1, 2. a) Ɛtɛkɛta wa Yeso wele lo Mateo 24:12 wakendanaka ntondo la waa na? b) Ngande wɛnya dibuku dia Etsha ɔnɛ Akristo efula wa lo ntambe ka ntondo wakatetemala nkɛnɛmɔla ngandji? (Enda osato wele lo mbɔtwɛlɔ.)

YESO akate dikambo dimɔtshi dia lo djembetelo yendana la “etena k’ekomelo ka dikongɛ di’akambo” ate: “Ngandji k’anto efula kayɔla.” (Mat. 24:3, 12) Lo ntambe ka ntondo, ase Juda wakasɛmaka dia vɔ mbaki ekambi wa Nzambi, waketawɔ dia ngandji kakawokaka Nzambi mbɔla.

² Lo wedi okina, Akristo efula waki l’etena kɛsɔ wakayasha tshɛ lo “mbewoya lokumu l’ɔlɔlɔ lendana la Kristo” ndo lo mɛnya ngandji kakawokaka Nzambi, asekawɔ Akristo ndo wanɛ waki komonga ambetawudi. (Ets. 2:44-47; 5:42) Koko, ambeki wa Yeso amɔtshi waki lo ntambe ka ntondo waketawɔ dia ngandji kawɔ mbɔla.

3. Kakɔna ondo kakakonya dia ngandji ka Akristo amɔtshi mbɔla?

³ Yeso Kristo akatɛ Akristo wa lo ntambe ka ntondo waki l’Ɛfɛsɔ ate: “Kɛnɛ kakonyangɛmi ele, wɛ ambotshika ngandji kaki la yɛ ntondo.” (Ɛny. 2:4) Kakɔna kakakoke monga lo kiɔkɔ ya  dikambo sɔ? Ondo ambeki wa Kristo wa lo ntambe ka ntondo asɔ wakasɛngiyama oma le andja ɔnɛ wele la tokanyi ta lo demba. (Ɛf. 2:2, 3) Oko wediɔ l’esomba efula wa nshi nyɛ, osomba w’Ɛfɛsɔ wa lo ntambe ka ntondo wakalolanɛ l’awui wa mindo. Vɔ waki osomba waki la ɔngɔnyi efula wele anto efula wa lɔkɔ wakalekaka ndjasha dia monga la lɔsɛnɔ la kawotake, tɔkɛnyɔ ndo lɔsɛnɔ la dimɛna. Anto wa lɛkɔ wakayashaka la lokaki tshɛ lo ɛngɛnɔngɛnɔ lo dihole dia monga la ngandji ka ndjahondja. Ndo nto, lɔkɛwɔ la fumbɔ nsɔnyi ndo awui wa mindo wakakitaka dikuma.

4. a) Lo toho takɔna tele ngandji kambɔla lo nshi yaso nyɛ? b) Lo akambo asato akɔna wakokaso monga la ngandji k’efula?

⁴ Prɔfɛsiya ka Yeso kakɛnya dia ngandji kayokitakita kekɔ lo kotshama polo lo nshi yaso nyɛ. Ɛlɔ kɛnɛ ngandji koka anto Nzambi kekɔ lo taleke nkitakita tsho. Lo dihole dia mendɛ le Nzambi dia nde nkandola ekakatanu wa l’andja ɔnɛ, miliyɔ y’anto wekɔ lo mendɛ le atshunda w’anto. Diakɔ diele, ngandji k’anto wahatɛmɔla Jehowa Nzambi kekɔ lo tatetemala mbɔla. Koko, kaanga ngandji k’ekambi wa Jehowa koka mbɔla, oko wakidiɔ lo etshumanelo ka l’Ɛfɛsɔ ka lo ntambe ka ntondo. Ɔnkɔnɛ, tɔsɛdingole akambo asato wahombaso monga la ngandji k’efula: 1) ngandji kokaso Jehowa, 2) ngandji kaso k’akambo wa mɛtɛ wa lo Bible, ndo 3) ngandji kokaso anangɛso.

5. Lande na kahombaso mboka Nzambi ngandji?

⁵ Onto akɔna ahombaso ndeka mboka ngandji? Yeso akate ate: “‘Langa Jehowa Nzambi kayɛ la otema ayɛ tshɛ ndo la anima ayɛ tshɛ ndo la yimba yayɛ tshɛ.’ Ɔsɔ mbele ɔlɛmbɛ woleki woke ndo wa ntondo.” (Mat. 22:37, 38) Lo mɛtɛ, mboka Nzambi ngandji k’efula tokimanyiyaka dia nkitanyiya ɛlɛmbɛ ande, mbikikɛ ndo mpetsha kɛnɛ kele kɔlɔ. (Adia Osambo 97:10.) Koko, Satana la andja ande wekɔ lo nsala la wolo dia toshishɛ ngandji kokaso Nzambi.

6. Etombelo akɔna wonga naka anto ntshika mboka Nzambi ngandji?

⁶ Andja wotodingi wekɔ la kanyi ya kɔlɔ lo dikambo dia ngandji. Lo dihole dia mboka Otungi ngandji, anto wekɔ lo “[ndj]alanga.” (2 Tim. 3:2) Andja walɔmbwama oma le Satana ɔnɛ wekɔ la “nsaki ka demba ndo nsaki ka washo ndo ɔsɛmɔ wa kɛnɛ kele la onto lo lɔsɛnɔ.” (1 Jni. 2:16) Ɔpɔstɔlɔ Pɔɔlɔ akahɛmɔla Akristo lo dikambo dia kɛnɛ kakoka ntomba naka sho mbetsha ɛngɛnɔngɛnɔ aso lo dihole dia ntondo. Nde akate ate: “Nkanyiya akambo wa lo demba nembetshiyaka nyɔi.” Lande na? Nɛ dia wanɛ wasala dui sɔ ndjokomaka atunyi wa Nzambi. (Rɔmɔ 8:6, 7) Diakɔ diele, wanɛ wetsha lɔsɛnɔ lawɔ l’oweso wa lomombo kana wayasha l’awui wa dieyanelo ndjɔsaka nsɔnyi ndo ndjoyasalɛka kɔlɔ.​—1 Kɔr. 6:18; 1 Tim. 6:9, 10.

7. Tokanyi takɔna ta kɔlɔ takoka monga waale le Akristo ɛlɔ kɛnɛ?

⁷ Anto efula wata ɔnɛ Nzambi bu, wanɛ wata ɔnɛ hatokoke monga la mbetawɔ le Nzambi ndo wanɛ wetawɔ wetshelo w’ohilwelo, tshutshuyaka anto diaha mboka Nzambi ngandji ndo diaha mbetawɔ ɔnɛ Nzambi ekɔ. Vɔ wambetawoya anto efula ɔnɛ paka kanga enginya kana onto laki kɔmbɔtɔ kalasa mbakoka mbetawɔ ɔnɛ Otungi ekɔ. Laadiko dia laasɔ, anto efula woleka nɛmiya ambeyi wa siansɛ oleki Otungi aso. (Rɔmɔ 1:25) Kaanga Akristo kokaka sɛngiyama oma lo tokanyi tɔsɔ. Diɔtɔnganelo diasaso la Jehowa koka ndana ndo ngandji kawokaso koka mbɔla.​—Hɛb. 3:12.

8. a) Akambo akɔna wakoka nkɔmɔla ekambi wa Jehowa efula? b) Ngande wakoka Osambo 136 tosamba?

⁸ Lam’ele tekɔ lo nsɛna lo dikongɛ dia kɔlɔ  diaki Satana, ekɔ awui efula wakoka tɔkɔmɔla lo tena dimɔtshi. (1 Jni. 5:19) Koko naka sho mbetawɔ dia ndjakɔmɔla amboleka, kete mbetawɔ ndo ngandji kokaso Nzambi koka mbɔla. Ɛnyɛlɔ, sho koka monga l’ekakatanu l’ɔtɛ wototatshunde, weso la yoonge ya kɔlɔ kana ekakatanu wendana l’ekondjelo. Kana mbeyaka monga ko tekɔ lo ndjaɛndja onongo l’ɔtɛ wahatakotshisha dui dimɔtshi, l’ɔtɛ wahakotshama dui dimɔtshi dialongamɛso kana wɛɔdu aso ɛmɔtshi. Oyadi ekakatanu akɔna wahomana la so, hatohombe pondjo mfɔnya dia Jehowa ambotɔsɛka. Koko sho pombaka nkana yimba la ɛtɛkɛta w’esambelo watanaso l’Osambo 136:23, wata ɔnɛ: “Nde akatoohɔ etena kakiso l’ɛse, nɛ dia ngandji kande ka kɔlamelo tshikalaka pondjo.” Lo mɛtɛ ngandji ka kɔlamelo koka Jehowa ekambi ande kekɔ nshi tshɛ. Ɔnkɔnɛ, tonge l’eshikikelo ɔnɛ nde ekɔ lo mboka “ɛsɛngɔsɛngɔ a[so] wa nyanga ekimanyielo” ndo nde ayowakadimola.​—Os. 116:1; 136:24-26.

9. Kakɔna kakakimanyiya Pɔɔlɔ dia ntetemala mboka Nzambi ngandji k’efula?

⁹ Ɔpɔstɔlɔ Pɔɔlɔ aki okambi wa Nzambi wakakanaka yimba efula lo woho wakosukɛka Jehowa ndo dui sɔ diakokimanyiya dia ntshikala nge. Nde akafunde ate: “Jehowa kele okimanyedi ami, dimi hantoka wɔma. Kakɔna kakoka onto salɛmi?” (Hɛb. 13:6) Wɛkamu waki la Pɔɔlɔ le Jehowa akookimanyiya dia ndɔshana l’ekakatanu wa lo lɔsɛnɔ. Etena kaki Pɔɔlɔ l’ekakatanu wa wolo, nde koshisha wɛkamu ande le Jehowa. Kaanga etena kakinde lo lokanu, Pɔɔlɔ akakimanyiya asekande Akristo lo mfundɛ tshumanelo mikanda efula w’ekeketshelo. (Ɛf. 4:1; Flpɛ. 1:7; Filɛ. 1) Lo mɛtɛ oyadi ekakatanu akɔna wakahomana la Pɔɔlɔ, nde akatetemala mboka Nzambi kande ngandji. Nde akayaɛkɛka le “Nzambi k’esambelo tshɛ, ɔnɛ latosamba lo asui aso tshɛ.” (2 Kɔr. 1:3, 4) Ngande wakokaso mbokoya Pɔɔlɔ?

10. Akokaso nsala dia ntetemala mboka Jehowa ngandji k’efula?

¹⁰ Pɔɔlɔ akalembetshiya yoho mɔtshi yakoka tokimanyiya dia mboka Nzambi ngandji k’efula etena kakandafunde ɔnɛ: “Nyotetemale nɔmba.” Oma laasɔ nde akafunde ate: “Nyotetemale nɔmba.” (1 Tɛs. 5:17; Rɔmɔ 12:12) Lande na kele dɔmbɛlɔ tosukanyaka la Nzambi? Etena kalɔmbaso, sho sawolaka la Jehowa ndo dui sɔ tokimanyiyaka dia monga la diɔtɔnganelo dia dimɛna la nde. (Os. 86:3) Naka sho mbutɛ Shɛso lele l’olongo tokanyi ndo nsaki y’oma k’ɛse otema yele la so, kete tayoyasukanya la Ɔnɛ “latokaka dɔmbɛlɔ.” (Os. 65:2) Ndo nto, ngandji kokaso Jehowa pamaka etena kɛnaso woho wakadimolande alɔmbɛlɔ aso. Tekɔ l’eshikikelo dia “Jehowa ekɔ suke la wanɛ tshɛ wawelɛ.” (Os. 145:18) Wɛkamu wele la so lo ngandji ndo l’osukɔ wa Jehowa ayotokimanyiya dia nkandola ekakatanu tshɛ wakoka mpomana la so nshi nyɛ ndo lo nshi yayaye.

11, 12. Ngande wakokaso mfudia ngandji kaso k’akambo wa mɛtɛ wa lo Bible?

¹¹ Oko weso Akristo, sho nangaka akambo wa mɛtɛ. Lo Ɔtɛkɛta wa Nzambi mbatanaso akambo wa mɛtɛ. Yeso akatɛ She lo dɔmbɛlɔ ate: “Ɔtɛkɛta ayɛ wekɔ mɛtɛ.” (Jni. 17:17) Dia nanga akambo wa mɛtɛ wa lo Bible, sho pombaka mbeya kɛnɛ kele lo Bible. (Kɔl. 1:10) Koko aha laasɔ ato. Tolembete woho watokimanyiya ofundji w’Osambo 119 dia sho nshihodia kɛnɛ kahombaso nsala. (Adia Osambo 119:97-100.) Lushi l’otondo, sho pombaka nkana yimba kana nkanyiya efula lo dikambo dia kɛnɛ kadiaso lo Bible. Naka sho nkana yimba lo woho wakokaso nkamba l’akambo wa mɛtɛ wa lo Bible lo nsɛnɔ yaso, kete tayoleka mbalanga.

 ¹² Omembi w’esambo akate nto ate: “Ande mpɛ kele ɛtɛkɛta ayɛ lo lolemi lami lee! ndeka osanga l’onyɔ ami!” (Os. 119:103) Ekanda walembetshiya Bible watotondjɛ okongamelo waki Nzambi wekɔ oko mbo ya ndɛ y’amɛna. Etena kalɛso mbo ya ndɛ yalangaso, ondo sho mbɔsaka etena k’otale dia ndjingɛnangɛna. Woho akɔ waamɛ mbele, sho pombaka mbɔsa etena k’otale dia mbeka. Ngaasɔ mbayotɔngɛnangɛna “tɔtɛkɛta t’amɛna” t’akambo wa mɛtɛ ndo hatonga wolo dia mbohɔ kɛnɛ kadiaso ndo nkamba la tɔ dia nkimanyiya anto akina.​—Ond. 12:10.

13. Kakɔna kakakimanyiya Jɛrɛmiya dia nanga akambo wa mɛtɛ wa lo Ɔtɛkɛta wa Nzambi, ndo dui sɔ diaki la shɛngiya yakɔna le nde?

¹³ Omvutshi Jɛrɛmiya akalangaka akambo wa mɛtɛ wa l’Ɔtɛkɛta wa Nzambi. Nde akate ate: “Ɛtɛkɛta ayɛ wakatanema, ndo dimi lakawale; ko ɔtɛkɛta ayɛ wakayala le mi ɔngɛnɔngɛnɔ ndo ɔlɔ w’otema ami, nɛ dia Jehowa Nzambi kanga lolembelembe le, wakambelɛ lo lokombo layɛ.” (Jɛr. 15:16) Jɛrɛmiya akakane yimba efula lo dikambo dia ɛtɛkɛta wa Nzambi wa nɛmɔ ndo nde akawalangaka. Nde akangɛnangɛna monga onyimpala wa Jehowa ndo mbewoya anto akina losango lande. Naka sho nangaka akambo wa mɛtɛ wa lo Bible, kete tayoshihodia ɔnɛ tekɔ la diɛsɛ dia laande dia monga Ɛmɛnyi wa Jehowa ndo nsambisha akambo wendana la Diolelo lo nshi y’ekomelo nyɛ.

14. Kakɔna nto kakokaso nsala dia mfudia ngandji kaso k’akambo wa mɛtɛ wa lo Bible?

¹⁴ Kakɔna nto kayotokimanyiya dia mfudia ngandji kaso k’akambo wa mɛtɛ? Sho pombaka mbɔtɔka lo nsanganya ya l’etshumanelo mbala la mbala lɛnɛ etshamaso oma le Jehowa. Wekelo wa Bible wa lomingu la lomingu l’ekimanyielo ka Tshoto y’Etangelo ekɔ yoho mɔtshi y’ohomba yetshamaso. Naka sho nangaka nkondja wahɔ tshɛ lo tshɛ oma lo losanganya lɔsɔ, kete sho pombaka nɔngɔsɔlaka la ntondo. Ɛnyɛlɔ, sho kokaka mboka sso lo avɛsa tshɛ woshilami. Ɛlɔ kɛnɛ, anto efula waya l’akoka wa mbadia kana telesharjɛ Tshoto y’Etangelo l’Ɛtɛrnɛtɛ. Periodikɛ kakɔ kekɔ lo ɛtɛkɛta efula lo sitɛ ka jw.org ndo lo application JW Library.  Fɔrma mɔtshi yele lo mashinyi tokimanyiyaka dia ntana avɛsa woshilami esadi eto. Koko sho nɔmbamaka dia mbeka sawo tshɛ, naka sho mbadia la yambalo tshɛ avɛsa ndo nkana yimba efula lo dikambo diawɔ, kete ngandji kaso k’akambo wa mɛtɛ wa lo Bible kayohama.​—Adia Osambo 1:2.

15, 16. a) Lo ndjela Joani 13:34, 35, ɔlɛmbɛ akɔna wakatosha Yeso? b) Lo ngande wele ngandji kokaso Nzambi ndo Bible mbɔtɔnɛka la ngandji kokaso anangɛso?

¹⁵ L’otsho w’ekomelo wakinde la nkɛtɛ, Yeso akatɛ ambeki ande ate: “Dimi lambonyosha ɔlɛmbɛ w’oyoyo dia nyu mbokana ngandji. Nyokane ngandji lam’asanyu oko wakamanyoke ngandji. Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.”​—Jni. 13:34, 35.

¹⁶ Mboka anangɛso l’akadiyɛso ngandji mbɔtɔnɛka la mboka Jehowa ngandji. Naka hatoke Nzambi ngandji, kete hatotoka anangɛso ngandji. Ndo naka hatoke anangɛso ngandji, kete hatokoke mboka Nzambi ngandji. Ɔpɔstɔlɔ Joani akafunde ate: “Onto lahalange ɔnango lɛnande hakoke nanga Nzambi lahandɛnyi.” (1 Jni. 4:20) Ngandji kokaso Jehowa ndo anangɛso mbɔtɔnɛka nto la ngandji kaso ka Bible. Lande na? Nɛ dia naka sho nanga kɛnɛ kekaso oma lo Bible, kete tayolanga nkitanyiya ɛlɛmbɛ wele lɔkɔ watotɛ dia nanga Nzambi ndo anangɛso.​—1 Pet. 1:22; 1 Jni. 4:21.

17. Naa toho tɔmɔtshi takokaso mɛnya anto akina ngandji kawaokaso?

¹⁷ Adia 1 Tɛsalɔnika 4:9, 10. Naa toho tɔmɔtshi shikaa takokaso mɛnya ase etshumanelo kaso ngandji? Ɔnangɛso laya opalanga kana kadiyɛso kɛmɔtshi koka monga l’ohomba w’ekimanyielo dia nde ntshɔ lo nsanganya ya l’etshumanelo ndo nkalola. Wadi aki odo ɔmɔtshi koka monga l’ohomba w’ekimanyielo dia nɔngɔsɔla ɛngɔ kɛmɔtshi lo luudu lande. (Jak. 1:27) Anangɛso l’akadiyɛso wambɔkɔmɔ kana wele l’ekakatanu ekina, wekɔ l’ohomba wa sho mbadja yimba, mbakeketsha ndo mbasamba. (Tok. 12:25; Kɔl. 4:11) Sho mɛnyaka ɔnɛ tekɔ lo mboka “wanɛ wotɔ la so lo mbetawɔ” ngandji oma l’ɛtɛkɛta ndo ditshelo diaso.​—Ngal. 6:10.

18. Kakɔna kayotokimanyiya dia nkandola ekakatanu wele lam’asaso l’anangɛso?

¹⁸ Bible mbutaka ɔnɛ “lo nshi y’ekomelo” ka dikongɛ nɛ di’akambo dia kɔlɔ anto efula wayonga la lokaki ndo l’ɔkɔmiya. (2 Tim. 3:1, 2) Lam’ele tekɔ Akristo, sho pombaka nsala la wolo dia ntetemala mfudia ngandji kokaso Jehowa, Ɔtɛkɛta ande ndo lam’asaso. Oko weso keema kokele, lo tena dimɔtshi ekakatanu wa totshitshɛ mongaka lam’asaso l’anangɛso. Koko naka sho mbokanaka ngandji k’onto l’ɔnango, kete tayosala la wolo dia nkandola ekakatanu akɔna tshɛ lo yoho ya dimɛna ndo esadi eto naka kokaka! (Ɛf. 4:32; Kɔl. 3:14) Ɔnkɔnɛ, tatetawɔke pondjo dia ngandji kaso mbɔla! Koko nyɛsɔ totetemale mboka Jehowa, Ɔtɛkɛta ande ndo anangɛso ngandji k’efula.