1, 2. L’ɔkɔngɔ wa Yeso mbidɛ l’olongo, kakɔna kakakoke apɔstɔlɔ ndjambola?

APƆSTƆLƆ waki Yeso wakemala lo dikona di’esongo w’Ɔlivɛ ndo wakendaka woho wakɔsama owandji ndo ɔngɛnyi awɔ Yeso otsha l’olongo ko dinge mbofɛ. (Ets. 1:9, 10) L’edja ka suke la ɛnɔnyi ehende, Yeso akawaetshaka, akaakeketshaka ndo akaalɔmbɔlaka. Koko l’etena kɛsɔ nde akatshu. Kakɔna kakawahombe nsala?

² La ntondo ka Yeso mbidɛ l’olongo, nde akatɛ ambeki ande ate: “Nyayoyala ɛmɛnyi ami la Jɛrusalɛma, lo Judeya y’otondo, la Samariya polo ndo l’ahole woleki etale wa lo nkɛtɛ.” (Ets. 1:8) Ngande wakawakoke nsala olimu ɔsɔ? Yeso akaalake dia nyuma k’ekila kaki Nzambi kakahombe mbakimanyiya. (Ets. 1:5) Ko akɔna akahombe mbalɔmbɔla ndo nkongɛ olimu w’esambishelo ka l’andja w’otondo? Apɔstɔlɔ wakeyaka dia Jehowa akakambe la apami dia nɔmbɔla ase Isariyɛlɛ lo nshi y’edjedja. Ɔnkɔnɛ, vɔ wakakoke ndjambola dia kana Jehowa akahombe nsɔna ɔnɔmbɔdi w’oyoyo etena kɛsɔ.

3. a) L’ɔkɔngɔ wa Yeso mbidɛ l’olongo, yɛdikɔ yakɔna y’ohomba yakɔsɛ apɔstɔlɔ wa kɔlamelo? b) Ambola akɔna wayangaso nkadimola lo sawo nɛ?

 ³ Yema tshitshɛ l’ɔkɔngɔ wa Yeso mbidɛ l’olongo, ambeki ande wakadiaka Afundelo, wakalɔmbaka dia Nzambi mbakimanyiya ndo wakasɔnɛ Matiyasɛ dia mpɛna Judasɛ Isakariyɔtɛ dia monga ɔpɔstɔlɔ wa 12. (Ets. 1:15-26) Lande na kele ɔsɔnwɛlɔ ɔsɔ waki ohomba le wɔ ndo le Jehowa? Ambeki wakashihodia dia vɔ wakahombe monga apɔstɔlɔ 12. * (Enda nɔtɛ ka l’ɛse ka dikatshi.) Yeso akasɔnɛ apɔstɔlɔ ndo akaalowanya dia vɔ monga la ɔkɛndɛ w’ohomba efula l’atei w’ekambi waki Nzambi. Naa ɔkɛndɛ akɔ ndo ngande wakaalɔngɔsɔla Jehowa nde la Yeso lo dikambo di’ɔkɛndɛ akɔ? Yɛdikɔ yakɔna yafɔna la shɔ yele ɛlɔ kɛnɛ? Ndo ngande wakokaso ‘mbohɔ wanɛ watɔlɔmbɔla,’ lo yoho ya laande “ɔhɔmbɔ wa kɔlamelo ndo kɛsɔ”?—Hɛb. 13:7; Mat. 24:45.

4. Ɔkɛndɛ akɔna waki la apɔstɔlɔ ndo dikumanyi dikina la Jɛrusalɛma?

⁴ Apɔstɔlɔ wakatatɛ nɔmbɔla etshumanelo k’Akristo lo Pɛntɛkɔsta ka l’ɔnɔnyi 33. Bible mbutaka dia “Petero akemala nde l’apɔstɔlɔ akina 11” ndo waketsha olui a woke w’anto akambo wa mɛtɛ washimbɛ nsɛnɔ. (Ets. 2:14, 15) Anto efula wa l’olui w’anto ɔsɔ wakakome Akristo. L’ɔkɔngɔ wa laasɔ, Akristo w’eyoyo asɔ “wakatetemalaka ndjasha tshɛ lo wetshelo w’apɔstɔlɔ.” (Ets. 2:42) Apɔstɔlɔ waki la ɔkɛndɛ wa nɔmbɔla okambelo wa la falanga ya l’etshumanelo. (Ets. 4:34, 35) Ndo nto, vɔ waketshaka ekambi waki Nzambi ndo wakalɔmbaka lo dikambo diawɔ, wata ɔnɛ: “Sho pombaka ndjasha tshɛ lo dɔmbɛlɔ ndo l’olimu w’ɔtɛkɛta.” (Ets. 6:4) Ndo vɔ wakatome Akristo wambohokɔ akambo dia tosambisha lo bɛtshi dia nkɛtɛ di’eyoyo. (Ets. 8:14, 15) L’ɔkɔngɔ diko, dikumanyi dikina di’akitami wakayokambaka kaamɛ l’apɔstɔlɔ dia nɔmbɔla etshumanelo. Oko olui-walɔmbɔla, vɔ wakashaka ɛlɔmbwɛlɔ lo tshumanelo tshɛ.—Ets. 15:2.

5, 6. a) Ngande wakasha nyuma k’ekila olui-walɔmbɔla wolo? (Enda osato wele lo mbɔtwɛlɔ.) b) Ngande wakakimanyiya andjelo olui-walɔmbɔla? c) Ngande wakalɔmbɔla Ɔtɛkɛta wa Nzambi olui-walɔmbɔla?

⁵ Akristo wa lo ntambe ka ntondo wakeyaka dia Jehowa mbakalɔmbɔlaka olui-walɔmbɔla lo tshimbo ya Yeso. Ngande wakawakoke nshikikɛ dui sɔ? Dui dia ntondo, nyuma k’ekila kakasha olui-walɔmbɔla wolo. (Jni. 16:13) Akristo tshɛ w’akitami wakalongola nyuma k’ekila, koko lo yoho ya laande, tɔ kakasha apɔstɔlɔ ndo dikumanyi dia la Jɛrusalɛma wolo dia nkotsha ɛkɛndɛ awɔ oko emendji. Ɛnyɛlɔ l’ɔnɔnyi 49, nyuma k’ekila kakalɔmbɔla olui-walɔmbɔla dia mbɔsa yɛdikɔ lo kɛnɛ kendana la wonyelo wa mpota. Tshumanelo diakayele yɛdikɔ shɔ. Etombelo waki la dui sɔ ele, vɔ “[w]akatatetemalaka nkeketala lo mbetawɔ ndo lofulo l’anto lakatadɛka lushi la lushi.” (Ets. 16:4, 5) Lo mukanda wakawafundɛ tshumanelo lo dikambo dia wonyelo wa mpota, sho koka mɛna dia olui-walɔmbɔla aki la nyuma kaki Nzambi ndo akakɛnɛmɔla waonga wele oko ngandji la mbetawɔ.—Ets. 15:11, 25-29; Ngal. 5:22, 23.

⁶ Dui dia hende, andjelo wakakimanyiya olui-walɔmbɔla. Ɛnyɛlɔ, ondjelo ɔmɔtshi akatɛ Kɔnɛliyo dia nde mɛnana la Petero. L’ɔkɔngɔ wa Petero nsambisha Kɔnɛliyo ndo ewotɔ ande, vɔ wakalongola nyuma k’ekila kaanga mbele apami asɔ kominyama mpota. Kɔnɛliyo mbaki ose Wodja la ntondo laki kominyama  mpota lakakome Okristo. Etena kakoke apɔstɔlɔ ndo anangɛso akina dui sɔ, vɔ waketawɔ lolango la Nzambi ndo wakalongola ase Wedja waki kominyama mpota lo etshumanelo k’Akristo. (Ets. 11:13-18) Oma lo dikambo sɔ, sho koka mɛna dia andjelo wakasukɛka la wolo tshɛ olimu w’esambishelo wakalɔmbɔlaka olui-walɔmbɔla. (Ets. 5:19, 20) Dui dia sato, Ɔtɛkɛta wa Nzambi wakalɔmbɔlaka olui-walɔmbɔla. Apami asɔ wakakambaka la Afundelo dia mbakimanyiya dia mbɔsa tɛdikɔ ta weke tendana la dietawɔ di’Okristo ndo dia nɔmbɔla tshumanelo.—Ets. 1:20-22; 15:15-20.

7. Lande na kakokaso mbuta dia Yeso akalɔmbɔlaka Akristo wa lo ntambe ka ntondo?

⁷ Kaanga mbele olui-walɔmbɔla aki la lowandji lo etshumanelo, anto wa l’olui ɔsɔ wakashihodia dia Yeso Kristo mbele Ɔnɔmbɔdi awɔ. Ngande weyaso dui sɔ? Ɔpɔstɔlɔ Pɔɔlɔ akate dia Kristo mbakasɔnɛ “amɔtshi dia ndjala oko apɔstɔlɔ.” Nde akate nto dia Kristo mbaki “ɔtɛ,” kana Ɔnɔmbɔdi w’etshumanelo. (Ɛf. 4:11, 15) Ndo lo dihole dia vɔ ndjaelɛ ɔnɛ apɔstɔlɔ, ‘ambeki wakelamɛ l’ɛlɔmbwɛlɔ ka Nzambi ɔnɛ Akristo.’ (Ets. 11:26) Pɔɔlɔ akeyaka dia aki ohomba ndjela wetshelo w’oma lo Bible w’apɔstɔlɔ ndo apami akina wakalɔmbɔlaka. Kaanga mbakidiɔ ngasɔ, Pɔɔlɔ akate ate: “Koko dimi nangaka dia nyu mbeya ɔnɛ: Owandji wa pami tshɛ ele Kristo.” Etelo kɛsɔ mendanaka ndo la ose olui-walɔmbɔla tshɛ. Oma laasɔ Pɔɔlɔ akakotsha ate: “Owandji wa Kristo ele Nzambi.” (1 Kɔr. 11:2, 3) Mbokɛmaka hwe dia Jehowa mbakasɔnɛ Ɔnande, Kristo Yeso dia nɔmbɔla etshumanelo.

8, 9. Ɔkɛndɛ akɔna w’ohomba waki la ɔnangɛso Russell?

⁸ Ntatɛ oma lo 1870, Charles Taze Russell nde la angɛnyi ande amɔtshi wakatatɛ nyanga dia ntɛmɔla Nzambi lo yoho yɔtɔnɛ la Bible ndo dia nkimanyiya anto akina dia nsala dui sɔ. Dui sɔ diakendanaka ndo la nkimanyiya anto wakatɛkɛtaka ɛtɛkɛta w’otshikitanyi. Ɔnkɔnɛ, tshunda dia Zion’s Watch Tower Tract Society diaketawɔma laka lɛɛta lo 1884, ndo ɔnangɛso Russell akakome ɔnɔmbɔdi. * (Enda nɔtɛ ka l’ɛse ka dikatshi.) Nde akeke Bible la yambalo y’efula ndo nde komonga la wɔma wa mbutɛ anto akina ɔnɛ wetshelo wa l’ɛtɛmwɛlɔ wele oko Losato l’osanto ndo anima wahavu bu lo Bible. Nde akeye dia okalwelo wa Kristo wakahombe monga lo yoho yahɛnama ndo ɔnɛ “etena kakashikikɛma k’ase wedja” kakahombe nkomɛ lo 1914. (Luka 21:24) Ɔnangɛso Russell akakambe la wenya ande, wolo ande ndo falanga yande dia mbetsha anto akina akambo wa mɛtɛ asɔ. Mbokɛmaka hwe dia Jehowa nde la Yeso wakakambe la ɔnangɛso Russell dia nɔmbɔla lo etena k’ohomba kɛsɔ.

⁹ Ɔnangɛso Russell konanga nkotola yambalo y’anto lo yoho ya laande oya le nde. Lo 1896, nde akafunde ɔnɛ nde l’apami akina waki l’ɛkɛndɛ konanga anto mbatombola. Vɔ konanga dia monga kaanga la titrɛ ɔtɔi ka laande ndo vɔ konanga dia kaanga olui ɔtɔi mbelamɛ lo nkombo yawɔ. L’ɔkɔngɔ diko nde akayota ɔnɛ: “Ɔnɛ bu olimu w’onto.”

10. a) Etena kakɔna kakasɔnɛ Yeso “ɔhɔmbɔ wa kɔlamelo ndo kɛsɔ”? b) Lembetshiya woho wakayokɛma hwe dia Olui-walɔmbɔla ntshikitana la tshunda dia Watch Tower Society.

¹⁰ Lo 1919, ɛnɔnyi esato l’ɔkɔngɔ w’ɔnangɛso Russell mvɔ, Yeso akasɔnɛ “ɔhɔmbɔ wa kɔlamelo ndo kɛsɔ.” La oyango akɔna? Dia mbishaka ambeki ande “mbo ya ndɛ . . . lo etena kahombama.” (Mat. 24:45) Kaanga lo ɛnɔnyi  wa l’etatelo ɛsɔ, djui ya tshitshɛ y’anangɛso w’akitami wa lo Mbalasa kalɔmbɔla olimu w’Ɛmɛnyi wa Jehowa wa l’andja w’otondo ka la Brooklyn, New York, wakashaka ambeki wa Yeso mbo ya ndɛ ya lo nyuma. Etelo k’ɔnɛ “olui-walɔmbɔla” kakatatɛ tondjama lo ekanda aso l’ɔkɔngɔ wa 1940. L’etena kɛsɔ, olui-walɔmbɔla wakakakatanyema efula la ɛnɔmbɔdi wa tshunda diaso dia Watch Tower Bible and Tract Society. Koko lo 1971, akayokɛmaka hwe dia Olui-walɔmbɔla ntshikitana la Watch Tower Society, laki la ɔkɛndɛ w’akambo wendana la lɛɛta ato. Oma l’etena kɛsɔ, anangɛso w’akitami wakakoke monga ase Olui-walɔmbɔla aha la monga ɛnɔmbɔdi wa Tshunda diaso. Atete edja, anangɛso wele l’ɛkɛndɛ wele “ɛkɔkɔ ekina” wakakambe oko ɛnɔmbɔdi wa Tshunda diaso ndo atshunda akina wakamba la ekambi waki Nzambi. Etombelo wele la dui sɔ ele, Olui-walɔmbɔla kokaka ndjasha tshɛ lo mbisha wetshelo ndo ɛlɔmbwɛlɔ k’oma lo Bible. (Jni. 10:16; Ets. 6:4) Tshoto y’Etangelo ya Ngɔndɔ k’esambele 15, 2013, yakalembetshiya dia “ɔhɔmbɔ wa kɔlamelo ndo kɛsɔ” ekɔ djui y’anangɛso w’akitami wakenga Olui-walɔmbɔla.

11. Ngande wɔsa Olui-walɔmbɔla tɛdikɔ?

¹¹ Olui-walɔmbɔla mbɔsaka tɛdikɔ ta weke etena kasangana anto wakenga olui akɔ lomingu tshɛ. Nsangana lo yoho shɔ mbakimanyiyaka dia vɔ nsawola dimɛna ndo monga kaamɛ. (Tok. 20:18) Ndooko ose Olui-walɔmbɔla loleki asekande akina ohomba, diakɔ diele ɔnɔnyi tshɛ vɔ tshikitanyaka ɔnangɛso lalɔmbɔla nsanganya shɔ. (1 Pet. 5:1) Ngasɔ mbediɔ ndo lo dikambo dia kɔmite tshɛ ka lo kɔmite yakɔ shamalo ya lo Olui-walɔmbɔla. Ndooko ose Olui-walɔmbɔla lafɔnya dia nde mbalɔmbɔla anango. Ɔmɔmɔ la l’atei awɔ ekɔ ndo ose luudu lalongola mbo ya ndɛ ya lo nyuma oma le ɔhɔmbɔ wa kɔlamelo ndo layela ɛlɔmbwɛlɔ kawɔ.

12. Ambola akɔna wayangaso nkadimola?

¹² Olui-walɔmbɔla hawosambiyama la nyuma ndo bu kokele. Vɔ kokaka nsala wandja etena kalembetshiyawɔ Bible kana kalɔmbɔlawɔ okongamelo. Ɛnyɛlɔ, Index des publications des Témoins de Jéhovah wekɔ ndo la ɔtɛ a dui wata ɔnɛ: “Elembetshielo w’eyoyo wendana la dietawɔ diaso,” wele la listɛ la etshikitanu wendana la eokelo kaso ka Bible ntatɛ lo 1870. Yeso kototɛ dia ɔhɔmbɔ ande wa kɔlamelo akahombe tondjaka mbo ya ndɛ ya lo nyuma ya kokele. Ko ngande wakokaso nkadimola lo dimbola diaki Yeso di’ɔnɛ: “Akɔna mɛtɛ ele ɔhɔmbɔ wa kɔlamelo ndo kɛsɔ?” (Mat. 24:45) Djembetelo yakɔna yɛnya dia Olui-walɔmbɔla mbele ɔhɔmbɔ wa kɔlamelo? Nyɛsɔ tɔsɛdingole akambo amɔtshi asato wakakimanyiya olui-walɔmbɔla lo nshi y’apɔstɔlɔ.

13. Ngande wambokimanyiya nyuma k’ekila Olui-walɔmbɔla?

¹³ Nyuma k’ekila kekɔ lo nkimanyiya Olui-walɔmbɔla. Nyuma k’ekila kakakimanyiya Olui-walɔmbɔla dia nshihodia akambo wa mɛtɛ wa lo Bible wakiwɔ koshihodiaka ntondo. Ɛnyɛlɔ, tokanyiya yema awui wele lo listɛ la elembetshielo w’eyoyo wendana la dietawɔ diaso lɔtɛkɛtshiso la diko. Ndooko onto lakakoke nshihodia ndo nembetshiya “akambo wa lotshimola waki Nzambi” asɔ la lomba lande hita! (Adia 1 Kɔrɛtɔ 2:10.) Olui-walɔmbɔla wakayaoke oko ɔpɔstɔlɔ Pɔɔlɔ lakafunde ate: “Akambo akɔ mbataso, aha la ɛtɛkɛta wetsha lomba l’anto, koko la ɛtɛkɛta wetsha nyuma.” (1 Kɔr. 2:13) L’ɔkɔngɔ wa ɛnɔnyi nkama wa wetshelo wa kashi ndo waki  komonga ɛlɔmbwɛlɔ kokɛma hwe, lande na kakafule eokelo k’akambo wa lo Bible ngasɔ ntatɛ lo 1919? Ndooko ɔkɔkɔ okina wakoka monga paka Nzambi mbakimanyiya la nyuma kande k’ekila!

14. Lo ndjela Ɛnyɛlɔ 14:6, 7, ngande wakimanyiya andjelo Olui-walɔmbɔla ndo ekambi waki Nzambi ɛlɔ kɛnɛ?

¹⁴ Andjelo wekɔ lo nkimanyiya Olui-walɔmbɔla. Olui-walɔmbɔla wekɔ la ɔkɛndɛ wa woke wa nɔmbɔla apandjudi ndekana miliyɔ enanɛi wa l’andja w’otondo dia nkamba olimu w’esambishelo. Lande na kele olimu ɔsɔ l’etombelo w’amɛna? Ɔkɔkɔ ɔmɔtshi ele osukɔ w’andjelo. (Adia Ɛnyɛlɔ 14:6, 7.) Lo waaso efula, andjelo nɔmbɔlaka apandjudi otsha le onto ɔmɔtshi laki oma la nɔmba Nzambi dia mbokimanyiya! * (Enda nɔtɛ ka l’ɛse ka dikatshi.) Olimu w’esambishelo ndo wa wetshelo wekɔ lo tatetemala mpama kaanga lo ahole wele ɔlɔshamelo w’efula. Ndo dui sɔ diekɔ lo salema paka l’ekimanyielo k’andjelo.

15. Ngande wotshikitanyi Olui-walɔmbɔla la ɛnɔmbɔdi wa lo Lokristokristo? Sha ɛnyɛlɔ.

¹⁵ Ɔtɛkɛta wa Nzambi wekɔ lo nɔmbɔla Olui-walɔmbɔla ɛlɔ kɛnɛ. (Adia Joani 17:17.) Tende kɛnɛ kakatombe lo 1973. Tshoto y’Etangelo ya Ngɔndɔ ka divwa 1 lo Falase yakambola dia kana “anto wahatshike nnɔ mfɔka kokaka batizama.” Okadimwelo wakashama lo dimbola sɔ wakahikama lo atɔndɔ wa lo Bible ndo okadimwelo akɔ waki  ɔnɛ ndooko! Tshoto y’Etangelo yakɔ yakashile avɛsa efula ndo yakalembetshiya lande na kele onto lahatshike nnɔ mfɔka pombaka mbitshanyema. (1 Kɔr. 5:7; 2 Kɔr. 7:1) Yɔ yakate dia tɔndɔ diahatshikitana sɔ kondja oma le anto koko diakaye “oma le Nzambi latɛkɛta lo tshimbo y’Ɔtɛkɛta ande wakafundama.” Ndooko tshunda dikina di’ɔtɛmwɛlɔ dietawɔ ndjaɛkɛ tshɛ lo tshɛ ngasɔ lo Ɔtɛkɛta wa Nzambi kaanga l’etena kele nsala dui sɔ kokaka monga okakatanu w’efula le anto amɔtshi wa lɔkɔ. Dibuku dimɔtshi dieke katomba diendana la ɔtɛmwɛlɔ lo États-Unis mbutaka ɔnɛ: “Mbala efula ɛnɔmbɔdi w’Akristo mvusolaka wetshelo awɔ dia mbɔtɔnganyiya la dietawɔ ndo tokanyi tasukamɛ oma le anto wa lɔkɔ ndo atshunda wa weke.” Koko Olui-walɔmbɔla halɔmbwama la kɛnɛ kalanga anto efula. Ase olui ɔsɔ wekɔ lo nɔmbwama la Ɔtɛkɛta wa Nzambi, ndo dui sɔ mɛnyaka dia Jehowa mɛtɛ mbalɔmbɔla ekambi ande ɛlɔ kɛnɛ.

16. Naa yoho mɔtshi ya mbohɔ Olui-walɔmbɔla?

¹⁶ Adia Hɛbɛru 13:7. Bible totɛka ɔnɛ: “Nyohɔ wanɛ wanyɔlɔmbɔla.” Yoho mɔtshi yakokaso nsala dui sɔ ele lo mbidjaka Olui-walɔmbɔla lo alɔmbɛlɔ aso. (Ɛf. 6:18) Vɔ wekɔ la ɛkɛndɛ efula, wele oko mbisha mbo ya ndɛ ya lo nyuma, nɔmbɔla olimu w’esambishelo wa l’andja w’otondo ndo menda okambelo wa la weshasha wakimɔma dikambo di’okongamelo. Ɔnkɔnɛ vɔ wekɔ mɛtɛ l’ohomba wa sho nɔmbaka lo dikambo diawɔ mbala la mbala!

17, 18. a) Ngande wayelaso ɛlɔmbwɛlɔ ka Olui-walɔmbɔla? b) Ngande wele esambishelo kaso sukɛka Olui-walɔmbɔla ndo Yeso?

¹⁷ Sho kokaka nto mbohɔ Olui-walɔmbɔla lo ndjela wetshelo ndo ɛlɔmbwɛlɔ kawɔ. Olui-walɔmbɔla toshaka ɛlɔmbwɛlɔ lo tshimbo ya ekanda aso, nsanganya ya l’etshumanelo ndo nsanganya ya weke. Vɔ sɔnaka nto emendji w’etshimbedi ndo emendji w’etshimbedi sɔnaka dikumanyi. Lo ndjela la yambalo tshɛ ɛlɔmbwɛlɔ kawashawɔ, emendji w’etshimbedi ndo dikumanyi mɛnyaka dia vɔ wekɔ lo mbohɔ Olui-walɔmbɔla. Ndo sho tshɛ mɛnyaka dilɛmiɛlɔ diaso le Yeso, Ɔnɔmbɔdi aso lo nkitanyiya apami wakamba la nde ɛlɔ kɛnɛ.—Hɛb. 13:17.

¹⁸ Yoho kina yakokaso mbohɔ Olui-walɔmbɔla ele lo nsala kɛnɛ tshɛ kakokaso nsala l’olimu w’esambishelo. Hɛbɛru 13:7 keketshaka Akristo dia mbokoya mbetawɔ ka wanɛ walɔmbɔla. Olui-walɔmbɔla mɛnyaka mbetawɔ kawɔ ka wolo lo nsambisha l’ohetoheto tshɛ ndo lo ntɔla lokumu l’ɔlɔlɔ otsha la ntondo. Onde tekɔ lo nsukɛ anangɛso asɔ l’olimu w’ohomba ɔsɔ? Naka eelo, kete tayonga l’ɔngɛnɔngɛnɔ etena kayotoka Yeso atotɛ ɔnɛ: “Lo yɛdikɔ yakanyasalɛ ɔtɔi ɔmɔtshi l’atei w’analengo woleki totshitshɛ akambo asɔ, dimi mbakanyasalɛ.”—Mat. 25:34-40.

19. Lande na kamboyoyashikikɛ dia ndjela Yeso, Ɔnɔmbɔdi aso?

¹⁹ Etena kakakalola Yeso otsha l’olongo, nde kokalɛ ambeki ande. (Mat. 28:20) Nde akeyaka dia nyuma k’ekila, andjelo, ndo Ɔtɛkɛta wa Nzambi wakookimanyiya dia nɔmbɔla etena kakinde la nkɛtɛ. Nde ekɔ lo mbisha ɔhɔmbɔ wa kɔlamelo ekimanyielo kakɔ kaamɛ ɛlɔ kɛnɛ. Olui-walɔmbɔla wekɔ lo ntetemala “ndjela Ɔna Ɔkɔkɔ,” Yeso, “l’ahole tshɛ watshɔnde.” (Ɛny. 14:4) Ɔnkɔnɛ, etena kayelaso ɛlɔmbwɛlɔ ka Olui-walɔmbɔla, sho ndjelaka Yeso, Ɔnɔmbɔdi aso. Keema edja, nde ayotɔlɔmbɔla otsha lo lɔsɛnɔ la pondjo. (Ɛny. 7:14-17) Ndo ndooko ɔnɔmbɔdi w’onto wakoka ndaka daka sɔ!