛlɛmbɛ diatona diaha nsoya ase wola.”