1, 2. a) Kakɔna kakatosholɛ Jehowa? b) Daka diakɔna diatanaso lo Isaya 46:10, 11 ndo 55:11?

ƐTƐKƐTA wa ntondotondo wa lo Bible wekɔ la etelo ka wɔdu koko k’ohomba efula kɛnɛ: “Lo etatelo, Nzambi akatonge olongo la nkɛtɛ.” (Eta. 1:1) Tambɛna paka diangɔ yema tshitshɛ tsho lo diangɔ efula diakatonge Nzambi l’andja ndo sho shihodiaka awui yema tshitshɛ tsho wendana la diangɔ sɔ, ɛnyɛlɔ loowa, osase ndo wolo w’okotwelo. (Ond. 3:11) Koko Jehowa akatosholɛ sangwelo diande diendana la nkɛtɛ ndo l’anto. Nde akatonge anto lo efanelo kande ndo nde akalange dia vɔ ngɛnangɛna la lɔsɛnɔ la nkɛtɛ. (Eta. 1:26) Vɔ wakahombe monga anande ndo nde akahombe monga Shɛwɔ.

² Ntatɛ oma lo tshapita ya sato ya dibuku di’Etatelo, sho mɛnaka dia sangwelo dia Jehowa diakalɔshama. (Eta. 3:1-7) Koko ndooko okakatanu wahakoke Jehowa nkandola. Ndooko onto lakoka mboshimba dia nkotsha sangwelo diande. (Isa. 46:10, 11; 55:11) Sho koka monga l’eshikikelo dia sangwelo dia Jehowa di’oma l’etatelo diayokotshama paka l’etena kahombama!

3. a) Wetshelo akɔna w’ohomba watokimanyiya dia nshihodia losango l’ohomba la lo Bible? b) Lande na kayangaso nsɛdingola wetshelo ɛsɔ? c) Ambola akɔna wayangaso nsɛdingola?

 ³ Aha la taamu, sho mbeyaka sangwelo diaki Nzambi lo dikambo dia nkɛtɛ ndo di’anto, mbidja ndo ɔkɛndɛ wele la Yeso lo sangwelo sɔ. Ɔsɔ ekɔ akambo wa mɛtɛ wa lo Bible w’ohomba efula ndo ondo vɔ wekɔ akambo wa mɛtɛ wa ntondo wakateke etena kakatatatɛ mbeka Ɔtɛkɛta wa Nzambi. Kakianɛ, sho tolanga nkimanyiya anto akina dia mbeka wetshelo w’ohomba efula ɛsɔ. Tekɔ la diaaso dia laande dia nsala dui sɔ lo etena kɛmɔtshi ka l’ɔnɔnyi, etena kelɛso anto dia ndjɔtɔ lo Eohwelo ka nyɔi ka Kristo. (Luka 22:19, 20) Naka vɔ ndja lo dikambo di’ohomba sɔ, kete vɔ wayoyeka akambo efula wendana la sangwelo diaki Nzambi dia dimɛna efula. Ɔnkɔnɛ, ɔnɛ ekɔ etena ka dimɛna ka nkana yimba lo ambola w’ohomba wakokaso nkamba la wɔ dia nkeketsha anto dia vɔ ndjɔtɔ. Lo sawo nɛ, tayanga nsɛdingola ambola asato anɛ: Naa sangwelo diaki Nzambi lo dikambo dia nkɛtɛ ndo di’anto? Kakɔna kakatombe? Ndo lande na kele oshinga w’etshungwelo waki Yeso wekɔ nsapi kadihola lokuke dia sangwelo diaki Nzambi kotshama?

4. Ngande wele etongelo kekɔ “lo nsanya lotombo la Nzambi”?

⁴ Jehowa ekɔ Otungi wa diambo efula. Ɛngɔ tshɛ kakandatonge kekɔ dimɛna efula. (Eta. 1:31; Jɛr. 10:12) Wetshelo akɔna wakokaso nkondja oma lo olangala ndo woho wɔlɔngami diangɔ dimɛna lo etongelo? Wetshelo wakondjaso ele diangɔ tshɛ diakatonge Jehowa, ntatɛ oma lo kɛnɛ koleki tshitshɛ polo lo kɛnɛ koleki woke kekɔ ohomba. Laadiko dia laasɔ, etena kakanayɛ yimba dikambo dia tshɔngu ya diambo ya lo demba di’onto kana kɛnayɛ ɔna ashashi, kana kendayɛ woho wonga wonya dimɛna lo ɛɔtwɛlɔ kawɔ, ngande watoyokaka? Sho ngɛnangɛnaka diangɔ sɔ nɛ dia Jehowa akatotonge la dikoka dia mbeya kɛnɛ kele mɛtɛ olangala.—Adia Osambo 19:1; 104:24.

5. Kakɔna kakasale Jehowa dia etongelo kande tshɛ nkamba dimɛna kaamɛ?

⁵ La yambalo tshɛ, Jehowa akadjɛ etongami kande tshɛ elelo. Nde akadje ɛlɛmbɛ wendana l’etongelo ndo nde akadje ɛlɛmbɛ wendana la lɔkɛwɔ. Nde akadje ɛlɛmbɛ ɛsɔ l’oyango wa diangɔ tshɛ diele l’andja nkamba dimɛna kaamɛ. (Os. 19:7-9) Ɛngɔ tshɛ ka l’andja kekɔ la dihole diatɔ ndo l’olimu atɔ. Ɛnyɛlɔ, wolo w’okotwelo salaka dia tshitshi la dungu monga suke la nkɛtɛ, vɔ nɔmbɔlaka ndjale ya weke, ololelo ndo okitekitelo w’ashi. Otondonga wolo w’okotwelo bu, tshike lɔsɛnɔ bu la nkɛtɛ. Elelo wakadje Jehowa lo etongelo kimanyiyaka diaha ofukutanu monga l’andja. Dui sɔ mɛnyaka dia nde ekɔ la sangwelo dimɔtshi lo dikambo dia nkɛtɛ ndo di’anto. Etena keso lo esambishelo, sho kokaka nkimanyiya anto akina dia mbeya Otungi w’andja wa diambo ɔnɛ.—Ɛny. 4:11.

6, 7. Naa weshasha ɛmɔtshi wakasha Jehowa Adama l’Eva?

⁶ Sangwelo diaki Jehowa aki dia anto nsɛna pondjo pondjo la nkɛtɛ. (Eta. 1:28; Os. 37:29) Nde ekɔ kanga lokaho ndo nde akasha Adama l’Eva weshasha efula w’amɛna. (Adia Jakɔba 1:17.) Jehowa akawasha lotshungɔ la nsɔna ndo dikoka dia nkanyiya, dia mbokana ngandji ndo dia monga la lɔngɛnyi. Otungi akasawola la Adama ndo akawetsha woho wa nsala kɛnɛ kele ɔlɔlɔ. Adama akeke nto woho wa ndjakokɛ, nkokɛ nyama ndo nkɛtɛ. (Eta. 2:15-17, 19, 20) Jehowa akasha Adama l’Eva dikoka dia ndɛta, minanda,  mɛna, mboka, ndo nɔna opumu wa diangɔ di’amɛna diakandaasalɛ. Lo yoho shɔ, vɔ wakakoke ngɛnangɛna la lɔsɛnɔ lo dihole diawɔ dia dimɛna. Adama l’Eva waki la elimu efula w’amɛna wa nkamba. Ndo vɔ wakakoke tekaka ndo tasholaka awui w’eyoyo pondjo pondjo.

⁷ Kakɔna kaki nto lo sangwelo diaki Nzambi? Jehowa akasha Adama l’Eva dikoka dia mbota ana wa kokele. Ndo anawɔ wakakoke vɔ lawɔ mbota ana polo ndo anto ndola lo nkɛtɛ k’otondo. Jehowa akalange dia ambutshi nanga anawɔ paka oko wakandalangaka Adama l’Eva, anande wa ntondo wa kokele. Nde akasha nkumbo k’anto nkɛtɛ ndo diangɔ tshɛ dia nɛmɔ ndo di’amɛna dia lɔkɔ. Ɔsɔ mbakahombe monga ngelo kawɔ ndo totowahɔtɔlatɔ pondjo.—Os. 115:16.

8. Lande na kakadjɛ Nzambi Adama l’Eva ɔlɛmbɛ watanaso lo Etatelo 2:16, 17?

⁸ Awui kosalema mbala kakɔ ɔtɔi oko wakalange Jehowa. Kakɔna kakatombe? Jehowa akadjɛ Adama l’Eva ɔlɛmbɛ ɔmɔtshi wa wɔdu dia vɔ mbeya elelo waki la lotshungɔ lawɔ la nsɔna. Nde akate ate: “Wɛ mbeyaka ndɛ elowa w’oma l’esongo tshɛ wele lo ekambɔ woho walangayɛ. Koko tɔlɛke elowa w’oma l’osongo w’ewo ka kɛnɛ kele ɔlɔlɔ la kɛnɛ kele kɔlɔ, nɛ dia lushi layoyɔlɛ, wɛ ayovɔ ndooko onyake.” (Eta. 2:16, 17) Ɔlɛmbɛ ɔsɔ komonga wolo nshihodia le wɔ. Ndo totondonga dui dia wolo le wɔ dia nkitanyiya, lam’ele vɔ waki la mbo ya ndɛ y’amɛna nkina efula l’ekambɔ.

9, 10. a) Akambo akɔna wakamamatanyɛ Satana Jehowa? b) Yɛdikɔ yakɔna yakɔshi Adama l’Eva? (Enda osato wele lo mbɔtwɛlɔ.)

⁹ Satana Diabolo akakambe la oloyi dia nkonya Eva dia mpindolɛ Jehowa, She. (Adia Etatelo 3:1-5; Ɛny. 12:9) Satana akadje taamu lo woho wele ana waki Nzambi w’anto komonga la lotshungɔ la ndɛ “elowa w’oma l’esongo tshɛ wele lo ekambɔ.” Aki oko nde akataka ɔnɛ: ‘Wɛ ekɔ lo nanga mbuta dia wɛ hakoke nsala kɛnɛ kalangayɛ?’ Oma laasɔ, nde akatɛ Eva ate: “Hanyotovɔ mɛ.” Ɔsɔ aki kashi. Oma laasɔ, nde akasale la wolo dia mbetawoya Eva ɔnɛ komonga ohomba nde mpokamɛ Nzambi. Satana akate ate: “Nzambi mbeyaka ɔnɛ lushi layonyɔlɛ elowa w’oma lɔkɔ, washo anyu wayodihɔ.” Satana akataka dia Jehowa konanga dia vɔ ndɛ olowa ɔsɔ nɛ dia dui sɔ diotowasha yema y’ewo ka laande. L’ekomelo, nde akawalake daka dia kashi lo mbuta ɔnɛ: “Nyayoyala oko Nzambi, ndo nyayeya kɛnɛ kele ɔlɔlɔ la kɛnɛ kele kɔlɔ.”

¹⁰ Adama l’Eva wakahombe mbɔsa yɛdikɔ ya kɛnɛ kakawahombe nsala. Onde wakahombe nkitanyiya Nzambi, kana wakahombe nkitanyiya oloyi? Lonyangu ko, vɔ wakɔshi yɛdikɔ ya mpindolɛ Nzambi. Vɔ wakatone Jehowa ɔnɛ laki Shɛwɔ ko wakete lo wedi wa Satana. L’etena kɛsɔ vɔ wakasɛnaka vɔamɛ, aha la ekokelo ka Jehowa.—Eta. 3:6-13.

11. Lande na kele Jehowa kokoka minya yimba lo pɛkato k’Adama l’Eva?

¹¹ Etena kakasekola Adama l’Eva ɔlɛmbɛ waki Nzambi, vɔ komonga nto kokele. Ndo nto, vɔ wakayala atunyi waki Nzambi, nɛ dia nde petshaka kɔlɔ. “Washo [ande] wekɔ pudipudi k’efula kahakoke menda kɛnɛ kele kɔlɔ.” (Hab. 1:13) Otondonga Jehowa kosala ndooko dui lo kɛnɛ kendana la pɛkato k’Adama l’Eva, tshike ditongami diande tshɛ totowonga la lɔsɛnɔ la dimɛna. Andjelo ndo anto wotoyambola dia kana vɔ kokaka ndjaɛkɛ lo ɔtɛkɛta ande. Koko Jehowa ekɔ la kɔlamelo lo atɔndɔ ande hita; nde hawasekola pondjo. (Os. 119:142) Kaanga mbele Adama  l’Eva waki la lotshungɔ la nsɔna, vɔ kokoka mbewɔ etombelo wa kɔlɔ w’oma lo woho wakawatɔmbɔkwɛ Jehowa. L’ekomelo, vɔ wakayovɔ ndo wakakalola lo ditshu oma lɛnɛ akawatongama.—Eta. 3:19.

12. Kakɔna kakakomɛ ana wa Adama?

¹² Etena kakale Adama l’Eva olowa, Jehowa kokoka mbaetawɔ nto oko anto wa lo nkumbo kande. Nde akawatshanya oma lo ekambɔ k’Ɛdɛna ndo vɔ kokoka pondjo nkalola lɛkɔ. (Eta. 3:23, 24) Jehowa akaatshike dia vɔ diɛnɛ la etombelo wa kɔlɔ w’oma lo tɛdikɔ tawɔ. (Adia Eohwelo k’Ɛlɛmbɛ 32:4, 5.) Etombelo waki la dui sɔ ele, vɔ kokoka nto mbokoya waonga waki Jehowa lo yoho ya kokele. Adama akayashishɛ ndo akashishɛ anande nshi yayaye y’amɛna efula. Nde akakoke sambiya anande paka eongelo ka keema kokele, pɛkato ndo nyɔi. (Rɔmɔ 5:12) Adama akaashishɛ diaaso dia nsɛna pondjo pondjo. Adama l’Eva kokoka mbota ɔna la kokele, ndo anawɔ kokoka mbota ana wa kokele. Ntatɛ lam’akakonya Satana Adama l’Eva dia tɔmbɔkwɛ Nzambi, Diabolo ekɔ lo mpemba dia nsɛngiya anto tshɛ dia nsala woho akɔ waamɛ.—Jni. 8:44.

13. Kakɔna kalanga Jehowa lo dikambo di’anto?

¹³ Jehowa ekɔ lo ntetemala mboka anto ngandji. Kaanga mbele Adama l’Eva wakawoke ɔkɔngɔ, nde ekɔ lo ntetemala mbetawɔ di’anto monga la diɔtɔnganelo dia dimɛna la nde. Ndo nde konanga dia kaanga ɔtɔi a l’atei awɔ mvɔ. (2 Pet. 3:9) Diakɔ diele, aha la ntshimbatshimba, Nzambi akɔshi tɛdikɔ dia anto monga la lɔngɛnyi la nde nto. Ngande wakandakoke nsala dui sɔ aha la nsekola atɔndɔ ande hita? Nyɛsɔ tende.

14. a) Lo ndjela Joani 3:16, kakɔna kakasale Nzambi dia ntshungola anto oma lo pɛkato la nyɔi? b) Dimbola diakɔna diakokaso nkɛtshanya l’anto?

¹⁴ Adia Joani 3:16. Anto efula welɛso oya lo Eohwelo mbeyaka divɛsa sɔ l’ɔtɛ. Ko ngande wakimanyiya olambo wa Yeso di’anto nkondja lɔsɛnɔ la pondjo? Tekɔ la diaaso dia nkimanyiya anto akina dia nkondja okadimwelo lo dimbola sɔ etena kawaelɛso lo Eohwelo, etena keso la wɔ lo Eohwelo ndo etena kawaembolaso l’ɔkɔngɔ wa Eohwelo. Etena katawaleke nshihodia awui wendana la oshinga w’etshungwelo mbayowoleka nshihodia ngandji k’efula koka Jehowa anto ndo woho wende la lomba. Awui akɔna wendana la oshinga w’etshungwelo wakokaso mbaetsha?

15. Ngande wakatshikitana Yeso la Adama?

¹⁵ Jehowa akakimɔ onto la kokele lakakoke nkimɔ lɔsɛnɔ lande oko oshinga w’etshungwelo. Onto la kokele ɔsɔ akahombe monga la kɔlamelo le Jehowa. Nde akahombe monga suke dia nkimɔ lɔsɛnɔ lande dikambo di’anto. (Rɔmɔ 5:17-19) Jehowa akasangola lɔsɛnɔ laki Yeso, etongami kande ka ntondo oma l’olongo oya la nkɛtɛ. (Jni. 1:14) Diakɔ diele Yeso akayonga onto la kokele paka oko waki Adama. Koko otshikitanyi la Adama, Yeso akasale kɛnɛ kakalongamɛka Jehowa oma le onto la kokele. Oyadi la ntondo k’ehemba wakaleke wolo, ndooko lushi lakandasekola kaanga ɔlɛmbɛ ɔtɔi wa Nzambi.

16. Lande na kele oshinga w’etshungwelo woshasha wa nɛmɔ?

¹⁶ Lo mvɔ oko onto la kokele, Yeso akakoke nshimbɛ anto oma lo pɛkato la nyɔi. Nde akɛdima tshɛ lo tshɛ la kɛnɛ tshɛ kakahombe Adama monga. Yeso aki onto la kokele, laki la kɔlamelo ndo la okitanyiya wa tshɛ lo tshɛ le Nzambi. (1 Tim. 2:6) Nde akavu dikambo diaso ndo olambo ande wakasha apami  tshɛ, wamato tshɛ ndo ana tshɛ diaaso dia nsɛna pondjo pondjo. (Mat. 20:28) Oshinga w’etshungwelo wekɔ nsapi kadihola lokuke dia sangwelo diaki Nzambi kotshama.—2 Kɔr. 1:19, 20.

17. Kakɔna kayosalema diɛsɛ la oshinga w’etshungwelo?

¹⁷ Jehowa akakimɔ oshinga w’etshungwelo kaanga mbakidiɔ dui dia wolo le nde. (1 Pet. 1:19) Nde tɔsaka la nɛmɔ di’efula diakɔ diakandetawɔ dia Ɔnande la nɛmɔ mvɔ dikambo diaso. (1 Jni. 4:9, 10) Lo yoho mɔtshi, Yeso akayala shɛso lo dihole dia Adama. (1 Kɔr. 15:45) Yeso akatosha diaaso, aha tsho dia nkondja lɔsɛnɔ la pondjo, koko ndo dia nkalola lo nkumbo kaki Nzambi lushi lɔmɔtshi. Diɛsɛ la oshinga w’etshungwelo, anto wayoyala kokele ndo Jehowa koka mbaetawɔ dia nkalola lo nkumbo kande aha la nde nsekola ɛlɛmbɛ ande hita. Ohokanyiya woho wayondonga dui dia diambo etena kayonga anto tshɛ wele la kɔlamelo le Jehowa kokele! L’ekomelo, anto tshɛ wa l’olongo ndo wa la nkɛtɛ wayonga kaamɛ oko nkumbo ɔtɔi. Sho tshɛ tayonga ana waki Nzambi.—Rɔmɔ 8:21.

18. Etena kakɔna kayonga Jehowa “laadiko dia tshɛ”?

¹⁸ Kaanga mbele ambutshi aso wa ntondo wakoke Jehowa ɔkɔngɔ, nde kotshika mboka anto ngandji ndo nde akakimɔ oshinga w’etshungwelo. Ndo kaanga mbeso keema kokele, Satana hakoke toshimba dia monga la kɔlamelo le Jehowa. Diɛsɛ la oshinga w’etshungwelo, Jehowa ayotokimanyiya dia monga la losembwe tshɛ lo tshɛ. Ohokanyiya woho wayonga lɔsɛnɔ etena kayokondja onto tshɛ “leya Ɔna ndo longa la mbetawɔ le nde” lɔsɛnɔ la pondjo! (Jni. 6:40) Shɛso ka ngandji ndo ka lomba ayokotsha sangwelo diande ndo ayokimanyiya anto dia monga kokele. Oma laasɔ, Jehowa ayonga “laadiko dia tshɛ.”—1 Kɔr. 15:28.

19. a) Lowando lele la so lo oshinga w’etshungwelo pombaka totshutshuya dia nsala na? (Enda kiombo yele l’ɔtɛ a dui ɔnɛ: “ Totetemale nyanga wanɛ wakoka.”) b) Kakɔna kayotɔsɛdingola lo sawo diayela?

¹⁹ Lowando lele la so lo oshinga w’etshungwelo pombaka totshutshuya dia mbutɛ anto akina akambo wendana la woshasha wa nɛmɔ efula ɔsɔ. Anto pombaka mbeya dia lo tshimbo y’oshinga w’etshungwelo, la ngandji tshɛ Jehowa akasha anto tshɛ diaaso dia nsɛna pondjo pondjo. Koko kɛnɛ kasala oshinga w’etshungwelo hakomɛ tsho laasɔ. Vɔ kandolaka dikambo diakonyiya Satana lo ekambɔ k’Ɛdɛna. Tayɔsɛdingola woho wasalawɔ dui sɔ lo sawo diayela.