1, 2. Ngande wele Jehowa la lokaho le so?

JEHOWA ekɔ Nzambi ka lokaho. Ɛngɔ tshɛ kele la so ndja oma le nde. Nde kakanga diangɔ tshɛ dia nɛmɔ dia la nkɛtɛ ndo nde kambaka la diɔ dia nsukɛ lɔsɛnɔ. (Os. 104:13-15; Han. 2:8) Diɛsɛ la Bible, sho mbeyaka woho wakakambaka Jehowa lo tena dimɔtshi la diangɔ dia nɛmɔ sɔ lo yoho ya dihindo dia nkotsha ehomba w’ekambi ande.

² Ɛnyɛlɔ, Jehowa akasha wodja w’Isariyɛlɛ mana ndo ashi etena kakiwɔ l’oswe wa shɛnga ɛnɔnyi 40. (Eto. 16:35) Diakɔ diele, vɔ waki la ɛngɔ tshɛ kakiwɔ l’ohomba. (Nɛh. 9:20, 21) L’ɔkɔngɔ diko, Jehowa akasha omvutshi Elisha wolo wa mfudia yema y’esɔ yaki la wadi aki odo la kɔlamelo. Woshasha ɔsɔ w’oma le Nzambi wakookimanyiya dia mfuta abasa waki la nde ndo ntshikala la yema ya falanga dia nde ndjasɛnya ndo nsɛnya anande. (2 Ku. 4:1-7) Ndo l’ekimanyielo ka Jehowa, Yeso akasha anto mbo ya ndɛ lo yoho ya dihindo ndo kaanga falanga etena kaki dui sɔ ohomba.​—Mat. 15:35-38; 17:27.

3. Kakɔna kayotɔsɛdingola lo sawo nɛ?

 ³ Jehowa koka nkamba la ɛngɔ tshɛ kasɔnande dia nsukɛ ditongami diande. Koko nde nɔmbaka ekambi ande dia nkimɔ kɛnɛ kakokawɔ nkimɔ dia nsukɛ olimu wakambema l’okongamelo ande. (Eto. 36:3-7; adia Tokedi 3:9.) Lande na kalongamɛ Jehowa dia sho mbosha diangɔ diaso dia nɛmɔ diakandatosha? Ngande wakasukɛka ekambi wa Jehowa wa lo nshi yakafundamaka Bible olimu ande? Ngande wakamba okongamelo la falanga yakimɔma ɛlɔ kɛnɛ? Sawo nɛ diayokadimola ambola asɔ.

4. Kakɔna kɛnyaso Jehowa etena kasukɛso olimu ande?

⁴ Sho mbishaka Jehowa nɛ dia sho mbolangaka ndo mbɔngɛnangɛnaka. Etena kakanaso yimba lo kɛnɛ tshɛ kakatosalɛ Jehowa, etema aso totshutshuyaka dia nsala dui dimɔtshi. Nkumekanga Davidɛ akoke woho akɔ waanɛ etena kakandalembetshiya kɛnɛ kaki ohomba dia mbika tɛmpɛlɔ. Davidɛ akate dia ɛngɔ tshɛ kakondjaso ndja oma le Jehowa ndo ɔnɛ ɛngɔ tshɛ kashaso Jehowa, nde mbakatoshatɔ.—Adia 1 Ɛkɔndɔ 29:11-14.

5. Ngande watetsha Bible ɔnɛ nkimɔ weshasha l’otema ɔtɔi ekɔ etenyi k’ohomba k’ɔtɛmwɛlɔ wa mɛtɛ?

⁵ Ndo nto sho mbishaka Jehowa, nɛ dia ɔsɔ ekɔ yoho mɔtshi ya mbɔtɛmɔla. Lo ɛnɛlɔ kɛmɔtshi, ɔpɔstɔlɔ Joani akoke ekambi wa Jehowa wa l’olongo wata ɔnɛ: “Wɛ Jehowa Nzambi kaso, wɛ kasungana nongola lotombo, kɛnɛmɔ ndo wolo, nɛ dia wɛ kakatonge diangɔ tshɛ, ndo oma lo lolango layɛ mbakadionge ndo mbakadiatongama.” (Ɛny. 4:11) Eelo, Jehowa kasungana nongola lotombo tshɛ ndo kɛnɛmɔ, diakɔ diele sho nangaka mbosha kɛnɛ koleki ɔlɔlɔ. Lo tshimbo ya Mɔsɛ, Jehowa akadjangɛ wodja w’Isariyɛlɛ dia salaka fɛtɛ shato l’ɔnɔnyi. Etenyi kɛmɔtshi k’ɔtɛmwɛlɔ awɔ lo fɛtɛ shɔ kakendanaka la nkimɔ weshasha lo dikambo dia Jehowa. Wakatɛ anto diaha “mɛnama la ntondo ka Jehowa anya hwe.” (Eoh. 16:16) Ndo ɛlɔ kɛnɛ, etenyi kɛmɔtshi k’ohomba k’ɔtɛmwɛlɔ aso mendanaka la nkimɔ weshasha l’otema ɔtɔi. Lo nsala ngasɔ, sho mɛnyaka dia tekɔ lo mbɔsa olimu wasala okongamelo wa Jehowa la nɛmɔ ndo mbosukɛka.

6. Lande na kele ekɔ dimɛna dia sho nkimɔ weshasha? (Enda osato wele lo mbɔtwɛlɔ.)

⁶ Ekɔ ohomba dia sho monga la lokaho, koko aha nongolaka tsho. (Adia Tokedi 29:21.) Tɔshi dia ambutshi wambosha ɔnawɔ la dikɛnda yema ya falanga, ko nde ambɔsa falanga mɔtshi oma lawɔ ambosombɛ ambutshi ande woshasha ɔmɔtshi. Ngande wayoyaoka ambutshi etena kayowɛna woshasha ande? Kana tɔshi dia ombatshi mboka w’ɔlɔngɔlɔngɔ waakadjasɛ l’ambutshi ande ambowasha falanga mɔtshi dia vɔ mfuta luudu kana nsomba mbo ya ndɛ dikambo dia nkumbo. Ondo ambutshi ande konongamɛ dia nde nsala dui sɔ, koko wambolongola woshasha akɔ. Lande na? Nɛ dia ɔsɔ ekɔ yoho mɔtshi ya mɛnya dia nde ekɔ la lowando lo kɛnɛ tshɛ kawosalɛwɔ. Woho akɔ waamɛ mbele, Jehowa mbeyaka dia ekɔ dimɛna dia sho nkimɔ weshasha oma lo diangɔ diaso dia nɛmɔ.

7, 8. Ngande wakatshike ekambi wa Jehowa wa lo nshi yakafundamaka Bible ɛnyɛlɔ lo nkimɔ weshasha a) dikambo di’awui amɔtshi shikaa? b) dia nsukɛ olimu ande?

⁷ L’ekimanyielo ka Bible, sho mbeyaka di’ekambi wa Jehowa wakakimɔka weshasha dia nsukɛ olimu ande. Lo tena dimɔtshi, vɔ wakakimɔka weshasha dia nsala awui amɔtshi shikaa. Ɛnyɛlɔ, Mɔsɛ akakeketsha ase Isariyɛlɛ dia nkimɔ weshasha lo dikambo dia wokelo wa tabɛrnaklɛ. L’ɔkɔngɔ wa laasɔ, nkumekanga  Davidɛ akasale woho akɔ waamɛ lo dikambo dia wokelo wa tɛmpɛlɔ. (Eto. 35:5; 1 Ɛk. 29:5-9) Lo nshi yakalɔmbɔlaka nkumekanga Jɛhɔashi, ɛlɔmbɛdi wakalɔngɔsɔla tɛmpɛlɔ diɛsɛ la falanga yakakimɔka anto. (2 Ku. 12:4, 5) Lo ntambe ka ntondo, Akristo wakoke dia ndjala kaki la Judeya ndo anangɛso waki l’ohomba w’ekimanyielo. Diakɔ diele Okristo tshɛ akakimɔ kɛnɛ kakinde l’akoka dia tomɛ anangɛso wa lɛkɔ.​—Ets. 11:27-30.

⁸ Ndo nto, ekambi wa Jehowa wakakimɔka falanga dia nsukɛ wanɛ wakalɔmbɔlaka olimu ande. Ɛnyɛlɔ, lo ndjela Ɛlɛmbɛ wa Mɔsɛ, ase Lɛwi komonga l’etenyi k’okitɔ oko wakidiɔ le waoho akina. Diakɔ diele, ase Isariyɛlɛ akina wakakimɔka etenyi ka dikumi oma lo kɛnɛ kaki la wɔ dia mbisha ase Lɛwi. Dui sɔ diakakimanyiyaka ase Lɛwi dia ndeka mbidja yimba l’olimu awɔ lo tabɛrnaklɛ. (Wal. 18:21) Woho akɔ waamɛ mbele, wamato waki la lokaho wakakimɔ kɛnɛ kaki la wɔ dia nsukɛ Yeso ndo apɔstɔlɔ ande.​—Luka 8:1-3.

9. Oma lende akayaka weshasha wakakimɔmaka lo nshi y’edjedja?

⁹ Weshasha ɛsɔ wakayaka oma lo diangɔ diotshikitanyi. Ondo ase Isariylɛ wakakimɔ weshasha lo dikambo dia wokelo wa tabɛrnaklɛ wakakimɔ diangɔ dia nɛmɔ diakaye la wɔ oma l’Edjibito. (Eto. 3:21, 22; 35:22-24) Lo ntambe ka ntondo Akristo amɔtshi wakasondja diangɔ diawɔ, ɛnyɛlɔ dikambɔ kana mvudu ndo wakatɔlɛ apɔstɔlɔ falanga. Oma laasɔ apɔstɔlɔ wakakambe la falanga yakɔ dia nkimanyiya anangɛso l’akadiyɛso waki l’ohomba w’ekimanyielo. (Ets. 4:34, 35) Akristo akina wakombaka falanga mbala la mbala dia ndjoyikimɔ dia nsukɛ olimu. (1 Kɔr. 16:2) Diakɔ diele, oma le wanɛ wakaleke ɔngɔnyi tshɛ polo le wanɛ wakaleke wola onto tshɛ akakokaka nkimɔ yangɔ mɔtshi.​—Luka 21:1-4.

10, 11. a) Ngande wakokaso mbokoya lokaho l’ekambi wa Jehowa waki lo nshi yakafundamaka Bible? b) Ngande wayaokayɛ lo kɛnɛ kendana la nsukɛ olimu wa Diolelo?

¹⁰ Ɛlɔ kɛnɛ, ndo sho la wɔ koka nɔmbama dia nkimɔ weshasha dia nsala dui dimɔtshi shikaa. Mbeyaka monga ko etshumanelo kanyu kekɔ lo ndjakongɛ dia nɔngɔsɔla Mbalasa kanyu ka Diolelo kana mbika k’oyoyo. Kana mbeyaka monga ko Bɛtɛlɛ ka lo dihole dienyu pombaka nɔngɔsɔma. Mbeyaka monga nto ko tekɔ l’akoka wa nkimɔ falanga dikambo dia adepasɛ wasalema lo losanganya la woke. Kana mbeyaka monga ko anangɛso wa lo dihole dikina wekɔ lo diɛnɛ la mpokoso k’oma lo diangɔ diakatongama ndo wekɔ l’ohomba w’ekimanyielo kaso. Weshasha aso sukɛka nto waa misiɔnɛrɛ, ambatshi mboka wa laande, emendji w’etshimbedi, wanɛ wakamba lo mbalasa kalɔmbɔla olimu wa l’andja w’otondo ndo wanɛ wele lo filialɛ ya l’andja w’otondo. Etshumanelo kanyu koka nto tomaka weshasha mbala la mbala dia nkimanyiya lo wokelo wa Mbalasa ya nsanganya ya weke ndo Mbalasa ya Diolelo lo dikambo di’anangɛso wa l’ahole akina.

¹¹ Onto tshɛ la l’atei aso kokaka kimɔka ɛngɔ kɛmɔtshi dia nsukɛ olimu wakamba okongamelo wa Jehowa lo nshi y’ekomelo nyɛ. Weshasha efula wakimɔma haweyama onto lakimɔ. Etena kadjaso falanga lo tɔshɛtɛshɛtɛ ta weshasha tele lo Mbalasa ka Diolelo kana kakimɔso weshasha lo tshimbo ya jw.org, hatoyange di’anto akina mbeya lofulo lambotokimɔ. Ko kayotota naka wɛ fɔnyaka dia weshasha ayɛ wamboleka yema tshitshɛ? Kɛnɛ kele mɛtɛ ele, weshasha efula walongola okongamelo ndjaka oma lo yema tshitshɛ yakimɔ onto l’onto oleki weshasha w’efula wakimɔ anto angana ato. Kaanga anangɛso wakimɔ falanga yoleki yema tshitshɛ wekɔ lo mbokoya Akristo wa lo  ntambe ka ntondo wa la Makɛdɔniya. Vɔ waki “wola . . . w’efula” koko vɔ wakasɛngasɛnga dia monga la lotshungɔ dia nkimɔ weshasha ndo oma laasɔ wakakimɔ la lokaho tshɛ.​—2 Kɔr. 8:1-4.

12. Ngande wasala okongamelo la wolo dia nkamba la weshasha lo yoho yoleki dimɛna?

¹² Olui-walɔmbɔla ekɔ la kɔlamelo ndo kɛsɔ lo woho wakambawɔ la weshasha. (Mat. 24:45) Vɔ nɔmbaka dia mbɔsa tɛdikɔ t’amɛna ndo vɔ kongɛka la diewo tshɛ woho wa nkamba la falanga. (Luka 14:28) Lo nshi yakafundamaka Bible, apami wa kɔlamelo wakalɔmbɔlaka woho wakawakambaka la weshasha, wakasalaka la wolo dia vɔ nkamba la wɔ paka lo dikambo di’ɔtɛmwɛlɔ wa Jehowa. Ɛnyɛlɔ, Ɛzɛra akakalola la Jɛrusalɛma la diangɔ dia nɛmɔ di’oma le nkumekanga ka Pɛrɛsiya ndo paonyi, mfɛsa la diangɔ dikina dia nɛmɔ diakoka monga ɛlɔ kɛnɛ la nɛmɔ diolekanyi dɔlara miliyɔ 100. Ɛzɛra akɔshi dia weshasha ɛsɔ waki lo dikambo dia Jehowa. Diakɔ diele nde akasha alako wa shikaa dia nkokɛ weshasha akɔ lam’ele vɔ waki lo bɛtshi dia nkɛtɛ dia waale. (Ɛzr. 8:24-34) L’ɔkɔngɔ w’ɛnɔnyi efula, ɔpɔstɔlɔ Pɔɔlɔ akakɔngɔla falanga dia nkimanyiya anangɛso waki lo dihombo la Judeya. Nde akayashikikɛ dia wanɛ wakakambaka la falanga yakɔ “nsala akambo tshɛ la losembwe, aha tsho lo washo wa Jehowa, koko ndo lo washo w’anto.” (Adia 2 Kɔrɛtɔ 8:18-21.) Ɛlɔ kɛnɛ, okongamelo aso mbokoyaka Ɛzɛra la Pɔɔlɔ ndo kambaka la weshasha la diewo di’efula.

13. Lande na kosadi okongamelo etshikitanu ɛmɔtshi atete edja?

¹³ Nkumbo kokaka nsala etshikitanu lo woho wakambawɔ la falanga yawɔ diaha vɔ salaka adepasɛ woleki kɛnɛ kakondjawɔ. Kana vɔ koka nyanga toho ta mbetɛ lɔsɛnɔ lawɔ ɔsɛlɛngɛ dia vɔ nsala akambo efula lo dikambo dia Jehowa. Ngasɔ mbasala ndo okongamelo wa Jehowa. Atete edja, dikongelo efula di’amɛna diakasalema ndo l’etena kɛsɔ falanga yakatombaka efula ndeka nyɛ yakɔtɔka. Ɔnkɔnɛ l’ɛnyɛlɔ ka nkumbo, okongamelo akayange toho ta nkitshakitsha adepasɛ ndo nkitshakitsha elimu dia monga l’akoka wa nsala akambo efula wakokawɔ nsala la weshasha anyu wa la lokaho.

14-16. a) Ngande wakambawɔ la weshasha wakimɔyɛ? b) Ngande wakokimanyiya dikongelo sɔ?

¹⁴ Anto efula waya l’ɔtɛmwɛlɔ ɔnɛ ɛnɔnyi efula mbutaka ɔnɛ nshi nyɛ tamboleka nkondja weshasha oma l’okongamelo ndeka nshi ya ntondo. Taya la jw.org ndo JW Télédifusion. Taya la Ekadimwelo k’andja w’oyoyo l’ɛtɛkɛta efula. Lo 2014/2015, losanganya la nshi shato laki l’ɔtɛ a dui ɔnɛ: “Nyotetemale nyanga ntondo Diolelo diaki Nzambi!” Losanganya la wedja efula lakasalema lo asɛkɛ wa ponde woleki  weke lo esomba 14 wa l’andja w’otondo. Onto tshɛ lakɔtɔ aki l’ɔngɛnɔngɛnɔ dia monga lɔkɔ!

¹⁵ Anto efula wakɛnya lowando lele la wɔ l’ɔtɛ wa weshasha w’oma l’okongamelo wa Jehowa ɛsɔ. Ɛnyɛlɔ, wadi l’omi amɔtshi wakamba l’Asie wakafunde ɔnɛ: “Wakatotome l’osomba wa tshitshɛ. Takayaokaka lo tena dimɔtshi oko tekɔ lo shɔpɔ ndo takohɛka esadi eto ohomba w’olimu wa Jehowa. Koko l’ɔkɔngɔ wa sho menda dikongelo diotshikitanyi dia JW Télédifusion, takohɔka dia tekɔ anto wa lo nkumbo k’onto l’ɔnango ka l’andja w’otondo. Anangɛso l’akadiyɛso wa ngandji wa lo dihole diodjashiso ngɛnangɛnaka JW Télédifusion efula. Mbala efula sho mbaokaka wata ɔnɛ l’ɔkɔngɔ wa vɔ menda ekongelo ka ngɔndɔ la ngɔndɔ, vɔ ndjaokaka suke l’ase Olui-walɔmbɔla. Kakianɛ vɔ wamboleka monga l’ofunu dia monga anto wa l’okongamelo wa Nzambi.”

¹⁶ L’andja w’otondo, Mbalasa ya Diolelo ndekana 2 500 yambokama kana yambɔlɔngɔsɔma. Ase etshumanelo ka Honduras wakate dia vɔ wakɛnaka oko lo dɔ dia monga la Mbalasa ka Diolelo kawɔ hita, koko ɛlɔ kɛnɛ dui sɔ diambosalema. Vɔ wakafunde ɔnɛ: “Tekɔ l’ɔngɛnɔngɛnɔ wa mamba dia monga anto wa lo nkumbo ka Jehowa ka l’andja w’otondo ndo ngɛnangɛna la nkumbo kaso ka dimɛna k’onto l’ɔnango ka l’andja w’otondo.” Anto efula ndjaokaka woho akɔ waamɛ etena kalongolawɔ Bible ndo ekanda ekina l’ɔtɛkɛta awɔ, etena kawakimanyiya anangɛso l’akadiyɛso l’ɔkɔngɔ wa mpokoso k’oma lo diangɔ diakatongama kana etena kɛnawɔ etombelo w’amɛna wonga l’esambishelo ka l’ahole watanema anto efula kana ka lo sɛkɛ l’ɛtshi kawɔ ka nkɛtɛ.

17. Ngande weyaso dia Jehowa ekɔ lo nsukɛ okongamelo ande ɛlɔ kɛnɛ?

¹⁷ Anto efula wele bu Ɛmɛnyi wa Jehowa hawokoke mbeya woho wasalaso akambo asɔ tshɛ lo nkamba paka la weshasha wa la lolango. Ɔnɔmbɔdi ɔmɔtshi wa kɔpanyi ka woke akatshu tenda dihole diaso dimɔtshi diatondjawɔ ekanda. Nde akambe lo mbeya ɔnɛ elimu tshɛ wekɔ lo kambema oma le anto wakayakimɔ la lolango, l’ekimanyielo ka weshasha wa la lolango ndo aha la nkongɛ elimu ɛmɔtshi wahomba tondjaka falanga. Nde akate dia kɛnɛ kasalaso hakoke salema. Sho mbetawɔka dui sɔ! Sho mbeyaka dia awui asɔ wekɔ lo salema paka nɛ dia Jehowa ekɔ lo nsukɛ olimu akɔ.​—Jɔbɔ 42:2.

18. a)  Ɛtshɔkɔ akɔna wakondjaso etena kakimɔso weshasha dia nsukɛ Diolelo? b) Ngande wakokaso mbetsha anaso ndo eyoyo dia nsala woho akɔ wamɛ?

¹⁸ Jehowa toshaka nɛmɔ ndo diaaso dia nsukɛ olimu wa woke wa Diolelo. Nde toshikikɛka dia naka sho nsala ngasɔ, kete nde ayotɔtshɔkɔla. (Mal. 3:10) Jehowa akalake dia naka sho monga la lokaho, kete awui aso wayolowana. (Adia Tokedi 11:24, 25.) Ndo nto nde totɛka ɔnɛ tayonga l’ɔngɛnɔngɛnɔ etena kashaso nɛ dia “ɔngɛnɔngɛnɔ waya lo mbisha ndeka wa nongola.” (Ets. 20:35) Oma lo kɛnɛ kataso ndo kasalaso, sho koka mbetsha anaso ndo eyoyo woho wakokawɔ vɔ la wɔ nkimɔ weshasha dikambo di’olimu ɔsɔ ndo nkondja ɛtshɔkɔ efula.

19. Ngande wambokokeketsha sawo nɛ?

¹⁹ Ɛngɔ tshɛ kele la so ndja oma le Jehowa. Etena kawoshaso kɛnɛ kakandatosha, sho mɛnyaka dia sho mbookaka ngandji ndo mbɔsaka kɛnɛ tshɛ kakandasale lo dikambo diaso la nɛmɔ. (1 Ɛk. 29:17) Etena kakakimɔka ase Isariyɛlɛ weshasha dia mbika tɛmpɛlɔ, vɔ “wakangɛnangɛna dia nkimɔ weshasha wa la lolango ɛsɔ, nɛ dia vɔ wakasha Jehowa weshasha wa la lolango ɛsɔ la otema ɔtɔi.” (1 Ɛk. 29:9) Ɔnkɔnɛ, nyɛsɔ sho la wɔ totetemale ngɛnangɛna ndo monga l’ɔlɔ etena kashaso Jehowa kɛnɛ kakandatosha.