Awui wodingi divɛsa nɛ tokimanyiyaka dia nshihodia ɔnɛ Pɔɔlɔ akatɛkɛtaka dikambo dia losango laki Nzambi lendana la sangwelo diande, oko walitanaso lo Bible.

Mbala efula sho shilaka Hɛbɛru 4:12 l’ekanda aso dia mɛnya ɔnɛ Bible ekɔ la wolo wa ntshikitanya nsɛnɔ y’anto, ndo ngasɔ mbediɔ. Koko, ekɔ nto ɔlɔlɔ nshihodia kɛnɛ kakalangaka Pɔɔlɔ mbuta etena kakandafunde ɛtɛkɛta wa lo Hɛbɛru 4:12. Nde aki lo nkeketsha Akristo w’ase Hɛbɛru dia nsala akambo lo yoho yɔtɔnɛ la asangwelo waki Nzambi. Efula k’asangwelo asɔ wakatanemaka lo efundelo w’ekila. Pɔɔlɔ akakambe la ɛnyɛlɔ k’ase Isariyɛlɛ wele Nzambi akaatshungola oma l’Edjibito. Vɔ waki la elongamelo ka mbɔtɔ lo “wodja wakɛlanɛ abɛlɛ la osanga” wakawalake, lɛnɛ akawahombe tonga la momuya mɛtɛ.​—Etombelo 3:8; Eohwelo k’Ɛlɛmbɛ 12:9, 10.

Ɔsɔ aki sangwelo dia Nzambi. Koko ase Isariyɛlɛ wakatone ɛlɔmbwɛlɔ kaki Jehowa ndo vɔ komonga la mbetawɔ, ɔnkɔnɛ efula kawɔ kɔmbɔtɔ lo momuya kɛsɔ. (Walelo 14:30; Jashua 14:6-10) Koko Pɔɔlɔ akakotsha dia ‘daka dimɔtshi diendana la wɔtwɛlɔ wa lo momuya ka Nzambi’ diekekɔ. (Hɛbɛru 3:16-19; 4:1) ‘Daka’ sɔ diekɔ mɛtɛ etenyi ka kɛnɛ kakashola Nzambi lo dikambo dia sangwelo diande. L’ɛnyɛlɔ k’Akristo w’ase Hɛbɛru, sho kokaka mbadia awui wendana la sangwelo sɔ ndo nsala awui lo yoho yɔtɔnɛ la diɔ. Dia ntɔtɔmiya ɔnɛ daka sɔ mpikama lo Afundelo, Pɔɔlɔ akashile awui wa lo Etatelo 2:2 ndo Osambo 95:11.

Etema aso minandemaka dia mbeya ɔnɛ ‘daka diendana la wɔtwɛlɔ wa lo momuya ka Nzambi diekekɔ.’ Tekɔ l’eshikikelo dia kɛnɛ ketsha Bible lo kɛnɛ kendana la mbɔtɔ lo momuya ka Nzambi kokaka salema ndo tamboshila ntakola wanya dia mbɔtɔ lo momuya kɛsɔ. Hatosale dikambo sɔ lo ndjela Ɛlɛmbɛ wa Mɔsɛ kana lo nsala akambo w’ɔlɔlɔ paka dia mbetawɔma le Nzambi. Koko l’ɔtɛ wa mbetawɔ kaso le Nzambi, sho salaka akambo lo yoho yɔtɔnɛ la sangwelo diande ndo sho tetemalaka nsala ngasɔ. Nunu di’anto wa l’andja w’otondo wakatatɛ mbeka Bible ndo kɛnɛ kakashola Nzambi lo dikambo dia sangwelo diande. Dui sɔ diakatshutshuya efula ka l’atei awɔ dia ntshikitanya yoho yawɔ ya lɔsɛnɔ ndo dia batizama. Etshikitanu wakawasale mɛnyaka hwe dia “ɔtɛkɛta wa Nzambi wekɔ la lɔsɛnɔ ndo la wolo.” Kɛnɛ kakashola Nzambi lo Bible lo dikambo dia sangwelo diande kamboshila monga la shɛngiya lo lɔsɛnɔ laso ndo kayotetemala monga la wolo lo lɔsɛnɔ laso.