1, 2. a) Kakɔna kasha ekambi wa Nzambi ɔngɛnɔngɛnɔ ɛlɔ kɛnɛ? b) Ngande wakoka ambutshi w’Akristo ndo dikumanyi nkimanyiya ɛlɔngɔlɔngɔ dia vɔ nshihodia kɛnɛ kalembetshiya batisimu?

EKUMANYI kɛmɔtshi k’Okristo akatɛ, Christopher laki la ɛnɔnyi 12 ate: “Dimi keyaka ntatɛ lam’akayotɔ. Ndo lekɔ l’ɔngɛnɔngɛnɔ dia mboka dia wɛ nangaka batizama. Dimi nangaka kombola yema: ‘Lande na kalangayɛ ntakoka nna nɛ?’” Ekumanyi kɛsɔ aki l’ɛkɔkɔ w’eshika wa mimbola dimbola sɔ. Tekɔ l’ɔngɛnɔngɛnɔ dia mɛna woho wabatizama nunu di’ɛlɔngɔlɔngɔ ɔnɔnyi tshɛ. (Undaki 12:1) Koko, ambutshi w’Akristo ndo dikumanyi dia l’etshumanelo nangaka monga l’eshikikelo ɔnɛ ɛlɔngɔlɔngɔ wambɔsa yɛdikɔ shɔ lo vɔamɛ ndo wamboshihodia kɛnɛ kalembetshiya batizama.

² Lo Bible, sho mbekaka dia ndjakimɔ ndo batisimu ekɔ etatelo ka lɔsɛnɔ l’oyoyo le Okristo. Lɔsɛnɔ lɔnɛ l’oyoyo  layela ɛtshɔkɔ efula oma le Jehowa, koko ndo ɔlɔshamelo oma le Satana. (Tukedi 10:22; 1 Petero 5:8) Diakɔ diele, ambutshi w’Akristo pombaka mbɔsa etena ka mbetsha anawɔ kɛnɛ kalembetshiya monga ombeki wa Kristo. Etena kele ɛlɔngɔlɔngɔ bu l’ambutshi w’Akristo, dikumanyi dia l’etshumanelo diayowakimanyiya la ngandji tshɛ dia nde nshihodia kɛnɛ kalembetshiya ndjakimɔ ndo batizama. (Adia Luka 14:27-30.) Oko wele di’onto nshidiya mbika luudu lande nɔmbamaka dia nde ndjalɔngɔsɔla, mbele nɔmbamaka di’onto ndjalɔngɔsɔla dimɛna dia kambɛ Jehowa la kɔlamelo “polo l’ekomelo.” (Mateo 24:13) Kakɔna kayokimanyiya ɛlɔngɔlɔngɔ dia ndjashikikɛ dia kambɛ Jehowa pondjo pondjo? Nyɛsɔ tende.

3. a) Kakɔna katetsha ɛtɛkɛta wa Yeso ndo wa Petero lo kɛnɛ kendana l’ohomba wa batisimu? (Mateo 28:19, 20; 1 Petero 3:21) b) Ambola akɔna wayotɔsɛdingola ndo lande na?

³ Onde ndo wɛ kele ɔlɔngɔlɔngɔ wakombola batizama? Naka ngasɔ kediɔ, kete wɛ ekɔ la oyango wa dimɛna! Ekɔ diɛsɛ dia woke dia nkoma Ɔmɛnyi wa Jehowa ɔmɔtshi wambobatizama. Ekɔ dikambo diahomba Okristo nsala ndo diɔ diekɔ nna di’ohomba le wanɛ wayoshimbamɛ lo mfɔnu ka woke. (Mateo 28:19, 20; 1 Petero 3:21) Etena kabatizamayɛ, wɛ mɛnyaka dia wɛ ambotshika dɔkɔlɔkɔ dia kambɛka Jehowa pondjo pondjo. Wɛ nangaka nama dɔkɔlɔkɔ sɔ, ɔnkɔnɛ ambola wayela anɛ wayokokimanyiya dia mɛna kana wɛ ekɔ suke dia bitizama. 1) Onde dimi lambotshunda lo nyuma dia mbɔsa yɛdikɔ nyɛ? 2) Onde dimɛ lekɔ la nsaki ka nsala dui nɛ? 3) Onde dimi nshihodiaka kɛnɛ kalembetshiya ndjakimɔ le Jehowa? Nyɛsɔ tɔsɛdingole ambola asɔ.

4, 5. a) Lande na kele batisimu halɔmbɛ paka anto waya epalanga? b) Kakɔna kalembetshiya Okristo wambotshunda lo nyuma?

⁴ Bible hate dia paka wanɛ waya epalanga kana anto wambokotsha ɛnɔnyi ɛmɔtshi mbakoka batizama. Sho mbadiaka lo Tukedi 20:11 ɔnɛ: ‘Kaanga ɔna mbeyamaka oma lo etsha ande, dia kana dionga diande diekɔ pudipudi ndo dimɛna.’ Laasɔ, kaanga ɔna koka nshihodia kɛnɛ kalembetshiya nsala kɛnɛ kele ɔlɔlɔ ndo ndjakimɔ le Otungi ande. Ɔnkɔnɛ, batizama ekɔ nna dimɔtshi di’ohomba ndo dia laande le ɔlɔngɔlɔngɔ wambɛnya dia nde ambotshunda lo nyuma ndo amboyakimɔ le Jehowa.​—Tukedi 20:7.

⁵ Kakɔna kalembetshiya ntshunda lo nyuma? Mbala efula, ntshunda halembetshiya nshi tshɛ onto lele l’ɛnɔnyi ɛmɔtshi kana lambola lo demba. Bible mbutaka dia anto wambotshunda wambekiya “wolo wa shɛnɔdi yawɔ” dia mbeya ntshikitanya ɔlɔlɔ la kɔlɔ.  (Hɛbɛru 5:14) Onto lambotshunda lo nyuma mbeyaka kɛnɛ kele ɔlɔlɔ ndo mbɔsaka yɛdikɔ l’otema ande dia kisala. Ɔnkɔnɛ, nde hakoke sɛngiyama esadi eto dia nsala kɛnɛ kele kɔlɔ. Ndo nde bu l’ohomba w’onto okina mbotɛ dia nsala kɛnɛ kele ɔlɔlɔ. Keema kɔlɔ nongamɛ ɔnɛ ɔlɔngɔlɔngɔ wabatizama ayosala kɛnɛ kele ɔlɔlɔ oyadi kaanga ambutshi ande kana epalanga ekina bu lawɔ.​—Ɛdika la Filipɛ 2:12.

6, 7. a) Lembetshiya ekakatanu wakahomana la Danyɛlɛ etena kakinde la Babilɔna. b) Ngande wakɛnya Danyɛlɛ dia nde ambotshunda lo nyuma?

⁶ Onde ɔlɔngɔlɔngɔ koka mɛnya yoho ya otshundelo wa lo nyuma ɔsɔ? Tɔsɛdingole ɛnyɛlɔ ka Danyɛlɛ. Ondo nde aki ɔlɔngɔlɔngɔ w’ɛnɔnyi dikumi l’ɛmɔtshi etena kakandɔsama oma la le ambutshi ande ndo tɔlama la Babilɔna. La shashimuya, Danyɛlɛ akatanema l’atei w’anto waki kokitanyiyaka ɛlɛmbɛ wa Nzambi. Koko, nyɛsɔ tende dikambo dia Danyɛlɛ la yambalo tshɛ. Nde wakosalɛka akambo oko onto la laande la Babilɔna. Nde aki ɔtɔi ɔmɔtshi l’atei w’ɛlɔngɔlɔngɔ wakasɔnama dia kambɛ nkumekanga. (Danyele 1:3-5, 13) Mɛnamaka dia Danyɛlɛ aki la dihole dia dimɛna la Babilɔna oleki yoho yakandahombe ndjala l’Isariyɛlɛ.

⁷ Ko kakɔna kakasale ɔlɔngɔlɔngɔ Danyɛlɛ? Onde nde aketawɔ di’ase babilɔna mbotshikitanya kana ndanya mbetawɔ kande? Keema! Bible mbutaka dia lam’akinde la Babilɔna, Danyɛlɛ akɔshi yɛdikɔ ‘l’otema ande dia nde hatoyadja mindo,’ dia mangana etale l’ɛngɔ tshɛ kaki la diɔtɔnganelo l’ɔtɛmwɛlɔ wa kashi. (Danyele 1:8) Kɛsɔ akɛnya mɛtɛ dia nde akatshunde lo nyuma!

8. Wetshelo akɔna wakokayɛ nkondja oma l’ɛnyɛlɔ ka Danyɛlɛ?

 ⁸ Wetshelo akɔna wakokayɛ nkondja oma l’ɛnyɛlɔ ka Danyɛlɛ? Ɔlɔngɔlɔngɔ wambotshunda lo nyuma ayoshikimala lo dietawɔ diande kaanga l’atei w’ekakatanu wa wolo. Nde honga oko lɔnganyiya, latshikitanya dangi lo ndjela dihole diende. Nde hasale akambo oko ɔngɛnyi wa Nzambi etena kende lo Mbalasa ka Diolelo, ko ɔngɛnyi wa andja ɔnɛ etena kende la kalasa. Koko, nde ayotshikala la kɔlamelo kaanga etena kende l’ehemba.​—Adia Ɛfɛsɔ 4:14, 15.

9, 10. a) Ngande wakoka ɔlɔngɔlɔngɔ nkondja wahɔ lo nkana yimba lo kɛnɛ kakandasale etena kakahembama mbetawɔ kande? b) Batisimu kɛdikɛdi na?

⁹ Lo mɛtɛ, ndooko onto lele kokele. Oyadi ɛlɔngɔlɔngɔ kana epalanga salaka munga tena dimɔtshi. (Undaki 7:20) Koko naka wɛ nangaka batizama, kete ayonga dui dia lomba dia wɛ mɛnya woho wamboyashikikɛ dia nkitanyiya ɛlɛmbɛ wa Jehowa. Yambola wate: ‘Onde aya tshanda mɔtshi yemi lo nkitanyiya Jehowa?’ Kana yimba lo kɛnɛ kakayasale etena k’ekomelo kakahembama mbetawɔ kayɛ. Onde wɛ aki la dikoka dia mbɔsa yɛdikɔ lo kɛnɛ kaki ɔlɔlɔ dia nsala? L’ɛnyɛlɔ ka Danyɛlɛ, onde onto ɔmɔtshi akakokeketsha dia wɛ nkamba la akoka ayɛ l’andja wa Satana ɔnɛ? Etena kahembamayɛ la dikambo diele oko sɔ, onde wɛ aki l’akoka wa nshihodia kɛnɛ kele lolango la Nzambi?​—Ɛfɛsɔ 5:17.

¹⁰ Lande na kele ekɔ ohomba mbeya ekadimwelo wa ambola wendana l’onto ndaamɛ asɔ? Nɛ dia vɔ wayokokimanyiya dia mɛna ɔnɛ batisimu ekɔ ohomba efula. Batisimu mɛnyaka anto akina dia wɛ ambotshika dɔkɔlɔkɔ di’ohomba efula la ntondo ka Jehowa. Wɛ ambotshika dɔkɔlɔkɔ dia wɛ oyowokaka ngandji ndo ayowokambɛka pondjo pondjo l’otema ayɛ tshɛ. (Makɔ 12:30) Onto tshɛ labatizama pombaka ndjashikikɛ dia nama dɔkɔlɔkɔ diambondotshika la ntondo ka Jehowa.​—Adia Undaki 5:4, 5.

11, 12. a) Dikambo diakɔna diahomba onto lalanga batizama monga l’eshikikelo lɔkɔ? b) Kakɔna kayokokimanyiya dia wɛ monga la kanyi y’ɔlɔlɔ lo yɛdikɔ ya Jehowa yendana la batisimu?

¹¹ Bible mbutaka dia ekambi tshɛ wa Jehowa, kaanga ɛlɔngɔlɔngɔ wayowokambɛ ‘la lolango.’ (Osambu 110:3) Diakɔ diele onto lalanga batizama pombaka monga l’eshikikelo dia dui nɛ diekɔ nsaki kande hita. Dui sɔ koka kɔlɔmba dia wɛ nsɛdingola nsaki kayɛ la yambalo tshɛ, djekoleko naka wɛ akodiama l’akambo wa mɛtɛ.

¹² Etena kayayole, ondo wɛ mɛnaka anto efula wabatizama, ondo kaanga angɛnyi ayɛ amɔtshi ndo ewotɔ ayɛ. Koko, onga la shɛnɔdi diaha wɛ ndjotatɛ ndjaoka dia wɛ koka batizama paka l’ɔtɛ wamboyokotsha ɛnɔnyi ɛmɔtshi kana l’ɔtɛ w’anto akina wekɔ lo batizama.  Ngande wakokayɛ ndjashikikɛ dia wɛ mbɔsaka batisimu oko wakiɔsa Jehowa? Ɔsa etena kakana yimba lo ɔkɔkɔ wɛnya dia batisimu ekɔ ohomba efula. Wɛ ayɛna ɛkɔkɔ efula w’amɛna lo sawo nɛ ndo lo sawo diayela.

13. Ngande wakokayɛ mɛnya dia kana yɛdikɔ yayɛ ya batizama ndja oma k’ɛse otema ayɛ?

¹³ Yoho mɔtshi yakokayɛ mɛnya dia kana yɛdikɔ yayɛ ya batizama ndja oma k’ɛse otema ayɛ, ele lo nsɛdingola alɔmbɛlɔ ayɛ. Mbala ngana yalɔmbayɛ Jehowa? Awui akɔna watoyotaka lo alɔmbɛlɔ ayɛ? Ekadimwelo lo ambola asɔ wayɛnya woho wele diɔtɔnganelo diasayɛ la Jehowa. (Osambu 25:4) Mbala efula Jehowa mbishaka ekadimwelo lo alɔmbɛlɔ aso lo tshimbo ya Bible. Ɔnkɔnɛ, yoho kina yakokayɛ mɛnya dia wɛ nangaka mɛtɛ monga suke suke la Jehowa ndo mbokambɛ oma k’ɛse otema, ele lo nsɛdingola ekongelo kayɛ ka wekelo. (Jashua 1:8) Yambola wate: ‘Ngande wele wekelo ami wa Bible w’onto ndaamɛ wa mbala la mbala? Onde dimi mbɔtɔka la lolango tshɛ l’ɔtɛmwɛlɔ aso wa lo nkumbo?’ Ekadimwelo lo ambola anɛ wayokokimanyiya dia wɛ mɛna dia kana yɛdikɔ yayɛ yabatizama yekɔ nsaki kayɛ hita.

14. Lembetshiya otshikitanu wele lam’asa ndjakimɔ ndo batisimu.

¹⁴ Mbeyaka monga ko ɛlɔngɔlɔngɔ ɛmɔtshi haweye mɛtɛ otshikitanu wele lam’asa ndjakimɔ ndo batisimu. Akina mbeyaka mbuta dia wamboshilaka nkimɔ nsɛnɔ yawɔ le Jehowa, koko vɔ bu suke dia batizama. Ko onde dui sɔ koka salema? Ndjakimɔ ekɔ dɔmbɛlɔ diasala onto dia mbutɛ Jehowa ɔnɛ nde amboolaka dia mbokambɛ pondjo pondjo. Etena kabatizamayɛ, wɛ mɛnyaka anto akina dia wɛ amboshilaka ndjakimɔ le Jehowa. Ɔnkɔnɛ, la ntondo ka wɛ batizama, wɛ pombaka nshihodia kɛnɛ kalembetshiya ndjakimɔ le Nzambi.

15. Ndjakimɔ kɛdikɛdi na?

¹⁵ Etena kakimɔyɛ lɔsɛnɔ la yɛ le Jehowa, wɛ mbotɛka dia kakianɛ wɛ aya onto lakinde. Wɛ mboolakaka ɔnɛ mbokambɛ ayonga dikambo dioleki ohomba lo lɔsɛnɔ la yɛ. (Adia Mateo 16:24.) Dɔkɔlɔkɔ dia ngasɔ diatshika onto la ntondo ka Nzambi diekɔ la nɛmɔ efula! (Mateo 5:33) Ngande wakokayɛ mɛnya dia wɛ hayɔsɛna nto lo dikambo diayɛ wɛmɛ, koko kakianɛ wɛ aya onto laki Jehowa?​—Rɔmɔ 14:8.

16, 17. a) Sha ɛnyɛlɔ ka kɛnɛ kalembetshiya ndjasɛka. b) Kakɔna mɛtɛ kata onto layakimɔ?

¹⁶ Nyɛsɔ tɔsɛdingole ɛnyɛlɔ kɛmɔtshi. Ohokanyiya dia ɔngɛnyi ayɛ ambokosha mutuka oko woshasha. Nde ambokosha titrɛ ndo ambokotɛ ate: “Mutuka aya wayɛ.” Koko ɔngɛnyi ayɛ ambokotɛ ate: “Dimi layolama nsapi. Ndo dimi mbayɔkɛndjakɛndjaka mutuka, koko aha wɛ.” Ngande wayoyaoka lo kɛnɛ kendana la woshasha ɔsɔ? Ngande wayoyaoka lo kɛnɛ kendana la ɔngɛnyi ayɛ wokosha mutuka?

¹⁷ Etena kakimɔ onto ɔmɔtshi lɔsɛnɔ lande le Jehowa, nde mbutɛka Nzambi ate: “Dimi lambokosha lɔsɛnɔ lami, dimi lekɔ onto lakiyɛ.” Jehowa ekɔ la lotshungɔ la nongamɛ di’onto nama dɔkɔlɔkɔ diande. Ko, kayotota naka onto ɔsɔ ambotatɛ pindolɛ Jehowa lo woshɛshɛ oko onto lahakambɛ Nzambi? Ko kayotota naka onto akɔ ambetawɔ olimu  wawɔsɛ wenya wakokande mbetsha lo olimu w’esambishelo kana olimu akɔ owokonya dia nde mbetsha nsanganya ya l’etshumanelo mbala la mbala? Onto lasala ngasɔ onto ɔsɔ hatetemadi nama dɔkɔlɔkɔ diande otsha le Jehowa. Dui sɔ diayonga oko onto lalama nsapi ya mutuka. Etena kakimɔso nsɛnɔ yaso le Jehowa sho mbotɛka ɔnɛ: “Lɔsɛnɔ la mi laya lakiyɛ aha lami.” Ɔnkɔnɛ, sho tayosalaka nshi tshɛ kɛnɛ kalanga Jehowa kaanga etena kele aha kɛsɔ mbakombolaso nsala. Nyɛsɔ tokoya Yeso lakate ate: “Dimi lakaye oma l’olongo dia ndjosala, aha lolango lami, koko lolango la Ɔnɛ lakatome.”​—Joani 6:38.

18, 19. a) Ngande wele kɛnɛ kakate Rose nde la Christopher, mɛnyaka dia batisimu ekɔ diɛsɛ dia nkonya lo ɛtshɔkɔ? b) Ngande wayaokayɛ lo kɛnɛ kendana la diɛsɛ dia batizama?

¹⁸ Mbokɛmaka hwe ɔnɛ batisimu ekɔ yɛdikɔ y’ohomba efula. Ekɔ diɛsɛ dia woke dia ndjakimɔ le Jehowa ndo batizama. Ɛlɔngɔlɔngɔ woka Jehowa ngandji ndo washihodia kitshimudi ya ndjakimɔ hawengenga dia nkimɔ nsɛnɔ yawɔ le Nzambi ndo batizama. Ndo vɔ hawonyange lo yɛdikɔ yakawɔshi. Rose lele osekaseka w’ɛnɔnyi dikumi l’ɛmɔtshi mbutaka ate: “Dimi mbokaka Jehowa ngandji ndo dimi halokoke monga l’ɔngɛnɔngɛnɔ w’efula lo nsala dui dikina tshɛ paka lo mbokambɛ. Dimi komonga pondjo l’eshikikelo lo kɛnɛ kendana la dui tshɛ dia lo lɔsɛnɔ lami oko wakimi l’eshikikelo lo kɛnɛ kendana la yɛdikɔ yami ya batizama.”

¹⁹ Ko kayotota lo kɛnɛ kendana la Christopher, lɔtɛkɛtami l’etatelo ka sawo nɛ? Ngande wakandayaoke lo kɛnɛ kendana la yɛdikɔ yande ya batizama etena kakinde l’ɛnɔnyi 12? Nde mbutaka ate lekɔ l’ɔngɛnɔngɛnɔ efula lo woho wakamɔshi yɛdikɔ shɔ. Nde akatatɛ nkamba oko ombatshi mboka wa pondjo etena kakinde l’ɛnɔnyi 17, ndo ndjokoma okambi wakimanyiya l’ɛnɔnyi 18, ɛlɔ kɛnɛ nde ekɔ lo nkamba lo Bɛtɛlɛ. Nde mbutaka ate: “Batisimu ekɔ yɛdikɔ ya dimɛna efula. Lɔsɛnɔ lami ndola l’elimu wangɛnyangɛnya Jehowa ndo okongamelo ande.” Naka wɛ ekɔ lo nanga batizama, woho akɔna wakokayɛ ndjalɔngɔsɔla lo dikambo sɔ? Sawo diayela diayokadimola lo dimbola sɔ.