1. Ngande wayaoka Jehowa lo dikambo di’ekambi ande?

 KAKƆNA kɛna Jehowa etena kendande ekambi ande wele la nkɛtɛ? Nde mɛnaka ɔngɛnɔngɛnɔ aso ndo asui aso. (Os. 37:18) Etena kɛnande dia tekɔ lo mbokambɛ lo yɛdikɔ yɛdimi l’akoka aso kaanga mbalɔshanaso l’ekiyanu, nde ngɛnangɛnaka efula! Kɛnɛ koleki tshɛ ele, nde nomɔlomɔka dia tosukɛ ndo tosamba.

2. Kakɔna kasalɛ Jehowa wanɛ wele l’etema wambatɛ ndo ngande wakokaso nkondja wahɔ oma lo woho wayakiyanyande dikambo diaso?

² Osambo 147:3 mbutaka dia Jehowa “mɔmbaka mpota” ya wanɛ wele l’etema wambatɛ. Lanɛ wekɔ lo mɛnya woho wayakiyanya Jehowa la ngandji tshɛ lo dikambo dia wanɛ wele l’ekiyanu. Ahombaso nsala dia nkondja wahɔ oma lo woho wayakiyanya Jehowa lo dikambo diaso? Tɔsɛdingole ɛnyɛlɔ kɛnɛ. Dɔkɔtɛlɛ dimɔtshi dia manamana koka nsala awui efula dia nkimanyiya onto lakahomɔ mpota dia nkɔnɔ. Koko dia nkondja wahɔ, ɔkɔnyi pombaka ndjela la yambalo tshɛ wadjango waki dɔkɔtɛlɛ. Lo sawo nɛ, tayɛna kɛnɛ kata Jehowa l’Ɔtɛkɛta ande lo dikambo dia wanɛ wadiɛnɛ l’ekiyanu ndo tayɔsɛdingola woho wakokaso nkamba l’alako ande woludi la ngandji.

JEHOWA TOSHIKIKƐKA DIA TEKƆ LA NƐMƆ LE NDE

3. Lande na kafɔnya anto amɔtshi dia vɔ bu la nɛmɔ efula?

³ Tekɔ lo nsɛna l’andja wele anto hawokana ngandji, lonyangu ko anto efula salanɛka kɔlɔ ndo konyaka anto akina dia ndjaoka dia vɔ bu la nɛmɔ. Kadiyɛso kelɛwɔ Helen a mbutaka ate: “Lakole lo nkumbo kahawokana ngandji. Papa aki ngala ndo akambitɛka lushi tshɛ dia dimi bu la nɛmɔ.” Ondo oko Helen, wakakɔhɛnyahɛnya, wakakɔnyɔlaka mbala la mbala  kana wakakokonya dia wɛ ndjaoka dia wɛ hokama ngandji. Naka ngasɔ, kete koka monga tshondo y’okakatanu le yɛ dia wɛ mbetawɔ di’onto ɔmɔtshi koka ndjakiyanya l’otema ɔtɔi lo dikambo diayɛ.

4. Lo ndjela Osambo 34:​18, eshikikelo kakɔna katosha Jehowa?

⁴ Oyadi anto akina wakakɔhɛnyahɛnya, wɛ koka monga l’eshikikelo dia Jehowa kookaka ngandji ndo kɔsaka la nɛmɔ. Nde “ekɔ suke la wanɛ wele l’etema wambatɛ.” (Adia Osambo 34:18.) Naka wɛ ekɔ “la lɔkɔnyɔ lo yimba,” kete ohɔ dia Jehowa akɛnyi awui w’ɛlɔlɔ l’otema ayɛ ndo akakokotola oya le nde. (Jni. 6:44) Nde ekɔ nshi tshɛ suke dia kokimanyiya nɛ dia wɛ ekɔ la nɛmɔ di’efula le nde.

5. Wetshelo akɔna wakokaso nkondja oma lo woho wakasalɛka Yeso anto wakɔnywamaka oma le anto akina akambo?

⁵ Sho koka mbeya woho wayaoka Jehowa lo nsɛdingola ɛnyɛlɔ ka Yeso. Etena kakandasalaka olimu ande lanɛ la nkɛtɛ, Yeso akadjaka wanɛ wakɔnyɔmaka oma le anto akina yimba ndo akaasalɛka akambo la kɛtshi. (Mat. 9:​9-12) Etena kakakimɛ womoto ɔmɔtshi lakalongamɛka dia nkɔnɔ oma lo hemɔ ka wolo dihɔndɔ diande, Yeso akookeketsha ndo akawandola l’ɔtɛ wa mbetawɔ kande. (Makɔ 5:​25-34) Yeso kɛnɛmɔlaka lonto la She lo yoho ya kokele. (Jni. 14:9) Laasɔ wɛ koka monga l’eshikikelo dia Jehowa kɔsaka la nɛmɔ ndo mɛnaka waonga ayɛ w’ɛlɔlɔ mbidja ndo mbetawɔ kayɛ la ngandji kawokayɛ.

6. Ngande wakoka onto ndɔshana la kanyi ya ndjaɔsa oko nde bu la nɛmɔ?

⁶ Akokayɛ nsala naka wɛ ekɔ lo ntetemala ndjaɔsa oko onto laha bu la nɛmɔ? Adia avɛsa wa lo Bible wakoshikikɛ dia Jehowa kɔsaka la nɛmɔ ndo nkana yimba la wɔ. b (Os. 94:19) Naka wɛ hakotshisha oyango ɔmɔtshi  wakayayadjɛ kana ekɔ l’ɔkɔmwɛlɔ l’ɔtɛ wahayakoke nsala akambo efula oko anto akina, toyaɛndjake onongo. Jehowa halongamɛ dia wɛ nsala kɛnɛ kahayakoke nsala. (Os. 103:​13, 14) Naka onto ɔmɔtshi akakosalɛ akambo l’epetenge, kete toyaɛndjake onongo l’ɔtɛ wa kɛnɛ kakakosalɛ onto ɔsɔ. Wɛ kosungana dia nde kosalɛ dui sɔ! Ohɔ dia Jehowa ayoyokoya la wanɛ wasalanɛ kɔlɔ koko aha la wanɛ wasalɛwɔ kɔlɔ. (1 Pe. 3:12) Sandra, lakawasalɛ akambo l’epetenge lam’akinde dikɛnda mbutaka ate: “Dimi nɔmbaka Jehowa mbala la mbala dia nde kimanyiyami dia dimi ndjaɔsa woho wambɔsande.”

7. Ngande wakoka awui wakatokomɛ lo nshi yakete monga ohomba l’olimu wakambɛso Jehowa?

⁷ Tongake pondjo la taamu dia Jehowa koka nkamba la yɛ dia nkimanyiya anto akina. Nde akakosha nɛmɔ dia monga okambi kaamɛ la nde l’olimu w’esambishelo. (1 Kɔr. 3:9) L’ɔtɛ w’ekakatanu wahomana la yɛ, wɛ koka nshihodia esadi eto woho wayaoka wanɛ wasowa. Wɛ koka mbakimanyiya lo toho efula. Helen, lakatatɛkɛtshi la diko, akakondja ekimanyielo ndo ɛlɔ kɛnɛ nde aya l’akoka wa nkimanyiya anto akina. Nde mbutaka ate: “Lakayaɔsaka oko onto lele bu la nɛmɔ koko Jehowa ambosala dia dimi mbokama ngandji ndo nde ekɔ lo nkamba la mi dia nkimanyiya anto akina.” Helen ekɔ l’ɔngɛnɔngɛnɔ dia nkamba oko ombatshi mboka wa pondjo.

JEHOWA NANGAKA DIA SHO MBETAWƆ EDIMANYIELO KANDE

8. Eshikikelo kakɔna katanaso l’Isaya 1:18?

⁸ Ekambi wa Jehowa ɛmɔtshi wekɔ lo ndjakiyanya l’ɔtɛ wa pɛkato yakawasale lo nshi yakete oyadi la ntondo kana l’ɔkɔngɔ wa batisimu kawɔ. Koko sho pombaka mbohɔ dia Jehowa akakimɔ oshinga w’etshungwelo l’ɔtɛ wa ngandji k’efula katookande. Lo mɛtɛ, nde nangaka dia sho mbetawɔ woshasha ande. Jehowa toshikikɛka dia l’ɔkɔngɔ wa sho ‘mbidja akambo l’ɔnɔngɔ’ c la nde, nde ayotodimanyiya pɛkato yaso tshɛ lo tshɛ. (Adia Isaya 1:18.) Ande ngandji katɛnya Jehowa lo woho wahandohɔ pɛkato yaso yakete lee! L’etena kakɔ kaamɛ, nde hohɛ pondjo akambo w’ɛlɔlɔ wakatasale.—Os. 103:​9, 12; Hɛb. 6:10.

9. Lande na kahombaso mbika washo lo kɛnɛ kasalaso ɛlɔ kɛnɛ ndo lo kɛnɛ katokongɛ lo nshi yayaye lo dihole dia mbika washo lo kɛnɛ kakatasale lo nshi yakete?

⁹ Naka wɛ ekɔ la lonyangu l’ɔtɛ wa pɛkato yakayasale lo nshi yakete, kete nsala la wolo dia mbika washo lo kɛnɛ kasalayɛ ɛlɔ kɛnɛ ndo lo kɛnɛ kayoyonga l’akoka wa nsala lo nshi yayaye. Tɔsɛdingole ɛnyɛlɔ k’ɔpɔstɔlɔ Pɔɔlɔ. Nde akanyange lo woho wakandahɛnyahɛnyaka Akristo l’esehe tshɛ, koko nde akeyaka dia Jehowa akoodimanyiya. (1 Tim. 1:​12-15) Onde nde akatetemala ndjakiyanya dikambo dia pɛkato yakandasale lo nshi yakete? Aha la taamu nde kosala dui sɔ, paka oko wakinde kombetsha wenya dia nkanyiya lo dikambo di’awui wakandasale dia nkoma ofarisɛ wakalɛmiyamaka. (Flpɛ. 3:​4-8, 13-15) Lo dihole dia nsala ngasɔ, Pɔɔlɔ akayasha l’ohetoheto tshɛ l’olimu ande w’esambishelo ndo akake washo ande lo kɛnɛ kakokongɛka lo nshi yayaye. L’ɛnyɛlɔ ka Pɔɔlɔ, wɛ hakoke ntshikitanya awui wakayasale lo nshi yakete. Koko wɛ koka ntombola Jehowa ndo mbɔngɛnyangɛnya oma ko kakianɛ ndo wɛ koka nkanyiya lo dikambo dia nshi yayaye ya diambo yakandakolake.

10. Kakɔna kakokaso nsala naka etsha aso wakete wakanyangiya anto akina?

 ¹⁰ Wɛ koka nyanga l’ɔtɛ w’awui amɔtshi wakayasale lo nshi yakete wakanyangiya anto akina. Kakɔna kakokayɛ nsala? Sala kɛnɛ tshɛ kakokayɛ nsala dia nɔngɔsɔla kɛnɛ kakalana mbidja ndo nɔmba edimanyielo ka l’otema ɔtɔi. (2 Kɔr. 7:11) Lɔmba Jehowa dia nde nkimanyiya wanɛ wakayasalɛ kɔlɔ. Nde koka nyokimanyiya wɛ la wanɛ wakayasalɛ kɔlɔ dia mbikikɛ ndo nyomonga la wɔladi.

11. Wetshelo akɔna wakokaso nkondja oma l’ɛnyɛlɔ k’omvutshi Jɔna? (Enda ndo lohoso.)

¹¹ Kondja wetshelo oma lo munga yayɛ yakete ndo etawɔ dia Jehowa nkamba la yɛ lo dihole tshɛ diayondɔsɔna. Tende ɛnyɛlɔ k’omvutshi Jɔna. Lo dihole dia ntshɔ otsha la Niniva oko wakawodjangɛ Nzambi, Jɔna akalawɔ otsha lo dihole dikina. Jehowa akasha Jɔna dilanya ndo nde akakondja wetshelo oma lo munga kande. (Jɔna 1:​1-4, 15-17; 2:​7-10) Jehowa kopekɔ Jɔna. Nzambi akawosha diaaso dikina dia nde ntshɔ otsha la Niniva ndo mbala kɛnɛ Jɔna aketawɔ mbala kakɔ ɔtɔi. Nde kombetawɔ dia lonyangu laki la nde l’ɔtɛ wa munga kakandasale lo nshi yakete mboshimba dia nde mbetawɔ ɔkɛndɛ wakawosha Jehowa.—Jɔna 3:​1-3.

JEHOWA TOSAMBAKA LO TSHIMBO YA NYUMA K’EKILA

12. Ngande watosha Jehowa wɔladi etena kongaso la dui dimɔtshi diatokiyanya? (Filipɛ. 4:​6, 7)

¹² Lo tshimbo ya nyuma kande k’ekila, Jehowa tosambaka etena keso la dui dimɔtshi diatokiyanya. Tende kɛnɛ kakakomɛ Ron nde la Carol. Dui dia lonyangu ko, ɔnawɔ la pami akayadiake. Vɔ mbutaka ɔnɛ: “Taki l’ekakatanu wa welo efula la ntondo, koko nyɔi k’ɔnaso mbakaleke tosha paa. Takasale etsho efula hatolale djɔ ndo takalɔmbaka, ko takoke wɔladi mɛtɛ wɔtɛkɛtami lo Filipɛ 4:​6, 7.” (Adia.) Naka wɛ ekɔ l’okakatanu ɔmɔtshi wakosha paa l’asolo, kete wɛ koka diholɛ Jehowa otema ayɛ lo dɔmbɛlɔ mbala la mbala ndo edja tshɛ kalangayɛ. (Os. 86:3; 88:1) Lɔmba Jehowa mbala la mbala dia nde kosha nyuma kande k’ekila. Nde ayokokimanyiyaka nshi tshɛ.—Luka 11:​9-13.

13. Ngande wakoka nyuma k’ekila tokimanyiya dia ntetemala ntɛmɔla Jehowa la kɔlamelo tshɛ? (Ɛfɛsɔ 3:16)

¹³ Onde wɛ atahomanaka l’okakatanu wakakɔkɔmɔla? Nyuma k’ekila koka kokimanyiya dia wɛ ntetemala ntɛmɔla Jehowa la kɔlamelo tshɛ. (Adia Ɛfɛsɔ 3:16.) Tɔsɛdingole ɛnyɛlɔ ka kadiyɛso kelɛwɔ Flora. Nde l’omɛnde wakakambaka kaamɛ oko waa misiɔnɛrɛ etena kakashisha omɛnde kɔlamelo otsha le nde ndo wakadiake diwala. Nde mbutaka ate: “Lakamɛnama l’ɔkɛyi l’ɔtɛ wa dikambo sɔ. Lakalɔmbɛ Jehowa nyuma kande k’ekila dia dimi mbikikɛ. Jehowa akambisha kɛnɛ kakimi l’ohomba dia nkɔnɔ ndo dia ndɔshana l’okakatanu wakamɛnaka oma l’etatelo oko halokoke ntondoya.” Flora akoke dia Nzambi akokimanyiya dia nde mfudia wɛkamu ande ndo ɔnɛ nde ayowosukɛ lo ekakatanu ande tshɛ. Nde kotshaka ate: “Ɛtɛkɛta wa l’Osambo 119:32 wata ɔnɛ: ‘Dimi layoyela la waasaso tshɛ mboka ka ɛlɛmbɛ ayɛ nɛ dia wɛ mbalɔngɔsɔlɛka dihole lo otema ami,’ wakakotshama le mi.”

14. Ngande wakokayɛ nyomoleka nkondja nyuma ka Nzambi?

¹⁴ Ngande wakokayɛ nsala akambo lo yoho yɔtɔnɛ l’alɔmbɛlɔ ayɛ wa nyuma k’ekila? Yasha lo akambo wayoleka kokimanyiya dia nyomoleka nkondja nyuma ka Nzambi. L’atei w’akambo asɔ mbele ndo mbɔtɔ lo nsanganya ndo nsambisha anto akina. Lodia yimba yayɛ la tokanyi ta Jehowa lo mbadiaka Ɔtɛkɛta ande lushi tshɛ. (Flpɛ. 4:​8, 9) Etena kadiayɛ, dja yimba lo anto wɔtɛkɛtami lo Bible  wakahomana l’ehemba ndo nkana yimba lo woho wakaakimanyiya Jehowa dia mbikikɛ. Sandra, lakatatɛkɛtshi la diko, akahomana l’ekakatanu efula wa wolo. Nde mbutaka ate: “Ɔkɔndɔ wa Yɔsɛfu wakaminanda mɛtɛ efula. Nde kombetawɔ di’ehemba ndo awui waha la losembwe wakawoosalɛka ntɛwɔla diɔtɔnganelo diasande la Jehowa.”—Eta. 39:​21-23.

JEHOWA TOSAMBAKA OMA LO TSHIMBO Y’ASEKASO AMBETAWUDI

15. Oma le waa na wakokaso nkondja esambelo ndo ngande wakokawɔ tokimanyiya? (Enda ndo osato.)

¹⁵ Etena kasowaso, asekaso ambetawudi koka monga “kiɔkɔ ya esambelo k’efula” le so. (Kɔl. 4:11) Jehowa mɛnyaka mɛtɛ ngandji katokande oma lo tshimbo y’anangɛso l’akadiyɛso. Asekaso ambetawudi koka tosamba lo tohokamɛ la kɛtshi tshɛ kana vɔ koka tosukɛ lo monga tsho suke la so. Vɔ koka taadiyɛ divɛsa dimɔtshi dia lo Bible dia tokeketsha kana nɔmba kaamɛ la so. d (Rɔmɔ 15:4) Lo tena dimɔtshi, ɔnangɛso kana kadiyɛso kɛmɔtshi koka tohola tokanyi ta Jehowa ndo tɔ tayotokimanyiya dia nama wɛdimo aso. Asekaso Akristo koka tosha ekimanyielo ka shikaa, ɛnyɛlɔ oko lo tosha mbo ya ndɛ etena keso l’ekiyanu.

16. Kakɔna kahombaso nsala dia nkondja osukɔ oma le anto akina?

¹⁶ Dia nkondja osukɔ oma le anto akina,  ayonga ohomba sho mbalɔmbawɔ. Anangɛso l’akadiyɛso tookaka ngandji ndo vɔ nangaka tokimanyiya. (Tok. 17:17) Koko vɔ mbeyaka monga ko haweye woho wayaokaso kana kɛnɛ keso l’ohomba. (Tok. 14:10) Naka wɛ ekɔ l’okiyanu, kete tɛ angɛnyi ayɛ wambotshunda lo nyuma. Tɛwɔ kɛnɛ kakoka kokimanyiya. Wɛ koka nsɔna dia mbutɛ ekumanyi ɔtɔi kana pende di’ekesanɛ la yɛ dikambo diakɔ. Akadiyɛso amɔtshi mɛnaka dia ekɔ dui diakeketsha nsawola la kadiyɛso kekina kambotshunda lo nyuma.

17. Naa ekakatanu ɛmɔtshi wakoka toshimba dia nongola ekeketshelo ndo ngande wakokaso ntondoya ekakatanu akɔ?

¹⁷ Ewɔ dia ndjaanganya l’anto akina. L’ɔtɛ w’ekiyanu wele la yɛ, wɛ mbeyaka monga ko bu la mposa ka mbetsha wenya kaamɛ l’anto akina. Lo tena dimɔtshi, anangɛyɛ l’akadiyɛyɛ mbeyaka monga l’okakatanu dia nshihodia woho wayaokayɛ kana kotɛ ɛtɛkɛta wakoka konyangiya. (Jak. 3:2) Tetawɔke dia awui wa ngasɔ koshimba dia wɛ nongola ekeketshelo kele la yɛ ohomba. Ekumanyi kɛmɔtshi kelɛwɔ Gavin, lele la hemɔ k’ɔkɔmwɛlɔ, mbutaka ate: “Tena efula halolangaka ntɛkɛta kana mbetsha wenya kaamɛ l’angɛnyi ami.” Koko, Gavin salaka la wolo dia monga kaamɛ l’anango, ndo nde ndjaokaka dimɛna etena kasalande dui sɔ. Kadiyɛso kɛmɔtshi kelɛwɔ Amy mbutaka ate: “L’ɔtɛ w’awui wakankomɛ lo nshi yakete, lekɔ l’okakatanu dia ndjaɛkɛ le anto. Koko lekɔ lo mbeka dia nanga ndo mbɛkɛ analengo l’akadiyɛmi otema oko wasala Jehowa. Dimi mbeyaka dia dikambo sɔ ngɛnyangɛnyaka Jehowa ndo ngɛnyangɛnyakami ndo dimi lawɔ.”

ALAKA WA JEHOWA WENDANA LA NSHI YAYAYE KOKA TOSAMBA

18. Kakɔna kakokaso nongamɛ lo nshi yayaye, ndo kakɔna kakokaso nsala ɛlɔ kɛnɛ?

¹⁸ Sho koka monga l’eshikikelo dia keema edja lo nshi yayaye, Jehowa ayanga minya kɛnɛ tshɛ katosha ekiyanu wa lo demba kana wa lo yimba. (Ɛny. 21:​3, 4) L’etena kɛsɔ, awui watosha paa wele la so ɛlɔ kɛnɛ “hawotoya lo otema nto.” (Isa. 65:17) Oko wambotɛna, Jehowa ekɔ lo ‘mɔmba mpota yaso’ kaanga nshi nyɛ. Kondja wahɔ tshɛ lo tshɛ oma lo tɛdikɔ toludi la ngandji tɔsa Jehowa dia kosamba ndo kokeketsha. Tongake pondjo la taamu dia ‘nde ndjakiyanyaka dikambo diayɛ.’—1 Pe. 5:7.