1, 2. a) Lande na kakoka ɔsɛdingwelo wa ɛnyɛlɔ ka Nɔa, Danyɛlɛ ndo Jɔbɔ tokeketsha? b) Akambo akɔna wakasalema etena kakafunde Ɛzɛkiyɛlɛ ɛtɛkɛta wele lo Ɛzɛkiyɛlɛ 14:14?

ONDE wɛ ekɔ lo diɛnɛ l’ɔtɛ weyɛ la hemɔ, ekakatanu wendana la falanga kana walɔshamayɛ? Onde tongaka dui dia wolo le yɛ lo tena dimɔtshi dia monga l’ɔngɛnɔngɛnɔ l’olimu wa Jehowa? Naka ngasɔ, kete ɔsɛdingwelo wa ɛnyɛlɔ ka Nɔa, Danyɛlɛ ndo Jɔbɔ koka kokeketsha. Apami asɔ komonga kokele ndo waki l’ekakatanu akɔ waamɛ wele la so ɛlɔ kɛnɛ. Lo tena dimɔtshi, kaanga nsɛnɔ yawɔ yaki lo waale. Koko vɔ wakatshikala la kɔlamelo le Jehowa ndo nde akawaɔshi oko bɛnyɛlɔ dia mbetawɔ ndo okitanyiya.​—Adia Ɛzɛkiyɛlɛ 14:12-14.

² Ɛzɛkiyɛlɛ akafunde ɛtɛkɛta wa lo divɛsa diɔsami ɔtɛ aso wa sawo la Babilɔna l’ɔnɔnyi 612 ntondo ka Kristo. * (Ɛzk. 1:1; 8:1) Dui sɔ diakasalema yema tshitshɛ la ntondo ka Jɛrusalɛma ndanyema l’ɔnɔnyi 607. Paka ase Jɛrusalɛma angana ato waki la kɔlamelo ndo l’okitanyiya oko Nɔa, Danyɛlɛ ndo Jɔbɔ, mbakake. (Ɛzk. 9:1-5) Jɛrɛmiya, Baruka, Ɛbɛdɛ-Mɛlɛkɛ ndo ase Rɛkabɛ waki amɔtshi l’atei awɔ.

3. Kakɔna kayoteka lo sawo nɛ?

 ³ Woho akɔ waamɛ mbele, ɛlɔ kɛnɛ paka anto wɔsa Jehowa oko anto w’ɛlɔlɔ, anto wele oko Nɔa, Danyɛlɛ la Jɔbɔ mbayoka l’ekomelo k’andja ɔnɛ wa kɔlɔ. (Ɛny. 7:9, 14) Diakɔ diele, tayanga mbeka lande na kakakambe Jehowa la bɛnyɛlɔ di’apami asato asɔ wakasale kɛnɛ kaki ɔlɔlɔ lo washo ande. Tayɔsɛdingola 1) ekakatanu waki la ɔmɔmɔ la l’atei awɔ ndo 2) woho wakokaso mbokoya mbetawɔ ndo okitanyiya awɔ.

4, 5. Naa ekakatanu ɛmɔtshi waki la Nɔa, ndo kakɔna katambiya lo dikambo diande?

⁴ Naa ekakatanu ɛmɔtshi waki la Nɔa? Lo nshi ya Ɛnɔkɛ, lɔtshɛtshɛ la Nɔa, ko anto wamboshilaka monga kɔlɔ efula. Vɔ wakataka “ɛtɛkɛta . . . wa kɔlɔ efula” lo dikambo dia Jehowa. (Judɛ 14, 15) L’etena kɛsɔ, andja wakatalekaka ndolanɛ l’akambo wa ngala. Lo nshi ya Nɔa, “[nkɛtɛ] yakalole la akambo wa ngala.” Andjelo wa kɔlɔ wakaye la nkɛtɛ, wakalɔtɛ alemba w’anto ko wakatshuke wamato. Anawɔ waki ngala ndo todjawudi. (Eta. 6:2-4, 11, 12) Koko onto tshɛ akɛnaka dia Nɔa akatshikitana la wɔ. Bible mbutaka dia “Nɔa akahomɔ lokolo l’ɔlɔ lo washo wa Jehowa.” Otshikitanyi l’anto wakodinge, nde akasalaka kɛnɛ kaki ɔlɔlɔ. “Nɔa akakɛndakɛndaka la Nzambi ka mɛtɛ.”​—Eta. 6:8, 9.

⁵ Kakɔna katetsha ɛtɛkɛta ɛsɔ lo dikambo dia Nɔa? Ntondo, tokanyiya edja kakakambɛ Nɔa Jehowa la kɔlamelo tshɛ lo andja wa kɔlɔ ɔsɔ la ntondo ka Mvula k’elola ndɔ. Dui sɔ kosalema ɛnɔnyi 70 kana 80, koko ɛnɔnyi suke la 600! (Eta. 7:11) Dikambo dia hende, tohɔ dia nde komonga la etshumanelo kakakoke mbokimanyiya ndo mbokeketsha oko weso la tɔ ɛlɔ kɛnɛ. Mɛnamaka dia kaanga anango la akadiyɛnde kombosukɛ. *

6. Ngande wakakɛnɛmɔla Nɔa dihonga di’efula?

⁶ Nɔa kɔfɔnya dia nde akahombe nkomɛ tsho lo monga onto ɔlɔlɔ. La dihonga tshɛ, nde akatɛka anto akina akambo wendana la mbetawɔ kande le Jehowa. Bible mbeelɛka ɔnɛ “osambisha w’akambo w’ɛlɔlɔ.” (2 Pe. 2:5) Ɔpɔstɔlɔ Pɔɔlɔ akate lo dikambo dia Nɔa ate: “Oma lo mbetawɔ kɛsɔ nde akaanya andja.” (Hɛb. 11:7) Aha la taamu, anto wakɔsɔkɛ ndo wakasale la wolo dia mboshimba. Ondo vɔ wakawanɛka dia mbosalɛ kɔlɔ. Koko Nɔa komboka anto wɔma. (Tok. 29:25) Nde aki la mbetawɔ ko Jehowa akawosha dihonga. Ndo nde mbishaka ekambi ande tshɛ wa kɔlamelo wa nshi nyɛ dihonga dia ngasɔ.

7. Ekakatanu akɔna waki la Nɔa etena kakandasalaka waato?

⁷ Nɔa aki la kɔlamelo le Jehowa ɛnɔnyi ndekana 500 etena kakawotɛ Jehowa dia nsala waato. Wakahombe nkamba la wɔ dia nshimbɛ anto amɔtshi ndo nyama oma lo Mvula k’elola. (Eta. 5:32; 6:14) Mɛnamaka dia nsala waato wa woke ɔsɔ akahombe monga tshondo y’okakatanu le Nɔa. Ndo nde akeyaka di’anto wakahombe mbɔsɔka ndo lɔsɛnɔ lande lakahombe ndeka monga l’ekakatanu. Koko Nɔa aki la mbetawɔ ndo akakitanyiya Jehowa. “Nde akasale kɛnɛ kakandawotɛ tshɛ lo tshɛ.”​—Eta. 6:22.

8. Ngande wakayaɛkɛ Nɔa le Jehowa dia nkotsha ehomba wa nkumbo kande?

⁸ Nɔa aki l’okakatanu okina. Nde akahombaka nkotsha ehomba wa wadɛnde ndo anande. La ntondo ka Mvula k’elola, anto wakakambaka olimu efula dia nkondja mbo ya ndɛ. Kɛsɔ mbakasalaka ndo Nɔa. (Eta. 5:28, 29) Koko, ehomba wa lo nkumbo kande komonga dui diakandaleke ndjakiyanya. Kambɛ Jehowa mbaki dui diakaleke ohomba lo lɔsɛnɔ lande. Kaanga mbaki Nɔa l’olimu efula wa nsala waato, ondo l’edja k’ɛnɔnyi 40 kana 50, nde akatetemala ndjasha lo dikambo dia Jehowa. Nde akasale dui sɔ l’edja k’ɛnɔnyi ekina 350 l’ɔkɔngɔ wa Mvula k’elola. (Eta. 9:28) Nɔa aki ɛnyɛlɔ ka dimɛna ka mbetawɔ ndo okitanyiya!

9, 10. a) Ngande wakokaso mbokoya mbetawɔ ndo okitanyiya wa Nɔa? b) Naka wɛ ndjashikikɛ dia nkitanyiya ɛlɛmbɛ wa Nzambi, eshikikelo kakɔna kakoka monga la yɛ?

 ⁹ Ngande wakokaso mbokoya mbetawɔ ndo okitanyiya wa Nɔa? Sho salaka dui sɔ lo nsukɛ kanyi ya Jehowa lo kɛnɛ kendana la ɔlɔlɔ, lo ntona dia monga ase andja wa Satana ndo lo mbetsha Jehowa lo dihole dia ntondo. (Mat. 6:33; Jni. 15:19) Lo mɛtɛ, l’ɔtɛ w’ɛkɔkɔ ɛsɔ mbahatolange andja ɔnɛ. Ɛnyɛlɔ, lam’ele takɔshi yɛdikɔ ya nkitanyiya ɛlɛmbɛ wa Nzambi lo dikambo di’awui wa dieyanelo ndo diwala, anto efula koka ntɛkɛta kɔlɔ lo dikambo diaso lo tita nsango. (Adia Malaki 3:17, 18.) L’ɛnyɛlɔ ka Nɔa, hatoke anto wɔma. Sho mbokaka Jehowa wɔma, mbuta ate sho mbɔlɛmiyaka efula ndo hatosale kɛnɛ kawonyangiya. Sho mbeyaka dia Nde oto mbakoka tosha lɔsɛnɔ la pondjo.—Luka 12:4, 5.

¹⁰ Yambola ɔnɛ: ‘Onde layotetemala nsala kɛnɛ kele ɔlɔlɔ lo washo wa Nzambi kaanga etena kasɔka kana kamɔnyɔla anto akina? Onde lekɔ l’eshikikelo dia Jehowa kokaka nkotsha ehomba wa nkumbo kami kaanga etena kaya lɔsɛnɔ wolo?’ Naka wɛ ndjaɛkɛ le Jehowa ndo mbokitanyiya oko wakasale Nɔa, kete wɛ koka monga l’eshikikelo dia Jehowa ayokokotshɛ ehomba ayɛ.​—Flpɛ. 4:6, 7.

11. Ekakatanu akɔna wa weke waki la Danyɛlɛ ndo angɛnyi ande asato la Babilɔna? (Enda osato wele lo mbɔtwɛlɔ.)

¹¹ Naa ekakatanu ɛmɔtshi waki la Danyɛlɛ? Danyɛlɛ akatshutshuyama dia todjasɛ la Babilɔna, osomba okina wakalole la tozambizambi ta kashi ndo awui w’ɛdiɛngɛ. Anto wa lɛkɔ konangaka ase Juda ndo wakawaɔlaka vɔ la Jehowa Nzambi kawɔ. (Os. 137:1, 3) Dui sɔ diakahombe nyangiya Danyɛlɛ ndo ase Juda akina wakalangaka Jehowa! Ndo nto, anto efula wakendaka Danyɛlɛ nde l’angɛnyi ande asato Hananiya, Mishaɛlɛ ndo Azariya nɛ dia vɔ wakalowanyemaka dia tokambɛ nkumekanga ka la Babilɔna. Vɔ wakawatɛ dia ndɛ mbo ya ndɛ yakalɛka nkumekanga, mbidja ndo diangɔ diahalange Jehowa di’ekambi ande ndɛ. Koko Danyɛlɛ kondjadja “mindo la diangɔ di’amɛna diakalɛka nkumekanga.”​—Dan. 1:5-8, 14-17.

12. a) Woho akɔna w’onto waki Danyɛlɛ? b) Ngande wakɔsaka Jehowa Danyɛlɛ?

¹² Danyɛlɛ aki l’okakatanu okina wakakoke mɛnama ntondo oko bu wolo efula. Nde aki l’akoka efula ndo l’ɔtɛ wa dui sɔ, nkumekanga akawosha ɛkɛndɛ wa laande. (Dan. 1:19, 20) Koko, Danyɛlɛ komonga l’otako kana mfɔnya dia kanyi yande yakongaka dimɛna tena tshɛ. Nde akatetemala monga l’okitshakitsha ndo akeye elelo ande. Nde akataka mbala tshɛ dia Jehowa mbakokimanyiya dia ntondoya. (Dan. 2:30) Ohokanyiya dikambo nɛ: Jehowa akashile Danyɛlɛ l’ɔnɔngɔ wa Nɔa ndo Jɔbɔ oko ɛnyɛlɔ ka dimɛna ka ndjela. Etena kaki Danyɛlɛ ɔlɔngɔlɔngɔ mbakawɔshi Jehowa oko onto ɔlɔlɔ oko Nɔa nde la Jɔbɔ wanɛ waki ekambi wa Jehowa wa kɔlamelo lo lɔsɛnɔ lawɔ l’otondo. Jehowa akayaɛkɛ mɛtɛ le Danyɛlɛ! Ndo ngasɔ mbakidiɔ nɛ dia Danyɛlɛ akatshikala la kɔlamelo ndo l’okitanyiya le Nzambi lɔsɛnɔ lande l’otondo. Etena kaki Danyɛlɛ l’ɛnɔnyi suke la 100, ondjelo wa Nzambi akawotɛ ɛtɛkɛta ɛnɛ: “Danyɛlɛ le, wɛ onto la nɛmɔ efula.”​—Dan. 10:11.

13. L’ɔkɔkɔ akɔna ondo wakakimanyiya Jehowa Danyɛlɛ dia monga lo dihole dia laadiko?

¹³ Lam’ele Jehowa akawosukɛ, Danyɛlɛ akonge ɔlɔhɛ wa laadiko, ntondo lo diolelo dia Babilɔna ndo oma laasɔ lo diolelo dia Mediya la Pɛrɛsiya. (Dan. 1:21; 6:1, 2) Ondo Jehowa akasale dia Danyɛlɛ monga lo dihole dia laadiko sɔ l’oyango wa nde nkimanyiya ekambi ande, oko wakasale Yɔsɛfu l’Edjibito ndo Ɛsta la Mɔrdɛkayi la Pɛrɛsiya. * (Dan. 2:48) Onde wɛ koka nkanyiya woho wakayaoke Ɛzɛkiyɛlɛ ndo ase Juda akina waki lo lɔhɔmbɔ etena kakawɛnyi woho wakakambe Jehowa  la Danyɛlɛ dia mbakimanyiya? Dui sɔ diakahombe mbakeketsha efula!

14, 15. a) Ngande wafɔna dikambo diaso la dia Danyɛlɛ? b) Wetshelo akɔna wakoka ambutshi nkondja oma le ambutshi wa Danyɛlɛ ɛlɔ kɛnɛ?

¹⁴ Ngande wakokaso mbokoya mbetawɔ ndo okitanyiya wa Danyɛlɛ? Andja wasɛnaso ɛlɔ kɛnɛ ndola tɔɔ l’akambo wa mindo ndo ɛtɛmwɛlɔ wa kashi. Anto sɛngiyamaka oma le Babilɔna ka woke, tshunda di’ɛtɛmwɛlɔ wa kashi wa l’andja w’otondo dielɛ Bible ɔnɛ “edjaselo k’ɛdiɛngɛ.” (Ɛny. 18:2) Koko sho tekɔ oko angɛndangɛnda l’andja ɔnɛ. Etombelo wele la dui sɔ ko, anto mɛnaka dia sho ntshikitana efula la wɔ ndo vɔ tɔsɔkaka. (Makɔ 13:13) Koko, l’ɛnyɛlɔ ka Danyɛlɛ, nyɛsɔ toyasukanya la Nzambi kaso, Jehowa. Naka sho monga l’okitshakitsha, ndjaɛkɛ le Jehowa ndo mbokitanyiya, kete nde ayotɔsa sho lawɔ oko anto w’ohomba.​—Han. 2:7.

¹⁵ Ambutshi koka nkondja wetshelo w’ohomba oma le ambutshi wa Danyɛlɛ. Etena kaki Danyɛlɛ dikɛnda la Juda, anto efula wakoodinge waki kɔlɔ efula. Koko, nde akodiama dia nanga Jehowa. Onde dui sɔ diakasalema osalemasalema? Ndooko. Ambutshi ande wakawetsha akambo wendana la Jehowa. (Tok. 22:6) Kaanga lokombo Danyɛlɛ lalembetshiya “Nzambi kele Shushi yami,” mɛnyaka di’ambutshi ande wakalangaka Jehowa. (Dan. 1:6, nɔtɛ) Ambutshi le, nyonge la solo dia lotutsha etena ketshanyu ananyu akambo wendana la Jehowa. Tanyohekɔke. (Ɛf. 6:4) Nyɔlɔmbake kaamɛ la wɔ. Nyɔlɔmbake lo dikambo diawɔ. Nyodje welo w’efula dia mbaetsha dia nanga kɛnɛ kata Jehowa dia kekɔ ɔlɔlɔ ndo Jehowa ayonyɔtshɔkɔla efula.​—Os. 37:5.

16, 17. Ekakatanu akɔna waki la Jɔbɔ lo tena diotshikitanyi dia lɔsɛnɔ lande?

¹⁶ Naa ekakatanu ɛmɔtshi waki la Jɔbɔ? Jɔbɔ akahomana l’ekakatanu wa wolo lo lɔsɛnɔ lande. Ntondo, Jɔbɔ aki “onto la woke efula oleki anto tshɛ wa lo Ɛstɛ.” (Jɔbɔ 1:3) Nde aki l’ɔngɔnyi w’efula ndo anto efula wakaweyaka ndo wakɔlɛmiyaka efula. (Jɔbɔ 29:7-16) Kaanga mbakidiɔ ngasɔ, Jɔbɔ kofɔnya dia nde akaleke anto akina kana mfɔnya ɔnɛ nde komonga l’ohomba wa Nzambi. Sho mbeyaka dui sɔ nɛ dia Jehowa akawelɛ ɔnɛ “okambi ami” ndo akate lo dikambo diande ɔnɛ: “Nde ekɔ kanga losembwe ndo onto lele la olowanyi, loka Nzambi wɔma ndo lakayanganya la kɛnɛ kele kɔlɔ.”​—Jɔbɔ 1:8.

¹⁷ Koko, lɔsɛnɔ la Jɔbɔ lakatshikitana tshɛ lo tshɛ la shashimuya. Nde akashisha ɛngɔ tshɛ kaki la nde ndo nde akayɔkɔmɔ efula polo lo nkombola nyɔi. Ɛlɔ kɛnɛ, sho mbeyaka dia Satana mbaki lo kiɔkɔ y’ekakatanu wa Jɔbɔ. Nde akate dia Jɔbɔ akakambɛka Jehowa l’eyango wa lokaki. (Adia Jɔbɔ 1:9, 10.) Jehowa kɔmbɔsa ɛtɛkɛta ɛsɔ oko  dui dia tshitshɛ. Kakɔna kakandahombe nsala dia mɛnya ɔnɛ Satana ekɔ kanga kashi ka kɔlɔ? Nde akasha Jɔbɔ diaaso dia mɛnya dia nde ekɔ la kɔlamelo le Nzambi ndo mɛnya dia nde akokambɛka la ngandji.

18. a) Kakɔna kakambiya lo dikambo dia Jɔbɔ? b) Wetshelo akɔna wambotokondja lo dikambo dia Jehowa lo yoho yakandasalɛ Jɔbɔ akambo?

¹⁸ Satana akalɔsha Jɔbɔ la ngala tshɛ mbala ko mbala ndo akookonya dia nde mfɔnya ɔnɛ Nzambi mbakɔɔlɔshaka. (Jɔbɔ 1:13-21) Oma laasɔ, apami asato wakataka dia wekɔ angɛnyi wa Jɔbɔ wakawotɛ akambo wa kɔlɔ. Vɔ wakate dia nde aki kanga kɔlɔ ndo ɔnɛ Nzambi mbakawosha dilanya. (Jɔbɔ 2:11; 22:1, 5-10) Kaanga mbaki akambo asɔ tshɛ, Jɔbɔ akatshikala la kɔlamelo le Jehowa. Ekɔ mɛtɛ dia lo tena dimɔtshi Jɔbɔ akatɛkɛta akambo w’enginya. (Jɔbɔ 6:1-3) Koko Jehowa akashihodia dia Jɔbɔ akasale dui sɔ l’ɔtɛ wakinde la paa ndo wakandakɔmɔ. Jehowa akɛnyi dia Jɔbɔ kombɔsɛka pondjo, kaanga mbakɔlɔsha Satana lele kanga ngala k’efula ndo mbakandɔtɛngaka mbala la mbala. L’ɔkɔngɔ w’ehemba wa wolo ɛsɔ nkomɛ, Jehowa akasha Jɔbɔ diangɔ diaki la nde ndodia l’ahende ndo ɛnɔnyi ekina 140 wa lɔsɛnɔ. (Jak. 5:11) L’etena kɛsɔ, Jɔbɔ akatetemala kambɛ Nzambi l’otema ande tshɛ. Ngande weyaso dui sɔ? Nɛ dia Ɛzɛkiyɛlɛ 14:14, divɛsa diɔsami ɔtɛ wa sawo diaso diakafundama ɛnɔnyi nkama l’ɔkɔngɔ wa Jɔbɔ mvɔ.

19, 20. a) Ngande wakokaso mbokoya mbetawɔ ndo okitanyiya wa Jɔbɔ? b) Ngande wakokaso mɛnya anto akina kɛtshi oko wasala Jehowa?

¹⁹ Ngande wakokaso mbokoya mbetawɔ ndo okitanyiya wa Jɔbɔ? Oyadi ekakatanu akɔna wele la so, totetemale mbetɛ Jehowa onto loleki ohomba lo lɔsɛnɔ laso. Toyaɛkɛ le nde tshɛ lo tshɛ ndo towokitanyiya la otema aso tshɛ. Lo mɛtɛ, tekɔ la ɛkɔkɔ efula wa nsala dui sɔ ndeka Jɔbɔ. Ohokanyiya dikambo dia kɛnɛ keyaso ɛlɔ kɛnɛ. Sho mbeyaka akambo efula wendana la Satana ndo toho takamba la nde. (2 Kɔr. 2:11) L’ekimanyielo ka Bible, djekoleko lo dibuku dia Jɔbɔ, sho mbeyaka lande na katshika Nzambi asui. L’ekimanyielo ka prɔfɛsiya ka Danyɛlɛ, sho mbeyaka dia Diolelo dia Nzambi ekɔ lowandji la mɛtɛ lalɔmbwama oma le Yeso Kristo. (Dan. 7:13, 14) Ndo sho mbeyaka dia kema edja, Diolelo sɔ diayanga mbolɛ lo nkɛtɛ k’otondo ndo komiya asui tshɛ.

²⁰ Akambo wakahomana la Jɔbɔ tetshaka nto dia monga la kɛtshi etena kasowa anangɛso. L’ɛnyɛlɔ ka Jɔbɔ, vɔ koka ntɛkɛta akambo w’enginya. (Ond. 7:7) Koko hatohombe monga la kanyi ya kɔlɔ lo dikambo diawɔ kana mbuta ɔnɛ wakasale dui dimɔtshi dia kɔlɔ. Koko, sho pombaka nsala la wolo dia ndjadja lo dihole diawɔ. Naka sho nsala dui sɔ, kete tayonga oko Jehowa, Shɛso lele la ngandji ndo kɛtshi.​—Os. 103:8.

21. Ngande watohola ɛtɛkɛta wa lo 1 Petero 5:10 akambo wakahomana la Nɔa, Danyɛlɛ ndo Jɔbɔ?

²¹ Nɔa, Danyɛlɛ ndo Jɔbɔ wakasɛnaka lo tena diotshikitanyi dia l’ɔkɔndɔ ndo vɔ waki l’ekakatanu wotshikitanyi efula. Koko, vɔ tshɛ wakakikɛ ekakatanu awɔ. Akambo wakahomana la wɔ toholaka kɛnɛ kakate ɔpɔstɔlɔ Petero ate: “L’ɔkɔngɔ wa nyu nsowa lo tshanda mɔtshi, Nzambi koludi tɔɔ la ɔlɔlɔ waheyama mbɛdika, . . . ayoshidiya olowanyelo anyu. Nde ayonyokimanyiya dia nyu ntshikala nge, nde ayonyokeketsha, nde ayonyoshikikadia nge.”​—1 Pe. 5:10.

22. Kakɔna kayoteka lo sawo diayela?

²² Ɛtɛkɛta wele lo 1 Petero 5:10 wekɔ mɛtɛ ndo lo dikambo di’ekambi wa Nzambi wa nshi nyɛ. Jehowa toshikikɛka dia nde ayokimanyiya ekambi ande dia monga nge ndo nkeketala. Sho tshɛ nangaka dia Jehowa tokeketsha ndo sho nangaka monga nge ndo ntshikala la kɔlamelo le nde. Diakɔ diele, sho nangaka mbokoya mbetawɔ ndo okitanyiya wa Nɔa, Danyɛlɛ ndo Jɔbɔ. Lo sawo diayela, tayeka dia apami asato asɔ wakatshikala la kɔlamelo le Jehowa nɛ dia vɔ wakaweyaka mɛtɛ. Lo mɛtɛ, vɔ “[waka]shihodia akambo tshɛ” wakandalange dia vɔ nsala. (Tok. 28:5) Ndo sho koka nsala woho akɔ waamɛ.