1, 2. a) Lembetshiya lande na kele batisimu ekɔ nna dimɔshi di’ohomba efula. b) Kakɔna kahomba onto ndjashikikɛ la ntondo ka batizama, ndo lande na?

ONDE wɛ ekɔ ɔlɔngɔlɔngɔ kana osekaseka walanga batizama? Naka eelo, kete ɔsɔ ekɔ diɛsɛ dioleki woke diakokayɛ monga la diɔ. Oko wakatatɛkɛta lo sawo dietshi, batisimu ekɔ yɛdikɔ y’ohomba efula. Tɔ mɛnyaka anto akina ɔnɛ wɛ amboyakimɔ le Jehowa, mbuta ate wɛ ambolaka dia mbokambɛ pondjo pondjo ndo ɔnɛ nsala lolango lande mbele dui dioleki ohomba lo lɔsɛnɔ layɛ. Lam’ele dui sɔ diekɔ oko dɔkɔlɔkɔ di’ohomba efula dia ntshika onto la ntondo ka Nzambi, wɛ pombaka batizama paka etena kamboyotshunda dimɛna. Wɛ pombaka mbɔsa yɛdikɔ yayɛ hita dia nsala dui sɔ, ndo nshihodia kɛnɛ kalembetshiya ndjakimɔ le Nzambi.

² Koko, ondo wɛ hayaoke dia wɛ ekɔ suke dia batizama. Kana ondo wɛ ndjaokaka dia wɛ ekɔ suke, koko ambutshi ayɛ  fɔnyaka dia wɛ pombaka kongɛ polo etena kayoyokoma opalanga kana kayoyeya akambo efula wa lo lɔsɛnɔ. Kakɔna kahombayɛ nsala? Tɔkɔmɔke, koko nkamba l’etena kɛnɛ dia wɛ mpama woho wakokayɛ nkotsha kɛnɛ kahombama dia wɛ batizama aha la ntshimbatshimba. La dui sɔ lo yimba, wɛ koka ndjadjɛ eyango l’akambo asato wotshikitanyi anɛ: 1) dietawɔ diayɛ, 2) etsha ayɛ, ndo 3) lowando layɛ.

3, 4. Wetshelo akɔna wakoka nkondja ɛlɔngɔlɔngɔ l’esekaseka oma l’ɛnyɛlɔ kaki Timɔte?

³ Ohokanyiya woho wakokayɛ nkadimola lo ambola anɛ: Lande na ketawɔmi dia Nzambi ekɔ? Lande na kemi l’eshikikelo dia Bible ndja oma le Nzambi? Lande na kakitanyiyami wadjango wa Nzambi lo dihole dia mbokoya atɔndɔ wa l’andja ɔnɛ wendana la lɔkɛwɔ? Ambola anɛ koka kokimanyiya dia wɛ ndjela dako diaki ɔpɔstɔlɔ Pɔɔlɔ diata ɔnɛ: ‘Nyeye dimɛna lolango la Nzambi l’ɔlɔlɔ, letawɔma ndo la kokele.’ (Rɔmɔ 12:2) Lande na kahombayɛ nsala dui sɔ?

⁴ Ɛnyɛlɔ kaki Timɔte koka kokimanyiya. Nde akeyaka Afundelo dimɛna nɛ dia nyango ndo tshɛnde ka womoto wakawetshaka akambo w’oma l’Afundelo. Koko Pɔɔlɔ akatɛ Timɔte ate: “Otetemale ndjela akambo wakayeke ndo wakawakokimanyiya dia mbetawɔ.” (2 Timɔte 3:14, 15) Lanɛ tshɛkɛta ‘mbetawoyama’ nembetshiyaka “monga l’eshikikelo dia awui amɔtshi wekɔ mɛtɛ.” Diakɔ diele Timɔte akahombe monga l’eshikikelo dia akambo wa mɛtɛ kokaka tanema l’Afundelo. Nde aketawɔ dui sɔ, aha tsho l’ɔtɛ wa nyango ndo tshɛnde ka womoto wakawotɛ dia nsala ngasɔ, koko nɛ dia nde akakane yimba lo kɛnɛ kakandetshama ndo kɛnɛ kakandetawoyama.​—Adia Rɔmɔ 12:1.

5, 6. Lande na kele ekɔ ohomba le yɛ dia nkamba ‘la dikoka diayɛ di’ekanelo ka yimba’ oma ko dikɛnda diayɛ?

⁵ Kayotota lo dikambo diayɛ? Ondo wɛ ambeyaka akambo wa mɛtɛ edja efula. Naka ngasɔ kediɔ, kete yadjɛ oyango wa nkana yimba lo kɛnɛ kendana la ɛkɔkɔ wakakotshutshuya dia mbetawɔ akambo akɔ. Dui sɔ diayokokimanyiya dia nkeketsha mbetawɔ kayɛ ndo mbewɔ mbɔsa tɛdikɔ ta kɔlɔ l’ɔtɛ wa tɔsɛngiya taki angɛnyi ayɛ, tokanyi t’andja ɔnɛ, kana l’ɔtɛ wa nsaki yayɛ hita.

⁶ Naka wɛ mbeka dia nkamba ‘la dikoka diayɛ di’ekanelo ka yimba’ etena kekeyɛ ɔlɔngɔlɔngɔ kana osekaseka, kete wɛ ayonga l’akoka wa nkadimola ambola w’oma le angɛnyi ayɛ wele oko: ‘Ngande weyɛ l’eshikikelo ɔnɛ Nzambi kɛmɔtshi ekɔ? Naka Nzambi tokaka ngandji, lande na ketawɔnde dia akambo wa kɔlɔ tokomɛ? Ngande wakokaso mbuta dia Nzambi okongaka oma ko mɔmbɔkɔmbɔla?’ Etena kayalɔngɔsɔlayɛ, ambola asɔ hawotokodja l’okandokando, koko wayokotshutshuya dia wɛ mbeka Bible efula.

7-9. Lembetshiya woho wakoka akatshi wa ambola (fiches d’étude) watanema l’Ɛtɛrnɛtɛ lo dihole diofundjiwɔ ɔnɛ: “Qu’enseigne réellement la Bible” kokimanyiya dia nkeketsha dietawɔ diayɛ.

⁷ Wekelo w’onto ndamɛ wa la yambalo  koka kokimanyiya dia wɛ nkadimola ambola, minya tamu tshɛ ndo nkeketsha tɛdikɔ tayɛ. (Etsha 17:11) Tekɔ l’ekanda efula wa koka kokimanyiya dia nsala dui sɔ. Anto efula tanaka ekimanyielo kɛsɔ lo mbeka biukubuku Cinq questions à se poser sur l’origine de la vie ndo dibuku Y a-t-il un Créateur qui se soucie de vous? Ndo nto ɛlɔngɔlɔngɔ l’esekaseka efula ngɛnangɛnaka ndo kondjaka wahɔ oma lo asawo wadjawɔ lo jw.org wele l’ɔtɛ a dui ɔnɛ: “Qu’enseigne réellement la Bible (Fiches d’étude)?” Wɛ koka ditana l’ɛse ka lam’ofundjiwɔ ɔnɛ LA BIBLE ET VOUS. Dikatshi tshɛ dia ambola dia lo asawo anɛ diakadjama dia kokimanyiya dia wɛ nkeketsha yɛdikɔ yayɛ yendana la dikambo dimɔtshi dia lo Bible.

⁸ Naka wɛ ekɔ ombeki wa Bible, kete ondo wɛ amboshilaka mbeya ekadimwelo lo ambola amɔtshi watanema lo asawo wa wekelo. Ko onde wɛ ekɔ l’eshikikelo lo ekadimwelo ayɛ? Akatshi wa ambola asɔ (Fiches d’étude) wayokokimanyiya dia wɛ nkana yimba la yambalo tshɛ la avɛsa wotshikitanyi ndo oma laasɔ vɔ kokeketshaka dia wɛ mfunda ɛkɔkɔ wa dietawɔ diayɛ hita. Dui sɔ diayokokimanyiya dia wɛ mbeya woho wa nembetshiya anto akina dietawɔ diayɛ. Naka wɛ ekɔ la lotshungɔ la mbɔtɔ l’Ɛtɛrnɛtɛ lam’ofundjiwɔ lo Falase ɔnɛ: “Qu’enseigne réellement la Bible? (Fiches d’étude),” kete wɛ koka nkamba la diɔ lo wekelo ayɛ w’onto ndamɛ dia diɔ kokimanyiya dia wɛ nkeketsha dietawɔ diayɛ.

⁹ Wɛ koka mbeya wɛmɛ kɛnɛ kele mɛtɛ. Dui sɔ diayokokimanyiya dia wɛ ndjalɔngɔsɔla lo dikambo dia batisimu. Kadiyɛso kɛmɔtshi kele l’ɛnɔnyi dikumi l’ɛmɔtshi mbutaka ate: “La ntondo ka dimi ndjɔsa yɛdikɔ ya batizama, lakeke Bible ndo lakɛnyi di’ɔnɛ ɔnɛ ekɔ ɔtɛmwɛlɔ wa mɛtɛ. Ndo lushi tshɛ la lɔsɛnɔ lami, dietawɔ sɔ talekaka nkeketala.”

10. Lande na kakokaso nongamɛ ɔnɛ Okristo wambobatizama ayɔkɛnɛmɔla etsha wɔtɔnɛ la mbetawɔ kande?

¹⁰ Bible mbutaka ɔnɛ: “Mbetawɔ kele bu l’etsha kambovɔ.” (Jakɔba 2:17) Naka wɛ ekɔ la dietawɔ dia wolo, kete wɛ ayodiɛnya  l’etsha ayɛ. Wɛ ayonga la kɛnɛ kelɛ Bible ɔnɛ: ‘Etsha wa lɔkɛwɔ l’ekila ndo ditshelo diɛnya omamemelo wa Nzambi.’​—Adia 2 Petero 3:11.

11. Lembetshiya etelo k’ɔnɛ ‘etsha wa lɔkɛwɔ l’ekila.’

¹¹ ‘Etsha wa lɔkɛwɔ l’ekila’ kɛdikɛdi na? Naka wɛ ekɔ l’etsha w’ekila, kete wɛ ekɔ pudipudi. Ɛnyɛlɔ, ohokanyiya lo kɛnɛ kendana la ngɔndɔ shamalo yetshi. Etena kakayahembama dia nsala dui dimɔtshi dia kɔlɔ, onde wɛ akakane yimba lo kɛnɛ kaki ɔlɔlɔ ndo kɛnɛ kaki kɔlɔ? (Hɛbɛru 5:14) Onde wɛ akohɔ ntena shikaa diakiyɛ kɔkɔ l’ohemba kana mbetawɔ sɛngiyama oma le asekayɛ? La kalasa, onde wɛ ekɔ ɛnyɛlɔ ka dimɛna le anto akina? Onde wɛ namaka kɔlamelo yayɛ le Jehowa, ko kana wɛ nyangaka monga oko asekayɛ wa la kalasa diaha vɔ ndjokɔla? (1 Petero 4:3, 4) Lo mɛtɛ, ndooko onto lele kokele. Lo ntena dimɔtshi, kaanga wanɛ wambokambɛ Jehowa ɛnɔnyi efula kokaka mboka sɔnyi ndo mɛna dia ekɔ wolo nsambisha anto akina. Koko onto lamboyakimɔ le Nzambi ayonga la ofunu dia monga Ɔmɛnyi wa Jehowa ndo nde ayɛnya dui sɔ oma lo lɔkɛwɔ lande la pudipudi.

12. ‘Ditshelo diɛnya omamemelo le Nzambi’ kɛdikɛdi na? Ndo ngande wahombayɛ diɛnya?

¹² ‘Ditshelo diɛnya dia omamemelo le Nzambi’ kɛdikɛdi na? Diɔ mendanaka ndo l’awui wasalayɛ l’etshumanelo, ɛnyɛlɔ oko wɔtwɛlɔ wa nsanganya ndo olimu w’esambishelo. Ndo nto diɔ mendanaka l’awui wele anto akina hawɛnyi, ɛnyɛlɔ oko alɔmbɛlɔ ayɛ w’onto ndaamɛ le Jehowa ndo wekelo ayɛ w’onto ndaamɛ. Onto lakakimɔ lɔsɛnɔ lande le Jehowa hatɔfɔnya dia awui asɔ wekɔ wotsho. Nde ayoyaoka oko nkumekanga Davidɛ lakate ate: ‘Dia nsala lolango layɛ, wɛ Nzambi kami, kele ɔngɛnɔngɛnɔ ami, ndo ɛlɛmbɛ ayɛ wambɔnyɔngɔmɛ etale l’etei kami.’​—Osambu 40:8.

13, 14. Dui diakɔna diakoka kokimanyiya dia monga la “ditshelo diɛnya dia nyekɔ lo mamema Nzambi” ndo ngande wakoka ɛlɔngɔlɔngɔ l’esekaseka nkondja wahɔ oma lo dui sɔ?

¹³ Dia kokimanyiya dia wɛ ndjadjɛ eyango ɛsɔ, tekɔ la dikatshi dia ambola wɛ koka ndodja dikatshi diele lo lɛkɛ 308 ndo 309 lo dibuku Les jeunes s’interrogent​—Réponses pratiques, volume 2. Lo dikatshi dia ndodja sɔ wɛ koka mfunda ekadimwelo ayɛ wɛmɛ lo ambola oko anɛ: “Kakɔna katoyɔlɔmbaka lo alɔmbɛlɔ ayɛ ndo kakɔna kɛnyawɔ lo kɛnɛ kendana la ngandji kayɛ otsha le Jehowa?” “Kakɔna katoyosalaka lo wekelo ayɛ w’onto ndamɛ?” “Onde wɛ ndjashaka l’olimu w’esambishelo kaanga naka ambutshi ayɛ hawoyasha lɔkɔ?” Dikatshi dia ndodja sɔ nto diekɔ la dihole diakokayɛ mfunda oseka eyango wahombayɛ ndjadjɛ wɛmɛ lo kɛnɛ kendana l’alɔmbɛlɔ ayɛ, wekelo w’onto ndamɛ ndo olimu w’esambishelo.

¹⁴ Ɛlɔngɔlɔngɔ l’esekaseka efula wakana yimba lo kɛnɛ kendana la batizama mɛnaka dia dikatshi dia ndodja sɔ diekɔ ehomɔ k’ohomba efula. Osekaseka ɔmɔtshi wakawelɛka Tilda akate ate: “Dimi lakakambe la dikatshi dia ndodja sɔ dia ndjadjɛ eyango. Yema yema lakayokotshaka eyango akɔ ndo laki suke dia batizama l’ɔkɔngɔ w’ɔnɔnyi ɔtɔi.” Ɔnangɛso l’ɔlɔngɔlɔngɔ lakawelɛka Patrick akasale woho akɔ  wamɛ ndo nde mbutaka ate: “Dimi lakeyaka eyango ami, koko woho wakamaafunde lofunda akatshutshuya dia dimi nsala la wolo dia mbakotsha.”

15. Lembetshiya lande na kele ndjakimɔ pombaka monga yɛdikɔ y’onto ndamɛ.

¹⁵ Dimbola dimɔtshi diele l’atei wa ambola wele lo dikatshi dia ndodja mbutaka ɔnɛ: “Onde wɛ ayotetemala la kambɛ Jehowa kaanga naka ambutshi ayɛ kana angɛnyi ayɛ wambokoshimba dia nsala dui sɔ?” Naka wɛ nambola Jehowa lɔsɛnɔ layɛ ndo wɛ batizama, kete wɛ ayonga la diɔtɔnganelo di’oshika lam’asayɛ la nde. Ɔnkɔnɛ kɛnɛ kasalɛyɛ Jehowa hatendana l’ambutshi ayɛ kana onto okina. Etsha ayɛ w’ekila ndo omamemelo ayɛ le Nzambi mɛnyaka dia wɛ amboshikikɛ dia wɛ ambeyaka akambo wa mɛtɛ ndo ekɔ lo nanga ndjela atɔndɔ wa Nzambi. Aha la tshimbatshimba wɛ ayokotsha kɛnɛ kalɔmbama dia batizama.

16, 17. a) Kakɔna kahomba ntshutshuya onto dia nde nkoma Okristo? b) Ɛnyɛlɔ kakɔna kakoka nkamba la so dia nembetshiya ohomba wa mɛnya lowando laso lo kɛnɛ kendana la oshinga w’etshungwelo?

¹⁶ Lushi lɔmɔtshi, pami kɛmɔtshi kakeyaka Ɛlɛmbɛ wa Mɔsɛ dimɛna efula akambola Yeso ate: “Ɔlɛmbɛ akɔna woleki woke lo ɛlɛmbɛ?” Yeso akokadimola ate:  “Olange Jehowa Nzambi kayɛ l’otema ayɛ tshɛ ndo la anima ayɛ tshɛ ndo la yimba yayɛ tshɛ.” (Mateo 22:35-37) Yeso akalembetshiya ɔnɛ ngandji k’otsha le Jehowa pombaka monga ɔkɔkɔ watshutshuya anga onto ɔmɔtshi dia batizama ndo nkoma Okristo. Yoho mɔtshi yoleki dimɛna ya nkeketsha ngandji kayɛ otsha le Jehowa ele lo nkana yimba dimɛna lo kɛnɛ kendana l’oshinga w’etshungwelo, woshasha woleki woke wakasha Nzambi anto. (Adia 2 Kɔrɛtɔ 5:14, 15; 1 Joani 4:9, 19.) Naka wɛ nsala ngasɔ, kete wɛ ayɛnya lowando layɛ lo woshasha wa diambo ɔsɔ.

¹⁷ Lowando layɛ l’oshinga w’etshungwelo koka nembetshiyama yoho nyɛ: Ohokanyiya dia wɛ ambotambɛ l’ashi ko onto ɔmɔtshi ambokotopola. Onde wɛ ayotshɔ tsho otsha lakayɛ, monya demba ko mbohɛ kɛnɛ kakasadi onto akɔ lo dikambo diayɛ? Ndooko! Wɛ ayongaka la lowando le onto lakakotsha! Woho akɔ wamɛ mbele sho pombaka monga la lowando l’efula le Jehowa nde la Yeso lo dikambo dia oshinga w’etshungwelo. Diɛsɛ la wɔ mbeso la lɔsɛnɔ! Vɔ wakatotshungola oma lo pɛkato la nyɔi. L’ɔtɛ wa ngandji kawɔ le so mbayaso l’elongamelo ka ndjɔsɛna pondjo pondjo lo Paradiso ka la nkɛtɛ!

18, 19. a) Lande na kahayahombe mboka wɔma dia monga onto laki Jehowa? b) Ngande wele kambɛ Jehowa mbetɛka lɔsɛnɔ layɛ dimɛna efula?

¹⁸ Onde wɛ ekɔ la lowando lo kɛnɛ kakasale Jehowa lo dikambo diayɛ? Naka ngasɔ, kete ndjakimɔ ndo batizama ekɔ dui di’ohomba efula dia nsala. Ndjakimɔ kayɛ kekɔ daka diayɛ le Nzambi di’ɔnɛ wɛ ayosalaka lolango lande pondjo pondjo. Onde wɛ koka monga la wɔma wa nkotsha daka sɔ? Keema! Jehowa nangaka kɛnɛ koleki dimɛna le yɛ ndo nde ayofuta wanɛ wasala lolango lande. (Hɛbɛru 11:6) Etena kakimɔyɛ lɔsɛnɔ layɛ le Nzambi ndo kabatizamayɛ, lɔsɛnɔ layɛ hatonga kɔlɔ, koko lɔ layonga dimɛna efula. Ɔnangɛso ɔmɔtshi l’ɛnɔnyi 24 lakabatizama la ntondo ka nde monga l’ɛnɔnyi dikumi l’ɛmɔtshi mbutaka ate: “Dimi lakakoke monga la eokelo k’oshika otondonga laki laya opalanga, koko mbɔsa yɛdikɔ ya dimɛ ndjakimɔ le Jehowa akakokɛ oma l’oweso wa lomombo la l’andja ɔnɛ.”

¹⁹ Jehowa nangaka kɛnɛ koleki dimɛna le yɛ. Koko Satana ekɔ kanga lokaki ndo nde hayakiyanya lo dikambo diayɛ. Nde hakoke kosha kaanga ɛngɔ ɔtɔi ka dimɛna naka wɛ mboyela. Ngande wakokande kosha ɛngɔ kɛmɔtshi kende bu la tɔ? Nde bu la lokumu l’ɔlɔlɔ ndo nde bu kaanga l’elongamelo. Nde koka tsho kosha nshi yayaye ya kɔlɔ, nɛ dia ɔsɔ mbele nshi yayaye yayonga la nde!​—Ɛnyɛlɔ 20:10.

20. Kakɔna kakoka ɛlɔngɔlɔngɔ l’esekaseka nsala dia mpama ko ndjakimɔ ndo batizama? (Enda kiombo yele l’ɔtɛ a dui ɔnɛ: “Dia kokimanyiya dia wɛ mpama.”)

²⁰ Nkimɔ lɔsɛnɔ layɛ le Jehowa ekɔ yɛdikɔ yoleki dimɛna yayoyɔsa. Onde wɛ ekɔ suke dia nsala dikambo sɔ? Naka wɛ ekɔ suke, kete tokake wɔma dia ntshika dɔkɔlɔkɔ sɔ. Koko naka wɛ mbokaka dia wɛ bu suke dia batizama, kete nkamba l’alako wele lo sawo diayela dia wɛ ntetemala mpama dimɛna. Pɔɔlɔ akatɛ anangɛso wa la Filipɛ dia ntetemala mpama. (Filipɛ 3:16) Naka wɛ ndjela alako asɔ, kete aha la ntshimbatshimba wɛ ayolanga nkimɔ lɔsɛnɔ layɛ le Jehowa ndo batizama.