1, 2. a) Olimu akɔna wakaleke ohomba lo lɔsɛnɔ la Yeso, ndo lande na? b) Ahombaso nsala dia monga l’etombelo w’ɛlɔlɔ oko weso “ekambi kaamɛ la Nzambi”?

YESO KRISTO aki otshudi w’abaya ndo l’ɔkɔngɔ, akayonga osambisha. (Makɔ 6:3; Rɔmɔ 15:8) Nde akasale elimu ɛsɔ ehende lo yoho ya kokele. Oko otshudi w’abaya, nde akeke woho wa nkamba la dihomɔ diande dia nsala diangɔ di’ohomba la abaya. Ndo oko osambisha, nde akakambe l’ewo k’efula ka Afundelo kaki la nde dia nkimanyiya anto k’anto dia nshihodia akambo wa mɛtɛ w’oma l’Ɔtɛkɛta wa Nzambi. (Mat. 7:28; Luka 24:32, 45) Etena kaki Yeso l’ɛnɔnyi 30, nde akatshike olimu w’otshudi w’abaya ko akonge osambisha nɛ dia nde akeyaka dia ɔsɔ aki olimu wakaleke ohomba wakandahombe nsala. Nde akate di’esambishelo ka lokumu l’ɔlɔlɔ la Diolelo dia Nzambi aki l’atei w’ɛkɔkɔ wakotome Nzambi la nkɛtɛ. (Mat. 20:28; Luka 3:23; 4:43) Yeso aketsha olimu w’esambishelo lo dihole dia ntondo lo lɔsɛnɔ lande ndo nde akalangaka di’anto akina nsala woho akɔ waamɛ.​—Mat. 9:35-38.

² Efula ka l’atei aso bu etshudi w’abaya, koko sho tshɛ tekɔ esambisha wa lokumu l’ɔlɔlɔ. Olimu ɔsɔ wekɔ ohomba efula, diakɔ diele ndo Nzambi ndjashaka lɔkɔ. Diakɔ dielamɛso “ekambi kaamɛ la Nzambi.” (1 Kɔr. 3:9; 2 Kɔr. 6:4) Sho mbetawɔka kɛnɛ kakate omembi w’esambo ɔnɛ: “Tshondo y’ɔtɛkɛta ayɛ wekɔ mɛtɛ.” (Os. 119:159, 160) Ɔtɛkɛta wa Jehowa wekɔ mɛtɛ. Diakɔ diele, sho pombaka ndjashikikɛ dia tekɔ anto “walembetshiya ɔtɛkɛta w’akambo wa mɛtɛ dimɛna”  l’esambishelo. (Adia 2 Timɔte 2:15.) Ɔnkɔnɛ, sho tetemalaka nsala la wolo dia nyomoleka monga la diewo dia nkamba la Bible kele ehomɔ kaso ka ntondo ka mbetsha anto akina awui wendana la Jehowa, Yeso ndo Diolelo. Dia tokimanyiya dia monga l’etombelo w’ɛlɔlɔ l’esambishelo, okongamelo wa Jehowa toshaka dihomɔ dikina di’ohomba ndo sho pombaka mbeya woho wa nkamba la diɔ. Dihomɔ sɔ diekɔ lo Ɛngɔ kombaso dihomɔ dia mbetsha.

3. Lo na ahombaso ndeka ndjasha etena kasambishaso, ndo ngande watokimanyiya Etsha 13:48 dia nsala dui sɔ?

³ Wɛ koka ndjambola lande na kakielɛso Ɛngɔ kombaso dihomɔ dia mbetsha, koko aha Ɛngɔ kombaso dihomɔ dia nsambisha. “Nsambisha” kɛdikɛdi mbewoya losango, koko, “mbetsha” kɛdikɛdi nembetshiya losango lakɔ di’onto nshihodia kɛnɛ kokande ndo oma laasɔ, tshutshuyama dia nkamba la kɛnɛ kekande. L’etena ka mondo kambotshikalɛ dikongɛ nɛ, sho pombaka ndjasha tshɛ dia ntatɛ mbeka l’anto Bible ndo mbetsha anto akambo wa mɛtɛ dia vɔ monga ambeki wa Kristo. Dui sɔ nembetshiyaka dia sho pombaka nyanga l’ohetoheto tshɛ wanɛ wele “suke dia mbetawɔ akambo wa mɛtɛ wakonya lo lɔsɛnɔ la pondjo” ndo mbakimanyiya dia vɔ ntatɛ kambɛ Jehowa.​—Adia Etsha 13:44-48.

4. Ngande wakokaso ntana anto wele “suke dia mbetawɔ akambo wa mɛtɛ wakonya lo lɔsɛnɔ la pondjo”?

⁴ Ngande wakokaso ntana wanɛ wele “suke dia mbetawɔ akambo wa mɛtɛ wakonya lo lɔsɛnɔ la pondjo”? Le Akristo wa lo ntambe ka ntondo, yoho tshɔi yakawatanaka anto asɔ aki l’esambishelo. Yeso akatɛ ambeki ande ate: “Lo osomba tshɛ kana lo ngelo tshɛ kayonyɔtɔ, kanyoyange wanɛ wakoka nyolongola.” (Mat. 10:11) Sho pombaka nsala woho akɔ waamɛ ɛlɔ kɛnɛ. Lo mɛtɛ naka anto bu l’etema w’ɛlɔlɔ, wekɔ l’otako kana hawoyakiyanya mɛtɛ lo kɛnɛ kendana la Nzambi, hatokoke nongamɛ dia vɔ wayohokamɛ lokumu l’ɔlɔlɔ. Sho pombaka nyanga anto w’etema ɛlɔlɔ, wele l’okitshakitsha ndo walanga mɛtɛ mbeya akambo wa mɛtɛ. Sho koka mbɛdika woho wayangaso anto la kɛnɛ kakahombe Yeso nsala etena kakinde otshudi w’abaya. Ntondo ka nde nsala ɛngɔ kɛmɔtshi, ɛnyɛlɔ lokuke, osembe kana ɛngɔ kekina, nde akahombe nyanga dibaya dia dimɛna. Oma laasɔ, nde akakoke mbɔsa ɛngɔ kombawɔ dihomɔ, nkamba la diewo diande ndo ntshula ɛngɔ kakɔ. Woho akɔ waamɛ mbele ɛlɔ kɛnɛ, sho pombaka ntondo nyanga anto w’etema ɛlɔlɔ ndo oma laasɔ, sho koka nkamba la dihomɔ ndo diewo diaso dia mbakimanyiya dia vɔ monga ambeki.​—Mat. 28:19, 20.

5. Kakɔna kahombaso mbeya lo dikambo dia dihomɔ diele lo Ɛngɔ kombaso dihomɔ dia mbetsha? Sha ɛnyɛlɔ. (Enda esato wele lo mbɔtwɛlɔ.)

⁵ Lo ɛngɔ kombawɔ dihomɔ, ehomɔ tshɛ kekɔ l’oyango atɔ shikaa. Ɛnyɛlɔ, tokanyiya dikambo dia dihomɔ diakakambe la Yeso oko otshudi w’abaya. * Nde aki l’ohomba wa dihomɔ dia mbɛdika, dia mbidja tolembetelo, dia ntondola wesho, dia nsɛla dibaya mbidja ndo dihomɔ dia mbɛdinya abaya ndo mbakakatanya. Woho akɔ waamɛ mbele, ehomɔ tshɛ ka lo Ɛngɔ kombaso dihomɔ dia mbetsha kekɔ l’oyango ɔmɔtshi shikaa. Ɔnkɔnɛ, tende woho wakokaso nkamba la dihomɔ di’ohomba sɔ.

6, 7. a) Ngande wakayakambe la kartɛ ya woho wa mbɔtɔ lo jw.org? b) Lande na kakambaso l’akatshi wa leeta l’oya lo nsanganya ya l’etshumanelo?

⁶ Kartɛ ya woho wa mbɔtɔ lo jw.org. Kartɛ yakɔ yekɔ totshitshɛ, koko yekɔ dihomɔ dionga l’etombelo w’ɛlɔlɔ diatɛ anto weho w’anto weso ndo diawatɔla lo sitɛ kaso ka jw.org. Lo sitɛ kaso k’Ɛtɛrnɛtɛ, vɔ koka mbeya akambo efula wendana laso ndo kaanga nɔmba dia mbeka Bible. Anto ndekana 400 000 wakalɔmbɛ dia mbeka Bible oma lo jw.org, ndo anto ndekana nkama salaka dui sɔ lushi tshɛ! Wɛ koka monga la kartɛ mɔtshi ndo nkamba la yɔ etena kasawolayɛ l’anto wahomana  la yɛ lo lushi.

⁷ Akatshi wa leeta. Dikatshi dia leeta diendana la nsanganya yaso mbutaka ɔnɛ: “Tambokelɛ dia ndjeka Bible la Ɛmɛnyi wa Jehowa.” Oma laasɔ diɔ mbutaka ɔnɛ, wɛ koka nsala dui sɔ “lo nsanganya yaso ya lo sɛkɛ” “kana la ombetsha ayɛ hita.” Ɔnkɔnɛ, dikatshi dia leeta mbutɛka anto weho w’anto weso ndo diɔ nɔmbaka wanɛ “weya ehomba awɔ wa lo nyuma” dia mbeka la so Bible. (Mat. 5:3) Lo mɛtɛ, anto kokaka mbɔtɔ lo nsanganya yaso oyadi vɔ mbetawɔka dia mbeka Bible kana bu. Naka vɔ ndja lo nsanganya yaso, kete vɔ wayɛna dia vɔ koka mbeka awui efula wendana la Bible.

8. Lande na kele ekɔ ohomba di’anto ndja kaanga mbala ɔtɔi lo nsanganya yaso? Sha ɛnyɛlɔ.

⁸ Ekɔ ohomba dia sho ntetemala mbelɛ anto dia ndjɔtɔ kaanga mbala ɔtɔi lo nsanganya yaso. Lande na? Nɛ dia etena kayowoya, vɔ wayoyɛna di’Ɛmɛnyi wa Jehowa mbetshaka akambo wa mɛtɛ w’oma lo Bible ndo kimanyiyaka anto dia mbeya Nzambi, etena kele ɛtɛmwɛlɔ wa kashi hawosale dui sɔ. (Isa. 65:13) Ɛnyɛlɔ, Ray la Linda, wadi l’omi amɔtshi wa l’États-Unis wakɛnyi otshikitanu ɔsɔ ambeta ɛnɔnyi ɛmɔtshi. Vɔ waki la mbetawɔ le Nzambi ndo wakalange dia mbeeya dimɛna. Diakɔ diele, vɔ wakɔshi yɛdikɔ ya tembolaka ɛtɛmwɛlɔ tshɛ wa l’osomba awɔ ndo tayangaka awui ahende ntondo ka vɔ ndjɔtɔ l’ɔtɛmwɛlɔ ɔmɔtshi. Dui dia ntondo ele, vɔ wakalange mbeka dui dimɔtshi l’ɔtɛmwɛlɔ, ndo dui dia hende ele, anto wa l’ɔtɛmwɛlɔ pombaka ndɔta oko anto wata dia wekɔ lo kambɛ Nzambi. Dui sɔ diakawaɔsɛ ɛnɔnyi efula nɛ dia ɛtɛmwɛlɔ waki efula. Koko vɔ wakonge la lonyangu l’efula. Vɔ kombeka ndooko dui ndo ase ɔtɛmwɛlɔ wakalɔtaka kɔlɔ. L’ɔkɔngɔ wa vɔ membola ɔtɛmwɛlɔ w’ekomelo waki lo listɛ lawɔ, Linda akatshu l’olimu ndo Ray akakalola la ngelo. Etena kakandatakalolaka otsha la ngelo, nde akatetaka la mutuka l’omamu wa Mbalasa ka Diolelo. Nde akate ate: ‘Tokɔtɔ kele mende kɛnɛ kasalawɔ lɛkɔ.’ Ɔsɔ aki dui dia dimɛna efula! Anto tshɛ waki lo Mbalasa ka Diolelo waki ɛlɔlɔ, wakadjaka anto lo demba ndo wakalɔtɛ dimɛna efula. Ray akatodjasɛ la ntondo ndo akangɛnangɛna kɛnɛ kakandeke! Dui sɔ toholaka kɛnɛ kakate ɔpɔstɔlɔ Pɔɔlɔ lo dikambo di’onto laya lo losanganya mbala ka ntondo ndo lata ate: “Nzambi ekɔ mɛtɛ l’atei anyu.” (1 Kɔr. 14:23-25) L’ɔkɔngɔ diko, Ray akayotatɛ ndja lo losanganya lushi la lomingu tshɛ. Oma laasɔ, nde akayotatɛ ndja lo losanganya tshɛ la l’atei wa lomingu. Linda nde lawɔ akatatɛ ntshɔ lo nsanganya, kaanga mbakiwɔ l’ɛnɔnyi 70 l’ɛmɔtshi, vɔ wakeke Bible ndo wakabatizama.

9, 10. a) Lande na kele bu wolo nkamba la traktɛ? b) Lembetshiya woho wa nkamba la traktɛ kele l’ɔtɛ a dui ɔnɛ: Diolelo diaki Nzambi kɛdikɛdi na?

⁹ Traktɛ. Tekɔ la traktɛ enanɛi lo ɛngɔ kombaso dihomɔ diaso. Ekɔ wɔdu nkamba la yɔ ndo yɔ yekɔ dimɛna efula dia ntatɛ asawo. Lam’ele traktɛ ka ntondo kakavusɔma lo 2013, wakayitondja miliyara tshanu! Traktɛ shɔ tshɛ kongɛma woho waamɛ. Ɔnkɔnɛ, etena keyayɛ woho wa nkamba la ɔtɔi l’atei ayɔ, wɛ koka nkamba la yɔ tshɛ! Ngande wakokayɛ nkamba la traktɛ dia ntatɛ sawo l’onto?

¹⁰ Ondo wɛ nangaka nkamba la traktɛ kele l’ɔtɛ a dui ɔnɛ: Diolelo diaki Nzambi kɛdikɛdi na? Ɛnya onto dimbola diele laadiko ndo mbolande ɔnɛ: “Onde wɛ amboyambolaka elɛwɔ Diolelo diaki Nzambi? Onde wɛ ayota wate diɔ diekɔ . . . ?” Oma laasɔ, mbolande okadimwelo akɔna wayondɔsɔna l’atei w’ekadimwelo esato wele lɔkɔ. Lo dihole dia mbuta di’okadimwelo ande wekɔ dimɛna kana kɔlɔ, fola tsho traktɛ lo etenyi kofundjiwɔ ɔnɛ: “Kɛnɛ kata Bible” l’etei ka traktɛ ndo adia efundelo wele laawɔ, Danyɛlɛ 2:44 ndo Isaya 9:6. L’ekomelo ka sawo dianyu, okande dimbola diele l’ɔkɔngɔ wa traktɛ l’etenyi kele l’ɔtɛ a dui ɔnɛ: “Dui dia nkana la diɔ yimba.” Okande dimbola diata ɔnɛ: “Ngande wayoyala lɔsɛnɔ lo ɛlɔmbwɛlɔ ka Diolelo diaki Nzambi?” Wɛ koka ndjokadimola  dimbola sɔ lam’ayonyosawola mbala kekina. Etena kayonyosawola nto, wɛ koka nkamba la wekelo 7 wa biukubuku Lokumu l’ɔlɔlɔ l’oma le Nzambi!, yele l’atei wa dihomɔ diaso dia ntatɛ mbeka l’anto Bible.

11. Oyango akɔna wele la periodikɛ yaso, ndo ahombaso mbeya lo dikambo dia periodikɛ yakɔ?

¹¹ Periodikɛ. Tshoto y’Etangelo la Emɔ! mbele periodikɛ yamboleka kahanyema ndo kadimɔma l’andja w’otondo! Lam’ele anto w’oma lo wedja efula wotshikitanyi mbadiaka periodikɛ shɔ, asawo wa lo lohoso kongɛmaka dia nkotola yambalo y’anto wa l’ahole tshɛ. Sho pombaka nkamba la periodikɛ shɔ dia nkimanyiya anto dia ndjasha tshɛ lo kɛnɛ koleki ohomba lo lɔsɛnɔ ɛlɔ kɛnɛ. Koko, ntondo sho pombaka mbeya anto wendana la periodikɛ kakɔna.

12. a) Emɔ! kakakongɛma dikambo di’anto akɔna, ndo tɔ kekɔ l’oyango akɔna? b) Naa ɛlɔlɔ wakayakondja atete edja lo nkamba la ehomɔ kɛnɛ?

¹² Emɔ! kakakongɛma lo dikambo di’anto waheye awui efula kana waheye ndooko dui lo dikambo dia Bible. Mbeyaka monga ko vɔ haweye ndooko dui lo dikambo dia wetshelo w’Akristo, ondo vɔ hawoyaɛkɛ l’ɔtɛmwɛlɔ kana vɔ haweye dia Bible koka mbaakimanyiya lo nsɛnɔ yawɔ. Oyango ɔmɔtshi woleki woke wele la Emɔ! ele dia mbetawoya ombadi ɔnɛ Nzambi ekɔ. (Rɔmɔ 1:20; Hɛb. 11:6) Tɔ kimanyiyaka nto ombadi dia monga la mbetawɔ ɔnɛ Bible kekɔ “mɛtɛ . . . ɔtɛkɛta wa Nzambi.” (1 Tɛs. 2:13) Numɛlɔ shato ya l’ɔnɔnyi wa 2018 yekɔ l’ɛtɛ w’awui ɛnɛ: “Mboka k’ɔngɛnɔngɛnɔ,” “Toseke 12 t’ɔngɛnɔngɛnɔ wa nkumbo,” ndo “Ekimanyielo le wanɛ wele l’ɔkɛyi.”

13. a) Tshoto y’Etangelo y’anto tshɛ yakakongɛma dikambo di’anto akɔna? b) Naa ɛlɔlɔ wakayakondja atete edja lo nkamba la ehomɔ kɛnɛ?

¹³ Oyango wa woke wele la Tshoto y’Etangelo y’anto tshɛ ele dia nembetshiya anto wele la yema ya dilɛmiɛlɔ le Nzambi ndo lo Bible wetshelo wa lo Bible. Ondo vɔ mbeyaka awui amɔtshi wendana la Bible, koko vɔ hawoshihodia mɛtɛ kɛnɛ ketshatɔ. (Rɔmɔ 10:2; 1 Tim. 2:3, 4) Numɛlɔ shato ya l’ɔnɔnyi wa 2018, mbishaka okadimwelo lo ambola asato anɛ: “Onde Bible kekekɔ ohomba ɛlɔ kɛnɛ?,” “Kakɔna katokongɛ lo nshi yayaye?” ndo “Onde Nzambi ndjakiyanyaka dikambo diayɛ?”

14. a) Tovidɛo tɔnɛi tele lo Ɛngɔ kombaso dihomɔ dia mbetsha takakongɛma l’oyango akɔna? b) Naa ɛlɔlɔ wakayakondja lo mɛnya anto tovidɛo tɔnɛ?

¹⁴ Tovidɛo. Lo nshi ya Yeso, otshudi w’abaya aki paka la dihomɔ diakambawɔ la anya. Koko nshi nyɛ, etshudi w’abaya wekɔ nto la dihomɔ diakamba la kura, ɛnyɛlɔ, si, perceuses ndo ponceuses. Ɛlɔ kɛnɛ etena kasambishaso, laadiko dia ekanda watondjama, tekɔ la tovidɛo t’amɛna efula dia mɛnya anto. Tovidɛo tɔnɛi l’atei atɔ tanemaka lo ɛngɔ kombaso dihomɔ diaso: Lande na mbeka Bible?, Ngande wasalema wekelo wa Bible?, Kakɔna kasalema lo Mbalasa ka Diolelo?, ndo Ɛmɛnyi wa Jehowa—Waa na weso? Tovidɛo ta tomondo tɔsɔ koka mɛnyama l’ɛse ka minitɛ hiende ndo monga l’etombelo w’ɛlɔlɔ lo wendelo wa ntondo. Sho koka nkamba la tovidɛo t’etale lo wendelo w’oyoyo ndo le anto wele la wenya efula. Tovidɛo tɔsɔ tekɔ dihomɔ di’amɛna efula, nɛ dia tɔ koka ntshutshuya anto dia mbeka Bible ndo ndja lo nsanganya yaso.

15. Shɛngiya yakɔna yakoka monga la wendelo wa vidɛo yaso mɔtshi l’ɔtɛkɛta wa lootɔ le anto amɔtshi? Sha bɛnyɛlɔ.

¹⁵ Tɔshi ɛnyɛlɔ, kadiyɛso kɛmɔtshi akahomana la womoto lakonɔ oma la Micronésie ndo lele ɔtɛkɛta ande wa lootɔ wekɔ Yap, nde akawɛnya vidɛo yele l’ɔtɛ a dui ɔnɛ: Lande na mbeka Bible? lo ɔtɛkɛta wa Yap. Etena kakandatatɛ menda vidɛo, womoto akɔ akate ate: “Ɔsɔ ekɔ ɔtɛkɛta ami. Ndjaka oko kashi! Dimi koka mbuta oma lo wondjo wa dui dia, nde ekɔ ose disɛnga diami. Nde  ekɔ lo ntɛkɛta ɔtɛkɛta ami!” L’ɔkɔngɔ wa laasɔ, nde akate dia nde ayotadia ndo tenda ɛngɔ tshɛ kele l’ɔtɛkɛta ande lo jw.org. (Ɛdika la Etsha 2:8, 11.) Ɛnyɛlɔ kekina ekɔ ka kadiyɛso ka l’États-Unis, lele ɔnaki ɔnango ekɔ lo dihonda dikina. Nde akotomɛ liɛ la vidɛo yakɔ yaamɛ l’ɔtɛkɛta ande. Nde akende vidɛo yakɔ ndo akotomɛ mesajɛ ate: “Etenyi kɛnyawɔ dia wolo wa kɔlɔ wekɔ lo nɔmbɔla andja ɔnɛ kakakotola yambalo yami lo yoho ya laande. Lakalɔmbɛ dia mbeka Bible.” Ɔsɔ ekɔ dui di’ɔngɛnɔngɛnɔ efula, nɛ dia nde ekɔ lo mbidjasɛ lo wodja wele olimu aso waya l’elelo ɛmɔtshi!

16. Lembetshiya oyango shikaa wele la biukubuku tshɛ: a) Hokamɛ Nzambi dia wɛ nsɛna pondjo pondjo. b) Lokumu l’ɔlɔlɔ l’oma le Nzambi! c) Waa na wasala lolango laki Jehowa ɛlɔ kɛnɛ?

¹⁶ Tobukubuku. Ngande wakokaso mbetsha onto lahakoke mbadia dimɛna kana lele ndooko kaanga okanda ɔtɔi walembetshiya Bible l’ɔtɛkɛta ande akambo wa mɛtɛ? Sho koka nkamba la biukubu Hokamɛ Nzambi dia wɛ nsɛna pondjo pondjo. * Biukubuku Lokumu l’ɔlɔlɔ l’oma le Nzambi! ekɔ ehomɔ ka dimɛna efula ka ntatɛ mbeka l’anto Bible. Wɛ koka mɛnya onto wekelo 14 wele la koma ndo mombola wekelo akɔna waleka nkotola yambalo yande. Oma laasɔ, ko wɛ ntatɛ mbeka la nde lo wekelo akɔ. Onde wɛ ambohembaka nsala ngasɔ lo wendelo w’oyoyo? Biukubuku Waa na wasala lolango laki Jehowa ɛlɔ kɛnɛ? yekɔ biukubuku ya sato yele lo ɛngɔ kombaso dihomɔ diaso. Yɔ yakakongɛma dia mbetsha ambeki wa Bible awui wendana l’okongamelo aso. Dia mbeya woho wa nkamba la biukubuku shɔ lo wekelo wa Bible tshɛ, enda Dikatshi dia losanganya​—Lɔsɛnɔ ndo olimu aso w’Okristo dia Ngɔndɔ ka sato 2017.

17. a) Oyango akɔna shikaa wele la dibuku tshɛ dia wekelo? b) Kakɔna kahomba wanɛ wambobatizama nsala, ndo lande na?

¹⁷ Abuku. L’ɔkɔngɔ wa wɛ ntatɛ mbeka l’onto lo nkamba la biukubuku mɔtshi, l’etena tshɛ kahombama wɛ koka mbeka l’onto lo dibuku Kakɔna kakoka Bible tetsha? Ehomɔ kɛsɔ koka nkimanyiya anto dia mbeya awui efula wendana la wetshelo w’etatelo wa lo Bible. Naka ombeki ekɔ lo tahame ndo amboshidiya mbeka dibuku sɔ, wɛ koka ntetemala la mbeka la nde lo dibuku Woho wa ntshikala lo ngandji ka Nzambi. Ehomɔ kɛsɔ kayetsha ombeki woho wa nkamba l’atɔndɔ wa lo Bible lo lɔsɛnɔ lande la lushi la lushi. Ohɔ dia kaanga l’ɔkɔngɔ wa batisimu kande, onto leke ka batizama ɔsɔ, pombaka ntetemala mbeka polo lam’ayondoshidiya abuku akɔ ahende. Dui sɔ diayowokimanyiya dia monga la mbetawɔ ka wolo le Jehowa ndo ntshikala la kɔlamelo le nde.—Adia Kɔlɔsayi 2:6, 7.

18. a) Kakɔna katokeketsha 1 Timɔte 4:16 dia nsala oko weso embetsha w’akambo wa mɛtɛ, ndo etombelo akɔna wakoka monga la dui sɔ? b) Oyango akɔna wele la so etena kakambaso la Ɛngɔ kombaso dihomɔ dia mbetsha?

¹⁸ Oko weso Ɛmɛnyi wa Jehowa, tekɔ l’ɔkɛndɛ wa mbetsha anto “losango l’akambo wa mɛtɛ wa lokumu l’ɔlɔlɔ” lakoka mbakimanyiya dia nkondja lɔsɛnɔ la pondjo. (Kɔl. 1:5; adia 1 Timɔte 4:16.) Dia tokimanyiya dia nsala dui sɔ, tekɔ la Ɛngɔ kombaso dihomɔ dia mbetsha kele la dihomɔ dieso l’ohomba. (Enda kiombo yele l’ɔtɛ a dui ɔnɛ: “ Ɛngɔ kombaso dihomɔ dia mbetsha.”) Nyɛsɔ tokambake la dihomɔ sɔ lo yoho ya dimɛna. Onto tshɛ l’atei aso koka nshikikɛ ehomɔ kakɔna katanema lo ɛngɔ kombaso dihomɔ kakoka nkamba la nde ndo etena kakɔna. Koko, tohɔ dia oyango aso bu tsho wa nkahɛ anto ekanda ndo hatohombe mbisha anto wahetawɔ losango laso ekanda. Oyango aso ekɔ wa mbetɛ anto w’etema ɛlɔlɔ, wele l’okitshakitsha ndo walanga mɛtɛ mbeya Nzambi ambeki, anto wele “suke dia mbetawɔ akambo wa mɛtɛ wakonya lo lɔsɛnɔ la pondjo.”​—Ets. 13:48; Mat. 28:19, 20.