1, 2. a) Ngande wayaoka anangɛso l’akadiyɛso efula lo dikambo dia monga la lonyuma la dimɛna? b) Ambola akɔna w’ohomba wayotɔsɛdingola lo sawo nɛ?

KADIYƐSO kɛmɔtshi kele la Canada mbutaka dia monga onto lele la lonyuma la dimɛna kana lambotshunda lo nyuma mboshaka ɔngɛnɔngɛnɔ efula ndo mbokimanyiyaka dia ntondoya ekakatanu wa lo lɔsɛnɔ lande. Ɔnangɛso ɔmɔtshi lele la Brésil lambotshukana l’edja k’ɛnɔnyi 23 mbutaka dia ntshunda lo nyuma ambookimanyiya nde la wadɛnde dia monga l’ɔngɛnɔngɛnɔ lo diwala. Ɔnangɛso ɔmɔtshi lele la Philippines mbutaka dia ntshunda lo nyuma mboshaka ki ka lo yimba ndo mbokimanyiyaka dia monga kaamɛ l’anangɛso l’akadiyɛso w’oma l’ahole wotshikitanyi.

² Mbokɛmaka hwe dia ntshunda lo nyuma tokimanyiyaka dia nkondja wahɔ efula. Akokaso nsala dia ndeka ntshunda lo nyuma ndo nkondja wahɔ ɛsɔ? Ntondotondo, sho pombaka nshihodia kɛnɛ kata Bible lo dikambo di’anto wele la lonyuma la dimɛna, wanɛ walɔmbwama la nyuma ka Nzambi ndo wakanyiya oko Jehowa. Lo sawo nɛ tayokadimola ambola asato w’ohomba anɛ: 1) Monga onto lele la lonyuma la dimɛna kana lambotshunda lo  nyuma kɛdikɛdi na? 2) Bɛnyɛlɔ diakɔna diayotokimanyiya dia mpama lo nyuma? 3) Ngande wele mbidja welo dia monga “la yimba ya Kristo” ayotokimanyiya dia monga anto wele la lonyuma la dimɛna?

3. Ngande walembetshiya Bible otshikitanu wele lam’asa onto la lo demba la onto lele la lonyuma la dimɛna?

³ Ɔpɔstɔlɔ Pɔɔlɔ tokimanyiyaka dia mbeya otshikitanu wele lam’asa “onto lele la lonyuma” la “onto la lo demba.” (Adia 1 Kɔrɛtɔ 2:14-16.) Onto la lo demba “hetawɔ akambo wa nyuma kaki Nzambi, nɛ dia vɔ wekɔ enginya le nde; ndo nde hakoke mbaeya.” Koko, onto lele la lonyuma la dimɛna “sɛdingolaka akambo tshɛ ndo nde ekɔ la yimba ya Kristo,” nde salaka la wolo dia nkanyiya woho wakanyiya Kristo. Pɔɔlɔ tokeketshaka dia monga anto wele la lonyuma la dimɛna. Lo toho tokina takɔna totshikitanyi anto wa lo demba l’anto wele la lonyuma la dimɛna?

4, 5. Ngande wakokaso mbeya onto la lo demba?

⁴ Ngande wakanyiya onto la lo demba? Onto la lo demba mbetawɔka dionga dia l’andja ɔnɛ di’anto waleka ndjasha lo nsaki ya lokaki. Pɔɔlɔ akalembetshiya dionga sɔ oko “yimba yakamba olimu ɛlɔ kɛnɛ le ana wele bu l’okitanyiya.” (Ɛf. 2:2) Dionga sɔ tshutshuyaka anto efula dia mbokoya anto wowadingi. Vɔ salaka paka kɛnɛ kɛnawɔ ɔlɔlɔ le wɔ, hawodje yimba lo atɔndɔ wa Nzambi. Onto la lo demba kana onto lasala akambo wa lo demba, ndekaka nkanyiya paka akambo wa lo demba ndo mbala efula nde mbɔsaka dia dihole diele la nde, falanga kana lotshungɔ lande ndeka akambo akina ohomba.

⁵ Mbala efula onto la lo demba salaka kɛnɛ kelɛ Bible ɔnɛ “etsha wa demba.” (Ngal. 5:19-21) Lo mukanda wa ntondo wakafundɛ Pɔɔlɔ Akristo wa la Kɔrɛtɔ, nde akashile akambo akina wasala anto wa lo demba. Etena katomba ekakatanu, vɔ mbetaka wedi ɔmɔtshi, mbidjaka diatɔnelo, keketshaka anto akina dia ntɔmbɔkɔ, fundanaka laka lɛɛta, hawɔlɛmiya ɛnɔmbɔdi ndo mbɔsaka mbo ya ndɛ la dinɔnɔ oko diangɔ dioleki ohomba lo lɔsɛnɔ lawɔ. Onto la lo demba hashike ntanga etena kahembamande dia nsala dui dia kɔlɔ. (Tok. 7:21, 22) Judɛ akate di’anto wa lo demba koka kaanga nshisha nyuma ka Jehowa.​—Judɛ 18, 19.

6. Ngande wakokaso mbeya onto lele la lonyuma la dimɛna?

⁶ Otshikitanyi l’onto la lo demba, onto lele la lonyuma la dimɛna kanyiyaka efula lo dikambo dia diɔtɔnganelo diande la Nzambi. Nde mbetawɔka nɔmbwama la nyuma k’ekila ka Nzambi ndo nde salaka la wolo dia mbokoya Jehowa. (Ɛf. 5:1) Nde salaka la wolo dia mbeka woho wakanyiya Jehowa ndo mɛna akambo oko wawaɛna Jehowa. Nzambi ekɔ onto la mɛtɛ le nde. Otshikitanyi l’onto la lo demba, onto lele la lonyuma la dimɛna nɛmiyaka atɔndɔ wa Jehowa l’akambo tshɛ wa lo lɔsɛnɔ lande. (Os. 119:33; 143:10) Nde hasale “etsha wa demba” koko nde salaka la wolo dia nkɛnɛmɔla “olowa wa nyuma.” (Ngal. 5:22, 23) Dia ndeka mbeya kɛnɛ kalembetshiya monga onto lambotshunda lo nyuma, tende wɛdikelo ɔnɛ: Onto lasala okanda dimɛna mbelamɛka omundji w’okanda wa dimɛna, ndo onto layakiyanya lo dikambo dia diɔtɔnganelo diande la Nzambi mbelamɛka onto lambotshunda lo nyuma.

7. Kakɔna kata Bible lo dikambo di’anto wambotshunda lo nyuma?

⁷ Yeso akate di’anto wambotshunda lo nyuma wekɔ l’ɔngɛnɔngɛnɔ. Sho mbadiaka lo  Mateo 5:3 ɔnɛ: “Ɔngɛnɔngɛnɔ le wanɛ weya ehomba awɔ wa lo nyuma, nɛ dia Diolelo dia l’olongo diekɔ diawɔ.” Rɔmɔ 8:6 mɛnyaka dia lɔsɛnɔ laso nemanɛka la nkanyiya woho wakanyiya Jehowa lo mbuta ɔnɛ: “Nkanyiya akambo wa lo demba nembetshiyaka nyɔi, koko nkanyiya akambo wa lo nyuma nembetshiyaka lɔsɛnɔ ndo wɔladi.” Diakɔ diele, naka sho ntshunda lo nyuma, kete sho koka monga la wɔladi la Nzambi, wɔladi shoamɛ ndo sho koka monga l’elongamelo ka lɔsɛnɔ la pondjo.

8. Lande na kele ekɔ okakatanu dia monga ndo ntetemala monga onto lele la lonyuma la dimɛna?

⁸ Koko, tekɔ lo nsɛna l’andja wa waale efula. Lam’ele sho dingama l’anto wahakanyiya woho wakanyiya Nzambi, nɔmbamaka mbidja welo dia nkokɛ timba taso. Naka hatolodisha timba taso la tokanyi ta Nzambi, kete andja ɔnɛ wayolodia timba taso la waonga ndo tokanyi ta lo demba. Akokaso nsala dia mbewɔ dui sɔ? Ngande wakokaso mpama lo nyuma?

9. a) Kakɔna kakoka tokimanyiya dia ntshunda lo nyuma? b) Bɛnyɛlɔ diakɔna di’amɛna diayangaso nsɛdingola?

⁹ Paka oko wonga ɔna l’ohomba wa mbeka akambo oma le ambutshi ande ndo mbokoya ɛnyɛlɔ kawɔ ka dimɛna, mbahombaso mbeka oma le wanɛ waki la diɔtɔnangelo dia ma ma la Jehowa ndo mbaokoya. Dui sɔ diayotetsha woho wa ntshunda lo nyuma. Koko bɛnyɛlɔ di’anto wasala akambo wa lo demba diekɔ ɔhɛmwɛlɔ le so. (1 Kɔr. 3:1-4) Bible kekɔ la bɛnyɛlɔ di’amɛna ndo dia kɔlɔ. Tayanga nsɛdingola wetshelo wakokaso nkondja oma lo bɛnyɛlɔ di’amɛna dia Jakɔbɔ, Mariya ndo Yeso.

10. Ngande wakɛnya Jakɔbɔ dia nde aki la lonyuma la dimɛna?

¹⁰ L’ɛnyɛlɔ k’anto efula wa l’atei aso, Jakɔbɔ komonga la lɔsɛnɔ la wɔdu. Esao w’ɔnango akalangaka mbodiaka. Okilo ande wa pami akalange mbokesa mbala efula. Koko mbetawɔ  ka Jakɔbɔ lo daka diakalake Jehowa Abrahama kaki wolo. Jakɔbɔ akeyaka dia nkumbo kande kakahombe monga etenyi kɛmɔtshi ka l’okotshamelo wa daka dia diambo sɔ, diakɔ diele nde akakikokɛka dimɛna. (Eta. 28:10-15) Jakɔbɔ kombetawɔ dia tokanyi ta lo demba t’anto wakoodinge mbokonya dia mbohɛ alaka wa Jehowa. Ɛnyɛlɔ, Jakɔbɔ akasɛngasɛnga Jehowa dia mboshimbɛ etena kakandoke dia ɔnango ambowaanɛ. Nde akɔlɔmbɛ ate: “Wɛ akate wate: ‘Layokosalɛ ɔlɔlɔ ndo layetɛ tokanula tayɛ efula oko nsɛkɛ ya lɔkɔngɔ la lo ndjale yaheyama mbadia.’” (Eta. 32:6-12) Jakɔbɔ aki la mbetawɔ ka wolo lo alaka wa Jehowa ndo nde akakiɛnya lo etsha ande.

11. Ngande weyaso dia Mariya aki onto lambotshunda lo nyuma?

¹¹ Kakianɛ tɔsɛdingole ɛnyɛlɔ ka Mariya. Jehowa akɔsɔnɛ dia monga nyango Yeso nɛ dia nde aki onto lambotshunda lo nyuma. Tadia kɛnɛ kakandate etena kakandatshu dia tenda Zɛkariya la Elizabɛtɛ ewotɔ ande. (Adia Luka 1:46-55.) Tayɛna dia Mariya akalangaka Ɔtɛkɛta wa Nzambi ndo akeyaka Afundelo wa lo Hɛbɛru dimɛna. (Eta. 30:13; 1 Sa. 2:1-10; Mal. 3:12) Ndo l’ɔkɔngɔ wa Mariya nde la Yɔsɛfu tshukana, vɔ wakakonge polo etena kakotɔ Yeso dia vɔ ndjeyana. Ɔkɛndɛ wakawasha Nzambi waki ohomba efula le wɔ ndeka nsaki yawɔ. (Mat. 1:25) Ndo nto, la yambalo tshɛ Mariya akendaka dikambo tshɛ diakasalema etena kakayolaka Yeso ndo nde akahokamɛka akambo wakandetshaka. Nde “akalamaka akambo asɔ tshɛ dimɛna l’otema.” (Luka 2:51) Mbokɛmaka hwe dia nde akayashaka efula l’alaka wa Nzambi wendana la Mɛsiya. Shi sho kokaka mbokoya Mariya ndo salaka la wolo lushi tshɛ dia nsala kɛnɛ kalanga Nzambi?

12. a) Ngande wakokoya Yeso She? b) Ngande wakokaso mbokoya Yeso? (Enda osato wele lo mbɔtwɛlɔ.)

¹² Lo anto tshɛ wambɔsɛna l’andja ɔnɛ, Yeso ekɔ ɛnyɛlɔ koleki dimɛna k’onto lambotshunda lo nyuma. Etena kakinde la lɔsɛnɔ ndo kakandasambishaka lanɛ la nkɛtɛ, nde akɛnya dia nde akalangaka mbokoya She. Yeso akakanyiyaka, akayaokaka ndo akasalaka akambo oko Jehowa. Nde akasalaka lolango la Nzambi ndo akalɛmiyaka atɔndɔ ande. (Jni. 8:29; 14:9; 15:10) Ɛnyɛlɔ, tɛdike woho wakalembetshiya Isaya kɛtshi ka Jehowa la woho wakalembetshiya Makɔ woho wakayaokaka Yeso. (Adia Isaya 63:9; Makɔ 6:34.) Onde sho mbokoyaka Yeso lo mongaka suke lushi tshɛ dia mboka wanɛ wele l’ohomba w’ekimanyielo kɛtshi? L’ɛnyɛlɔ ka Yeso, onde sho ndekaka ndjasha lo nsambisha ndo mbetsha lokumu l’ɔlɔlɔ? (Luka 4:43) Anto wambotshunda lo nyuma mbokanaka kɛtshi ndo salaka la wolo dia nkimanyiya anto akina.

13, 14. a) Wetshelo akɔna wakokaso nkondja oma le anto wambotshunda lo nyuma ɛlɔ kɛnɛ? b) Sha ɛnyɛlɔ.

¹³ Ɛlɔ kɛnɛ, tekɔ l’anangɛso ndo akadiyɛso efula wambotshunda lo nyuma wasala la wolo dia mbokoya Kristo. Wɛ koka mɛna dia vɔ wekɔ l’ohetoheto l’olimu w’esambishelo, nongɔnaka ndo mbokanaka kɛtshi. Kaanga mbewɔ keema kokele, vɔ salaka la wolo dia nkɛnɛmɔla waonga w’amɛna ndo dia nsala kɛnɛ kalanga Jehowa dia vɔ nsala. Rachel, kadiyɛso ka la Brésil, mbutaka ate: “Lakalangaka toho t’ɔlɔtɔ ta l’andja ɔnɛ. Etombelo waki la dui sɔ ele, dimi kɔndɔtaka la wɛdimo. Koko mbeka akambo wa mɛtɛ akatshutshuya dia mbidja welo wahombama dia monga onto lele la lonyuma la dimɛna. Nsala etshikitanu komonga dui dia wɔdu, koko lakaleke monga l’ɔngɛnɔngɛnɔ ndo lakonge la lɔsɛnɔ lele l’oyango.”

¹⁴ Reylene, kadiyɛso ka la Philippines, aki l’okakatanu wotshikitanyi. Kaanga mbakandeyaka akambo wa mɛtɛ, nde akaleke  ndjasha lo wɔtwɛlɔ wa kalasa ya laadiko ndo dia nkondja olimu wa dimɛna. L’etena kɛsɔ, eyango ande wa lo nyuma kondeka monga ohomba le nde. Nde mbutaka ate: “Lakatatɛ nshihodia dia lakahombaka ɛngɔ kɛmɔtshi lo lɔsɛnɔ lami, ɛngɔ koleki olimu ami ohomba efula.” Reylene akatshikitanya ekanelo kande ndo akɔshi olimu wa Jehowa oko dui dioleki ohomba lo lɔsɛnɔ lande. Ɛlɔ kɛnɛ nde ekɔ lo ndjaɛkɛ lo daka dia Jehowa diele lo Mateo 6:33, 34 ndo ekɔ lo mbuta ate: “Dimi mbeyaka l’eshikikelo tshɛ dia Jehowa ayokotshɛ ehomba ami!” Ondo wɛ mbeyaka anangɛso l’akadiyɛso amɔtshi wa l’etshumanelo kanyu wele la dionga diakɔ diaamɛ. Etena kɛnaso woho wokoyawɔ Kristo, sho nangaka ndjela ɛnyɛlɔ kawɔ ka kɔlamelo.​—1 Kɔr. 11:1; 2 Tɛs. 3:7.

15, 16. a) Ahombaso nsala dia monga oko Kristo? b) Akokaso nsala dia “yimba ya Kristo” monga la shɛngiya le so?

¹⁵ Ngande wakokaso mbokoya Kristo? Kɔrɛtɔ ka ntondo 2:16 mɛnyaka dia sho pombaka monga “la yimba ya Kristo.” Rɔmɔ 15:5 toholaka dia “monga la woho wa yimba yaki la Kristo Yeso.” Dia monga oko Kristo, sho pombaka mbeka woho wakanyiyande, wayaokande ndo wasalande akambo. Yeso akalekaka ndjakiyanya lo dikambo dia diɔtɔnganelo diande la Nzambi oleki ɛngɔ kekina tshɛ. Ɔnkɔnɛ, monga oko Yeso ayoleka tokonya dia monga oko Jehowa. Diakɔ diele ekɔ ohomba efula sho mbeka dia nkanyiya oko wakasalaka Yeso.

¹⁶ Ngande wakokaso mbeka dia nkanyiya oko Yeso? Ambeki ande wakawendaka etena kakandasalaka ahindo, wakohokamɛka etena kakandetshaka elui wa weke w’anto, wakɛnaka woho wakandasalɛka weho w’anto tshɛ akambo ndo wakɛnaka woho wakandalɔmbwamaka la tokanyi ta Jehowa. Vɔ wakate vate: “Sho tekɔ ɛmɛnyi w’akambo tshɛ wakandasale.” (Ets. 10:39) Ɛlɔ kɛnɛ, hatokoke mɛna Yeso. Koko tekɔ la ɛkɔndɔ wa l’Evanjiliɔ watokimanyiya dia mbeeya dimɛna efula. Etena kadiaso ndo kakanaso yimba la dibuku dia Mateo, Makɔ, Luka, ndo Joani,, sho mbekaka akambo efula wendana la woho wakanyiya Yeso. Dui sɔ tokimanyiyaka dia “mboyela dimɛna dimɛna lo wanya ande” dia sho monga “la woho w’ekanelo kaki la nde.”​—1 Pe. 2:21; 4:1.

17. Ngande wele nkanyiya oko Kristo ayotokimanyiya?

¹⁷ Wahɔ akɔna wayotokondja naka sho nkanyiya oko Kristo? Oko wele ndɛ mbo ya ndɛ y’amɛna tokimanyiyaka dia monga la demba dia wolo, mbele ndodia timba taso la tokanyi ta Kristo tokimanyiyaka dia monga la lonyuma la wolo. Yema yema, tayeya kɛnɛ kahombaso nsala lo dikambo tshɛ. Oma laasɔ, tayonga l’akoka wa mbɔsa tɛdikɔ tangɛnyangɛnya Nzambi ndo tayonga la nkum’otema ka pudipudi. Shi ɔsɔ ekɔ ɛkɔkɔ w’amɛna wa “n[dɔta] Nkumadiɔndjɔ Yeso Kristo”?​—Rɔmɔ 13:14.

18. Wetshelo akɔna wamboyokondja lo kɛnɛ kendana la monga onto lambotshunda lo nyuma?

¹⁸ Sawo nɛ diambotokimanyiya dia nshihodia kɛnɛ kalembetshiya monga onto lambotshunda lo nyuma. Tambokondja wetshelo oma lo bɛnyɛlɔ di’anto waki la lonyuma la dimɛna. Tambeka nto dia monga “la yimba ya Kristo” tokimanyiyaka dia nkanyiya oko Jehowa ndo monga la diɔtɔnganelo dia ma ma la nde. Koko ekɔ akambo efula wakokaso mbeka. Ɛnyɛlɔ: Ngande wakokaso mbeya dia kana tekɔ la lonyuma la wolo? Akokaso nsala dia monga la lonyuma la wolo? Ndo ngande wele monga la lonyuma la dimɛna ekɔ la shɛngiya lo lɔsɛnɔ laso? Tayokondja ekadimwelo wa ambola asɔ lo sawo diayela.