LO NGƆNDƆ ka sato 26, 1937, amɛngɔdi ahende w’apami wakatakɛndjakɛndjaka mutuka awɔ wa lɔtɛkɛ ɔkɔkɛ ɔkɔkɛ la Sydney, l’Australie. Ntatɛ lam’akawamɔ oma l’osomba ambeta ɔnɔnyi w’otondo, vɔ wakande lɔkɛndɔ la kilɔmɛtrɛ ndekana 19 300 lo bɛtshi dia nkɛtɛ dimɔtshi di’etale efula dia lo dihonda sɔ. Apami asɔ komonga amɛngɔdi ko amɛngɔdi kana anto watetsha wenya. Arthur Willis nde la Bill Newlands waki tsho ambatshi mboka ahende w’ohetoheto wakayashikikɛ dia tosambisha lokumu l’ɔlɔlɔ la Diolelo diaki Nzambi lo shamba ya woke y’ase Australie.

Polo ndo oya l’ekomelo k’ɛnɔnyi 1920, djui ya tshitshɛ y’Ambeki wa Bible * ya l’Australie wakaleke nsambisha l’esomba la tosombasomba ta l’omamu w’ashi. Shamba mɔtshi yele l’anto efula, ɛtshi ka nkɛtɛ ka waale efula kele la yɛdikɔ ya k’ahende ɔtɔi ka woke wa États-Unis, yekɔ etale efula l’etei ka dihonda sɔ. Koko, anangɛso wakeyaka dimɛna dia ambeki waki Yeso wakahombe nsambisha awui wendana la nde “polo ndo l’ahole woleki etale wa lo nkɛtɛ,” mbidja ndo shamba yanganyi etale y’ase Australie. (Ets. 1:8) Ko ngande wakawakoke nkotsha ɔkɛndɛ wa woke ɔsɔ? La mbetawɔ tshɛ ɔnɛ Jehowa ayɔtshɔkɔla welo awɔ, vɔ wakayashikikɛ dia nsala kɛnɛ tshɛ kakawakoke nsala.

Lo 1929, tshumanelo dia la Queensland ndo dia lo Owɛstɛ w’Australie wakasale mituka efula waki la mɔtɛrɛ w’amɛna dia mbetetaka lo bɛtshi dia nkɛtɛ dia l’etale sɔ. Ambatshi mboka waki la wolo mbakakɛndjakɛndjaka mituka akɔ ndo vɔ wakakokaka ntshɔ ɔkɔkɛ l’ahole w’afuku afuku ndo nɔngɔsɔla mituka naka wambolana. Ambatshi mboka asɔ wakatshu l’ahole efula waki watasambishamaka.

Ambatshi mboka waki kokoka nsomba mutuka wakatshu otsha lo shamba shɔ lo akalo. Ɛnyɛlɔ lo 1932, Bennett Brickell laki l’ɛnɔnyi 23 akonɛ oma la Rockhampton, Queensland, ko akatshu lɔkɛndɔ la Ngɔndɔ tshanu lo ɛtshi ka nkɛtɛ kanganyi etale ka lo nɔrdɛ dia tosambisha. Lo dikalo diande diaki la wotsho efula, nde akɛmbɛ elangitshi, ahɔndɔ, mbo ya ndɛ ndo ekanda k’ɔlɔlɔ k’abuku. Etena kakalana etshimbi wa dikalo diande, nde akatetemala la lɔkɛndɔ ele l’eshikikelo dia Jehowa ayowɔlɔmbɔla. Nde akapuse dikalo diande lopusa lo kilɔmɛtrɛ 320 yakatshikala lo ahole wele anto wakavu ntondo laawɔ la  mposa k’ashi. Lo ɛnɔnyi 30 wakayele, ɔnangɛso Brickell aketeta kilɔmɛtrɛ nunu nkama lo Australie wotondo lo dikalo, lo mututu ndo lo mutuka. Nde akatatshiya olimu w’esambishelo le ase ngelo ndo akasha lonya dia mbata tshumanelo di’eyoyo, ko nde akayeyamaka dimɛna ndo akalɛmiyamaka lo shamba yakɔ y’otondo.

Australie ekɔ l’atei wa ahonda wele bu l’anto efula l’andja w’otondo, djekoleko lo shamba yahadjashi anto dihole ɔtɔi shɔ. Ɔnkɔnɛ ekambi waki Jehowa wakayashikikɛ dia ntana anto wa lo bɛtshi dia nkɛtɛ di’etale dia lo dihonda sɔ.

Stuart Keltie nde la William Torrington waki ambatshi mboka wakakɛnɛmɔla eshikikelo ka ngasɔ. Lo 1933, vɔ wakatenyanya oswe wa shɛnga wa Simpson, shakasaka y’oswe wa shɛnga wakalole tɔɔ la ditshu dia tosambisha lo shombasomba ya Alice Springs, k’atei atei wa dihonda. Etena kakalana tshukatuka yawɔ ndo kakawahombe ndjitshika, ɔnangɛso Keltie laki la lokolo l’osongo akatetemala lɔkɛndɔ lande l’esambishelo, koko l’etena kɛsɔ nde akakambe la kamɛlɔ. Welo wakadje ambatshi mboka asɔ wakonge l’etombelo w’ɛlɔlɔ etena kakawahomana la kanga ɔtɛlɛ ɔmɔtshi la William Creek, dihole dimɔtshi dianganyi etale diatemalaka kawolo. Charles Bernhardt kanga ɔtɛlɛ akɔ akayetawɔka akambo wa mɛtɛ, akasondja ɔtɛlɛ ande ndo akakambe olimu w’ombatshi mboka ndamɛ l’edja k’ɛnɔnyi 15 lo ahole amɔtshi wa shɛnga ndo w’etale wa l’Australie.

Lo mɛtɛ, ambatshi mboka wa ntondo waki l’ohomba wa dihonga ndo etete dia ntondoya efula k’ekakatanu wakahomana la wɔ. Lo lɔkɛndɔ lawɔ l’esambishelo otsha lo shamba y’ase Australie, Arthur Willis nde la Bill Newlands, wakatatɛkɛtshi dikambo diawɔ lo mbɔtwɛlɔ, wakadiɛnɛ ntondo l’edja ka mingu hiende dia minda lɔkɛndɔ la kilɔmɛtrɛ 32, nɛ dia mvula ya weke yakalɔ yakakadimola oswe wa shɛnga ndjale kolodi la lɔtɛkɛ. Lo tena dimɔtshi, wakatombanɛka dungu ndo wakadiɛnɛka la yanyi ya wolo dia mpusa mutuka awɔ lo ditshu dia mamba, vɔ wakete lo akona waki l’ave ndo wakatehɔ nkushi yele la lɔsɛnga efula. Etena kakalanaka mutuka awɔ, dui diakasalemaka tena efula, vɔ wakakɛndakɛndaka l’ekolo kana lo dikalo l’edja ka nshi efula dia tokoma lo ngelo kakaleke suke, ko oma laasɔ vɔ tokonga l’edja ka mingu dia mbolo yahombawɔ mengola nkoma. Kaanga mbakawahomana l’ekakatanu ɛsɔ, vɔ kɔkɔmɔ. Arthur Willis, akayota ɛtɛkɛta watanema lo periodikɛ kakawelɛka L’Âge d’Or ate: “Ndooko mboka kele afuku efula kana otale efula le ɛmɛnyi Ande.”

Charles Harris ombatshi mboka w’edjedja akate dia woho wele shamba shɔ mangana etale ndo ekakatanu wa lɛkɔ, wakokimanyiya mɛtɛ dia nde ndeka ndjasukanya la Jehowa. Nde akakotsha ate: “Ndeka dimɛna nsɛna lɔsɛnɔ aha la monga la diangatangata. Naka Yeso aketawɔ ndala l’andja etena kaki dui sɔ ohomba, kete sho lawɔ pombaka ngɛnangɛna dia nsala woho akɔ waamɛ naka ɔkɛndɛ aso tɔlɔmbaka dia nsala dui sɔ.” Kɛsɔ mbakasale ambatshi mboka efula. Diɛsɛ la welo wakawadje aha la mpekɔ, lokumu l’ɔlɔlɔ lakakome lo atshuku tshɛ wa lo dihonda sɔ ndo wakakimanyiya anto efula dia mbeta lo wedi wa Diolelo dia Nzambi.