Ɛlɔngɔlɔngɔ—“Nyotetemale nkamba dikambo dia panda kanyu”
“Oko watonyongaka la okitanyiya nshi tshɛ, . . . nyotetemale nkamba dikambo dia panda kanyu la wɔma ndo la lokomba.”—FLPƐ. 2:12.
1. Lande na kele batisimu ekɔ nna di’ohomba? (Enda osato wele lo mbɔtwɛlɔ.)
ƆNƆNYI tshɛ nunu di’ambeki wa Bible wekɔ lo batizama. Efula l’atei awɔ wekɔ ɛlɔngɔlɔngɔ, wekɔ l’ɛnɔnyi dikumi l’ɛmɔtshi kana watakotsha ɛnɔnyi dikumi l’ɛmɔtshi. Ondo vɔ wakodiama lo nkumbo y’Akristo. Onde wɛ ekɔ ɔmɔtshi l’atei awɔ? Naka eelo, kete wɛ akasale dui dia dimɛna efula. Okristo tshɛ pombaka batizama. Ndo batisimu kekɔ ohomba dia nkondja panda ndo nsɛna pondjo pondjo.—Mat. 28:19, 20; 1 Pe. 3:21.
2. Lande na kahayahombe mboka wɔma dia ndjakimɔ le Jehowa?
2 Etena kakayabatizama, Jehowa akatatɛ kɔtshɔkɔla lo toho efula t’eyoyo. Koko wɛ akonge ndo la ɛkɛndɛ w’eyoyo. Lo yoho yakɔna? Lushi lakayabatizama, ɔnangɛso lakasha sawo dianyu dia batisimu akambola ɔnɛ: “Oma l’ekimanyielo k’olambo wa Yeso Kristo, onde nyakayatshumoya lo pɛkato yanyu ndo nyakayakimɔ nyamɛ le Jehowa dia nsala lolango lande?” Wɛ akakadimola ɔnɛ eelo. Wɛ akatshike dɔkɔlɔkɔ dia nanga Jehowa ndo mbetɛ
olimu ande dui dioleki ohomba lo lɔsɛnɔ layɛ. Onde wɛ pombaka nyanga l’ɔtɛ wakayatshike dɔkɔlɔkɔ di’ohomba sɔ? Ndooko kaanga yema! Wɛ hanyangaki pondjo l’ɔtɛ wetawɔyɛ dia Jehowa nɔmbɔla lɔsɛnɔ layɛ. Wanɛ waheye Jehowa wekɔ ase andja wa Satana. Diabolo hayakiyanya lo dikambo diawɔ kana lo dikambo diayɛ. Koko, nde ayɔngɛnangɛna naka wɛ nshisha elongamelo kayɛ ka nsɛna pondjo pondjo lo mbeta lo wedi ande ndo mboka Jehowa ɔkɔngɔ.3. Ngande wakɔtshɔkɔla Jehowa l’ɔtɛ wakayayakimɔ le nde?
3 Kana yimba lo woho wakɔtshɔkɔla Jehowa l’ɔtɛ wakayayakimɔ le nde ndo wakayabatizama. Wɛ akakimɔ lɔsɛnɔ layɛ le Jehowa, diakɔ diele wɛ koka mbuta l’eshikikelo ɔnɛ: “Jehowa ekɔ lo wedi ami; dimi hantoka wɔma. Kakɔna kakoka onto salɛmi?” (Os. 118:6) Ndooko dui dioleki mbisha nɛmɔ oko mbeta lo wedi wa Nzambi ndo mbeya dia nde ekɔ l’ofunu lo dikambo diayɛ.
ƆKƐNDƐ W’ONTO NDAMƐ
4, 5. a) Lande na kakokaso mbuta dia ndjakimɔ le Jehowa ekɔ ɔkɛndɛ w’onto ndamɛ? b) Ekakatanu akɔna wahomana l’Akristo tshɛ oyadi ɛnɔnyi akɔna wele la wɔ?
4 Wɛ hahombe mbɔsa diɔtɔnganelo diasayɛ la Jehowa oko telefɔnɛ kakakongɛ ase nkumbo di’ambutshi ayɛ kosombɛ. Kaanga naka wɛ akadjasɛ l’ambutshi ayɛ, diɔtɔnganelo diasayɛ la Jehowa ekɔ ɔkɛndɛ ayɛ wɛmɛ. Lande na kele ekɔ ohomba mbohɔ dui sɔ? Ndooko onto l’atei aso leya shikaa woho wayohembama mbetawɔ kaso lo nshi yayaye. Ɛnyɛlɔ, mbeyaka monga ko wɛ akabatizama ntondo ka monga l’ɛnɔnyi dikumi l’ɛmɔtshi. Koko etena kayayɛ l’ɛnɔnyi dikumi l’ɛmɔtshi, wɛ aya la nsaki ndo ekakatanu w’eyoyo. Ɔna ɔmɔtshi la womoto lele l’ɛnɔnyi dikumi l’ɛmɔtshi akate ate: “Mbala efula ɔna hakoke ntona dia monga Ɔmɛnyi wa Jehowa paka l’ɔtɛ wahandakondjisha yɛtshi y’okate wa fɛtɛ ka eotwelo la kalasa. Koko l’ɔkɔngɔ w’ɛnɔnyi engana, etena kongande la nsaki k’efula ka dieyanelo, nde pombaka monga l’eshikikelo tshɛ lo tshɛ ɔnɛ mbala tshɛ nkitanyiya ɛlɛmbɛ wa Jehowa mbele ɔsɔnwɛlɔ woleki dimɛna.”
5 Aha ɛlɔngɔlɔngɔ l’esekaseka eto mbayonga l’ekakatanu w’eyoyo. Kaanga mbetawɔ ka wanɛ wabatizama waya epalanga mbɔtɔka l’ohemba lo toho tahawalongamɛ. Ondo vɔ mongaka l’ehemba wendana la diwala, yoonge kana elimu awɔ. Oyadi ɛnɔnyi akɔna wele la so, onto tshɛ l’atei aso pombaka monga la kɔlamelo le Jehowa l’awui wotshikitanyi.—Jak. 1:12-14.
6. a) Lo yoho yakɔna yele dɔkɔlɔkɔ diakayatshike le Jehowa hadiokoke tshikitanyema? b) Wetshelo akɔna wakokayɛ nkondja oma lo Filipɛ 4:11-13?
6 Dia kokimanyiya dia ntetemala monga la kɔlamelo, kohɔke mbala tshɛ ɔnɛ dɔkɔlɔkɔ diakayatshike le Jehowa hadiokoke tshikitanyema. Dui sɔ nembetshiyaka dia wɛ akatshike dɔkɔlɔkɔ le Ɔnɛ-Laheme-Tshɛ dia mbokambɛka oyadi kɛnɛ tshɛ kayokokomɛ, kaanga naka angɛnyi kana ambutshi ayɛ wambotshika nsala dui sɔ. (Os. 27:10) Lo dikambo tshɛ, nsala la wolo dia nɔmba Jehowa dia kokimanyiya dia nkotsha dɔkɔlɔkɔ diayɛ le nde.—Adia Filipɛ 4:11-13.
7. Kakɔna kalembetshiya nkamba dikambo dia panda kayɛ “la wɔma ndo la lokomba”?
7 Jehowa nangaka dia wɛ monga ɔngɛnyi ande. Koko nɔmbamaka mbidja welo dia nkeketsha lɔngɛnyi lɔsɔ ndo nkamba dikambo dia panda kayɛ. Filipɛ 2:12 mbutaka ɔnɛ: “Nyotetemale nkamba dikambo dia panda kanyu la wɔma ndo la lokomba.” Dui sɔ nembetshiyaka dia sho pombaka nkana yimba la yambalo tshɛ lo woho wayototshikala suke la Jehowa ndo ntetemala monga la kɔlamelo oyadi kɛnɛ tshɛ kayotokomɛ. Hatokoke tsho mfɔnya dia tayosala dui sɔ. Tohɔ dia kaanga anto amɔtshi wakakambɛ Nzambi l’edja k’ɛnɔnyi efula kotetemala monga la kɔlamelo. Awui akɔna shikaa wakoka kokimanyiya dia nkamba dikambo dia panda kayɛ?
WEKELO WA BIBLE WEKƆ OHOMBA
8. Wekelo w’onto ndamɛ mendanaka la na? Lande na kewɔ ohomba?
8 Dia monga ɔngɛnyi wa Jehowa, sho pombaka mbohokamɛ ndo sho pombaka nsawola la nde. Yoho yoleki ohomba yahokamɛso Jehowa ele mbekaka Bible. Dui sɔ mendanaka la mbadiaka ndo kanaka yimba la Ɔtɛkɛta wa Nzambi ndo ekanda walembetshiya Bible. Koko mbeka Bible bu oko nkimɛ awui l’ɔtɛ woho wakokayɛ nsala lo dikambo di’ɛgzamɛ wa la kalasa. Koko, wekelo wekɔ oko lɔkɛndɔ lasha ɔngɛnɔngɛnɔ latayɛnyi ndo latayashola akambo w’eyoyo wendana la Jehowa. Wɛ ayoyasukanya la Nzambi ndo nde ayoyasukanya la yɛ.—Jak. 4:8.
9. Dihomɔ diakɔna diakakokimanyiya lo wekelo ayɛ w’onto ndamɛ?
9 Okongamelo wa Jehowa wekɔ lo ntondja dihomɔ efula diakoka kokimanyiya lo ekongelo kayɛ ka wekelo. Ɛnyɛlɔ, ekɔ asawo amɔtshi welamɛ ɔnɛ “Wetshelo wa lo Bible” l’etenyi kele l’ɔtɛ a dui ɔnɛ “Ɛlɔngɔlɔngɔ” lo jw.org dia kokimanyiya dia nkamba la wetshelo wakondjayɛ oma l’ɛkɔndɔ wa lo Bible. Ndo nto lo jw.org, wɛ koka ntana asawo wa wekelo w’oma lo “Bible etshatɔ mɛtɛ?” Awui asɔ koka nkeketsha mbetawɔ kayɛ ndo kokimanyiya dia nembetshiya anto akina dietawɔ diayɛ. Wɛ koka ntana tokanyi tokina dikambo dia wekelo ayɛ w’onto ndamɛ lo sawo diele l’ɔtɛ a dui ɔnɛ “Les jeunes s’interrogent : Comment trouver du plaisir à lire la Bible?” lo Emɔ! ka Ngɔndɔ ka nɛi 2009. Wekelo ndo okanelo wa yimba wekɔ ohomba dia nkamba dikambo dia panda kayɛ.—Adia Osambo 119:105.
DƆMBƐLƆ DIEKƆ OHOMBA
10. Lande na kele Okristo wambobatizama pombaka nɔmbaka?
10 Etena kekaso Bible, sho pokamɛka Jehowa ndo etena kalɔmbaso, sho sawolaka la nde. Hatohombe mbɔsa dɔmbɛlɔ oko tsho mbekelo kɛmɔtshi kana oko kiɔkɔ y’ekokelo yatokimanyiya dia ntondoya. Dɔmbɛlɔ ekɔ mɛtɛ sawo dia la Otungi aso. Ohokanyiya yema: Jehowa nangaka mpokamɛ kɛnɛ kalangayɛ mbotɛ! (Adia Filipɛ 4:6.) Diakɔ diele naka wɛ amboyakiyanya l’ɔtɛ wa dui diakɔna tshɛ, Bible kotɛka ɔnɛ “kitsha wotsho ayɛ le Jehowa.” (Os. 55:22) Miliyɔ y’anangɛso ndo akadiyɛso koka kotɛ dia dako sɔ diakaakimanyiya. Diɔ koka kokimanyiya ndo wɛ!
11. Lande na kahombayɛ mbokaka Jehowa losaka tena tshɛ?
11 Koko, hatohombe nɔmbaka tsho paka etena kalangaso dia Jehowa tokimanyiya. Bible toholaka ɔnɛ: “Nyɛnya dia nyekɔ la lowando.” (Kɔl. 3:15) Lo tena dimɔtshi sho ndjakiyanyaka efula l’ɔtɛ w’ekakatanu aso polo ndo hatoyɛna akambo w’amɛna tshɛ wele la so. Ɔnkɔnɛ hemba nsala nganɛ: Lushi tshɛ, nkanyiya awui kaanga asato wakokayɛ mbisha Jehowa losaka ndo oma laasɔ shande losaka l’ɔtɛ awɔ. Abigail lele l’ɛnɔnyi dikumi l’ɛmɔtshi, lakabatizama etena kakinde l’ɛnɔnyi 12 mbutaka ate: “Dimi shihodiaka dia Jehowa mbakokaso mbisha losaka oleki onto akɔna tshɛ la l’andja ɔnɛ. Sho pombaka mboshaka losaka lo diaaso tshɛ l’ɔtɛ wa weshasha watoshande. Lushi lɔmɔtshi, lakoke wohwelo ɔnɛ: Naka sho mboka Jehowa losaka ɛlɔ l’ɔtɛ w’awui amɔtshi ko mbooka losaka lo awui akɔ waamɛ loyi, lende ayotokomɛ?” *
OHOMBA WELE L’AWUI WAKAKOKOMƐ
12, 13. Ngande wakayɛnyi dia Jehowa ekɔ ɔlɔlɔ, ndo lande na kele ekɔ ohomba nkanyiya lo kɛnɛ kendana la woho wakakokimanyiya Jehowa?
12 Jehowa akakimanyiya nkumekanga Davidɛ dia mbikikɛ ekakatanu efula wa wolo. Ɔnkɔnɛ Davidɛ akate oma lo kɛnɛ kakokomɛ ate: “Nyɔlɛtɛ ko nyayɛna dia Jehowa ekɔ ɔlɔlɔ; ɔngɛnɔngɛnɔ le onto layashɛ le nde.” (Os. 34:8) Divɛsa sɔ tɛnyaka dia shoamɛ pombaka mɛna ɔlɔlɔ wa Jehowa. Etena kadiayɛ Bible, ekanda walembetshiya Bible ndo kɔtɔyɛ nsanganya yaso, wɛ mbekaka woho wakakimanyiya Nzambi anto akina dia ntshikala la kɔlamelo. Koko etena katakeketala diɔtɔnganelo diasayɛ la Jehowa, ekɔ ohomba mɛna woho watakokimanyiya Jehowa. Ngande wakayɛnyi dia Jehowa ekɔ ɔlɔlɔ?
13 Okristo tshɛ akɛnyi ɔlɔlɔ wa Jehowa lo yoho ya laande. Nde nɔmbaka onto tshɛ la l’atei aso dia ndjasukanya la nde ndo Ɔnande. Yeso akate ate: “Ndooko onto lakoka ndja le mi paka Papa lakantome kookotodi.” (Jni. 6:44) Onde wɛ ndjaokaka dia Jehowa akakokotola otsha le nde? Kana onde wɛ mbutaka ɔnɛ: ‘Jehowa akakotola ambutshi ami otsha le nde ndo dimi lekɔ lo tawayele tsho’? Ohɔ dia oma l’etena kakayayakimɔ le Jehowa ndo kakayabatizama, wɛ akonge la diɔtɔnganelo dia laande la Jehowa. Bible totɛka ɔnɛ: “Naka onto mbokaka Nzambi ngandji, onto ɔsɔ mbeyamaka le nde.” (1 Kɔr. 8:3) Tena tshɛ ɔsaka dihole diakakosha Jehowa l’okongamelo ande la nɛmɔ.
Onde wɛ sawolaka la Jehowa dimɛna? (Enda odingɔ 8-11)
14, 15. Ngande wakoka esambishelo kokimanyiya dia monga la mbetawɔ ka wolo?
14 Wɛ ekɔ lo mɛna ɔlɔlɔ wa Jehowa nto etena kakoshande dihonga dia mbutɛ anto akina akambo wendana la mbetawɔ kayɛ, oyadi l’esambishelo kana la kalasa. Mbeyaka monga tshondo y’okakatanu dia wɛ nsambisha asekayɛ wa la kalasa. Wɛ koka ndjakiyanya lo dikambo dia kɛnɛ kayowosala. Wɛ mbeyaka mboka wɔma djekoleko dia nembetshiya awui wendana la dietawɔ diayɛ la ntondo k’olui a woke w’anto. Kakɔna kakoka kokimanyiya?
15 Kanyiya lande na ketawɔyɛ kɛnɛ ketawɔyɛ. Naka asawo wa wekelo wele lo jw.org wekɔ l’Ɔtɛkɛta ayɛ, kete sala la wolo dia nkamba la wɔ. Vɔ koka kokimanyiya dia nkana yimba lo dikambo dia kɛnɛ ketawɔyɛ, lande na kakietawɔyɛ ndo woho wakokayɛ nembetshiya anto akina dietawɔ diayɛ. Naka wɛ ekɔ mɛtɛ l’eshikikelo ndo amboyalɔngɔsɔla dimɛna, kete wɛ Jɛr. 20:8, 9.
ayokombola nsambisha akambo wendana la Jehowa.—16. Kakɔna kakoka kosha dihonga dia ntɛkɛta akambo wendana la dietawɔ diayɛ?
16 Kaanga naka wɛ akayalɔngɔsɔdi dimɛna, wɛ koka mboka wɔma dia nembetshiya akambo wendana la dietawɔ diayɛ. Kadiyɛso kele l’ɛnɔnyi 18, kakabatizama etena kakinde l’ɛnɔnyi 13, mbutaka ɔnɛ: “Dimi mbeyaka kɛnɛ ketawɔmi, koko lo tena dimɔtshi dimi mongaka l’okakatanu dia mbuta kɛnɛ kele lo yimba yami.” Diakɔ diele, nde salaka la wolo dia ntɛkɛta woho wokondɔtɛkɛtaka ndo aha l’okakatanu etena kasambishande. Nde mbutaka ate: “Asekami wa la kalasa mbutaka awui wasalawɔ aha l’okakatanu. Dimi la wɔ pombaka nsala woho akɔ waamɛ. Laasɔ, layota tsho dui dimɔtshi, ɛnyɛlɔ ɔnɛ: ‘Lushi lɔmɔtshi laketshaka anto akambo wendana la Bible, ndo . . .’ Oma laasɔ ko dimi ntetemala l’ɔkɔndɔ ami. Kaanga mbele kɛnɛ kayomota l’etena kɛsɔ hendana la Bible, mbala efula anto akina nangaka mbeya kɛnɛ kasalami etena ketshami Bible. Lo tena dimɔtshi vɔ mbokakami ambola wendana la tɔ. Woho watamaleke nkamba la yoho shɔ, mbataleke dui sɔ monga wɔdu. Ndo oma laasɔ, dimi mongaka l’ɔngɛnɔngɛnɔ!”
17. Kakɔna nto kakoka kokimanyiya dia nsambisha anto akina?
17 Etena kɛna anto akina dia wɛ ndjakiyanyaka mɛtɛ lo dikambo diawɔ ndo mbalɛmiyaka, mongaka dui dia wɔdu le wɔ dia kɔlɛmiya ndo nɛmiya dietawɔ diayɛ. Olivia, lele l’ɛnɔnyi 17 ndo lakabatizama etena kakinde dikɛnda mbutaka ate: “Mbala tshɛ lakokaka wɔma ɔnɛ naka dimi dimola dikambo dia Bible etena kasawolaso, kete anto wayɔmbɔsa oko onto lambotamba elelo.” Oma laasɔ, nde akatatɛ mɛna akambo woho okina. Lo dihole dia nkanyiya efula dikambo dia wɔma waki la nde, nde akate ate: “Ɛlɔngɔlɔngɔ ndo esekaseka efula haweye ndooko dui lo dikambo di’Ɛmɛnyi wa Jehowa. Sho ato mbele Ɛmɛnyi wa Jehowa wele kaamɛ la wɔ. Ɔnkɔnɛ, yoho yasalaso akambo koka nshikikɛ kɛnɛ kayowosala. Ko kayotota naka tekɔ ɛsɔnyi, akanga wa diki kana mongaka l’okakatanu dia ntɛkɛta awui wendana la mbetawɔ kaso kana tekɔ lo mbatɛ asolo etena kasambishaso? Naka ngasɔ, kete vɔ wayotɔsa dia sho bu l’ofunu l’ɔtɛ wa weho w’anto weso. Vɔ koka kaanga tokadimola kɔlɔ l’ɔtɛ weso bu l’eshikikelo. Koko, naka sho ntɛkɛta aha l’okakatanu ndo l’eshikikelo lo kɛnɛ kendana la kɛnɛ ketawɔso ndo kidjaka lo asawo aso, kete ondo vɔ wayotɔlɛmiya.”
NYOTETEMALE NKAMBA DIKAMBO DIA PANDA KANYU
18. Ahombayɛ nsala dia nkamba dikambo dia panda kayɛ?
18 Tambɛna dia nkamba dia nkondja panda kayɛ ekɔ ohomba efula. Dia nsala dui sɔ, wɛ pombaka mbadiaka ndo kanaka yimba la Ɔtɛkɛta wa Nzambi, nɔmbaka Jehowa ndo kanyiyaka dimɛna lo dikambo dia toho tshɛ takokimanyiyande. Salaka akambo asɔ ayokokimanyiya dia ndeka nshikikɛ ɔnɛ Jehowa ekɔ ɔngɛnyi ayɛ. Dui sɔ diayokotshutshuya dia nsambisha anto akina akambo wendana la dietawɔ diayɛ.—Adia Osambo 73:28.
19. Lande na kele ekɔ ohomba mbidja welo dia nkamba dikambo dia panda kayɛ?
19 Yeso akate ate: “Naka onto nangaka ndjelami, nde ayasɛkɛ, ɛmbɛ otamba ande w’asui ndo atetemale ndjelami.” (Mat. 16:24) Lo mɛtɛ dia ndjela Yeso, Okristo tshɛ pombaka ndjakimɔ le Jehowa ndo batizama. Koko ɔsɔ ekɔ tsho etatelo ka lɔsɛnɔ la dimɛna efula l’etena kɛnɛ ndo diɔ diayokokonya lo lɔsɛnɔ la pondjo l’andja w’oyoyo waki Nzambi. Ɔnkɔnɛ, nsala kɛnɛ tshɛ kakokayɛ nsala dia ntetemala nkamba dikambo dia panda kayɛ!
^ od. 11 Dia mbeya awui akina, enda “Les jeunes s’interrogent : Pourquoi devrais-je prier ?” ndo fishi kadiɔ lo jw.org.