1. Naa weshasha ɛmɔtshi wakatalongola oma le Yeso?

 NDOOKO onto lambongaka la lokaho ko mbɛdima la Yeso. Etena kakinde la nkɛtɛ, nde akakambe la wolo ande dia nkimanyiya anto. (Luka 9:​12-17) Nde akakimɔ woshasha woleki tshɛ lo nkimɔ lɔsɛnɔ lande dikambo diaso. (Jni. 15:13) Oma ko etena kakandolɔ, Yeso ekɔ lo ntetemala tɛɛnya lokaho. Paka oko wakandalake, nde akalɔmbɛ Jehowa dia tosha nyuma kande k’ekila dia teetsha ndo tosamba. (Jni. 14:​16, 17, nɔtɛ.; 16:13) Ndo lo tshimbo ya nsanganya ya l’etshumanelo, Yeso ekɔ lo ntetemala tosha kɛnɛ keso la tɔ ohomba dia mbetɛ anto ambeki lo nkɛtɛ k’otondo.—Mat. 28:​18-20.

2. Waa na wele l’atei wa “apami wele oko weshasha” wɔtɛkɛtami lo Ɛfɛsɔ 4:​7, 8?

² Tende woshasha okina wakatosha Yeso. Ɔpɔstɔlɔ Pɔɔlɔ akafunde l’ɔkɔngɔ wa Yeso mbidɛ l’olongo ate: “Nde akakimɔ apami wele oko weshasha.” (Adia Ɛfɛsɔ 4:​7, 8.) Pɔɔlɔ akalembetshiya dia Yeso akakimɔ weshasha ɛsɔ l’oyango wa nde nsukɛ etshumanelo lo toho totshikitanyi. (Ɛf. 1:​22, 23; 4:​11-13) Ɛlɔ kɛnɛ, “weshasha wele oko apami” wekɔ ekambi wakimanyiya, dikumanyi ndo emendji w’etshimbedi. a Lo mɛtɛ, apami asɔ wekɔ anto wele keema kokele ndo vɔ salaka wandja. (Jak. 3:2) Koko, Nkumɛso Yeso kambaka la wɔ dia tokimanyiya; vɔ wekɔ weshasha le so.

3. Sha ɛnyɛlɔ kɛnya woho wakokaso nsukɛ elimu wakamba “apami wele oko weshasha.”

 ³ Yeso akasɔnɛ “apami wele oko weshasha” asɔ dia nkeketsha etshumanelo. (Ɛf. 4:12) Koko sho anto akina tshɛ koka mbakimanyiya dia vɔ nkotsha ɔkɛndɛ awɔ wa woke ɔsɔ. Ɛnyɛlɔ: Amɔtshi l’atei aso mbishaka lonya lo wokelo wa Mbalasa ka Diolelo. Akina sukɛka olimu lo nkimɔ diangɔ dia ndɛ, ekolo wa lɔkɛndɔ ndo lo nkamba elimu ekina. Woho akɔ waamɛ mbele sho tshɛ koka nsukɛ ekambi wakimanyiya, dikumanyi ndo emendji w’etshimbedi oma lo kɛnɛ kataso ndo kasalaso. Nyɛsɔ tɔsɛdingole woho wakokaso nkondja wahɔ oma l’olimu awɔ wa wolo ndo woho wakokaso mbaɛnya vɔ la Yeso ɔnɛ lakatosha “apami wele oko weshasha,” dia sho mbangɛnangɛnaka.

EKAMBI WAKIMANYIYA KAMBAKA “ELIMU WA KIMANYIYANA”

4. Naa “elimu wa kimanyiyana” ɛmɔtshi wakasalaka ekambi wakimanyiya wa lo ntambe ka ntondo?

⁴ Lo ntambe ka ntondo, anangɛso amɔtshi wakasɔnama oko ekambi wakimanyiya. (1 Tim. 3:8) Mɛnamaka dia vɔ mbakakambaka “elimu wa kimanyiyana” wakafunde Pɔɔlɔ lo dikambo diawɔ. (1 Kɔr. 12:28) Ekambi wakimanyiya kambaka elimu w’ohomba efula dia dikumanyi ndeka ndjasha l’olimu wa wetshelo ndo wa nama ɛkɔkɔ. Ɛnyɛlɔ, ondo ekambi wakimanyiya wakashaka lonya lo nsangola Afundelo kana nsomba diangɔ diaki ohomba dia nsangola.

5. Elimu akɔna ɛmɔtshi w’ohomba wakamba ekambi wakimanyiya ɛlɔ kɛnɛ?

⁵ Tɔsɛdingole elimu ɛmɔtshi w’ohomba wakamba ekambi wakimanyiya wele l’etshumanelo kanyu. (1 Pe. 4:10) Vɔ koka nkamba l’owadi wa falanga kana lo nkahanya bɛtshi dia nkɛtɛ di’esambishelo, mɛmba ekanda ndo mbaakahɛ apandjudi, nkamba lo audio vidɛo, mbisha anto ahole kana nkimanyiya dia nkokɛ Mbalasa ka Diolelo. Elimu ɛsɔ tshɛ wekɔ ohomba di’etshumanelo nkɛndakɛnda dimɛna. (1 Kɔr. 14:40) Ndo nto ekambi wakimanyiya mbishaka asawo lo Losanganya la Lɔsɛnɔ ndo Olimu aso ndo asawo wa lo sɛkɛ. Okambi wakimanyiya koka sɔnama dia monga ɔhɛna w’ɔnɔmbɔdi w’olui w’esambishelo. Lo tena dimɔtshi, ekambi wambohokɔ akambo tshindɛɛka dikumanyi dia tembola ɛkɔkɔ.

6. Naa ɛkɔkɔ ɛmɔtshi wɛnya lande na keso la lowando le ekambi wakimanyiya l’olimu wa wolo wakambawɔ?

⁶ Wahɔ akɔna wakondja etshumanelo oma l’olimu wakamba ekambi wakimanyiya? Beberly, b kadiyɛso kɛmɔtshi kadjasɛ la Bolivie mbutaka ate: “Diɛsɛ l’ekambi wakimanyiya wa l’etshumanelo kaso, dimi kondjaka wahɔ tshɛ lo tshɛ lo nsanganya. Diɛsɛ l’olimu awɔ, dimi koka memba esambo, mbisha kɔmatɛrɛ, mpokamɛ asawo ndo nkondja wetshelo oma lo tovidɛo l’esato. Vɔ mendanaka l’awui w’ekokelo ka wanɛ wele lo mbalasa ndo kimanyiyaka anto akina wahaye dia nkɔhama lo vidɛo kɔfɛransɛ. L’ɔkɔngɔ wa losanganya, vɔ mɔmbaka Mbalasa, mendanaka l’awui w’owadi wa falanga ndo vɔ ndjashikikɛka dia takakondjisha ekanda weso la wɔ ohomba. Lekɔ la lowando l’efula lo kɛnɛ kasalawɔ!” Leslie ladjasɛ la Colombie, lele omɛnde ekɔ lo nkamba oko ekumanyi mbutaka ate: “Omɛmi mongaka l’ohomba w’ekambi wakimanyiya dia mɛmba ɛkɛndɛ wotshikitanyi. Otondongaka aha vɔ, tshike nde otoleka monga l’awui efula wa nsala, diakɔ diemi la lowando lo woho wewɔ l’ohetoheto ndo suke dia nkimanyiya.” Aha la taamu, ngasɔ mbayaokayɛ ndo wɛ.—1 Tim. 3:13.

7. Ngande wakokaso mɛnya lowando le ekambi wakimanyiya? (Enda ndo osato.)

⁷ Kaanga mbakokaso ngɛnangɛna elimu wakamba ekambi wakimanyiya, Bible tokeketshaka ɔnɛ: “Nyɛnya  dia nyekɔ la lowando.” (Kɔl. 3:15) Krzysztof, ekumanyi ka la  Finlande, mɛnyaka lowando lande lo yoho nyɛ: “Dimi fundaka yɛtshi ya mukanda kana mesajɛ washilami divɛsa dimɔtshi ndo mɛnyaka lo yoho mɔtshi shikaa yakakeketsha okambi wakimanyiya kana ɔkɔkɔ wemi la lowando l’olimu ande.” Pascal nde la Jael, wadjasɛ la Nouvelle-Calédonie, nɔmbaka lo dikambo di’ekambi wakimanyiya. Pascal nembetshiyaka ate: “L’ɔkɔngɔ diko, takayosalaka alɔmbɛlɔ aso w’ɛsɛngɔsɛngɔ ndo wa eokelo ka losaka lo dikambo di’anangɛso wakasɔnama.” Jehowa pokamɛka alɔmbɛlɔ wa ngasɔ ndo etshumanelo k’otondo kondjaka wahɔ.—2 Kɔr. 1:11.

DIKUMANYI DIA L’ETSHUMANELO ‘DIAKAMBA OLIMU WA WOLO L’ATEI ANYU’

8. Lande na kakahombe Pɔɔlɔ mfunda dia dikumanyi dia lo ntambe ka ntondo ‘wakakambaka olimu wa wolo’? (1 Tɛsalɔnika 5:​12, 13)

⁸ Dikumanyi dia lo ntambe ka ntondo wakakambaka olimu wa wolo lo dikambo di’etshumanelo. (Adia 1 Tɛsalɔnika 5:​12, 13; 1 Tim. 5:17) Vɔ ‘wakalɔmbɔlaka’ etshumanelo, mbuta ate wakalɔmbɔlaka nsanganya ndo wakɔsaka tɛdikɔ oko olui wa dikumanyi. Vɔ “wakalakaka” anangɛwɔ l’akadiyɛwɔ lo mbasha alako wa shikaa koko wa la ngandji l’oyango wa nkokɛ etshumanelo. (1 Tɛs. 2:​11, 12; 2 Tim. 4:2) Lo mɛtɛ, apami asɔ wakakambaka nto olimu wa wolo dia nkotsha ehomba wa nkumbo yawɔ ndo dia ntshikala nge lo nyuma.—1 Tim. 3:​2, 4; Tito 1:​6-9.

9. Naa ɛkɛndɛ ɛmɔtshi wele la dikumanyi ɛlɔ kɛnɛ?

⁹ Ɛlɔ kɛnɛ, dikumanyi diekɔ l’awui efula wa nsala. Vɔ wekɔ esambisha. (2 Tim. 4:5) Vɔ mbishaka ɛnyɛlɔ ka dimɛna lo nsambisha l’ohetoheto tshɛ, nkongɛ olimu w’esambishelo l’ɛtshi kawɔ ka nkɛtɛ ndo tolowanya dia nsambisha ndo mbetsha dimɛna. Vɔ kambaka oko wanɛ wokana kɛtshi ndo toshushi tele bu la shɔnɔdi. Etena kasala Okristo pɛkato ka woke, dikumanyi salaka la wolo dia mbokimanyiya dia nde nyomonga la diɔtɔnganelo dia dimɛna la Jehowa. Ko l’etena kakɔ kaamɛ, vɔ salaka la wolo dia nama etshumanelo pudipudi. (1 Kɔr. 5:​12, 13; Ngal. 6:1) Ntondotondo, dikumanyi mbeyamaka oko alami w’ɛkɔkɔ. (1 Pe. 5:​1-3) Vɔ mbishaka asawo wɔlɔngɔswami dimɛna w’oma lo Bible, salaka la wolo dia mbeya onto tshɛ la l’etshumanelo ndo membolaka ɛkɔkɔ. Dikumanyi dimɔtshi nto mbishaka lonya lo wokelo wa Mbalasa ka Diolelo ndo l’ɔlɔngɔswɛlɔ, lo nkongɛ nsanganya ya weke, lo nkamba lo Kɔmite ya diɔtɔnganelo la mpitadi ndo lo Kɔmite y’elui wembola ɛkɔnyi mbidja ndo ɛkɛndɛ ekina. Dikumanyi kambaka wolo dikambo diaso!

10. Ɛkɔkɔ akɔna ɛmɔtshi wɛnya lande na kahombaso monga la lowando le dikumanyi diakamba olimu wa wolo?

¹⁰ Jehowa akatatshi di’alami w’ɛkɔkɔ wayoleka ndjakiyanya lo dikambo diaso, diakɔ diele ‘hatotoka wɔma nto kana nsaka lokomba.’ (Jɛr. 23:4) Johanna, kadiyɛso kɛmɔtshi kadjasɛ la Finlande akɛnyi mɛtɛ k’ɛtɛkɛta ɛsɔ etena kakatate mama kande hemɔ ka wolo. Nde kɔndɔlaka ate: “Kaanga mbakimi l’okakatanu dia mbutɛ anto woho wakamayaokaka, ekumanyi kɛmɔtshi akampokamɛ la solo dia lotutsha tshɛ, akalɔmbɛ kaamɛ la mi ndo akashikikɛ dia Jehowa mbokakami ngandji. Koko lekɔ lo mbohɔ dia lakayaoke dia lambookama ngandji. Laki l’eshikikelo dia aki paka Jehowa mbakootome dia ndjokimanyiya l’etena kaki dui sɔ ohomba.” Ngande wakakokimanyiya dikumanyi dia l’etshumanelo kanyu?

11. Ngande wakokaso mɛnya lowando laso le dikumanyi? (Enda ndo osato.)

¹¹ Jehowa nangaka dia sho mɛnya lowando l’oma k’ɛse otema le dikumanyi “l’ɔtɛ w’olimu awɔ.” (1 Tɛs. 5:​12, 13) Henrietta, landjasɛ la Finlande mbutaka ate: “Dikumanyi kimanyiyaka anto akina la lolango tshɛ koko kɛsɔ halange mbuta ɔnɛ vɔ wekɔ la wenya efula ndo wolo  efula toleka kana vɔ bu l’ekakatanu lo nsɛnɔ yawɔ. Tena dimɔtshi dimi mbatɛka tsho ɔnɛ: ‘Onde wɛ mbeyaka? Wɛ mɛtɛ ekɔ ekumanyi ka dimɛna. Dimi kombolaka dia wɛ mbeya dui sɔ.’” Kadiyɛso kɛmɔtshi kandjasɛ la Türkiye c kelɛwɔ Sera mbutaka ate: “Dikumanyi wekɔ l’ohomba ‘w’ekeketshelo’ dia ntetemala nkamba olimu awɔ. Laasɔ, sho koka mbaafundɛ yɛtshi ya mukanda, mbaawelɛ dia ndjɔlɛ yangɔ kana nsambisha kaamɛ la wɔ.” Onde ekɔ ekumanyi kɛmɔtshi shikaa keyɛ la lowando lo welo wadjande? Yanga waaso wa mbɛɛnya dia wɛ ekɔ la lowando lo kɛnɛ kasalande.—1 Kɔr. 16:18.

EMENDJI W’ETSHIMBEDI DIA NKEKETSHA

12. Naa olui okina w’apami wakasɔnɛ Yeso dia nkeketsha tshumanelo lo ntambe ka ntondo? (1 Tɛs. 2:​7, 8)

¹² Yeso akasha etshumanelo “apami wele oko weshasha” wakamba lo weho ekina. L’ɛlɔmbwɛlɔ kande, dikumanyi dia la Jɛrusalɛma wakatome Pɔɔlɔ, Barnabasɛ ndo anto akina oko emendji w’eteta. (Ets. 11:22) Lande na? L’ɔtɛ w’ɔkɔkɔ akɔ waamɛ wakasɔnama ekambi ndo dikumanyi: Dia nkeketsha tshumanelo. (Ets. 15:​40, 41) Apami asɔ wakayahondja awui efula polo ndo lo mbidja nsɛnɔ yawɔ lo waale dia mbetsha ndo nkeketsha anto akina.—Adia 1 Tɛsalɔnika 2:​7, 8.

13. Naa ɛkɛndɛ ɛmɔtshi w’omendji w’otshimbedi?

¹³ Emendji w’etshimbedi mindaka nkɛndɔ efula. Amɔtshi mindaka nkɛndɔ ya kilɔmɛtrɛ nkama lam’asa tshumanelo. Lumingu tshɛ, omendji w’otshimbedi mbishaka asawo, membolaka ɛkɔkɔ, nɔmbɔlaka losanganya l’ambatshi mboka ndo nɔmbɔlaka losanganya la dikumanyi ndo nsanganya y’otsha l’olimu w’esambishelo. Nde nɔngɔsɔlaka asawo ndo nɔmbɔlaka nsanganya y’otshimbedi ndo ya rɛjɔ. Nde mbetshaka lo kalasa k’ambatshi  mboka, nɔngɔsɔlaka losanganya la laande la l’otshimbedi la l’ambatshi mboka ndo laadiko dia laasɔ, nde kandolaka awui wa wanyandja ndo tena dimɔtshi awui wawosha Bɛtɛlɛ ɔkɛndɛ.

14. Ɛkɔkɔ akɔna ɛmɔtshi wɛnya lande na kahombaso monga la lowando le emendji w’etshimbedi wakamba olimu wa wolo?

¹⁴ Wahɔ akɔna wakondja tshumanelo oma l’olimu wa dimɛna wakamba emendji w’etshimbedi? Dia ntɛkɛta lo dikambo dia wembwelo w’emendji w’etshimbedi, ɔnangɛso ɔmɔtshi la la Turquie mbutaka ate: “Wembwelo awɔ tshɛ tshutshuyakami dia ndeka mbetsha wenya efula dia nkimanyiya anangɛmi l’akadiyɛmi. Lambohomana l’emendji w’etshimbedi efula koko ndooko kaanga ɔtɔi lambombitɛka dia nde ekɔ l’awui efula kana halange nsawola la mi.” Johanna, lakatatɛkɛtshi l’etatelo akasambisha l’omendji w’otshimbedi koko vɔ kotana kaanga onto la ngelo. Nde mbutaka ate: “Koko, layotetemala mbohɔka lushi lɔsɔ. Akadiyɛmi ahende wakoonɔ ndo laki l’ohomba awɔ efula. Omendji w’otshimbedi akakeketsha la wangasanu tshɛ ndo akakimanyiya dia mɛna dia l’olimu wa Jehowa, okakitɔnelo wekɔ wa lo tshanda mɔtshi tsho koko l’andja w’oyoyo tayonga la waaso wa mbetshaka wenya kaamɛ.” Efula k’emendji w’etshimbedi mbindjaka welo akɔ waamɛ dia nangema le anto wakambɛwɔ.—Ets. 20:37–21:1.

15. a) Lo yoho yɔtɔnɛ la 3 Joani 5-8, ngande wakokaso mɛnya lowando laso le emendji w’etshimbedi? (Enda ndo osato.) b) Lande na kahombaso mbɔsaka la nɛmɔ wadi w’apami wakasɔnama ndo ngande wokokaso nsala dui sɔ? (Enda kiombo yele l’ɔtɛ a dui ɔnɛ: “ Nyohɔ wadi w’apami wakasɔnama.”)

¹⁵ Ɔpɔstɔlɔ Joani akakeketsha Ngayo dia nongolaka anangɛso waya dia ndjokeketsha tshumanelo ndo dia ‘mbakɛndja lo yoho yangɛnyangɛnya Nzambi.’ (Adia 3 Joani 5-8.) Yoho  mɔtshi yakokaso nsala dui sɔ ele, mbelɛ omendji dia ndjɔlɛ yangɔ lakaso. Yoho kina ele lo nsukɛ ekongelo k’olimu w’esambishelo etena ka wembwelo ande. Leslie, lakatatɛkɛtshi la diko mɛnyaka lowando lande lo toho tokina nto. Nde mbutaka ate: “Dimi nɔmbaka Jehowa dia mbakimanyiya la kɛnɛ kewɔ la tɔ ohomba. Dimi l’omɛmi takaafundɛ mukanda dia mbatɛ woho wakatokimanyiya wembwelo awɔ.” Tohɔ di’emendji w’etshimbedi pomanaka l’ekakatanu ndo nɛmbaka oko sho. Tena dimɔtshi, vɔ tataka, mongaka l’ekiyanu ndo kɔmɔka. Ɛtɛkɛta ayɛ wa la ngandji kana yangɔ yowoshayɛ koka monga ekadimwelo l’alɔmbɛlɔ w’omendji w’otshimbedi wayangande ekimanyielo!—Tok. 12:25.

TEKƆ L’OHOMBA WA “APAMI WELE OKO WESHASHA”

16. Lo yoho yɔtɔnɛ la Tokedi 3:​27, ambola akɔna wakoka anangɛso ndjaoka?

¹⁶ L’andja w’otondo tekɔ l’ohomba w’anangɛso efula dia nkamba oko “apami wele oko weshasha.” Naka wɛ ekɔ ɔnangɛso lambobatizama, onde “wɛ ekɔ la akoka wa nkimanyiya”? (Adia Tokedi 3:27.) Onde wɛ ekɔ lo nkotsha kɛnɛ kalɔmbama dia nkamba oko okambi wakimanyiya? Onde wɛ hakombola nkotsha ehomba w’anangɛyɛ oko ekumanyi? d Onde wɛ hakoke nsala etshikitanu lo lɔsɛnɔ layɛ l’oyango wa mbɔtɔ Kalasa k’Esambisha wa Diolelo? Kalasa kɛsɔ kayokokimanyiya dia wɛ monga l’akoka wa Yeso ndeka nkamba la yɛ. Naka wɛ mɛnaka dia wɛ bu l’akoka, kete lɔmba Jehowa. Lɔmbande dia kosha nyuma kande k’ekila dia nkotsha ɔkɛndɛ tshɛ wakayalongola.—Luka 11:13; Ets. 20:28.

17. Kakɔna kɛnya “apami wele oko weshasha” lo dikambo dia Nkumekanga kaso Yeso Kristo?

¹⁷ Anangɛso wakasɔnɛ Yeso oko “apami wele oko weshashasa” wekɔ djembetelo yɛnya dia nde mbatatɔlɔmbɔla lo nshi y’ekomelo nyɛ. (Mat. 28:20) Onde wɛ bu la lowando lo woho weso la Nkumekanga kokana ngandji, ka lokaho ndo woho watodjande yimba lo tosha anangɛso wele l’akoka dia tokotshɛ ehomba aso? Ɔnkɔnɛ yanga waaso wa mɛnya lowando layɛ le apami wakamba olimu wa wolo asɔ. Ndo tohɛke pondjo mbisha Jehowa losaka, ɔnɛ lele kiɔkɔ ya “losha tshɛ l’ɔlɔlɔ ndo woshasha tshɛ wa kokele.”—Jak. 1:17.