1, 2. Kakɔna kakashihodia ɔnangɛso ɔmɔtshi lo dikambo diande, ndo kakɔna kakandasale?

ROBERT akabatizama eke l’ɛnɔnyi dikumi l’ɛmɔtshi, koko akambo wa mɛtɛ komonga dui diakaleke ohomba lo lɔsɛnɔ lande. Nde mbutaka ate: “Ndooko dui dia kɔlɔ diakamasale, koko dimi kosalaka awui efula. Lakalangaka monga la lonyuma la wolo, mbɔtɔka nsanganya tshɛ ndo nkamba oko ombatshi mboka wa tshanda lo etena kɛmɔtshi ka l’ɔnɔnyi. Koko lakahombaka ɛngɔ kɛmɔtshi.”

² Robert koshihodiaka kɛnɛ kakandahombaka polo l’ɔkɔngɔ wa nde tshukana. Lo tena dimɔtshi, nde la wadɛnde wakakɛnyaka kɛnyɔ ya mbokana ambola wa lo Bible. Wadɛnde akeyaka Bible dimɛna ndo akakadimolaka ambola asɔ aha l’okakatanu. Koko mbala efula Robert kombeyaka ekadimwelo, nde akokaka nsɔnyi. Nde mbutaka ate: “Aki oko dimi kombeyaka ndooko ɛngɔ. Lakate nte: ‘Naka dimi mbahomba nɔmbɔla wadɛmi l’akambo wa lo nyuma, kete dimi pombaka nsala dui dimɔtshi.’” Kɛsɔ mbakandasale. Nde mbutaka ate: “Lakeke Bible, lakeke Bible nto, lakanyomeka Bible ndo lakatatɛ mboka dia awui wa lɔkɔ mbɔtɔnɛka. Lakayoshihodia akambo ndo kɛnɛ kakaleke ohomba ele, lakayonga la diɔtɔnganelo dia ma ma la Jehowa.”

3. a) Wetshelo akɔna wakokaso nkondja oma l’ɔkɔndɔ wa Robert? b) Naa awui w’ohomba wayangaso nsɛdingola?

 ³ Sho koka nkondja wetshelo w’ohomba oma l’ɔkɔndɔ wa Robert. Sho koka monga la yema ya ewo ka Bible ndo mbɔtɔka mbala la mbala lo nsanganya, tshɔka l’esambishelo, koko awui asɔ hawɛnya dia tambotshunda lo nyuma. Kana ondo tekɔ lo nsala la wolo dia ntshunda lo nyuma, koko etena kayasɛdingolaso, sho mɛnaka awui amɔtshi wakokaso ndjalowanya. (Flpɛ. 3:16) Lo sawo nɛ, tayokondja ekadimwelo lo ambola asato w’ohomba anɛ: 1) Kakɔna kayotokimanyiya dia mbeya kana tambotshunda lo nyuma? 2) Ngande wakokaso ndeka monga la lonyuma la wolo? 3) Ngande wele monga la lonyuma la wolo koka tokimanyiya lo lɔsɛnɔ laso la lushi la lushi?

4. Waa na wendana la dako dia lo Ɛfɛsɔ 4:23, 24?

⁴ Etena kakatatatɛ kambɛ Nzambi, takasale etshikitanu wakonge la shɛngiya l’awui tshɛ wa lo lɔsɛnɔ laso. Etshikitanu ɛsɔ kokomɛ etena kakatabatizama. Bible totɛka ɔnɛ: “[Nyotetemale] monga eyoyo lo wolo walɔmbɔla timba tanyu.” (Ɛf. 4:23, 24) Lam’ele sho keema kokele, sho pombaka ntetemala nsala etshikitanu. Kaanga naka tambokambɛ Jehowa l’edja k’ɛnɔnyi efula, sho pombaka ntetemala nkeketsha diɔtɔnganelo diasaso la nde.—Flpɛ. 3:12, 13.

5. Ambola akɔna wakoka tokimanyiya dia mbeya kana tambotshunda lo nyuma?

⁵ Oyadi tekɔ dikɛnda kana opalanga, sho pombaka ndjasɛdingola l’otema ɔtɔi. Sho koka ndjambola ɔnɛ: ‘Onde lekɔ lo mɛna dia lekɔ lo taleke ntshunda lo nyuma? Onde lekɔ lo taleke monga oko Kristo? Kakɔna kɛnya dionga diami ndo kɛnɛ kasalami lo nsanganya? Asawo ami ɛnyawɔ lo dikambo dia kɛnɛ kalangami mɛtɛ lo lɔsɛnɔ? Mbekelo yami ya wekelo, ɔlɔtɔ ndo ɔlɔngɔswɛlɔ ami wa divo ndo kɛnɛ kasalami etena kambishawɔ dako, ɛnyatɔ lo dikambo diami? Kakɔna kasalami etena kahembamami dia nsala dui dimɔtshi dia kɔlɔ? Onde dimi laya Okristo wambotshunda lo nyuma?’ (Ɛf. 4:13) Ambola asɔ koka tokimanyiya dia mbeya polo lo yɛdikɔ yakɔna yambototshunda lo nyuma.

6. Kakɔna nto kakoka tokimanyiya dia mbeya kana tambotshunda lo nyuma?

⁶ Lo tena dimɔtshi sho mongaka l’ohomba w’anto akina tokimanyiya dia mbeya kana tambotshunda lo nyuma. Ɔpɔstɔlɔ Pɔɔlɔ akalembetshiya dia onto la lo demba hashihodia dia yoho yande ya lɔsɛnɔ hangɛnyangɛnya Nzambi. Koko onto lambotshunda lo nyuma shihodiaka woho wɛna Nzambi akambo. Nde mbeyaka dia Jehowa hetawɔ yoho ya lɔsɛnɔ ya lo demba. (1 Kɔr. 2:14-16; 3:1-3) Dikumanyi diele la yimba ya Kristo mbeyaka esadi eto etena katatɛ anangɛsɔ nsala akambo lo yoho ya lo demba ndo vɔ salaka la wolo dia mbakimanyiya. Naka dikumanyi wambosala la wolo dia tokimanyiya, onde tayetawɔ ekimanyielo kawɔ ndo nsala etshikitanu wahombama? Naka sho nsala ngasɔ, kete tayɛnya dia sho mɛtɛ nangaka monga la lonyuma la wolo.​—Ond. 7:5, 9.

7. Ngande weyaso di’onto lambotshunda lo nyuma bu tsho onto lele l’ewo ka lo Bible?

⁷ Aha monga tsho la ewo ka lo Bible, kete tambotshunda lo nyuma. Nkumekanga Sɔlɔmɔna akeyaka awui efula wendana la Jehowa ndo ɛtɛkɛta wa lomba wa Sɔlɔmɔna ɛmɔtshi wakafundama lo Bible. Koko l’ɔkɔngɔ diko, diɔtɔnganelo diande la Jehowa diakɔlɛ ndo nde kotetemala monga la kɔlamelo. (1 Ku. 4:29, 30; 11:4-6) Ko ahombaso nsala nto laadiko dia monga la ewo ka lo Bible? Sho pombaka ntetemala  nkeketsha mbetawɔ kaso. (Kɔl. 2:6, 7) Ngande wasalaso dui sɔ?

8, 9. a) Kakɔna kayotokimanyiya dia nkeketsha mbetawɔ kaso? b) Naa oyango aso etena kekaso ndo kakanaso yimba? (Enda osato wele lo mbɔtwɛlɔ.)

⁸ Lo ntambe ka ntondo, Pɔɔlɔ akakeketsha Akristo dia “[nsala] la wolo dia monga anto wambotshunda.” (Hɛb. 6:1) Ngande wakokaso nkamba la dako sɔ ɛlɔ kɛnɛ? Yoho mɔtshi y’ohomba ele, mbeka dibuku ‘Nyotshikale lo ngandji ka Nzambi.’ Dui sɔ diayokokimanyiya dia mbeya woho wa nkamba l’atɔndɔ wa lo Bible lo lɔsɛnɔ layɛ. Naka wɛ ambekaka dibuku sɔ, kete ekɔ ekanda ekina wakokayɛ mbeka dia kokimanyiya dia nkeketsha mbetawɔ kayɛ. (Kɔl. 1:23) Sho pombaka nto nkana yimba la kɛnɛ kekaso ndo nɔmba Jehowa dia tokimanyiya dia mbeya woho wa nkamba la tɔ.

⁹ Etena kekaso ndo kakanaso yimba, sho pombaka nsala dui sɔ l’oyango wa monga la nsaki k’oma k’ɛse otema ka ngɛnyangɛnya ndo nkitanyiya Jehowa. (Os. 40:8; 119:97) Sho pombaka nto ntona dui tshɛ diakoka toshimba dia mpama lo nyuma.​—Tito 2:11, 12.

10. Kakɔna kakoka ɛlɔngɔlɔngɔ nsala dia ndeka monga la lonyuma la wolo?

¹⁰ Naka wɛ ekɔ ɔlɔngɔlɔngɔ, onde wɛ ekɔ l’eyango wa lo nyuma? Ɔnangɛso ɔmɔtshi lakamba lo Bɛtɛlɛ, sawolaka mbala efula l’ɛlɔngɔlɔngɔ walanga batizama lo nsanganya y’etshimbedi ndo mbambolaka eyango awɔ wa lo nyuma. Nde mɛnaka dia efula kawɔ kanyiyaka la yambalo tshɛ woho walangawɔ kambɛ Jehowa lo nshi yayaye. Amɔtshi kongɛka dia kambɛ Jehowa lo tena tshɛ kana dia monɔ lo dihole diewɔ l’ohomba efula w’apandjudi. Koko ɛlɔngɔlɔngɔ ɛmɔtshi haweye nkadimola dimbola sɔ. Onde dui sɔ nembetshiyaka dia vɔ fɔnyaka dia vɔ bu l’ohomba wa ndjadjɛ eyango wa lo nyuma? Naka wɛ ekɔ ɔlɔngɔlɔngɔ, yambola wate: ‘Onde dimi tshɔka lo nsanganya ndo l’esambishelo paka l’ɔtɛ walanga ambutshi ami dia dimi ntshɔ? Kana onde dimɛ lekɔ la diɔtɔnganelo la Nzambi?’ Lo mɛtɛ, sho tshɛ pombaka monga l’eyango wa lo nyuma oyadi tekɔ ɔlɔngɔlɔngɔ kana opalanga. Eyango ɛsɔ wayotokimanyiya dia ndeka monga la lonyuma la wolo.​—Ond. 12:1, 13.

11. a) Ahombaso nsala dia ntshunda lo nyuma? b) Ɛnyɛlɔ kakɔna ka lo Bible kakokaso mbokoya?

¹¹ L’ɔkɔngɔ wa sho mbeya awui wakokaso ndjalowanya, sho pombaka ntatɛ nsala etshikitanu. Dui sɔ diekɔ ohomba efula, nɛ dia diɔ nemanɛka la lɔsɛnɔ kana nyɔi. (Rɔmɔ 8:6-8) Jehowa halongamɛ dia sho monga kokele, ndo nde toshaka nyuma kande k’ekila dia tokimanyiya. Koko sho pombaka ntetemala mbidja welo shoamɛ. Ɔnangɛso John Barr, laki ose Olui-walɔmbɔla akalembetshiya Luka 13:24 ndo akate ate: “Anto efula hawotondoya nɛ dia vɔ hawoleke nsala la wolo dia mpama.” Sho pombaka monga oko Jakɔbɔ lakalɔ la ondjelo ndo laki kopekɔ polo ndo lam’akandakondja ɔtshɔkɔ. (Eta. 32:26-28) Kaanga mbakoka wekelo wa Bible tosha ɔngɛnɔngɛnɔ, tatolongamɛke dia tɔ monga oko ɔkɔndɔ wakafundama tsho dia mbɔdia anto. Sho pombaka mbidja welo dia mbishola akambo wa mɛtɛ w’ohomba wayotokimanyiya.

12, 13. a) Kakɔna kayotokimanyiya dia nkamba la Rɔmɔ 15:5? b) Ngande wakoka ɛnyɛlɔ ndo dako dia Petero tokimanyiya? c) Kakɔna kakokayɛ nsala dia mpama lo nyuma? (Enda kiombo yele l’ɔtɛ a dui ɔnɛ: “ Kɛnɛ kakokayɛ nsala dia mpama lo nyuma.”)

¹² Etena kadjaso welo dia mpama lo nyuma, nyuma k’ekila kayotokimanyiya dia ntshikitanya ekanelo kaso. Yema yema, sho koka mbeya nkanyiya oko wakakanyiyaka Kristo. (Rɔmɔ 15:5) Nyuma k’ekila koka tokimanyiya dia minya nsaki ya kɔlɔ ndo monga la waonga wangɛnyangɛnya Nzambi. (Ngal. 5:16, 22, 23) Naka tamboshihodia dia sho ndekaka ndjasha  lo lomombo la l’emunyi kana ɛngɛnɔngɛnɔ, aha sho mpekɔ. Sho pombaka ntetemala nɔmba Jehowa nyuma k’ekila dia tɔ tokimanyiya dia ndjasha lo awui w’amɛna. (Luka 11:13) Tohɔ ɔpɔstɔlɔ Petero. Aha mbala tshɛ mbakandakanyiyaka oko Kristo. (Mat. 16:22, 23; Luka 22:34, 54-62; Ngal. 2:11-14) Koko nde kopekɔ ndo Jehowa akokimanyiya. Yema yema, Petero akeye nkanyiya oko Yeso. Ndo kɛsɔ kakokaso nsala.

¹³ L’ɔkɔngɔ diko, Petero akashile waonga wotshikitanyi wayotokimanyiya. (Adia 2 Petero 1:5-8.) Sho pombaka mbidja welo dia monga la solo dia lotutsha, ekikelo, ngandji k’onto l’ɔnango ndo waonga akina w’amɛna. Lushi tshɛ sho koka ndjambola ɔnɛ: ‘Dionga diakɔna diakokami nsala la wolo dia nkɛnɛmɔla ɛlɔ diayokimanyiya dia ndeka monga la lonyuma la wolo?’

14. Ngande wele monga onto lambotshunda lo nyuma ekɔ la shɛngiya lo lɔsɛnɔ laso?

¹⁴ Naka sho kanyiyaka oko Kristo, kete dui sɔ diayonga la shɛngiya lo lɔkɛwɔ laso, l’olimu kana la kalasa, woho watɛkɛtaso ndo wɔsaso tɛdikɔ lushi la lushi. Tɛdikɔ taso tayɛnya dia tekɔ lo mbidja welo dia mbokoya Kristo. Lam’ele tambotshunda lo nyuma, hatolange kaanga dui ɔtɔi ndanya diɔtɔnganelo diasaso la Jehowa. Etena kahembamaso dia nsala dui dimɔtshi dia kɔlɔ, lonyuma laso layotokimanyiya dia nshika tanga la ntondo k’ohemba. Ntondo ka sho mbɔsa yɛdikɔ, tayemala ndo tayoyambola ɔnɛ: ‘Naa atɔndɔ wa lo Bible wakoka kimanyiyami? Kakɔna kotosala Kristo lo dikambo nɛ? Kakɔna kayɔngɛnyangɛnya Jehowa?’ Sho pombaka monga la mbekelo ka kanyiyaka lo yoho shɔ. Diakɔ diele, tayanga nsɛdingola awui amɔtshi. Lo dui tshɛ, tayɛna tɔndɔ dia lo Bible diakoka tokimanyiya dia mbɔsa yɛdikɔ ya dimɛna.

15, 16. Ngande wakoka nkanyiya oko Yeso tokimanyiya dia mbɔsa yɛdikɔ yendana la a) ɔsɔnwɛlɔ w’olonganyi? b) ɔsɔnwɛlɔ w’angɛnyi?

¹⁵ Ɔsɔnwɛlɔ w’olonganyi. Tɔndɔ dia lo Bible diekɔ lo 2 Kɔrɛtɔ 6:14, 15. (Adia.) Pɔɔlɔ akɛnya hwe di’anto wambotshunda lo nyuma hawɛnyi akambo woho wawaɛna anto wa lo demba kana anto wele la tokanyi ta lo demba. Vɔ hawɛnyi akambo woho akɔ wamɛ. Ngande wakoka tɔndɔ sɔ kokimanyiya dia nsɔna olonganyi?

¹⁶ Ɔsɔnwɛlɔ w’angɛnyi. Tɔndɔ dia lo Bible diekɔ lo 1 Kɔrɛtɔ 15:33. (Adia.) Onto lambotshunda lo nyuma hatɔtɔ lɔngɛnyi l’anto wakoka mbɔdia mbetawɔ kande. Kanyiya woho wakokayɛ nkamba la tɔndɔ sɔ lo awui wotshikitanyi. Ɛnyɛlɔ, ngande wakokadiɔ kokimanyiya dia mbɔsa tɛdikɔ lo dikambo di’okambelo wa la réseaux sociaux? Ngande wakokadiɔ kokimanyiya dia mbeya kana wɛ kokaka nkɛnya tɔkɛnyɔ ta l’Ɛtɛrnɛtɛ l’anto wahayeye?

17-19. Ngande wele monga onto lambotshunda lo nyuma ayokokimanyiya a) dia mbewɔ awui w’anyanya? b) dia monga l’eyango w’amɛna? c) dia nshidiya ewanu?

¹⁷ Awui wakoka ndanya lonyuma laso.  Ɔhɛmwɛlɔ w’ohomba wekɔ lo Hɛbɛru 6:1. (Adia.) Ele “etsha w’anyanya” wahombaso mbewɔ? Ɔsɔ ekɔ awui wahakoke tokimanyiya dia monga la lonyuma la wolo. Ɔhɛmwɛlɔ ɔsɔ wendana l’etsha w’anyanya koka tokimanyiya dia nkadimola ambola wayela anɛ: ‘Onde dui nɛ diekɔ ohomba kana bu? Onde dimi pombaka ndjasha lo dui diakɔ? Lande na kahamahombe mbɔtɔ l’olui w’anto wasala la wolo dia ntshikitanya awui wa l’andja ɔnɛ?’

¹⁸ Eyango wa lo nyuma. Lo Dako diande dia lo Dikona, Yeso akatosha dako dia dimɛna diendana l’eyango. (Mat. 6:33) Onto lambotshunda lo nyuma mbetshaka Diolelo lo dihole dia ntondo lo lɔsɛnɔ lande. Tɔndɔ sɔ diayotokimanyiya dia nkadimola ambola wayela anɛ: ‘Onde dimi pombaka mbɔtɔ kalasa ya laadiko l’ɔkɔngɔ wa nshidiya kalasa ya sekɔndɛrɛ? Onde dimi pombaka mbetawɔ olimu ɔnɛ?’

¹⁹ Ewanu. Dako dia Pɔɔlɔ otsha le Akristo wa la Rɔmɔ koka tokimanyiya etena kongaso l’ewanu l’anto akina. (Rɔmɔ 12:18) Sho mbokoyaka Kristo, diakɔ diasalaso la wolo dia “[mbi]djasɛ l’anto tshɛ ki.” Kakɔna kasalaso etena kongaso l’ewanu l’anto akina? Onde ekɔ tshondo y’okakatanu leso dia mbetawɔ nkanyi y’onto okina? Kana onde sho mbeyamaka oko onto lasala la wolo dia mbidja wɔladi?—Jak. 3:18.

20. Lande na kalangayɛ ntetemala mpama lo nyuma?

²⁰ Bɛnyɛlɔ sɔ mɛnyaka woho wakoka atɔndɔ wa lo Bible tokimanyiya dia mbɔsa tɛdikɔ tɛnya dia tekɔ lo nɔmbwama la nyuma ka Nzambi. Naka sho ntshunda lo nyuma, kete tayonga la lɔsɛnɔ l’ɔngɛnɔngɛnɔ ndo la dimɛna. Robert, lakatatɛkɛtshi dikambo diande l’etatelo mbutaka ate: “L’ɔkɔngɔ wa dimi monga la diɔtɔnganelo dia dimɛna la Jehowa, lakayonga omi ndo papa k’ɔlɔlɔ. Lakayonga l’ɔngɛnɔngɛnɔ ndo l’ɔlɔ.” Naka sho nsala kɛnɛ tshɛ kakokaso nsala dia ntetemala mpama lo nyuma, kete tayokondja wahɔ efula. Tayonga la lɔsɛnɔ l’ɔngɛnɔngɛnɔ oma ko kakianɛ ndo lo nshi yayaye tayonga la “lɔsɛnɔ l’oshika.”​—1 Tim. 6:19.