Onde wɛ akadia la yambalo tshɛ numɛlɔ ya Tshoto y’Etangelo yeke katomba? Naka ngasɔ, kete enda kana wɛ kokaka nkadimola ambola wayela anɛ:

Tolembetelo takɔna ta l’Afundelo tɛnya dia Nzambi tokaka kɛtshi?

Etena kaki ase Isariyɛlɛ w’edjedja lo lɔhɔmbɔ l’Edjibito, Nzambi akadjaka yimba lo asui ndo paa yawɔ. (Eto. 3:7; Isa. 63:9) Takatongama l’efanelo ka Nzambi ndo sho koka mbokana kɛtshi. Nde tokaka kɛtshi oyadi etena kahatakoke mbokama ngandji oma le nde.​—wp18.3, lk. 8-9.

Ngande wakimanyiya wetshelo wa Yeso anto dia minya tshelo ya kananɛ kɔlɔ?

Ase Juda efula wa lo nshi ya Yeso wakakananɛka kɔlɔ. Kristo akɛnya ohomba wa monga l’okitshakitsha ndo akɛnya dia ekɔ kɔlɔ monga l’otako l’ɔtɛ wa lokoho la demba. Nde akakeketsha ambeki ande dia vɔ mbɔsana oko onto l’ɔnango.​—w18.06, lk. 9-10.

Wetshelo akɔna wakondjaso oma lo ɔkɔkɔ waki Nzambi kombetawɔ dia Mɔsɛ mbɔtɔ lo Nkɛtɛ ya Daka?

Mɔsɛ aki la diɔtɔnganelo dia ma ma la Jehowa. (Eoh. 34:10) Oya l’ekomelo k’ɛnɔnyi 40 l’oswe wa shɛnga, wodja wakatatɛ ngunanguna mbala ka hende l’ɔtɛ wakiwɔ komonga l’ashi. Nzambi akatɛ Mɔsɛ dia mbitɛ dive dia ntondja ashi. Koko, Mɔsɛ akakɔmɔla danga lo dive. Ondo Jehowa akanyange woho waki Mɔsɛ kondjela ɛlɔmbwɛlɔ Ande kana l’ɔtɛ waki Mɔsɛ kombisha Nzambi lotombo lo dihindo sɔ. (Wal. 20:6-12) Dui sɔ pombaka tosha wetshelo w’ohomba efula wendana la nkitanyiya Jehowa ndo mbosha lotombo.​—w18.07, lk. 13-14.

Ngande wele sho koka nsala dindja esadi eto naka sho salɛ anto akambo lo ndjela ɛnamelo?

Ekɔ awui asato watshutshuya anto efula dia nsala akambo lo ndjela ɛnamelo: Lokoho la demba kana wodja, ekondjelo ndo ɛnɔnyi wele l’onto. Ekɔ ohomba efula le so dia nsala la wolo diaha monga la shɔnɔdi l’ɛnyɛlɔ ka Nzambi! (Ets. 10:34, 35)—w18.08, lk. 8-12.

Naa toho tɔmɔtshi takoka Akristo w’epalanga nkimanyiya anto akina?

Okristo w’opalanga wele ɛkɛndɛ ande wakatshikitanyema tetemalaka mbɔsama la nɛmɔ le Nzambi ndo nde koka nsala awui efula dia nkimanyiya anto akina. Nde koka nsambisha elonganyi wele bu ambetawudi, nkimanyiya anto wambɔla lo nyuma, mbeka l’anto Bible ndo mpamia olimu ande w’esambishelo.​—w18.09, lk. 8-11.

Akristo wekɔ la diangɔ diakɔna lo Ɛngɔ kombawɔ dihomɔ dia mbetsha?

Kartɛ ya woho wa mbɔtɔ lo JW.ORG ndo akatshi wa leeta. Traktɛ enanɛi yakakongɛma dimɛna ndo Tshoto y’Etangelo la Emɔ! Ehomɔ kakɔ kombaso diangɔ kekɔ nto la tobukubuku tɔmɔtshi, abuku ahende walekaso mbeka l’anto ndo tovidɛo t’ohomba efula tɔnɛi, l’atei atɔ mbele ndo nyɛ yele l’ɔtɛ a dui ɔnɛ: Lande na mbeka Bible?​—w18.10, lk. 16.

Ngande wakoka Okristo “somba mɛtɛ,” oko wotamidiɔ lo Tokedi 23:23?

Hatofute falanga dia mbeya akambo wa mɛtɛ. Koko, sho pombaka nkamba la wenya aso ndo mbidja welo dia mbakondja.​—w18.11, lk. 4.

Wetshelo akɔna wakokaso nkondja oma lo woho wakasalɛ Hɔsɛya wadɛnde Ngɔmɛrɛ akambo?

Ngɔmɛrɛ akasalaka loseka mbala la mbala, koko Hɔsɛya akoodimanyiyaka ndo nde akatetemala mbidjasɛ la nde. Naka olonganyi w’Okristo ambosala awui wa mindo wa dieyanelo, kete olonganyi ande koka mbodimanyiya. Naka nde ambeyana la olonganyi wakasale kɔlɔ, kete nde aya bu l’ɔkɔkɔ wa l’Afundelo wa ndjaka diwala.​—w18.12, lk. 13.