Lo 2 Kɔrɛtɔ 12:2, 3, Pɔɔlɔ akate ɔnɛ pami kɛmɔtshi “akatɔlama polo l’olongo wa 3.” Ko naa pami kakɔ? Lo fundɛ etshumanelo ka la Kɔrɛtɔ, Pɔɔlɔ akashikikɛ ɔnɛ Nzambi akakambe la nde oko ɔpɔstɔlɔ. (2 Kɔr. 11:5, 23) Oma laasɔ, nde akate dia “waɛnɛlɔ ndo woshwelo w’oma le Nkumadiɔndjɔ.” Lanɛ Pɔɔlɔ kɔtɛkɛta dikambo di’anangɛso akina. Mbokɛmaka dia nde akatɛkɛtaka dikambo diande ndaamɛ oko onto lakalongola waɛnɛlɔ ndo woshwelo.​—2 Kɔr. 12:1, 5.

Diakɔ diele, Pɔɔlɔ mbaki onto “[l]akatɔlama polo l’olongo wa 3” ndo “onto lakatɔlama lo paradiso.” (2 Kɔr. 12:2-4) Nde akakambe la tshɛkɛta “woshwelo,” dia mɛnya dia nde akatɛkɛtaka dikambo diayosalema lo nshi yayaye.

Kakɔna kakɛnyi Pɔɔlɔ kaki oko “olongo wa 3”?

Lo Bible, “olongo” koka mendana la olongo wɛnama. (Eta. 11:4; 27:28; Mat. 6:26) Koko vɔ kambaka nto la “olongo” lo toho tokina. Lo tena dimɔtshi, olongo mendanaka l’ɛlɔmbwɛlɔ k’anto. (Dan. 4:20-22) Kana olongo koka mendana la ɛlɔmbwɛlɔ ka Nzambi, ɛnyɛlɔ Diolelo dia Nzambi.​—Ɛny. 21:1.

Pɔɔlɔ akɛnyi “olongo wa 3.” Akandalange mbuta? Lo tena dimɔtshi, Bible kalolɛka dui dimɔtshi mbala shato dia ditɔtɔmiya, dia mɛnya woke woke adiɔ. (Isa. 6:3; Ɛzk. 21:27; Ɛny. 4:8) Mɛnamaka dia, lo ntɛkɛta dia “olongo wa 3,” Pɔɔlɔ akake epole ɔsɛkɛ lo yoho y’ɛlɔmbwɛlɔ yoleki tshɛ, ka lotombo, mbuta ate Diolelo dia Mɛsiya dialɔmbwama oma le Yeso Kristo nde la anto 144 000. (Enda Étude perspicace des Écritures, Vol. 1, lk. 473, 476.) Oko wakafunde ɔpɔstɔlɔ Petero, tekɔ lo kongɛɛ “olongo w’oyoyo” lo ndjela daka dia Nzambi.​—2 Pe. 3:13.

Kayotota lo dikambo dia “paradiso” kakate Pɔɔlɔ?

Tshɛkɛta “paradiso” ndo yɔ lawɔ koka nembetshiya awui efula: 1) Lo kɛnɛ kendana la edjaselo ka ntondo k’anto, “paradiso” koka mendana la Paradiso ka mɛtɛ mɛtɛ kayoyala la nkɛtɛ kakongɛɛso. 2) Tɔ koka mendana la eongelo ka lo nyuma kayonga l’ekambi wa Nzambi l’andja w’oyoyo. 3) Laadiko dia laasɔ, tɔ koka mendana la awui wa diaambo wele l’olongo, mbuta ate “paradiso ka Nzambi” katɛkɛtama lo Ɛnyɛlɔ 2:7.​—Enda Tshoto y’Etangelo, Ngɔndɔ k’esambele 15, 2015, lk. 8. od. 8.

Mbeyaka monga ko Pɔɔlɔ akatɛkɛtaka akambo akɔ asato tshɛ wele lo 2 Kɔrɛtɔ 12:4 etena kakandalembetshiyaka akambo wakokomɛ.

Lo tshɛna pe:

“Olongo wa 3” wɔtɛkɛtami lo 2 Kɔrɛtɔ 12:2 koka monga Diolelo dia Mɛsiya diakawasha Yeso Kristo nde l’anto 144 000, mbuta ate “olongo w’oyoyo.”​—2 Pe. 3:13.

Ɔsɔ ekɔ “olongo wa 3” nɛ dia Diolelo diekɔ yoho y’ɛlɔmbwɛlɔ koleki tshɛ, ndo lotombo.

“Paradiso” kele Pɔɔlɔ “akatɔlama” lo ɛnɛlɔ koka mendana la: 1) Paradiso ka mɛtɛ mɛtɛ kayonga la nkɛtɛ, 2) paradiso ka lo nyuma kayonga l’etena kɛsɔ kayonga woke efula ndeka paradiso ka lo nyuma ka nshi nyɛ, ndo 3) “paradiso ka Nzambi” ekɔ paradiso kayoyala l’olongo l’andja w’oyoyo, mbuta ate paradiso kayoyala l’etena kakɔ kaamɛ.

Ɔnkɔnɛ, andja w’oyoyo wayokengama la olongo w’oyoyo la nkɛtɛ k’oyoyo. Ɔsɔ ayonga dikongɛ di’oyoyo, mbidja ndo ɛlɔmbwɛlɔ ka Diolelo dia l’olongo ndo anto wakambɛ Jehowa lo paradiso ka la nkɛtɛ.