Tshoto y’otale aki etenyi kɛmɔtshi ka lo ɛɔtwɛlɔ k’otsha lo dihole di’Ekila dia lo tɛmpɛlɔ. Lo ndjela Bible—Ekadimwelo k’andja w’oyoyo kakatondjama la ntondo ka 2023, “tshoto y’otale yaki la ntondo yaki la otale wa kubita 20 yakɛdima la wekeke wa luudu ndo yaki la tanga dia kubita 120.” (2 Ɛk. 3:4) Dikadimwelo dikina mbutaka dia tshoto y’otale yaki l’otale wa “kubita 120,” mbuta ate tshoto ya mɛtrɛ 53!

Koko, Bible—Ekadimwelo k’andja w’oyoyo kakatondjama l’akatshi lo 2023 mbutaka lo dikambo dia tshoto ya tɛmpɛlɔ ka Sɔlɔmɔna ɔnɛ: “Tanga diatɔ diaki la kubita 20,” kana suke la mɛtrɛ 9. a Tɔsɛdingole ɛkɔkɔ ɛmɔtshi l’ɔtɛ w’etshikitanu ɛsɔ.

Tanga dia tshoto y’otale hatɛkɛtami lo 1 Nkumi ya dikanga 6:3. Lo divɛsa nɛ, ofundji Jɛrɛmiya akatɛkɛta dia otale ndo dia woke wa tshoto y’otale koko aha dia tanga diayɔ. Oma laasɔ lo tshapita yayela, nde akalembetshiya towuiwui tshɛ tendana la tenyi dikina dia lo tɛmpɛlɔ, mbidja ndo Oduwa wa la mbolo ya lɔlɛlɔla, pusupusu dikumi ndo dikundji 2 dia konga diaki l’andja wa tshoto y’otale. (1 Nku. 7:​15-37) Naka lo mɛtɛ mbaki tshoto y’otale la mɛtrɛ 50 ndo yaki otale ndeka tenyi dikina tshɛ dia lo tɛmpɛlɔ, lande na kaki Jɛrɛmiya kombuta otale ayɔ? Kaanga ɛnɔnyi nkama l’ɔkɔngɔ, afundji w’ase Juda wakate dia tshoto y’otale kondeka tenyi dikina dia lo tɛmpɛlɔ ka Sɔlɔmɔna otale.

Waa nomb’ewo wakayambola dia kana mpele dia tɛmpɛlɔ diaki l’akoka wa nsukɛ tshoto y’otale yaki l’otale wa kubita 120. Ave wa weke ndo brikɛ yakakambaka la wɔ lo nshi y’edjedja, ɛnyɛlɔ oko nyɛ yakawake asoko wa tɛmpɛlɔ l’Edjibito, wakasalaka etshina ka woke ndo tshoto y’ɔsɔdi yakadɛka otsha l’olongo. Koko tɛmpɛlɔ ka Sɔlɔmɔna komonga ngasɔ. Waa nomb’ewo mbetawɔka dia mpele diatɔ komonga la woke wa kubita ndekana 6 kana mɛtrɛ 2.7. Ombeyi w’ɛkɔndɔ ndo ombiki a mvudu Theodor Busink akakomiya ate: “Lo kɛnɛ kendana la woke w’ehele ka [ɛɔtwɛlɔ ka tɛmpɛlɔ], tshoto y’otale kokoka monga [l’otale] wa kubita 120.”

Ondo kɛnɛ kofundami lo 2 Ɛkɔndɔ 3:4 kakasangɔma l’ɛkɔmɔ. Kaanga mbele efundelo wa l’anya w’edjedja ɛmɔtshi mɛnyaka dia aki kubita “120” lo divɛsa nɛ, efundelo ekina wele la nɛmɔ wɛkɛso otema, oko Codex Alexandrinus ka lo ntambe ka tanu ndo Codex Ambrosianus ka lo ntambe ka samalo, mɛnyaka dia aki “kubita 20.” Lande na kakakoke ofundji aha la mbeya mfunda “120”? Tshɛkɛta “lokama” ndo “kubita” fɔnaka lo Hɛbɛru. Laasɔ ondo ofundji akafunde tshɛkɛta “lokama” lo dihole dia “kubita.”

Aha la taamu, kaanga mbasalaso la wolo dia nshihodia awui asɔ ndo dia mɛnya kɛnɛ kele mɛtɛ lo dikambo dia tɛmpɛlɔ ka Sɔlɔmɔna, sho ndekaka ndjasha lo yoho ya laande lo kɛnɛ kakalembetshiyaka tɛmpɛlɔ, mbuta ate tɛmpɛlɔ ka woke ka lo nyuma. Tekɔ la lowando efula lo woho wakelɛ Jehowa ekambi ande tshɛ dia mbɔtɛmɔla lo tɛmpɛlɔ kɛsɔ!—Hɛb. 9:​11-14; Ɛny. 3:12; 7:​9-17.