Onde wɛ mbeyaka wonya?
NAKA wɛ ekɔ lo nanga mbeya wonya, kakɔna kayoyosala? Ondo wɛ ayenda lo tango kayɛ. Naka ɔngɛnyi ayɛ ɔmɔtshi ambokombola wonya, ngande wayoyowotɛ? Ekɔ toho totshikitanyi ta mbita wonya. Lande na?
Tɔshi dia tekɔ oshidi ɔtɔi la minitɛ 30. Wɛ ayota dia tekɔ 1:30. Nemanɛka la dihole dienyu ndo mbekelo ya lɛkɔ, wɛ koka mbuta dia tekɔ 13:30. Yoho ya mbita wonya shɔ ndja oma lo tango kɛnya wenya akɔ 24. Ekɔ nto ahole amɔtshi wakokawɔ mbita wonya akɔ waamɛ ɔnɛ “oshidi ɔtɔi l’etenyi,” mbuta ate ambotshikala minitɛ 30 dia eshidi ehende koka.
Oko weyɛ ombadi wa Bible, wɛ koka ndjambola woho wakataka anto wa lo nshi yakafundamaka Bible wonya. Vɔ komonga la yoho tshɔi tsho. Etenyi ka Bible ka lo Hɛbɛru tɛkɛtaka dikambo dia “pindju,” “midi” ndo “dikɔlɔ.” (Eta. 8:11; 19:27; 43:16; Eoh. 28:29; 1 Ku. 18:26) Koko, lo waaso amɔtshi wakakambe la wenya ɛmɔtshi shikaa.
Lo nshi yakafundamaka Bible, waki la mbekelo ka kambaka la todjamu. Wakalekaka monga l’ohomba awɔ l’otsho. Ntambe efula ntondo ka Yeso mbotɔ, ase Isariyɛlɛ wakakahanya otsho lo tenyi sato diakawelɛka tena dia nsungukala. (Os. 63:6) Embadi 7:19 tɛkɛtaka dikambo dia ‘etena ka nsungukala ka l’asa deke.’ Lo nshi ya Yeso, ase Juda wakayokoya yoho y’ase Ngirika ndo y’ase Rɔmɔ yendana la tena nɛi dia nsungukala dia l’otsho.
Evanjiliɔ tɛkɛtaka dia tena sɔ mbala efula. Ɛnyɛlɔ, lo ‘etena ka nɛi ka nsungukala ka l’otsho’ mbakatakɛndakɛndaka Yeso l’ashi otsha lo waato lɛnɛ aki ambeki ande. (Mat. 14:25) Lo wɛɛla ɔmɔtshi Yeso akate ate: “Naka kanga luudu mbeya wonya wayoya wovi, kete nde ayɔsɛnaka ndo hatetawɔ dia vɔ ntondola luudu lande.”—Mat. 24:43.
Yeso akatɛkɛtaka dia tena diakɔ nɛi etena kakandatɛ ambeki ande ate: “Nyosungukalake nɛ dia hanyeye etena kayoya owandji wa luudu, kana la dikɔlɔ kana l’atei wa deke kana la yosose kana la pindju ka pɛɛ.” (Makɔ 13:35; nɔtɛ) Etena ka ntondo lo tena dia nsungukala sɔ, mbuta ate “dikɔlɔ,” diakatatɛka oma lo ɛɔtwɛlɔ ka wonya polo oya lo eshedi divwa w’otsho. Etena ka hende, mbuta ate etena ka nsungukala ka “l’atei wa deke,” kakatatɛka oma lo eshidi divwa w’otsho polo l’atei wa deke. Etena ka sato, mbuta ate “la yosose” kana “etena keeka nkɔkɔ,” kakatatɛka oma l’atei wa deke polo oya lo eshidi esato wa pindju. Ondo lo etena kɛsɔ ka l’ɔkɔngɔ wa nkɔkɔ mbeka l’otsho mbakawande Yeso. (Makɔ 14:72) Etena ka nɛi, mbuta ate etena ka nsungukala ka la “pindju ka pɛɛ,” kakatatɛka oma lo eshidi esato wa pindju polo wonya potɔ.
Ɔnkɔnɛ, kaanga mbele aha woho wakawataka wenya lo nshi yakafundamaka Bible mbatama nshi nyɛ, vɔ waki la toho tɔmɔtshi takawataka wonya la yanyi kana l’otsho.