Tshelo tshɔi y’ɔlɔlɔ w’otema w’Okristo
L’OSOMBA wa tshitshɛ wa Gujerat, la Inde, she John akabatizama dia monga Ɔmɛnyi wa Jehowa oya l’ekomelo k’ɛnɔnyi wa 1950. Koko, John l’anango ndo akadiyɛnde atanu la mama kawɔ waki aseka Mupɛ w’oma la Rɔmɔ ndo wakayashaka efula l’awui w’ɔtɛmwɛlɔ. Diakɔ diele, vɔ wakalɔshanaka la dietawɔ dia shɛwɔ.
Lushi lɔmɔtshi, she John akɔɔlɔmbɛ dia tɔlɛ ɔnangɛso ɔmɔtshi la l’etshumanelo divɔlɔpɛ dimɔtshi. Koko la pindju kakɔ, John akayahomuya lo lohita etena kakandadiholaka fi. Koko lam’ele nde akalange nkotsha kɛnɛ kakawotɛ she, nde akɔmbɛ dihɔndɔ lo lohita lakandahomɔ ko akatshu dia totshika divɔlɔpɛ diakɔ.
Etena kakakome John lo dihole diakɔ, nde akasha wadi aki ɔnangɛso akɔ divɔlɔpɛ. Wadɛnde akɔ aki Ɔmɛnyi wa Jehowa. Nde akɛnyi mpota ka John ka lo lohita ko akokimanyiya. Nde akatondja dihomɔ diande, akosole mpota ndo akawɔmbɛ bandɛ lo lohita. Oma laasɔ, nde akasha John dikɔhɔ dia tshayi. Lo wonya ɔsɔ tshɛ, kadiyɛso kakɔ akasawolaka la nde la lɔngɛnyi tshɛ akambo wa lo Bible.
L’ɔtɛ w’ɔlɔlɔ w’otema wa kadiyɛso, tokanyi taki la John lo dikambo di’Ɛmɛnyi wa Jehowa takatatɛ ntshikitana. Diakɔ diele, nde akambola kadiyɛso ambola ahende wendana la dietawɔ di’Ɛmɛnyi wa Jehowa diotshikitanyi la di’aseka Mupɛ. Nde akawombola dia kana Yeso ekɔ Nzambi ndo kana Akristo pombaka nɔmba Mariya. Kadiyɛso akeyaka ɔtɛkɛta wa Gujarati ko akakadimola ambola wa John l’ɔtɛkɛta ande hita. Nde akawɛnya ekadimwelo w’oma lo Bible ndo akawosha biukubuku “Lokumu l’ɔlɔlɔ lɔnɛ la Diolelo” (lo Angɛlɛ).
L’ɔkɔngɔ wa John mbadia biukubuku yakɔ, nde akashihodia ɔnɛ akambo wa mɛtɛ mbakandadiaka. Nde akatshu le abe ande ndo akawombola ambola akɔ ahende. Abe akomala ndo akawoke Bible ahangɔhangɔ ate: “Wɛ aya Satana! Ɔmɛnya lɛnɛ ata Bible ɔnɛ Yeso bu Nzambi. Ɔmɛnya lɛnɛ atatɔ ɔnɛ hatohombe ntɛmɔla Mariya. Ɔmɛnya!” John akanyange l’ɔtɛ wakasale abe akambo lo yoho shɔ. Nde akatɛ abe dia nde hatshɔki pondjo l’ɔtɛmwɛlɔ w’aseka Mupɛ nto. Ndo nde kotshɔ nto!
John akatatɛ mbeka Bible l’Ɛmɛnyi wa Jehowa, aketawɔ akambo wa mɛtɛ ndo akatatɛ kambɛ Jehowa. L’etena kɛsɔ, ase nkumbo kande efula wakayele lokolo lande. Aya ɛnɔnyi oko 60 wele lofwe la lo lohita la John tetemalaka mbohola tshelo y’ɔlɔlɔ w’otema w’Okristo yakotshutshuya dia nde mbetsha lɔsɛnɔ lande l’otondo lo kambɛ Jehowa.—2 Kɔr. 6:4, 6.
