1-3. a) Kakɔna kayotokimanyiya dia ntetemala monga la mbetawɔ le Nzambi lo nshi y’ekomelo nyɛ? b) Kakɔna kayoteka lo sawo nɛ?

ƐLƆ kɛnɛ tekɔ lo nsɛna suke l’ekomelo ka nshi y’ekomelo. Tekɔ lo mɛna anto wa kɔlɔ wekɔ lo taleke fulanɛ. Vɔ “[tombaka] oko adiyo.” (Os. 92:7) Diakɔ diele, hatokoke mamba woho watona anto efula kɛnɛ kata Nzambi dia kekɔ ɔlɔlɔ. Pɔɔlɔ akatɛ Akristo ate: “Nyonge ana wa akɛnda lo kɛnɛ kendana la kɔlɔ,” koko “nyonge etshundju w’anto lo eokelo kanyu.” (1 Kɔr. 14:20) Ngande wakokaso nsala dui sɔ?

² Sho tanaka okadimwelo lo divɛsa diɔsami ɔtɛ aso wa sawo diata ɔnɛ: “Wanɛ wayanga Jehowa koka nshihodia akambo tshɛ.” (Tok. 28:5) Dui sɔ nembetshiyaka dia vɔ koka nshihodia dui tshɛ diele ohomba dia ngɛnyangɛnya Jehowa. Tokedi 2:7, 9 tetshaka nto dia Jehowa mbishaka wanɛ wasala kɛnɛ kele ɔlɔlɔ lomba. Etombelo wele la dui sɔ ele, vɔ kokaka “[nshihodia] kɛnɛ kele ɔlɔlɔ, losembwe ndo osembɔki, mboka k’otondo ka kɛnɛ kele ɔlɔlɔ.”

³ Nɔa, Danyɛlɛ ndo Jɔbɔ waki la lomba l’oma le Nzambi lɔsɔ. (Ɛzk. 14:14) Ndo ekambi wa Nzambi wekɔ lalɔ ɛlɔ kɛnɛ. Ko wɛ?  Onde wɛ ekɔ la lomba l’oma le Nzambi? Dia “nshihodia akambo tshɛ” wele la yɛ ohomba dia ngɛnyangɛnya Jehowa, wɛ pombaka mbeeya dimɛna. Diakɔ diele, lo sawo nɛ tayeka 1) woho wakeye Nɔa, Danyɛlɛ ndo Jɔbɔ Nzambi, 2) woho wele mbeya Nzambi akaakimanyiya ndo 3) woho wakokaso monga la mbetawɔ kele oko kawɔ.

4. Ngande wakeye Nɔa Jehowa, ndo ngande wele mbeya Nzambi dimɛna akookimanyiya?

⁴ Ngande wakeye Nɔa Jehowa? Oma l’etena kakatatɛ Adama l’Eva mbota ana, anto wakekaka awui wendana la Jehowa lo toho tosato tɔnɛ: Lo tshimbo y’etongelo, oma le ekambi ekina wa Nzambi wa kɔlamelo ndo lo mɛna wahɔ waya lo mbokitanyiya. (Isa. 48:18) Lo mbidja yimba l’etongelo, Nɔa akakoke mɛna tolembetelo tɛnya dia Nzambi ekɔ ndo akakoke nto mbeka waonga waki Nzambi. Etombelo waki la dui sɔ ele, Nɔa akashihodia dia Jehowa ekɔ la wolo w’efula ndo ɔnɛ nde kele Nzambi ɔtɔi ka mɛtɛ. (Rɔmɔ 1:20) Diakɔ diele, Nɔa komonga tsho la mbetawɔ le Nzambi, koko nde akonge ndo la mbetawɔ ka wolo le nde.

5. Ngande wakeye Nɔa kɛnɛ kakalange Nzambi lo dikambo di’anto?

⁵ Bible mbutaka ɔnɛ “mbetawɔ ndjaaka oma lo kɛnɛ koka onto,” mbuta ate kɛnɛ kokaso oma le anto akina koka tokimanyiya dia monga la mbetawɔ. (Rɔmɔ 10:17) Ondo Nɔa akoke akambo wendana la Jehowa oma le ewotɔ ande. Lamɛka, she aki la mbetawɔ le Nzambi ndo akotɔ ntondo ka Adama mvɔ. (Enda osato wele lo mbɔtwɛlɔ.) Metusɛla, tshɛnde ndo Jarɛdɛ lɔtshɛtshɛ la Nɔa, akavu ɛnɔnyi 366 l’ɔkɔngɔ wa Nɔa mbotɔ. * (Luka 3:36, 37) Ondo apami asɔ la wadiɛwɔ mbaketsha Nɔa ɔnɛ Jehowa mbakatonge anto ndo ɔnɛ nde akalange dia vɔ mbota ana, ndodia nkɛtɛ ndo mbokambɛ. Nɔa akakoke nto mbeya dia Adama l’Eva kokitanyiya Jehowa ndo nde akakoke mɛna etombelo wa kɔlɔ w’oma lo yɛdikɔ yawɔ. (Eta. 1:28; 3:16-19, 24) Nɔa akalangaka kɛnɛ kakandekaka ndo awui asɔ wakotshutshuya dia kambɛ Jehowa.​—Eta. 6:9.

6, 7. Ngande wakakeketsha elongamelo mbetawɔ ka Nɔa?

⁶ Elongamelo keketshaka mbetawɔ. Ohokanyiya woho wakakeketshama mbetawɔ ka Nɔa etena kakandeye dia lokombo lande lalembetshiya “Diomuyelo” kana “Esambelo,” mbelaka kanyi y’elongamelo. (Eta. 5:29, nɔtɛ) Jehowa akasambiya Lamɛka dia mbuta lo dikambo di’ɔnande Nɔa ɔnɛ: “Ɔna ɔnɛ ayotosamba l’olimu wa wolo ndo l’opipi wadiɛnɛso l’ɔtɛ wakadje Jehowa nkɛtɛ mananu.” Diakɔ diele, Nɔa aki l’elongamelo dia Jehowa ayɔlɔngɔsɔla akambo. L’ɛnyɛlɔ ka Abɛlɛ ndo Ɛnɔkɛ, nde aki la mbetawɔ ɔnɛ “kanula” yayominola ɔtɛ w’oloyi.​—Eta. 3:15.

⁷ Nɔa koshihodiaka tshɛ lo tshɛ daka dia Nzambi diele lo Etatelo 3:15. Koko nde akeyaka dia prɔfɛsiya kɛsɔ mbishaka elongamelo dikambo dia nshi yayaye. Ɛnɔkɛ akasambisha losango lakɔ lo mbuta dia Jehowa ayolanya anto wa kɔlɔ. (Judɛ 14, 15) Lo mɛtɛ, losango la Ɛnɔkɛ layokotshama tshɛ lo Aramangɛdɔna, lakahombe nkeketsha mbetawɔ ndo elongamelo ka Nɔa!

8. Ngande wele mbeya Nzambi dimɛna akakokɛ Nɔa?

⁸ Ngande wakakimanyiya ewo k’oshika ka Nzambi Nɔa? Lam’ele Nɔa akeke akambo wendana la Jehowa, nde akonge la mbetawɔ ndo lomba l’oma le Nzambi. Dui sɔ diakokokɛ, djekoleko diaha nsala ndooko dui diakakoke nyangiya Jehowa. Lo woho akɔna? Nɔa akalange monga ɔngɛnyi wa Nzambi, diakɔ diakinde kɔmbɔtɔ lɔngɛnyi la wanɛ waki komonga la mbetawɔ le Jehowa ndo wakootone. Otshikitanyi la wɔ, Nɔa kokesama oma le ɛdiɛngɛ wakaye la nkɛtɛ. Anto wakaambe efula  lo menda wolo waki l’ɛdiɛngɛ ndo wakakoke kaanga mbatɛmɔla. (Eta. 6:1-4, 9) Ndo nto, Nɔa akeyaka dia Jehowa akalange di’anto mbota ana ndo ndodia nkɛtɛ. (Eta. 1:27, 28) Diakɔ diele, etena kakatshuke ɛdiɛngɛ wamato ndo kakawote la wɔ ana, Nɔa akeyaka dia dui sɔ diaki kɔlɔ. Dui sɔ diakayɛnama hwe etena kakole ana akɔ, kakawonge akongote ndo kakawonge la wolo w’efula ndeka ana akina tshɛ. L’ekomelo, Jehowa akayotɛ Nɔa dia nde ayɔlɔsha Mvula k’elola dia ndanya anto wa kɔlɔ tshɛ. Lam’ele Nɔa aki la mbetawɔ l’ɔhɛmwɛlɔ wa Jehowa, nde akasale waato ko nde la nkumbo kande wakashimbamɛ.​—Hɛb. 11:7.

9, 10. Ngande wakokaso monga la mbetawɔ oko ka Nɔa?

⁹ Ngande wakokaso monga la mbetawɔ oko ka Nɔa? Ekɔ ohomba mbekaka Ɔtɛkɛta wa Nzambi la yambalo tshɛ, nanga kɛnɛ kekaso ndo nkamba la tɔ dia nsala etshikitanu ndo nsala ɛsɔnwɛlɔ w’amɛna lo nsɛnɔ yaso. (1 Pe. 1:13-15) Lo nsala ngasɔ, mbetawɔ ndo lomba l’oma le Nzambi layotokokɛ oma lo tolonga ta mayɛlɛ ta Satana ndo tɔsɛngiya ta l’andja ɔnɛ. (2 Kɔr. 2:11) Anto efula wa l’andja ɔnɛ nangaka awui wa ngala, awui wa mindo ndo ndjelaka nsaki yawɔ ya kɔlɔ. (1 Jni. 2:15, 16) Vɔ minyaka yimba dia taya suke l’ekomelo k’andja ɔnɛ wa kɔlɔ. Naka sho bu la mbetawɔ ka wolo, kete sho la wɔ koka nkanyiya woho akɔ. Tatohɛke dia etena kakɛdika Yeso nshi yaso la ya Nɔa, nde kɔtɛkɛta dikambo di’awui wa ngala kana wa mindo, koko dia waale wa mbekola yimba diaha kambɛ Nzambi.​—Adia Mateo 24:36-39.

¹⁰ Yambola wate: ‘Onde lɔsɛnɔ lami mɛnyaka dia dimi mɛtɛ mbeyaka Jehowa? Onde mbetawɔ kami tshutshuyakami dia nsala kɛnɛ kata Jehowa dia kekɔ ɔlɔlɔ ndo mbetsha anto akina kɛnɛ kalanga Nzambi dia vɔ nsala?’ Ekadimwelo ayɛ lo ambola asɔ wayokokimanyiya dia mbeya kana wɛ la wɔ ekɔ lo nkɛndakɛnda la Nzambi ka mɛtɛ oko wakasale Nɔa.

11. a) Wetshelo akɔna wakondjaso lo ngandji kakokaka Danyɛlɛ Nzambi lam’akinde ɔlɔngɔlɔngɔ lo dikambo di’ambutshi ande? b) Naa waonga wa Danyɛlɛ wayoyolanga monga la wɔ?

¹¹ Ngande wakeye Danyɛlɛ Jehowa? Ambutshi wa Danyɛlɛ wakawetsha dia nanga Jehowa ndo Ɔtɛkɛta ande. Ndo kɛsɔ mbakasale Danyɛlɛ lɔsɛnɔ lande l’otondo. Kaanga etena kakinde osombe, nde akatetemala mbeka Afundelo la yambalo tshɛ. (Dan. 9:1, 2) Danyɛlɛ akeyaka Jehowa dimɛna efula. Nde akeyaka nto awui tshɛ wakasale Jehowa lo dikambo di’ase Isariyɛlɛ. Sho mɛnaka dui sɔ lo dɔmbɛlɔ dia l’okitshakitsha ndo di’oma k’ɛse otema dia Danyɛlɛ diele lo Danyɛlɛ 9:3-19. Adia dɔmbɛlɔ sɔ ndo kana yimba la yambalo tshɛ lo dikambo dia diɔ. Yambola wate: ‘Kakɔna kambetsha dɔmbɛlɔ sɔ lo dikambo dia Danyɛlɛ?’

12-14. a) Ngande wakɛnya Danyɛlɛ lomba l’oma le Nzambi? b) Ngande wakatshɔkɔla Jehowa Danyɛlɛ l’ɔtɛ wa dihonga ndo kɔlamelo yande?

¹² Ngande wele mbeya Nzambi dimɛna akakimanyiya Danyɛlɛ? Komonga dui dia wɔdu dia ose Juda laki la kɔlamelo kambɛ Nzambi l’osomba wa Babilɔna w’apanganu. Ɛnyɛlɔ, Jehowa akatɛ ase Juda ate: “Nyoyange wɔladi wa osomba wakamanyɔtɔlɛ lo lɔhɔmbɔ.” (Jɛr. 29:7) Koko, nde akawadjangɛ ndo dia mbɔtɛmɔla ndamɛ oto l’otema awɔ tshɛ. (Eto. 34:14) Ngande wakakoke Danyɛlɛ nkitanyiya wadjango asɔ tshɛ? Lomba l’oma le Nzambi lakakimanyiya Danyɛlɛ dia mbeya dia nde akahombe ntondo nkitanyiya Jehowa, oma laasɔ ko ɛlɛmbɛ w’anto. Ɛnɔnyi nkama l’ɔkɔngɔ, Yeso aketsha atɔndɔ akɔ waamɛ.—Luka 20:25.

¹³ Tokanyiya kɛnɛ kakasale Danyɛlɛ etena kakawadje ɔlɛmbɛ w’ɔnɛ ndooko onto lahomba nɔmba nzambi kana onto okina paka nkumekanga l’edja ka nshi 30. (Adia Danyɛlɛ 6:7-10.) Nde akakoke mbisha tɛkɛnɛndɛ ndo mbuta ɔnɛ: ‘Ekɔ  paka l’edja ka nshi 30 tsho.’ Koko Danyɛlɛ akatone di’ɔlɛmbɛ w’anto ndeka ɔtɛmwɛlɔ wakandatɛmɔlaka Nzambi ohomba. Danyɛlɛ akakoke nɔmba Jehowa lo dihole dia woshɛshɛ. Koko nde akeyaka di’anto efula wakawɛnaka alɔmba lushi tshɛ. Ɔnkɔnɛ, kaanga mbele dui sɔ diaki waale, Danyɛlɛ akatetemala nɔmba lo dihole diakakoke anto mbɛna nɛ dia nde konanga di’anto mfɔnya dia nde ambotshika kambɛ Jehowa.

¹⁴ Jehowa akatshɔkɔla Danyɛlɛ l’ɔtɛ wa dihonga ndo yɛdikɔ yande ya monga la kɔlamelo. Nde akasale dihindo ndo akashimbɛ Danyɛlɛ diaha ntambwɛ mbodiaka. Etombelo waki la dui sɔ ele, anto wa lo diolelo di’otondo dia Mediya la Pɛrɛsiya wakeye Jehowa!​—Dan. 6:25-27.

15. Ngande wakokaso monga la mbetawɔ oko ka Danyɛlɛ?

¹⁵ Ngande wakokaso monga la mbetawɔ oko ka Danyɛlɛ? Dia monga la mbetawɔ ka wolo, hatohombe nkomɛ tsho lo mbadia Ɔtɛkɛta wa Nzambi. Sho pombaka mboshihodia. (Mat. 13:23) Sho nangaka mbeya woho wakanyiya Jehowa ndo kanyi yande l’akambo akɔ. Diakɔ diele, sho pombaka nkana yimba efula la kɛnɛ kadiaso. Ekɔ nto ohomba efula nɔmbaka mbala la mbala, djekoleko etena keso l’ekakatanu. Naka sho nɔmba Jehowa lomba ndo wolo la mbetawɔ tshɛ, kete nde ayotosha la lokaho tshɛ.​—Jak. 1:5.

16, 17. Ngande wakeye Jɔbɔ Jehowa?

¹⁶ Ngande wakeye Jɔbɔ Jehowa? Jɔbɔ komonga ose Isariyɛlɛ. Koko Abrahama, Isaka ndo Jakɔbɔ waki ewotɔ ande w’etale ndo Jehowa akawaetsha akambo wendana la nde ndo kɛnɛ kakandalange dikambo di’anto. Lo yoho mɔtshi, Jɔbɔ nde la wɔ akeke akambo wa mɛtɛ efula w’ohomba asɔ. (Jɔbɔ 23:12) Nde akatɛ Jehowa ate: “Atoyi ami wakoke awui wendana la yɛ.” (Jɔbɔ 42:5) Ndo Jehowa ndamɛ akate dia Jɔbɔ akewoya anto akina akambo wa mɛtɛ wendana la Nde.—Jɔbɔ 42:7, 8.

¹⁷ Jɔbɔ akeye ndo waonga wa Jehowa lo nsɛdingola etongelo. (Jɔbɔ 12:7-9, 13) Elihu la Jehowa wakakambe la etongelo dia mbetsha Jɔbɔ woho wele anto totshitshɛ lo mbɛdika la Nzambi. (Jɔbɔ 37:14; 38:1-4) Ɛtɛkɛta wa Jehowa wakonge la shɛngiya le Jɔbɔ ndo wakokonya dia mbutɛ Nzambi l’okitshakitsha tshɛ ɔnɛ: “Kakianɛ dimi lambeya dia wɛ ekɔ la akoka wa nsala akambo tshɛ ndo ndooko dui dionga la yɛ lo yimba dia nsala diahayakoke nsala.” Nde akakotsha ate: “Lamboyatshumoya lo ditshu ndo lo otoko.”​—Jɔbɔ 42:2, 6.

18, 19. Ngande wakɛnya Jɔbɔ dia nde akeyaka mɛtɛ Jehowa?

 ¹⁸ Ngande wele mbeya Nzambi dimɛna akakimanyiya Jɔbɔ? Jɔbɔ akashihodiaka atɔndɔ waki Nzambi dimɛna efula. Nde akeyaka mɛtɛ Jehowa ndo dui sɔ diakotshutshuyaka dia nsala akambo lo yoho ya dimɛna. Ɛnyɛlɔ, Jɔbɔ akeyaka dia nde kokoka mbuta dia nde akalangaka Nzambi naka nde kosalɛka anto akina ɔlɔlɔ. (Jɔbɔ 6:14) Nde kɔfɔnyaka dia nde ndeka anto akina, koko nde akawasalɛka akambo oko ase nkumbo kande oyadi wanɛ waki ɛngɔnyi kana ase wola. Jɔbɔ akate ate: “Shi Ɔnɛ lakankenge lo dikundju kakaakenge ndo vɔ?” (Jɔbɔ 31:13-22) Kaanga l’etena kaki Jɔbɔ ɔngɔnyi ndo la lowandji l’efula, nde komonga la lotamanya ndo kɔmbɔsa anto akina oko nde mbaleka ohomba. Dui sɔ ntshikitana etale la woho wasala akanga w’ɛngɔnyi ndo wanɛ wele la lowandji ɛlɔ kɛnɛ.

¹⁹ Jɔbɔ konanga dia kaanga ɛngɔ ɔtɔi, mbidja ndo lomombo la l’emunyi monga ohomba efula le nde ndeka Jehowa. Nde akeyaka dia naka nde nsala dui sɔ, kete nde akakoke nsɛka “Nzambi ka mɛtɛ kele l’olongo.” (Adia Jɔbɔ 31:24-28.) Ndo nto, Jɔbɔ akɔsaka diwala oko dɔkɔlɔkɔ di’ekila dia lam’asa wadi l’omi. Nde akatshike ndo dɔkɔlɔkɔ ndamɛ diaha menda womoto lo yoho ya kɔlɔ. (Jɔbɔ 31:1) Dui sɔ tambiyaka efula nɛ dia Jɔbɔ akasɛnaka l’etena kaketawɔka Jehowa dia pami monga l’ɔsɛngɛ. Ɔnkɔnɛ otondolanga, Jɔbɔ akakoke ntshuka wadi la hende. Koko weho akɔ tshɛ nde akeyaka dia diwala dia ntondo diakakongɛ Jehowa diakasalema lam’asa pami ɔtɔi la womoto ɔtɔi ndo Jɔbɔ akasɔnɛ dia nsala akambo lo yoho shɔ. * (Eta. 2:18, 24) Koko, l’ɔkɔngɔ w’ɛnɔnyi oko 1600, Yeso aketsha ampokami ande atɔndɔ akɔ wamɛ lo kɛnɛ kendana la dieyanelo ndo diwala.​—Mat. 5:28; 19:4, 5.

20. Ngande wele mbeya Jehowa ndo atɔndɔ ande ayotokimanyiya dia nsɔna angɛnyi ndo tɔkɛnyɔ t’amɛna?

²⁰ Ngande wakokaso monga la mbetawɔ oko ka Jɔbɔ? Sho la wɔ pombaka mbeya Jehowa dimɛna ndo mbetawɔ dia ewo kande monga la shɛngiya lo kɛnɛ tshɛ kasalaso. Ɛnyɛlɔ, Bible totɛka dia Jehowa “petshaka onto tshɛ lalanga awui wa ngala” ndo ɔnɛ sho hatohombe mbetsha wenya kaamɛ l’anto washɛ woho wewɔ. (Adia Osambo 11:5; 26:4.) Yambola wate: ‘Kakɔna kambetsha avɛsa anɛ ahende lo woho wakanyiya Jehowa? Ngande wakokawɔ monga la shɛngiya lo kɛnɛ koleki ohomba lo lɔsɛnɔ lami? Ngande wahombawɔ monga la shɛngiya lo kɛnɛ kendami l’Ɛtɛrnɛtɛ, anto wasɔnami dia monga angɛnyi ami ndo tɔkɛnyɔ tasɔnami?’ Ekadimwelo ayɛ koka kokimanyiya dia mɛna polo lo yɛdikɔ yakɔna yeyayɛ Jehowa. Hatolange sɛngiyama oma le andja ɔnɛ wa kɔlɔ. Diakɔ diele sho pombaka mbekiya “wolo [aso] wa shɛnɔdi,” mbuta ate sho pombaka mbeya ntshikitanya ɔlɔlɔ la kɔlɔ ndo kanga lomba la kanga enginya.​—Hɛb. 5:14; Ɛf. 5:15.

21. Kakɔna kayotokimanyiya dia “nshihodia akambo tshɛ” wele laso ohomba dia mbeya dia ngɛnyangɛnya Jehowa?

²¹ Lam’ele Nɔa, Danyɛlɛ ndo Jɔbɔ wakasale kɛnɛ tshɛ kakawakoke nsala dia mbeya Jehowa dimɛna, nde akakimanyiya dia “nshihodia akambo tshɛ” waki ohomba dia mbɔngɛnyangɛnya. Ɛnyɛlɔ kawɔ mɛnyaka dia nsala akambo lo yoho yalanga Jehowa konyaka dia ntondoya lo lɔsɛnɔ. (Os. 1:1-3) Diakɔ diele yambola wate: ‘Onde dimi mbeyaka Jehowa dimɛna oko wakaweyaka Nɔa, Danyɛlɛ ndo Jɔbɔ?’ Lo mɛtɛ, ɛlɔ kɛnɛ sho koka mbeya Jehowa dimɛna ndeka woho wakaweyaka apami wa kɔlamelo asɔ nɛ dia nde ekɔ lo tetsha awui efula wendana la nde. (Tok. 4:18) Ɔnkɔnɛ ekaka Bible la yambalo tshɛ. Kanaka yimba dimɛna la kɛnɛ kekayɛ. Ndo lɔmbaka dia nkondja nyuma k’ekila. Naka wɛ nsala ngasɔ, kete andja ɔnɛ wa kɔlɔ hawotonga la shɛngiya le yɛ. Wɛ ayosala akambo la lomba l’oma le Nzambi ndo ayoleka ndjasukanya la Shɔ ka l’olongo.​—Tok. 2:4-7.