OYA lo 1910 ambutshi ami wakonɔ oma la Tbilissi la Géorgie otsha la Canada. Vɔ wakatodjasɛ lo luudu lɔmɔtshi la tshitshɛ lo dihole dialongawɔ nyama suke la Pelly, Saskatchewan, lo ɛstɛ ka Canada. Lakotɔ lo 1928, ndo dimi mbaki kose lo ana asamalo wakatotɔ. Papa akavu ngɔndɔ shamalo la ntondo ka dimi mbotɔ ndo mama akayovɔ etena kakimi dikɛnda efula. Yema tshitshɛ oma laasɔ, Lucy enondo aso tshɛ la womoto akavu ele l’ɛnɔnyi 17. Ɔnkɔnɛ Nick ɔnango mama mbakayotodia dimi l’anangɛmi.

Lushi lɔmɔtshi etena kakimi dikɛnda, ase nkumbo kami wakamɛnyi lakotola mfalasa kɛmɔtshi k’omi kaki lo lokombo lo wela. Vɔ wakoke wɔma ɔnɛ kana mfalasa kakɔ ayɔtɛta sabɔ, ko wakampangwɛ dia dimi kikimɔ. Koko dimi lakawaɛdiya ɔkɔngɔ ndo dimi komboka kɛnɛ kakawambutɛka. Diɛsɛ ko tɔ kosalɛmi kɔlɔ. Lushi lɔsɔ mbakashola ase nkumbo kami ɔnɛ dimi lekɔ kanga ehoke.

Ɔngɛnyi w’ose nkumbo kaso ɔmɔtshi akayota ɔnɛ ndeka dimɛna dimi ntshɔ dia tɔtɔ kalasa kaamɛ l’ana wa mpoke akina. Diakɔ diele Nick ɔnango mama akantome lo kalasa k’akanga a mpoke la Saskatoon, Saskatchewan. Lam’ele kalasa kɛsɔ kakangana etale l’ase nkumbo kami, ndo lam’ele laasɔ ko leke l’ɛnɔnyi etanu, lakoke wɔma. Lakakokaka ntshɔ dia tenda ase nkumbo kami paka lo nshi ya dikimɔ ndo lo nshi ya vakashi. Yema yema lakayeya ɔtɛkɛta w’akanga a mpoke ndo lakayotatɛ nkɛnya l’ana akina.

Lo 1939, Marion enondo ami akatshukama la Bill Danylchuck, ko vɔ wakatatɛ tɔsɛnya dimi la Frances kadiyɛmi. Vɔ mbaki anto wa ntondo wa lo nkumbo kaso wakatatɛ mbeka Bible la Ɛmɛnyi wa Jehowa. Etena kakamongaka lo tovakashi, vɔ wakasalaka la wolo dia sambishami kɛnɛ kakawekaka oma lo Bible. Komonga dui dia wɔdu dia dimi nsawola la wɔ, nɛ dia vɔ kombeyaka ɔtɛkɛta  w’akanga a mpoke. Koko vɔ wakakoke nshihodia ɔnɛ dimi mɛtɛ lekɔ lo nanga awui wendana la Jehowa wekami. Dimi lakashihodia ɔnɛ kɛnɛ kakawasalaka mbɔtɔnɛka la kɛnɛ kata Bible, diakɔ diakamatatɛ ntshɔ la wɔ l’esambishelo. Kombeta edja oma laasɔ lakangɛnangɛna batizama, ndo lo Ngɔndɔ ka divwa 5, 1941, Bill akabatiza lo ehomɔ ka lowolo kaki l’ashi tɔɔ w’oma lo difuku di’ashi. Ashi akɔ waki tshitshi efula!

Lo 1946, etena kakamaye la ngelo lo vakashi, takatɔtɔ lo losanganya la woke la Cleveland, Ohio, États-Unis. Lushi la ntondo, akadiyɛmi wakafundɛka awui lo akatshi dia dimi ndjela ekongelo kakɔ dimɛna. Koko lushi la hende lakangɛnangɛna dia mboka ɔnɛ lo losanganya lɔnɛ olui ɔmɔtshi w’akanga a mpoke wekɔ ndo wekɔ lo mbaɔmbɔlɛ l’ɔtɛkɛta w’akanga a mpoke. L’ekomelo, lakayotatɛ ndjela ekongelo dimɛna, ndo aki dui dia diambo dia dimi ndjoka hwe kɛnɛ ketsha Bible!

L’etena kɛsɔ, Ta dia hende di’andja w’otondo diaki oma la nshila ndo anto wakalangaka mɛnya dia vɔ wekɔ la kɔlamelo le wodja awɔ. Koko etena kakamakalola oma lo losanganya la woke ndo kakamakalola otsha la kalasa, lakɔshi yɛdikɔ ya ntshikala la kɔlamelo le Jehowa. Diakɔ diele lakatshike ntɛmɔla dalapo, memba leembo la wodja ndo nsala fɛtɛ ya wodja. Lakatshike nto dia ntshɔ l’ɔtɛmwɛlɔ kaamɛ l’ana akina. Ase kalasa kɔngɛnangɛna ndo vɔ wakatatɛ kɔmɔlami ndo wakambutɛ awui wa kashi l’oyango wa dimi ntshikitanya kanyi yami. Asekami wa la kalasa wakɛnyi kɛnɛ kakatombe ndo l’ɔtɛ wa dui sɔ, lakakondja waaso efula wa mbasambisha. Asekami wa la kalasa asɔ, ɛnyɛlɔ Larry Androsoff, Norman Dittrick, ndo Emil Schneider, wakayetawɔ akambo wa mɛtɛ ndo vɔ wekɔ lo ntetemala kambɛ Jehowa.

Etena kakamatshɔka l’esomba ekina, tena tshɛ lakadjaka welo wa laande dia nsambisha akanga a mpoke. Ɛnyɛlɔ, la Montréal lakatshu lo dihole diakatshumanaka akanga a mpoke wa lɛkɔ. Lɛkɔ lakasambisha Eddie Tager, ɔlɔngɔlɔngɔ waki l’ɔnɔngɔ wa dengalenga dimɔtshi. Polo ndo lam’akandavu ɔnɔnyi wetshi, nde aki l’etshumanelo ka l’ɔtɛkɛta w’akanga a mpoke ka la Laval, la Québec. Lakasambisha nto ɔlɔngɔlɔngɔ welɛwɔ Juan Ardanez. L’ɛnyɛlɔ k’ase Bɛrɔya wa lo nshi y’edjedja, nde akasale eyangelo dia nshikikɛ kana kɛnɛ kakandekaka kaki oma lo Bible. (Ets. 17:10, 11) Nde la wɔ akonge Ɔmɛnyi wa Jehowa ndo nde akayala ekumanyi la Ottawa, Ontario, polo lam’akandavu.

Lo 1950, lakonɔ otsha la Vancouver. Kaanga mbakamalangaka nsambisha akanga a mpoke, hambohɛki pondjo kɛnɛ kakete lam’akamasawola dimi la Chris Spicer, womoto ɔmɔtshi loka lakamasambisha lo shinga. Nde aketawɔ dia dimi mboshaka periodikɛ mbala la mbala ndo nde akalange dia dimi mɛnana la Gary k’omɛnde. Lakatshu dia towaenda lakawɔ ndo takasawola edja efula lo fundanɛka  awui lofunda. Oma laasɔ sho kondjɛnana nto edja ndo ɛnɔnyi ɛmɔtshi wambeta, ko lakambe efula etena kakawaye ndjombisha mɔyɔ lo losanganya lɔmɔtshi la woke la Toronto, Ontario. Gary akabatizama lushi lakɔ lɔsɔ. Kɛnɛ kakete kɛsɔ akambohola dia ekɔ ohomba ntetemala nsambisha, nɛ dia hateye kaanga yema kana onto lasambishaso ayoyonga Ɔmɛnyi wa Jehowa.

L’ɔkɔngɔ wa laasɔ, lakakalola otsha la Saskatoon. Lɛkɔ lakahomana la womoto ɔmɔtshi lakanɔmbɛ dia mbeka Bible l’anande ahende wa waasa wa wamato wa mpoke, Jean nde la Joan Rothenberger. Vɔ wakɔtɔka kalasa lo kalasa kakɔ kaamɛ k’akanga a mpoke kakamɔtɔka. Kombeta edja, ana wa wamato asɔ ahende wakatatɛ mbutɛ asekawɔ wa la kalasa awui wakawekaka. Yema yema, ambeki atanu wa lo kalasa kawɔ wakayala Ɛmɛnyi wa Jehowa. Ɔmɔtshi lokombo lande Eunice Colin. Lakɛnana la Eunice mbala ka ntondo, l’ɔnɔnyi ami w’ekomelo wa kalasa k’akanga a mpoke. L’etena kɛsɔ, nde akambisha bɔmbɔ ndo akanɔmbɛ dia dimi mbɔtɔ lande ɔngɛnyi. L’ɔkɔngɔ diko, nde mbakayonga onto l’ohomba efula lo lɔsɛnɔ lami. Nde mbakayonga wadɛmi!

Etena kakayeya nyango Eunice ɔnɛ nde akekaka Bible, nde akalɔmbɛ owandji wa kalasa dia mbetawoya Eunice dia ntshika. Kaanga mbakandasale la wolo ndo mbakandɔhɔtɔla dihomɔ diande dia wekelo, Eunice akayashikikɛ dia ntshikala la kɔlamelo le Jehowa. Etena kakalange Eunice batizama, ambutshi ande wakawotɛ ɔnɛ: “Naka wɛ monga Ɔmɛnyi wa Jehowa, kete wɛ pombaka mimɔ oma la ngelo kaso!” Ɔnkɔnɛ etena kakinde l’ɛnɔnyi 17, Eunice akamɔ oma la ngelo kawɔ ko akatodjasɛ kaamɛ la nkumbo kɛmɔtshi k’Ɛmɛnyi wa Jehowa. Nde akatetemala la wekelo ande ndo akayobatizama. Etena kakatatshukana lo 1960, ambutshi ande kondja lo fɛtɛ ka diwala diaso. Koko, l’edjedja ka wonya, dilɛmiɛlɔ diakawatoshaka diakatafulaka tsho l’ɔtɛ wa dietawɔ diaso ndo woho wakatodiaka anaso.

Oko wakiso ambutshi wa mpoke, aki tshondo y’okakatanu dia mbodia ana esambele w’apami woka. Koko takasale la wolo dia vɔ mbeya ɔtɛkɛta w’akanga a mpoke dia sho sawolaka dimɛna ndo dia mbaetsha akambo wa mɛtɛ. Anangɛso l’akadiyɛso wa l’etshumanelo wakatokimanyiya efula. Ɛnyɛlɔ, ombutshi ɔmɔtshi akatofundɛ yɛtshi ya mukanda dia totɛ ɔnɛ ɔnaso ɔmɔtshi ekɔ lo mbuta awui wa kɔlɔ lo Mbalasa ka Diolelo. Kɛsɔ akatokimanyiya dia menda dikambo sɔ ɔlɔlɔ. Anami anɛi w’apami anɛ: James, Jerry, Nicholas, ndo Steven wekɔ dikumanyi ndo wekɔ lo kambɛ Jehowa la kɔlamelo tshɛ kaamɛ la wadiɛwɔ ndo nkumbo yawɔ. Ndo nto, Nicholas nde la Deborah dia wadɛnde wekɔ lo mbisha lonya dia nkadimola l’ɔtɛkɛta w’akanga a mpoke lo Bɛtɛlɛ ka la Grande-Bretagne ndo Steven nde la Shannan ya wadɛnde wekɔ l’atei w’akadimudi wa l’ɔtɛkɛta w’akanga a mpoke lo Bɛtɛlɛ ka l’États-Unis.

Lonyangu ko, ngɔndɔ ɔtɔi la ntondo ka ɔnɔnyi wa 40 wa fɛtɛ kaso ka diwala nkoka, Eunice akavu la kansɛrɛ. L’etena kakandadiɛnɛka la paa kɛsɔ, mbetawɔ kande lo eolwelo kakookimanyiya dia nde ntshikala nge. Lekɔ lo kongɛɛ l’asolo walomɔlomɔ lushi layomɛnana la nde nto.

Lo Ngɔndɔ ka hende 2012, lakakɔ ko lakɔkɔ lokende. Lakoke dia lekɔ l’ohomba w’ekimanyielo, ko lakonɔ laka ɔnami ɔmɔtshi nde la wadɛnde. Nshi nyɛ tekɔ lo etshumanelo ka l’ɔtɛkɛta w’akanga a mpoke ka la Calgary, lɛnɛ atetemalami nkamba oko ekumanyi. Lo mɛtɛ, ɔsɔ ekɔ mbala kami ka ntondo ka monga l’etshumanelo ka l’ɔtɛkɛta w’akanga a mpoke! Ko laasɔ ngande wakamakeketshaka diɔtɔnganelo diasami la Jehowa lo ɛnɔnyi ɛsɔ tshɛ wakimi l’etshumanelo ka Angɛlɛ? Jehowa mbakakimanyiyaka. Nde akakotsha daka diande dia nkokɛ ana wa tshike. (Os. 10:14) Lekɔ la lowando le wanɛ tshɛ waketawɔka dia fundɛmi awui, dia mbetshami ɔtɛkɛta w’akanga a mpoke, ndo dia kadimolɛmi awui wakatamaka lo yɛdikɔ yɛdimi l’akoka awɔ.

Lo tena dimɔtshi, dimi kombokaka kɛnɛ kakatamaka ndo lakafɔnyaka dia ndooko onto leya woho wa nkimanyiya akanga a mpoke. Lo tena dia ngasɔ, etena kakamanyangaka ndo kakamayangaka mpekɔ, dimi lakakanaka yimba la ɛtɛkɛta wa Petero wakandatɛ Yeso ate: “Nkumadiɔndjɔ, le na atshɔso? Wɛ kele la ɛtɛkɛta wa lɔsɛnɔ la pondjo.” (Jni. 6:66-68) L’ɛnyɛlɔ ka anangɛso l’akadiyɛso efula w’akanga a mpoke waya edja lo akambo wa mɛtɛ, lakeke dia monga la solo dia lotutsha. Lakeke dia ndjaɛkɛ le Jehowa ndo lo okongamelo ande, ndo dui sɔ diambonga la wahɔ efula le mi. Nshi nyɛ, ekanda aso waya woho w’anyanya l’ɔtɛkɛta ami ndo lekɔ l’ɔngɛnɔngɛnɔ efula l’ɔtɛ womɔtɔ nsanganya ya l’etshumanelo ndo ya weke l’ɔtɛkɛta w’akanga a mpoke w’ase Amɛrikɛ. Lo mɛtɛ, lambonga la lɔsɛnɔ l’ɔngɛnɔngɛnɔ ndo loludi l’ɛtshɔkɔ lo kambɛ Jehowa, Nzambi kaso ka woke.