DJUNGUDUNGU yakatatɛ mbidɛ Lushi la tanu la pindju lo Ngɔndɔ ka divwa 1922 etena kakasangana anto 8 000 lo mbalasa kɛmɔtshi. Ɔnɔmbɔdi wa losanganya akewoya dia l’etenyi k’ohomba kɛnɛ, onto lalanga koka ntomba, koko ndooko onto lele la lotshungɔ la mbɔtɔ nto lo mbalasa.

Esambo wakembama lo etenyi ka mbɔtwɛlɔ kaki l’ɔtɛ a dui ɔnɛ: “Olimu wa lotombo,” ndo l’ɔkɔngɔ wa laasɔ Joseph Rutherford akemala la ntondo ka mikro. Ampokami efula wakadjasɛ wele l’okandokando. Anto amɔtshi wakemala lo yanyi. Ɔtɛkɛtshi akawatɛ dia mbidjasɛ ko mpokamɛ. Etena kakatatɛ sawo, onde onto ɔmɔtshi akɛnyi dihɔndɔ dia woke diakɔmbama dimɛna ndo diakalɛndalɛndaka la diko?

Ɔnangɛso Rutherford akasha sawo diaki l’ɔtɛ a dui ɔnɛ: “Diolelo dia l’olongo diaya suke.” L’edja ka wonya a ntango l’etenyi, dui diande dia wolo diakokɛmaka lo mbalasa k’otondo etena kakandalembetshiyaka woho wakewoyaka amvutshi wa lo nshi y’edjedja oyelo wa Diolelo aha la mboka wɔma. Etena kakandakome lo kondoko ya sawo diande, nde akambola ate: “Onde nyu mbetawɔka dia Nkumekanga ka lotombo amboshilaka ntatɛ la mbolɛ?” Ampokami wakakadimola la dui dia wolo ɔnɛ: “Eelo!”

Ɔnangɛso Rutherford akate la dui dia wolo ate: “Naka ngasɔ, kete nyokalole lo ekambɔ, nyu ana wa Nzambi Nkum’Olongo! Nyende, Nkumekanga ekɔ lo mbolɛ! Nyu mbele wanɛ watakokola lokumu lande. Laasɔ, nyewoya, nyewoya, nyewoya.”

L’etena kɛsɔ, dihɔndɔ diakɔmbama diakalɛndalɛndaka la diko, diakɔmbɔma ndo akafundama lɔkɔ ɔnɛ: “Nyewoya Nkumekanga ndo Diolelo.”

Ray Bopp mbohɔka ate: “Ampokami waki mɛtɛ l’ɔngɛnɔngɛnɔ efula.” Anna Gardner kɔndɔlaka woho “wakasukasuka odiko la nsaka.” Fred Twarosh akate ate: “Ampokami tshɛ wakemala mbala kakɔ ɔtɔi.” Evangelos Scouffas akate ate: “Aki oko wolo ɔmɔtshi mbakatotshutshuya dia sho monɛ oma lo nkɔsa yaso, ko takemala ndo asɔyi wakakɛlanɛ lo washo aso.”

Anto efula waki lo losanganya lɔsɔ wokewoyaka lokumu l’ɔlɔlɔ la Diolelo. Koko, l’etena kɛsɔ vɔ wakalodiama la oyango okina w’oyoyo. Ethel Bennecoff akakɔndɔla dia Ambeki wa Bible wakakalola “la ohetoheto ndo la ngandji k’efula lo etema [awɔ] woho wahatayalaka.” Odessa Tuck laki l’ɛnɔnyi 18 l’etena kɛsɔ akakalola oma lo losanganya lɔsɔ ele l’eshikikelo ka mbetawɔ lo leeta l’ɔnɛ: ‘Akɔna ayotshɔ?’ Nde akate ate: “Dimi kombeyaka lende kana ngande ndo kakɔna. Dui ɔtɔi diakameyaka ele dimi lakalangaka monga oko Isaya lakate ate: ‘Dimi ɔnɛ, ontome!’” (Isa. 6:8) Ralph Leffler akate ate: “Lushi la fɛtɛ lɔsɔ laki etatelo ka mɛtɛ k’esambishelo ka laande kendana la Diolelo kambokokanɛ lo nkɛtɛ k’otondo ɛlɔ kɛnɛ.”

Aha la taamu, losanganya la woke lɔsɔ lakasalema lo 1922 la Cedar Point, Ohio, lakatshikala l’ɛkɔndɔ oko dikambo dia teokrasi diahohamamɛki!  George Gangas akate ate: “Losanganya la woke lɔsɔ lakambisha nsaki kaha dimi mpandja ndooko losanganya lokina.” L’edja tshɛ kakandohɔka dui sɔ, ndooko lushi lakandetsha. Julia Wilcox akafunde ate: “Haakoke nembetshiya ɔngɛnɔngɛnɔ wonga la mi etena tshɛ katɛkɛtawɔ lo ekanda aso dikambo dia losanganya lɔsɔ la la Cedar Point lo 1922. Tena tshɛ dimi nangaka mbuta ɔnɛ: ‘Jehowa losaka lo woho wakayetawɔ dia dimi monga laawɔ.’”

Ɛlɔ kɛnɛ, ondo efula ka l’atei aso tekɔ la akambo w’amɛna wohɔso wakasalema lo losanganya lɔmɔtshi la woke lakaleke minanda etema aso ndo lakatolodia la ohetoheto ndo la ngandji lo dikambo dia Nzambi kaso ka woke ndo Nkumekanga kande. Etena kakanyiyaso akambo wahatohɛ asɔ, sho lawɔ tshutshuyamaka dia mbuta ɔnɛ: “Jehowa losaka lo woho wakayetawɔ dia dimi monga laawɔ.”