ANTO nangaka monga l’ɔngɛnɔngɛnɔ. Koko lam’ele tekɔ lo nsɛna lo nshi y’ekomelo, onto tshɛ ekɔ l’ekakatanu wa “wolo mbikikɛ.” (2 Tim. 3:1) Anto amɔtshi shishaka ɔngɛnɔngɛnɔ awɔ, nɛ dia wekɔ lo mbasalɛ akambo aha la losembwe, wekɔ lo ntata hemɔ, wekɔ lo nshisha elimu kana anto amɔtshi wokawɔ ngandji wekɔ lo mvɔ. Akina shishaka ɔngɛnɔngɛnɔ naka dui dimɔtshi diambotomba diawakonya dia ndjakiyanya kana monga la lonyangu. Kaanga atɛmɔdi wa Jehowa koka nkɔmɔ ndo ndjoshisha ɔngɛnɔngɛnɔ. Naka dui sɔ diambokokomɛ, ngande wakokayɛ nyomonga l’ɔngɛnɔngɛnɔ?

Dia nkadimola dimbola sɔ, sho pombaka ntondo mbeya elɛwɔ ɔngɛnɔngɛnɔ wa mɛtɛ ndo ngande wakatetemala anto amɔtshi monga l’ɔngɛnɔngɛnɔ kaanga etena kakiwɔ l’ekakatanu. Oma laasɔ, tayɛna woho wakokaso ntetemala monga l’ɔngɛnɔngɛnɔ ndo ndeka monga la wɔ.

Monga l’ɔngɛnɔngɛnɔ halembetshiya di’onto ekɔ l’ɔngɛnɔngɛnɔ wa mɛtɛ. Tɔshi ɛnyɛlɔ kɛnɛ: Onto lambodjɔ wanu koka ngɛnangɛna efula. Koko etena koondɔ wanu, nde hangɛnangɛna nto ndo koka nshihodia dia nde ekɔ paka l’ekakatanu efula. Ɔngɛnɔngɛnɔ ande waki paka wa lo tshanda mɔtshi ndo nde hongi l’ɔngɛnɔngɛnɔ wa mɛtɛ.​—Tok. 14:13.

Lo wedi okina, ɔngɛnɔngɛnɔ ekɔ nsaki k’efula konga la so l’otema etena kakondjaso kana kalongamɛso ɛngɔ kɛmɔtshi ka dimɛna. Monga l’ɔngɛnɔngɛnɔ kɛdikɛdi monga l’ɔlɔ, oyadi tekɔ l’ekakatanu kana bu. (1 Tɛs. 1:6) Lo mɛtɛ, sho koka nyanga l’ɔtɛ wa dikambo dimɔtshi, koko tekɔ l’ɔngɛnɔngɛnɔ. Ɛnyɛlɔ, apɔstɔlɔ wakakɔmama l’ɔtɛ wakawasambishaka awui wendana la Yeso. Koko, vɔ “wakatombe oma lo tominadi ta laadiko t’ase Juda, watangɛnangɛna, nɛ dia vɔ wakɔsama oko anto wasungana mbishama nsɔnyi l’ɔtɛ wa lokombo lande.” (Ets. 5:41) Vɔ kɔngɛnangɛna l’ɔtɛ wakawakɔmama, koko l’ɔtɛ wakawatshikala la kɔlamelo le Nzambi.

Ɔngɛnɔngɛnɔ bu dionga diotɔso la diɔ kana dionga diaya oyaya. Lande na? Nɛ dia ɔngɛnɔngɛnɔ wa mɛtɛ wekɔ dionga dimɔtshi dia lo olowa wa nyuma k’ekila ka Nzambi. Nyuma ka Nzambi mbatokimanyiya dia monga la “lonto l’oyoyo,” mbidja ndo ɔngɛnɔngɛnɔ. (Ɛf. 4:24; Ngal. 5:22) Ndo naka tekɔ l’ɔngɛnɔngɛnɔ, kete hatotonga l’okakatanu dia nkandola ekakatanu aso.

Jehowa akalange mɛna akambo w’amɛna wasalema la nkɛtɛ, koko aha akambo wa kɔlɔ wɛnaso ɛlɔ kɛnɛ. Koko kaanga mbasala anto akambo wa kɔlɔ, Jehowa hashisha ɔngɛnɔngɛnɔ. Bible mbutaka ɔnɛ: “Wolo ndo ɔngɛnɔngɛnɔ wekɔ lo dihole diadjasɛnde.” (1 Ɛk. 16:27) Laadiko dia laasɔ, akambo w’amɛna wasala ekambi wa Jehowa mbɔngɛnyangɛnyaka.​—Tok. 27:11.

Sho mbokoyaka kana salaka la wolo dia monga oko Jehowa naka hatoshisha ɔngɛnɔngɛnɔ etena kahasalema akambo woho wakatalongamɛka. Lo dihole dia ndjakiyanya,  toleke mbidja yimba l’akambo w’amɛna wele laso l’etena kɛnɛ ndo tokonge la solo dia lotutsha tshɛ akambo woleki amɛna lo nshi yayaye. *

Bible kekɔ la bɛnyɛlɔ efula di’anto wakatetemala monga l’ɔngɛnɔngɛnɔ kaanga mbakiwɔ l’ekakatanu efula. Abrahama akatetemala monga l’ɔngɛnɔngɛnɔ kaanga etena kaki lɔsɛnɔ lande lo waale ndo etena kakokonya anto akina dia monga l’ekakatanu. (Eta. 12:10-20; 14:8-16; 16:4, 5; 20:1-18; 21:8, 9) Ngande wakandasale dui sɔ? Lo nkanyiya elongamelo kaki la nde ka nsɛna l’andja w’oyoyo l’ɛlɔmbwɛlɔ ka Mɛsiya. (Eta. 22:15-18; Hɛb. 11:10) Yeso akate ate: “Shɛnyu Abrahama akangɛnangɛna efula lam’akandalongamɛka dia mɛna lushi lami.” (Jni. 8:56) Sho koka mbokoya Abrahama naka sho ntetemala nkanyiya ɔngɛnɔngɛnɔ wayoyala la so lo nshi yayaye.​—Rɔmɔ 8:21.

L’ɛnyɛlɔ k’Abrahama, Pɔɔlɔ nde la Silasɛ vɔ la wɔ waki la mbetawɔ ka wolo ndo wakatetemala monga l’ɔngɛnɔngɛnɔ kaanga etena kakiwɔ l’ekakatanu efula. Ɛnyɛlɔ, l’ɔkɔngɔ wa vɔ kɔmama efula ndo mbidjama lo lokanu, vɔ “wakalɔmbaka ndo wakatombolaka Nzambi l’esambo.” (Ets. 16:23-25) Vɔ wakakikɛ asui awɔ nɛ dia vɔ wakatetemala nkanyiya alaka wa Nzambi wa lo nshi yayaye. Ndo mbeya dia vɔ wakasoyamaka l’ɔtɛ wakiwɔ ambeki wa Kristo akawasha ɔngɛnɔngɛnɔ. Sho koka mbokoya Pɔɔlɔ nde la Silasɛ naka sho mbohɔ etombelo w’amɛna waya lo kambɛ Nzambi la kɔlamelo.​—Flpɛ. 1:12-14.

Ɛlɔ kɛnɛ, tekɔ nto la bɛnyɛlɔ efula di’anangɛso l’akadiyɛso wakatetemala monga l’ɔngɛnɔngɛnɔ kaanga mbakiwɔ l’ekakatanu. Ɛnyɛlɔ, lo Ngɔndɔ ka dikumi l’ɔtɔi 2013, lɔpɛpɛ la wolo lelɛwɔ Supertyphon Haiyan lakalanya mvudu ndekana 1 000 ya nkumbo y’Ɛmɛnyi wa Jehowa wa la Philippines. George, lele luudu lande la l’osomba wa Tacloban lakalana vwa akate ate: “Oyadi kɛnɛ tshɛ kakasalema, anangɛso wekɔ l’ɔngɛnɔngɛnɔ. Haleye ndo woho wakokami nembetshiya ɔngɛnɔngɛnɔ wele la so.” Naka sho nkanyiya kɛnɛ kakasale Jehowa lo dikambo diaso ndo monga la lowando le nde, kete tayotetemala monga l’ɔngɛnɔngɛnɔ kaanga etena keso l’ekakatanu wa wolo. Naa ɛkɔkɔ ekina wele la so wa monga l’ɔngɛnɔngɛnɔ?

Diɔtɔnganelo diasaso la Jehowa mbele ɔkɔkɔ woleki woke weso l’ɔngɛnɔngɛnɔ. Tekɔ lo mbeya Omboledi w’andja w’otondo. Nde kele Shɛso, Nzambi kaso ndo Ɔngɛnyi aso!​—Os. 71:17, 18.

Tekɔ nto l’ɔngɛnɔngɛnɔ nɛ dia Jehowa akatosha lɔsɛnɔ ndo akoka wa ngɛnangɛna la lɔ. (Ond. 3:12, 13) Lam’ele nde akatokutola oya le nde, tookoka nshihodia lolango lande lo dikambo diaso ndo tekɔ lo mbeya woho wa ndowanya nsɛnɔ yaso. (Kɔl. 1:9, 10) Koko, anto efula haweye oyango wa lɔsɛnɔ. Dia ntɔtɔmiya otshikitanu ɔsɔ, Pɔɔlɔ akafunde ate: “‘Sso kɔmɛna ndo toyi komboka ndo akambo wakalɔngɔsɔlɛ Nzambi wanɛ wawoka ngandji kombidjama l’otema w’onto.’ Nɛ dia Nzambi sho mbakandasholɛ akambo akɔ l’ekimanyielo ka nyuma kande.” (1 Kɔr. 2:9, 10) Mbeya lolango la Jehowa ndo nsangwelo diande toshaka ɔngɛnɔngɛnɔ.

Jehowa akasale akambo efula lo dikambo diaso. Nde akasale dia pɛkato yaso dimanyiyama. (1 Jni. 2:12) Nde toshaka elongamelo ka sɛnaka pondjo pondjo l’andja w’oyoyo waanga ndja kem’edja. (Rɔmɔ 12:12) Kaanga l’etena kɛnɛ, Jehowa ekɔ lo tosha angɛnyi efula watɛmɔla kaamɛ la so. (Os. 133:1) Nde ekɔ lo tokokɛ oma le Satana la ɛdiɛngɛ. (Os. 91:11) Naka sho ntetemala nkanyiya awui w’amɛna asɔ watosalɛ Jehowa, kete tayoleka monga l’ɔngɛnɔngɛnɔ.—Flpɛ. 4:4.

Onde Okristo wokongaka l’ɔngɛnɔngɛnɔ koka ndeka monga l’ɔngɛnɔngɛnɔ? Yeso akate ate: “Dimi lakanyotɛ akambo asɔ dia nyu  monga l’ɔngɛnɔngɛnɔ ami ndo dia ɔngɛnɔngɛnɔ anyu monga lo yɛdikɔ y’efula.” (Jni. 15:11) Dui sɔ mɛnyaka dia tena tshɛ sho kokaka monga l’ɔngɛnɔngɛnɔ efula. Sho koka mbɛdika ɔngɛnɔngɛnɔ la dja. Naka sho nangaka dia dja ndeka nombalomba, kete sho pombaka nyomodja nkunyi. Tohɔ dia: Nyuma k’ekila mbatokimanyiya dia monga l’ɔngɛnɔngɛnɔ. Diakɔ diele, naka sho nangaka ndeka monga l’ɔngɛnɔngɛnɔ, kete sho pombaka ntetemala nɔmba dia nkondja nyuma ka Nzambi. Sho pombaka nto ntetemala nkana yimba la awui wa lo Bible, tɔ kakafundama l’ɛlɔmbwɛlɔ ka nyuma k’ekila.​—Os. 1:1, 2; Luka 11:13.

Dikambo dikina diakoka tosha ɔngɛnɔngɛnɔ w’efula ele, monga l’akambo efula wa nsala wangɛnyangɛnya Jehowa. (Os. 35:27; 112:1) Lande na? Nɛ dia takatongama dia salaka lolango la Nzambi. Bible mbutaka dia sho takatongama dia “[mb]oka Nzambi ka mɛtɛ wɔma ndo kitanyiyaka ɛlɛmbɛ ande, nɛ dia ɔsɔ kele ɔkɛndɛ woleki ohomba lo lɔsɛnɔ l’onto.” (Ond. 12:13) Diakɔ diele, naka tekɔ lo kambɛ Jehowa, kete tayonga l’ɔngɛnɔngɛnɔ w’efula lo lɔsɛnɔ laso. *

Naka sho monga l’ɔngɛnɔngɛnɔ efula, kete tayokondja wahɔ ekina efula. Ɛnyɛlɔ, Jehowa ayoleka tɔngɛnangɛna naka sho ntetemala mbokambɛ l’ɔngɛnɔngɛnɔ kaanga etena keso l’ekakatanu. (Eoh. 16:15; 1 Tɛs. 5:16-18) Ndo nto, lam’ele tekɔ l’ɔngɛnɔngɛnɔ wa mɛtɛ, hatɔfɔnya dia monga la lomombo la l’emunyi efula mbele dui dioleki ohomba lo lɔsɛnɔ. Koko, tayosala la wolo dia ndjahondja akambo efula l’ɔtɛ wa Diolelo dia Nzambi. (Mat. 13:44) Ndo etena kɛnaso etombelo w’amɛna waya oma l’akambo wayahondjaso, tayoleka monga l’ɔngɛnɔngɛnɔ, tayonga dimɛna ndo tayokimanyiya anto akina dia ndeka monga l’ɔngɛnɔngɛnɔ.​—Ets. 20:35; Flpɛ. 1:3-5.

Ndo nto, lo yɛdikɔ yayotoleka monga l’ɔngɛnɔngɛnɔ ondo mbayotoleka monga la yoonge ya dimɛna. Bible mbutaka ɔnɛ: “Otema wele l’ɔngɛnɔngɛnɔ ekɔ okanga wa dimɛna.” (Tok. 17:22) Onyangiyangi ɔmɔtshi wakeke awui wendana la yoonge lo inivɛrsite wa Nebraska l’États-Unis akate awui wɔtɔnɛ la kɛnɛ kata Bible. Nde mbutaka ate: “Naka wɛ ekɔ l’ɔngɛnɔngɛnɔ ndo l’ɔlɔ lo lɔsɛnɔ l’etena kɛnɛ, kete ondo wɛ ayonga la yoonge ya dimɛna lo nshi yayaye.”

Ɔnkɔnɛ, kaanga mbasɛnaso lo tena dia paa, sho kokaka monga l’ɔngɛnɔngɛnɔ wa mɛtɛ etena kakondjaso nyuma k’ekila lo nɔmbaka, mbekaka ndo kanaka yimba la Ɔtɛkɛta wa Nzambi. Tayoleka monga l’ɔngɛnɔngɛnɔ nto, naka sho kanyiya akambo w’amɛna watosalɛ Jehowa nshi nyɛ, naka sho mbokoya mbetawɔ k’anto akina ndo naka sho mbidja welo dia nsala lolango la Nzambi. Oma laasɔ, sho koka mɛna mɛtɛ k’ɛtɛkɛta wele lo Osambo 64:10, wata ɔnɛ: “Onto ɔlɔlɔ ayɔngɛnangɛna le Jehowa ndo ayoyashɛ le nde.”