Kaamɛ ka dimɛna ndo Eohwelo
“Ande dimɛna ndo ande ɔlɔ dia . . . mbidjasɛ kaamɛ lee!”—OS. 133:1.
1, 2. Lo 2018, dikambo diakɔna diayotokimanyiya dia monga kaamɛ lo yoho ya laande, ndo lande na? (Enda osato wele lo mbɔtwɛlɔ.)
LO Ngɔndɔ ka sato 31, 2018, miliyɔ y’anto wa l’andja w’otondo wayotshɔ dia tosala dikambo dimɔtshi diasalema paka mbala ɔtɔi l’ɔnɔnyi. L’ɔkɔngɔ wa ɛɔtwɛlɔ ka wonya, Ɛmɛnyi wa Jehowa ndo anto akina efula, wayosangana dia mbohɔ olambo wakakimɔ Yeso lo dikambo diaso. Ɔnɔnyi tshɛ, Eohwelo ka nyɔi ka Yeso kimanyiyaka anto dia monga kaamɛ lo yoho ya diambo oleki dui diakɔna tshɛ diasalema la nkɛtɛ.
2 Jehowa nde la Yeso ngɛnangɛnaka efula etena kɛnawɔ miliyɔ y’anto watshɔ lo dikambo dia laande sɔ lo wenya wotshikitanyi l’andja w’otondo. Bible mɛnyaka dia vɔ wekɔ “olui a woke w’anto wele ndooko onto lakoka mbadia, oma lo wedja tshɛ, oma lo waoho tshɛ ndo weho w’anto tshɛ ndo oma l’ɛtɛkɛta tshɛ,” wahangɔhangɔ ɔnɛ: “Panda kaso ndja oma le Nzambi kaso lodjashi lo kiti ka lowandji ndo oma le Ɔna Ɔkɔkɔ.” (Ɛny. 7:9, 10) Ekɔ dui dia dimɛna efula woho wele ɔnɔnyi tshɛ lo Eohwelo, anto efula tombolaka Jehowa ndo Yeso l’ɔtɛ w’awui wa weke wakawasale!
3. Ambola akɔna wayotokondja ekadimwelo lo sawo nɛ?
3 Lo sawo nɛ, wɛ ayokondja ekadimwelo wa ambola anɛi anɛ: 1) Ngande wakokami ndjalɔngɔsɔla dikambo dia Eohwelo dia dimi tokondja wahɔ oma lɔkɔ? 2) Lo toho takɔna takimanyiya Eohwelo ekambi wa Nzambi tshɛ dia monga kaamɛ? 3) Akokami nsala dia nkeketsha kaamɛ kele lam’asa ekambi wa Nzambi? 4) Onde Eohwelo k’ekomelo kayoyala? Naka eelo, l’etena kakɔna?
NGANDE WAKOKASO NDJALƆNGƆSƆLA DIKAMBO DIA EOHWELO NDO NKONDJA WAHƆ LO MBƆTƆ LƆKƆ?
4. Lande na kele ekɔ ohomba sho monga lo Eohwelo?
4 Lande na kele ekɔ ohomba sho monga lo Eohwelo? Ɔkɔkɔ ɔmɔtshi ele, wɔtwɛlɔ wa lo nsanganya ekɔ yoho mɔtshi yatɛmɔlaso Jehowa. Sho koka monga l’eshikikelo dia Jehowa ndo Yeso mɛnaka onto tshɛ lasala la wolo dia mbɔtɔ lo losanganya loleki ohomba la l’ɔnɔnyi lɔsɔ. Sho nangaka dia Jehowa ndo Yeso mɛna dia tayonga lo Eohwelo, onyake tekɔ l’okakatanu woleki wolo. Etena kɛnyaso oma l’etsha aso dia nsanganya yaso yekɔ ohomba le so, sho mbishaka Jehowa ɔkɔkɔ okina wa nde nama lokombo laso lo “dibuku dia eohwelo.” Dibuku sɔ mbelamɛka nto ɔnɛ “dibuku dia lɔsɛnɔ.” Diɔ diekɔ la nkombo y’anto tshɛ walanga Jehowa dia mbasha lɔsɛnɔ la pondjo.—Mal. 3:16; Ɛny. 20:15.
5. Lo mingu ya la ntondo ka Eohwelo, ngande wakokayɛ “ntetemal[a] ndjasɛdingola dia mbeya kana [wɛ] ekɔ lo mbetawɔ”?
5 Lo mingu ya la ntondo ka Eohwelo, sho kokaka mbɔsa etena dia nɔmba ndo nkana yimba efula lo kɛnɛ kendana la woho wele diɔtɔnganelo diasaso la Jehowa. (Adia 2 Kɔrɛtɔ 13:5.) Ɔpɔstɔlɔ Pɔɔlɔ akatɛ Akristo ate: “Nyotetemale ndjasɛdingola dia mbeya kana nyekɔ lo mbetawɔ.” Ngande wakokaso nsala dui sɔ? Sho koka ndjambola ɔnɛ: ‘Onde dimi mɛtɛ mbetawɔka dia paka okongamelo ɔnɛ oto mbakasɔnɛ Jehowa dia nsala lolango lande? Onde lekɔ lo nsala kɛnɛ tshɛ kakokami nsala dia nsambisha lokumu l’ɔlɔlɔ ndo mbetsha? Onde etsha ami mɛnyaka dia dimi mbetawɔka mɛtɛ dia tekɔ lo nsɛna lo nshi y’ekomelo ndo ɔnɛ ekomelo k’ɛlɔmbwɛlɔ ka Satana kaya suke? Onde lakayaɛkɛ le Jehowa ndo le Yeso oko wakamasalaka etena kakamatatɛ kambɛ Jehowa?’ (Mat. 24:14; 2 Tim. 3:1; Hɛb. 3:14) Nkana yimba lo dikambo dia ekadimwelo wa ambola asɔ ayotokimanyiya dia ‘ntetemala mɛnya’ weho w’anto weso.
6. a) Naa yoho yaamɛ yakokaso nkondja lɔsɛnɔ la pondjo? b) Ngande wayalɔngɔsɔla ekumanyi kɛmɔtshi dikambo dia Eohwelo ɔnɔnyi tshɛ, ndo ngande wakokayɛ nsala woho akɔ waamɛ?
6 Yoho mɔtshi yakokayɛ ndjalɔngɔsɔla dikambo dia Eohwelo ele mbadia ndo nkana yimba lo asawo walembetshiya lande na kele dui sɔ ohomba efula. (Adia Joani 3:16; 17:3.) Yoho yaamɛ yakokaso nkondja lɔsɛnɔ la pondjo ele mbeya Jehowa ndo monga la mbetawɔ le Ɔnande, Yeso. Dia ndjalɔngɔsɔla dikambo dia Eohwelo, sho koka nsɔna asawo wayotokimanyiya dia ndeka ndjasukanya la wɔ. Kɛsɔ kasala ɔnangɛso ɔmɔtshi laya ekumanyi edja efula. L’edja k’ɛnɔnyi efula, nde tshumanyaka asawo wa Tshoto y’Etangelo watɛkɛta dikambo dia Eohwelo ndo ngandji kakatɛnya Jehowa nde la Yeso. Lo mingu ya la ntondo ka Eohwelo, nde mbadiaka asawo asɔ nto ndo kanaka yimba lo woho wele dikambo sɔ ohomba efula. Lo tena dimɔtshi, nde kotshaka sawo ɔtɔi kana ahende l’asawo wakandatshumanya. Ndo nto, nde mbadiaka ndo kanaka yimba efula lo dikambo dia wadielo wa Bible wendana la Eohwelo. Ekumanyi kɛsɔ mbutaka ɔnɛ lo nsala awui asɔ tshɛ, nde mbekaka awui w’eyoyo ɔnɔnyi tshɛ. Kɛnɛ koleki ohomba ele, wekelo ande mbokimanyiyaka dia ndeka mboka Jehowa la Yeso ngandji. Naka wɛ mbeka lo yoho shɔ, kete ndo wɛ la wɔ ayoleka mboka Jehowa la Yeso ngandji. Ndo nto, wɛ ayoleka monga la lowando l’ɔtɛ wa kɛnɛ kakawasale ndo wɛ ayoleka nkondja wahɔ oma lo Eohwelo.
EOHWELO TOKIMANYIYAKA DIA MONGA KAAMƐ
7. a) Lo dikambo diakɔna diakalɔmbɛ Yeso l’otsho wa Dambo dia dikɔlɔ dia Nkumadiɔndjɔ dia ntondo? b) Kakɔna kɛnya dia Jehowa akakadimola dɔmbɛlɔ dia Yeso?
7 L’otsho wa Dambo dia dikɔlɔ dia Nkumadiɔndjɔ dia ntondo, Yeso akasale dɔmbɛlɔ dia laande. Nde akalɔmbɛ lo dikambo dia kaamɛ k’ohomba kele lam’asande la She. Yeso akalɔmbɛ nto di’ambeki ande tshɛ monga kaamɛ woho akɔ. (Adia Joani 17:20, 21.) Aha la taanu, Jehowa akakadimola dɔmbɛlɔ di’Ɔnande la ngandji sɔ. Oleki nsanganya kina tshɛ, Eohwelo mɛnyaka hwe dia Ɛmɛnyi wa Jehowa wekɔ kaamɛ. Lushi lɔsɔ, miliyɔ y’anto wa lo wedja efula, wele la nkoho yotshikitanyi sanganaka kaamɛ l’andja w’otondo ndo mɛnyaka dia vɔ mbetawɔka ɔnɛ Jehowa mbakatome Ɔnande. L’ahole amɔtshi, ekɔ dui dia wolo efula di’anto wele la nkoho y’alemba yotshikitanyi nsangana kaamɛ lo nsanganya y’ɔtɛmwɛlɔ kana naka vɔ nsala dui sɔ, anto akina mbutaka ɔnɛ bu dimɛna. Koko aha ngasɔ mbata Jehowa la Yeso. Le wɔ, woho wongaso kaamɛ lo Eohwelo ekɔ dui dia dimɛna efula.
8. Losango lakɔna lakatɛ Jehowa Ɛzɛkiyɛlɛ?
8 Oko weso ekambi wa Jehowa, bu dui dia diambo lo woho weso kaamɛ ngasɔ. Jehowa akate dia kaamɛ kɛsɔ lo losango lakandatɛ Ɛzɛkiyɛlɛ. Nde akatɛ Ɛzɛkiyɛlɛ dia mbɔsa totenyi t’esongo tohende, tshenyi mɔtshi “dikambo dia Juda” ndo kina “dikambo dia Yɔsɛfu,” ko tisanganya dia tɔ monga tshenyi y’osongo tshɔi. (Adia Ɛzɛkiyɛlɛ 37:15-17.) Sawo dia “Ambola w’oma le ambadi” diakatondjama lo Tshoto y’Etangelo ya Ngɔndɔ k’esambele 2016 akalembetshiya ɔnɛ: “Lo tshimbo y’omvutshi ande Ɛzɛkiyɛlɛ, Jehowa akewoya ɔnɛ wodja ande wakahombe nkalola lo Nkɛtɛ ya Daka ndo ɔnɛ vɔ wakahombe nyomonga kaamɛ oko wodja ɔtɔi nto. Prɔfɛsiya kɛsɔ kakewoya nto ɔnɛ wanɛ watɛmɔla Nzambi lo nshi y’ekomelo pombaka monga kaamɛ oko wodja ɔtɔi.”
9. Ɔnɔnyi tshɛ lo Eohwelo, ngande wɛnaso kaamɛ kakatama lo prɔfɛsiya k’Ɛzɛkiyɛlɛ?
9 Ntatɛ lo 1919, Jehowa akasale di’akitami ndjakongɛmaka yema yema nto ndo dia vɔ monga kaamɛ nto. Vɔ waki oko tshenyi y’osongo “dikambo dia Juda.” Oma laasɔ, anto efula wele l’elongamelo ka nsɛna pondjo pondjo la nkɛtɛ wakatatɛ nsangana kaamɛ l’akitami. Anto asɔ wele l’elongamelo ka ndjɔsɛna la nkɛtɛ wekɔ oko tshenyi y’osongo “dikambo dia Yɔsɛfu.” Jehowa akalake dia nkakatanya totenyi t’esongo tohende tɔsɔ lo “tshenyi tshɔi” lo anya ande. (Ɛzk. 37:19) Nde akasale di’akitami ndo “ɛkɔkɔ ekina” monga “olui 1.” (Jni. 10:16; Zɛk. 8:23) Ɛlɔ kɛnɛ, elui akɔ ehende wekɔ kaamɛ ndo wekɔ lo kambɛ Jehowa kaamɛ. Ndo vɔ wekɔ la Nkumekanga ɔtɔi, Yeso Kristo, lelamɛ lo prɔfɛsiya ka Ɛzɛkiyɛlɛ “okambi [wa Nzambi] Davidɛ.” (Ɛzk. 37:24, 25) Ɔnɔnyi tshɛ lo Eohwelo, sho sanganaka kaamɛ dia mbohɔ nyɔi ka Yeso, sho mɛnaka kaamɛ kele l’elui ɛsɔ ehende oko wakadiatama lo tshimbo y’Ɛzɛkiyɛlɛ. Ko kakɔna kakoka onto tshɛ la l’atei aso nsala dia nama ndo nkeketsha kaamɛ kele lam’asa ekambi wa Nzambi?
KAKƆNA KAKOKA ONTO TSHƐ LA L’ATEI ASO NSALA DIA NKEKETSHA KAAMƐ?
10. Ngande wakokaso nkeketsha kaamɛ kele lam’asa ekambi wa Nzambi?
10 Naa yoho ya ntondo yakokaso nkeketsha kaamɛ kele lam’asa ekambi wa Nzambi? Lo nsala la wolo dia monga l’okitshakitsha. Etena kaki Yeso la nkɛtɛ, nde akatɛ ambeki ande dia vɔ pombaka monga l’okitshakitsha. (Mat. 23:12) Mbala efula anto wa l’andja ɔnɛ ndjaɔsaka dia vɔ ndeka anto akina. Naka tekɔ l’okitshakitsha, kete tayɔlɛmiya anangɛso walɔmbɔla l’etshumanelo ndo tayokitanyiya ɛlɔmbwɛlɔ kawɔ. Paka lo nsala ngasɔ mbakoka etshumanelo monga kaamɛ. Kɛnɛ koleki ohomba ele, naka sho ntetemala monga l’okitshakitsha, kete tayɔngɛnyangɛnya Nzambi nɛ dia nde “petshaka akanga wa lotamanya, koko nde salɛka akanga w’okitshakitsha ɔlɔlɔ waheyama mbɛdika.”—1 Pe. 5:5.
11. Ngande wele nkana yimba lo dikambo dia mapa ndo vinyɔ yakamba la so lo Eohwelo tokimanyiyaka dia nkeketsha kaamɛ?
11 Naa yoho ya hende yakokaso nkeketsha kaamɛ? Lo kanaka yimba dimɛna lo kɛnɛ kendana la kitshimudi ya mapa la vinyɔ. Sho pombaka nsala dui sɔ la ntondo ka Eohwelo ndo djekoleko la dikɔlɔ diakɔ. (1 Kɔr. 11:23-25) Mapa waha la wodoya wekɔ didjidji dia demba dia kokele diakakimɔ Yeso oko olambo. Vinyɔ ya beela yekɔ didjidji dia dikila diande. Koko sho pombaka nsala akambo efula lo dihole dia mbeya tsho awui w’etatelo asɔ. Sho pombaka mbohɔka dia oshinga w’etshungwelo wa Yeso mɛnyaka tolembetelo tohende ta ngandji koleki woke. Jehowa akakimɔ Ɔnande lo dikambo diaso ndo la lolango tshɛ, Yeso akakimɔ lɔsɛnɔ lande lo dikambo diaso. Naka sho kanaka yimba lo dikambo dia ngandji kawɔ, kete tɔ kayototshutshuya dia mbaoka ngandji. Ndo ngandji kokaso sho tshɛ Jehowa kayokeketsha kaamɛ kaso.
Naka sho dimanyiya anto akina, kete tayokeketsha kaamɛ (Enda odingɔ 12, 13)
12. Lo ɛnyɛlɔ kendana la nkumekanga ndo ase olimu ande, ngande wakɛnya Yeso hwe dia Jehowa nangaka sho dimanyiya anto akina?
12 Naa yoho ya sato yakokaso nkeketsha kaamɛ? Lo dimanyiya anto akina l’otema ɔtɔi. Etena kasalaso dui sɔ, sho mɛnyaka dia tekɔ la lowando dia Jehowa koka todimanyiya pɛkato yaso diɛsɛ l’olambo wa Yeso. Dia mɛnya lande na kele ekɔ ohomba dimanyiya, Yeso akasha ɛnyɛlɔ ka nkumekanga kɛmɔtshi la ase olimu ande. Lam’alangayɛ adia Mateo 18:23-34 ndo yambola wate: ‘Onde dimi nangaka nsala kɛnɛ kaketsha Yeso? Onde lekɔ la solo dia lotutsha ndo ndjadjaka lo dihole di’analengo l’akadiyɛmi? Onde dimi lekɔ suke dia dimanyiya wanɛ wasalɛ kɔlɔ?’ Ekɔ mɛtɛ dia pɛkato mɔtshi ndeka kina weke. Ndo lam’ele sho bu kokele, mbeyaka monga wolo efula dia sho dimanyiya pɛkato mɔtshi. Koko ɛnyɛlɔ kakasha Yeso tetshaka dia kɛsɔ mbalanga Jehowa dia sho nsala. (Adia Mateo 18:35.) Yeso akɛnya hwe dia Jehowa hotodimanyiya naka sho hatodimanyiya anangɛso naka vɔ wamboyatshumoya l’otema ɔtɔi. Ɔsɔ ekɔ mɛtɛ dui diahombaso nkana yimba dimɛna. Dia nkokɛ ndo nama kaamɛ kaso k’ohomba, sho pombaka dimanyiya anto akina oko wakatetsha Yeso.
13. Ngande wakeketshaso kaamɛ etena katetemalaso monga lo wɔladi l’anto akina?
13 Naka sho dimanyiya anto akina, kete tayotetemala monga lo wɔladi l’anangɛso ndo akadiyɛso. Ɔpɔstɔlɔ Pɔɔlɔ akate dia sho pombaka nsala la wolo dia ntetemala monga kaamɛ l’anto akina ndo monga la wɔladi. (Ɛf. 4:3) Diakɔ diele, lo nshi ya Eohwelo ndo djekoleko la dikɔlɔ sɔ, tokane yimba dimɛna lo kɛnɛ kendana la woho wasalɛso anto akina akambo. Yambola wate: ‘Onde anto wambeya mɛnaka hwe dia dimi halolamɛ anto wasalɛ kɔlɔ tokumbɛkumbɛ? Onde anto wekɔ lo mɛna dia lekɔ lo nsala la wolo dia mbidja wɔladi ndo nkeketsha kaamɛ?’ Ɔsɔ ekɔ ambola w’ohomba efula wahombaso nkana la wɔ yimba.
14. Ngande wakokaso mɛnya dia tekɔ lo ‘mbikikanɛ onto la wonyande lo ngandji’?
14 Naa yoho ya nɛi yakokaso nkeketsha kaamɛ? Lo mbokoya Jehowa lo mbokana ngandji. (1 Jni. 4:8) Hatohombe pondjo mbuta ɔnɛ: “Dimi koka mbidja wɔladi lam’asami l’analengo, koko hahombe monga la diɔtɔnganelo dia ma ma la wɔ.” Naka ekanelo kɛsɔ mbele la so, kete hatoyele dako dia Pɔɔlɔ diata ɔnɛ “nyokikane onto la wonyande lo ngandji.” (Ɛf. 4:2) Tolembete dia Pɔɔlɔ kombita tsho ɔnɛ sho pombaka ‘mbikikanɛ onto la wonyande,’ koko ɔnɛ sho pombaka nsala dui sɔ “lo ngandji.” Awui asɔ ntshikitana. Tekɔ la weho w’anto efula l’etshumanelo kaso ndo Jehowa akaakotola vɔ tshɛ oya le nde. (Jni. 6:44) Diakɔ diele, nde ekɔ l’ɛkɔkɔ efula w’eshika wa mbaoka ngandji. Naka Nzambi mbokaka anangɛso l’akadiyɛso ngandji, ngande wakokaso mbuta dia sho hatokoke mbaoka ngandji? Sho pombaka nomɔlomɔ dia mbaoka ngandji woho walanga Jehowa dia sho nsala.—1 Jni. 4:20, 21.
ETENA KAKƆNA KAYOSALEMA EOHWELO K’EKOMELO?
15. Ngande weyaso dia Eohwelo k’ekomelo kayoyala?
15 Lushi lɔmɔtshi, tayɔtɔ lo Eohwelo mbala k’ekomelo. Ngande weyaso dui sɔ? Pɔɔlɔ akatɛ Akristo w’akitami ɔnɛ etena kohɔwɔ nyɔi ka Yeso ɔnɔnyi tshɛ vɔ “[t]etemalaka mbewoya nyɔi ka Nkumadiɔndjɔ polo lam’ayondoya.” (1 Kɔr. 11:26) Lo prɔfɛsiya kande kendana la etena k’ekomelo, Yeso akatɛkɛta nto dikambo dia ‘oyelo’ ande. Lo ntɛkɛta dikambo dia mfɔnu ka woke kaya k’emembe, nde akate ate: “Djembetelo ya Ɔna onto yayɛnama l’olongo, ko waoho tshɛ wa la nkɛtɛ wayoyatshatsha la lonyangu ndo wayɛna Ɔna onto ayaye lo wange wa l’olongo la wolo ndo la lotombo l’efula. Ko nde ayotoma andjelo ande la londjo la dimama dia wolo, ko vɔ wayotshumanya asɔnami ande kaamɛ oma lo mpɛpɛ 4, oma lo koma mɔtshi y’olongo polo lo koma nkina.” (Mat. 24:29-31) Yeso “[a]yotshumanya asɔnami ande” etena kayondɔsa Akristo w’akitami tshɛ weke la nkɛtɛ otsha l’olongo. Dui sɔ diayosalema l’ɔkɔngɔ wa mfɔnu ka woke ntatɛ, koko la ntondo ka ta dia Armangɛdɔna. Lo ta sɔ, Yeso kaamɛ l’akitami 144 000 tshɛ wayɔlɔsha nkumi ya dikanga ya la nkɛtɛ ndo wayodja otshumba. (Ɛny. 17:12-14) Eohwelo k’ekomelo kayotɔtɔ ntondo ka Yeso ‘ndja’ dia ndjotshumanya akitami mbayonga Eohwelo k’ekomelo.
16. Lande na kamboyoyashikikɛ dia monga lo Eohwelo ɔnɔnyi ɔnɛ?
16 Yashikikɛ dia monga lo Eohwelo kayosalema Ngɔndɔ ka sato 31, 2018. Ndo lɔmba Jehowa dia kokimanyiya dia nsala kɛnɛ kakokayɛ nsala dia sho ekambi ande ntetemala monga kaamɛ. (Adia Osambo 133:1.) Lushi lɔmɔtshi, tayɔtɔ Eohwelo mbala k’ekomelo. Polo lushi lɔsɔ, nyɛsɔ tɛnya dia kaamɛ ka dimɛna konga la so ɔnɔnyi tshɛ lo Eohwelo kekɔ ohomba efula le so.