1. Kakɔna kɛnya di’Afundelo waki ohomba le Yeso?

 OHƆSA dia wɛ ekɔ lo mpokamɛ etena ketsha Yeso. Mbala efula, nde akashilaka Afundelo w’Ekila oma l’ɔtɛ! Diakɔ diele, l’ɛtɛkɛta ande wa ntondo wakafundama l’ɔkɔngɔ wa batisimu kande ndo l’ɛtɛkɛta ande ɛmɔtshi w’ekomelo wa la ntondo ka nyɔi kande, Yeso akaashile oma l’Afundelo. b (Eoh. 8:3; Os. 31:5; Luka 4:4; 23:46) Ndo l’edja k’ɛnɔnyi esato l’etenyi wa lam’asa awui asɔ ahende, mbala efula Yeso akadiaka ndo akashilaka Afundelo lo sɛkɛ ndo akaalembetshiyaka.​—Mat. 5:17, 18, 21, 22, 27, 28; Luka 4:16-20.

2. Kakɔna kakakimanyiya Yeso dia nde mbeya Afundelo dimɛna etena kakandayolaka? (Enda osato wele lo lohoso.)

² Ɛnɔnyi efula la ntondo ka nde ntatɛ olimu ande, Yeso akadiaka ndo akahokamɛka Ɔtɛkɛta wa Nzambi mbala la mbala. Aha la taamu, la ngelo, nde akokaka Mariya nde la Yɔsɛfu washila awui w’oma l’Afundelo lo asawo awɔ wa lo nkumbo wa lushi la lushi. c (Eoh. 6:6, 7) Sho koka monga l’eshikikelo dia Yeso akatshɔɔka la shinangɔnga lushi la Sabato tshɛ kaamɛ la nkumbo kande. (Luka 4:16) Etena kakinde lɛkɔ, nde akahokamɛka la yambalo tshɛ Afundelo wakadiemaka. L’edjedja ka wonya, Yeso akayeka dia mbadia Efundelo w’Ekila lo ndamɛ. Etombelo waki la dui sɔ ele, Yeso kokomɛ tsho lo mbeya afundelo dimɛna, koko akaalangaka ndo aketawɔ dia vɔ monga la shɛngiya l’etsha ande. Ɛnyɛlɔ, tohɔ kɛnɛ kakatombe lo tɛmpɛlɔ lam’aki  Yeso l’ɛnɔnyi 12 eto. Embetsha wakeyaka Ɛlɛmbɛ wa Mɔsɛ dimɛna ‘wakambaka lo menda yimba ya Yeso ndo ekadimwelo ande.’​—Luka 2:46, 47, 52.

3. Kakɔna kayotɔsɛdingola lo sawo nɛ?

³ Sho lawɔ koka mbeya ndo nanga Ɔtɛkɛta wa Nzambi naka sho mbadiaka Afundelo mbala la mbala. Ngande wakokaso ndeka nkondja wahɔ oma lo kɛnɛ kadiaso? Sho koka mbeka oma lo kɛnɛ kakatɛ Yeso wanɛ wakeyaka Ɛlɛmbɛ wa Mɔsɛ, mbidja ndo afundji, Afarisɛ ndo Asadukɛ. Ewandji w’ɛtɛmwɛlɔ ɛsɔ wakadiaka Afundelo mbala la mbala, koko vɔ kokondjaka wahɔ oma lo kɛnɛ kakawadiaka. Yeso akake epole ɔsɛkɛ lo toho tosato tele apami asɔ kokondjaka wahɔ w’efula oma l’Afundelo. Kɛnɛ kakandawatɛ ayotokimanyiya dia 1) sho ndowanya dikoka diaso dia nshihodia kɛnɛ kadiaso, 2) nkondja wahɔ oma lo diangɔ di’oshinga wolo dia lo nyuma, ndo 3) mbetawɔ dia Ɔtɛkɛta wa Nzambi monga la shɛngiya le so.

4. Kakɔna katetsha Luka 10:25-29 lo kɛnɛ kendana la wadielo w’Ɔtɛkɛta wa Nzambi?

⁴ Sho nangaka nshihodia kitshimudi ya kɛnɛ kadiaso l’Ɔtɛkɛta wa Nzambi. Koko naka hatendji ɔlɔlɔ, kete hatotokondja wahɔ tshɛ lo tshɛ oma lo kɛnɛ kadiaso. Ɛnyɛlɔ, nyɛsɔ tɔsɛdingole sawo dia Yeso nde la “onto ɔmɔtshi lakayashaka tshavu lo Ɛlɛmbɛ.” (Adia Luka 10:25-29.) Etena kakawombola pami kɛsɔ dia mbeya kɛnɛ kakandahombe nsala dia nkondja lɔsɛnɔ la pondjo, Yeso akokimanyiya dia nde ntana okadimwelo l’Ɔtɛkɛta wa Nzambi lo mombola ate: “Kakɔna kofundami l’Ɛlɛmbɛ? Atoyadiaka?” Pami kɛsɔ aki l’akoka wa mbisha okadimwelo wa dimɛna lo nshila Afundelo lo kɛnɛ kendana la nanga Nzambi la wonyaso onto. (Lɛw. 19:18; Eoh. 6:5) Koko tolembete kɛnɛ kakandayota l’ɔkɔngɔ: “Akɔna mɛtɛ ele wonyami?” Pami kɛsɔ akɛnya dia nde koshihodiaka mɛtɛ kitshimudi ya kɛnɛ kakandadiaka. Etombelo wakonge la dui sɔ ele, nde kombeya woho wa nkamba dimɛna l’avɛsa asɔ lo lɔsɛnɔ lande.

5. Ngande wakoka dɔmbɛlɔ la wadielo w’ɔkɔkɛ tokimanyiya dia nshihodia kɛnɛ kadiaso?

⁵ Sho koka mfudia eokelo kaso k’Ɔtɛkɛta wa Nzambi lo monga la mbekelo y’amɛna ya wadielo. Awui wayela anɛ koka kokimanyiya dia nsala dui sɔ. Lɔmba la ntondo ka wɛ ntatɛ la wadielo. Tekɔ l’ohomba w’ekimanyielo ka Jehowa dia sho nshihodia Afundelo. Ɔnkɔnɛ, sho koka mbɔlɔmba nyuma kande k’ekila dia sho mbidja yimba lo kɛnɛ kadiaso. Oma laasɔ adia ɔkɔkɛ. Kɛsɔ ayokokimanyiya dia wɛ nshihodia kɛnɛ katayadia. Wɛ koka mɛna ɔlɔlɔ mbadia la dui dia wolo kana ndjela wadielo wa Bible wakadjama l’eshinga. Naka wɛ mpokamɛ awui wakadjama l’eshinga ndo wɛ mbaɛna lo dikatshi, kɛsɔ koka kokimanyiya dia wɛ nshihodia, mbohɔ ndo mbeka akambo efula oma lo wadielo ayɛ w’Ɔtɛkɛta wa Nzambi. (Jak. 1:8) Naka wɛ ambomana la mbadia, lɔmba Jehowa nto dia mbosha losaka l’ɔtɛ wa woshasha w’Ɔtɛkɛta ande ndo lɔmbande dia nde kokimanyiya dia wɛ nkamba la kɛnɛ kadishayɛ.

6. Lande na kele ndjaoka ambola ndo mbɔsa nɔtɛ koka kokimanyiya etena kadiayɛ? (Enda ndo osato.)

⁶ Awui ahende wayela anɛ koka kokimanyiya dia wɛ nshihodia Bible. Yaoka ambola lo kɛnɛ kadiayɛ. Etena kadiayɛ ɔkɔndɔ ɔmɔtshi, yambola ɔnɛ: ‘Lo dikambo di’anto akɔna watɛkɛtawɔ? Onto akɔna atɛkɛta? Otsha le na atɛkɛtande, ndo lande na? Lende ndo l’etena kakɔna kakasalema dui dakɔ?’ Ambola  wa ngasɔ wayokokimanyiya dia nkana yimba ndo nkamba la tokanyi toleki ohomba ta lo divɛsa. Ndo nto, ɔsaka nɔtɛ etena katayadia. Etena kafundayɛ, sala la wolo dia mbidja yimba lo tɔtɛkɛta, kana la tɔ yimba ndo kɛsɔ ayokokimanyiya dia wɛ nshihodia dimɛna dimɛna. Mfunda kokimanyiyaka nto dia wɛ mbohɔ kɛnɛ kadishayɛ. Wɛ koka mfunda ambola, akambo wamboyotana oma lo eyangelo wosadiyɛ, mfunda lo tshena pe awui woleki ohomba, mfunda woho wakokayɛ kamba la kɛnɛ kadishayɛ, kana mfunda tsho woho wayaokayɛ lo kɛnɛ kendana la kɛnɛ kadishayɛ. Mfunda awui asɔ koka kokimanyiya dia mbɔsa Ɔtɛkɛta wa Nzambi oko losango lendana la yɛ.

7. Dionga diakɔna diahombaso monga ladiɔ etena kadiaso ndo lande na? (Mateo 24:15)

⁷ Yeso akatɛkɛta dia dionga dimɔtshi di’ohomba diahombaso monga ladiɔ naka sho nangaka nshihodia kɛnɛ kadiaso l’Ɔtɛkɛta wa Nzambi, dionga diakɔ ko shɛnɔdi. (Adia Mateo 24:15.) Shɛnɔdi kɛdikɛdi na? Shɛnɔdi ekɔ dikoka dia nshihodia woho wɔtɔnɛ tokanyi tohende, woho watshikitanatɔ ndo nshihodia kɛnɛ kahokama esadi eto. Laadiko dia laasɔ, oko wakadiɛnya Yeso, tekɔ l’ohomba wa shɛnɔdi dia nshihodia woho wakotshama prɔfɛsiya ya lo Bible. Tekɔ nto l’ohomba wa dionga sɔ dia sho nkondja wahɔ tshɛ lo tshɛ oma lo kɛnɛ tshɛ kadiaso oma lo Bible.

8. Ngande wakokaso mbadia la shɛnɔdi?

⁸ Jehowa mbishaka ekambi ande shɛnɔdi. Ɔnkɔnɛ, lɔmbande dia kokimanyiya dia nkɛnɛmɔla dionga sɔ. (Tok. 2:6) Ngande wakokayɛ mbɔtɔnganyiya etsha ayɛ la dɔmbɛlɔ diayɛ? Sɛdingola la yambalo tshɛ kɛnɛ kadiayɛ, ndo nsala dia mbeya woho wɔtɔnɛtɔ l’akambo weyayɛ. Dia wɛ nkondja ekimanyielo, nkamba la dihomɔ diatokimanyiya dia nshihodia Bible, ɛnyɛlɔ, Dibuku di’eyangelo di’Ɛmɛnyi wa Jehowa. Dihomɔ sɔ diayokokimanyiya dia wɛ nshihodia elembetshielo w’avɛsa amɔtshi wa lo Bible ndo  mɛna toho takokayɛ nkamba la wɔ lo lɔsɛnɔ layɛ. (Hɛb. 5:14) Naka wɛ mbadia la shɛnɔdi, kete eokelo kayɛ k’Afundelo kayofula.

9. Naa dui dimɔtshi dia mɛtɛ di’ohomba di’oma l’Afundelo diakɔnyɔlaka Asadukɛ?

⁹ Asadukɛ wakayaekesanyiya l’abuku atanu wa ntondo wa l’Afundelo wa lo Hɛbɛru, koko vɔ kombetawɔka akambo wa mɛtɛ w’ohomba waki l’abuku wakasambiyama asɔ. Ɛnyɛlɔ, tɔsɛdingole woho wakakadimola Yeso etena kakawombola Asadukɛ lo kɛnɛ kendana la eolwelo. Nde akawambola ate: “Onde nyu nyatadiaka ɔkɔndɔ wakafunde Mɔsɛ lo dikambo dia dikombokombo di’atɛndɛ ɔnɛ Nzambi akawotɛ ate: ‘Dimi kele Nzambi ka Abrahama, Nzambi ka Isaka ndo Nzambi ka Jakɔbɔ’?” (Makɔ 12:18, 26) Kaanga mbakadiaka Asadukɛ divɛsa sɔ mbala efula, dimbola dia Yeso diakɛnya dia vɔ wakɔnyɔlaka dikambo dimɔtshi dia mɛtɛ di’ohomba dia l’Afundelo, mbuta ate wetshelo wendana la eolwelo.​—Makɔ 12:27; Luka 20:38. d

10. Lo na ahombaso mbidja yimba etena kadiaso?

¹⁰ Wetshelo akɔna wakokaso nkondja? Etena kadiaso, hatolange mpandja wetshelo ɔmɔtshi wakoka divɛsa kana ɔkɔndɔ ɔmɔtshi wa lo Bible teetsha. Hatolange nshihodia tsho paka wetshelo w’etatelo, koko ndo akambo mɛtɛ wa lotshimola ndo atɔndɔ w’ohomba.

11. Lo yoho yɔtɔnɛ la 2 Timɔte 3:16, 17, ngande wakokayɛ nkondja wahɔ oma lo diangɔ di’oshinga wolo dia lo Bible?

¹¹ Ngande wakokaso ntana diangɔ di’oshinga wolo dia lo nyuma etena kadiaso Bible? Tɔsɛdingole kɛnɛ kata 2 Timɔte 3:16, 17. (Adia.) Tolembete dia “Afundelo tshɛ wekɔ . . . ohomba” dia 1) mbetsha, 2) dia mpangwɛ, 3) dia mbidja akambo l’ɔnɔngɔ, ndo dia 4) mpokola. Wɛ koka nkondja wahɔ ɛnɛi ɛnɛ oyadi oma l’abuku wa lo Bible wahakambe la yɛ mbala la mbala. Sɛdingola ɔkɔndɔ ɔmɔtshi dia mɛna kɛnɛ kaketshawɔ lo kɛnɛ kendana la Jehowa, la sangwelo diande kana lo kɛnɛ kendana l’atɔndɔ waki Nzambi. Tɔsɛdingole woho wele lohango lekɔ ohomba efula. Enda woho wele nsala dui sɔ lo ndjela divɛsa diakɔ koka kokimanyiya dia mbeya ndo minya mbekelo ya kɔlɔ l’oyango wa ntshikala la kɔlamelo l’Ɔtɛkɛta wa Nzambi. Sɛdingola woho wele nkamba la divɛsa diakɔ koka mbidja akambo l’ɔnɔngɔ kana nɔngɔsɔla kanyi mɔtshi ya kɔlɔ, kana dui dimɔtshi diakate onto ɔmɔtshi l’olimu w’esambishelo. Ndo yanga oseka ohokwelo tshɛ washa divɛsa diakɔ wakoka kokimanyiya dia mɛna akambo woho wawaɛna Jehowa. Naka wɛ ntetemala nama wahɔ ɛnɛi ɛsɔ lo yimba, kete wɛ ayoshola diangɔ di’oshinga wolo dia lo nyuma diakoka kokimanyiya dia nkondja wahɔ oma lo wadielo ayɛ wa Bible.

12. Lande na kakambola Yeso Afarisɛ dimbola di’ɔnɛ: “Onde nyu nyatadiaka?”

¹² Yeso nde lawɔ akoke dimbola ate: “Onde nyu nyatadiaka?” dia mɛnya di’Afarisɛ waki la kanyi ya kɔlɔ lo dikambo di’Afundelo. (Mat. 12:1-7) e Lo diaaso sɔ, Afarisɛ wakate di’ambeki wa Yeso wakɔnyɔla ɔlɛmbɛ wendana la lushi la Sabato. Yeso akakadimola lo nshila bɛnyɛlɔ pende dia l’Afundelo ndo akashile awui w’oma lo divɛsa dimɔtshi di’oma lo dibuku dia Hɔsɛya dia mɛnya di’Afarisɛ koshihodiaka lande na kakadjama ɔlɛmbɛ wendana la Sabato ndo vɔ kombokaka anto kɛtshi. Lande na kele apami asɔ kombetawɔ dia wadielo awɔ w’Ɔtɛkɛta wa Nzambi monga la shɛngiya le wɔ? Aki nɛ dia vɔ wakadiaka la diɔnyɔ ndo la yimba y’otako. Lɔkɛwɔ lawɔ lɔsɔ lakaashimbe dia nshihodia kɛnɛ kakawadiaka.​—Mat. 23:23; Jni. 5:39, 40.

13. L’oyango akɔna wahombaso mbadia Bible ndo lande na?

¹³ Sho mbekaka oma l’ɛtɛkɛta wa Yeso dia sho pombaka mbadiaka Bible l’oyango w’oshika. Otshikitanyi l’Afarisɛ, sho pombaka monga l’okitshakitsha ndo mbetawɔ dia mbeka. Sho pombaka ‘mbetawɔ la memakana tshɛ di’ɔtɛkɛta monɛma l’etema aso.’ (Jak. 1:21) Naka tekɔ la memakana, kete tayetawɔ di’Ɔtɛkɛta wa Nzambi mbika edio l’etema aso. Naka hatosadi la wolo dia mbewɔ yimba ya diɔnyɔ ndo y’otako kete wetshelo w’oma lo Bible wendana la kɛtshi ndo la ngandji honga la shɛngiya le so.

14. Ngande wakokaso mbeya dia kana sho mbetawɔka dia Bible monga la shɛngiya le so? (Enda ndo esato.)

¹⁴ Woho wasalɛso anto akina akambo mɛnyaka dia kana sho tshikaka Ɔtɛkɛta wa Nzambi dia vɔ monga la shɛngiya le so kana bu. Afarisɛ kombetawɔ di’Ɔtɛkɛta wa Nzambi minanda etema awɔ. Ndo etombelo waki la dui sɔ  ele, vɔ ‘wakaanya anto waha l’onongo.’ (Mat. 12:7) Woho akɔ waamɛ mbele, woho wɔsaso anto akina ndo waasalɛso akambo mɛnyaka dia kana sho mbetawɔka di’Ɔtɛkɛta wa Nzambi monga la shɛngiya le so. Ɛnyɛlɔ, onde sho tɛkɛtaka dikambo dia waonga w’amɛna wɛnaso le anto akina, ko kana sho mongaka suke dia ntɛkɛta dikambo dia munga yawɔ? Onde sho mongaka la kɛtshi ndo suke dia dimanyiya, ko kana sho mɔnyɔlaka anto akina ndo mbaombɛka tokumbɛkumbɛ etena katosalɛwɔ kɔlɔ? Ekadimwelo aso lo ambola asɔ koka mɛnya dia kana sho mbetawɔka dia kɛnɛ kadiaso monga la shɛngiya lo tokanyi taso, lo nsaki yaso ndo l’etsha aso.​—1 Tim. 4:12, 15; Hɛb. 4:12.

15. Ngande wakɔsaka Yeso Afundelo w’Ekila?

¹⁵ Yeso akalangaka Afundelo w’Ekila ndo ɛtɛkɛta wa l’Osambo 40:8 wakatatshi woho wakɔsaka Yeso Ɔtɛkɛta wa Nzambi. Vɔ mbutaka ɔnɛ: “Dia nsala lolango layɛ, wɛ Nzambi kami, kele ɔngɛnɔngɛnɔ ami. Ndo ɛlɛmbɛ ayɛ nyɔngɔmɛ etale l’etei kami.” Lam’ele Yeso akalangaka Afundelo, nde aki l’ɔngɛnɔngɛnɔ ndo akatetemala kambɛ Jehowa. Sho lawɔ koka monga l’ɔngɛnɔngɛnɔ ndo ntondoya naka sho mbadiaka Ɔtɛkɛta wa Nzambi ndo naka sho mbeka dia mboolanga.​—Os. 1:1-3.

16. Lo toho takɔna takombolayɛ nyomoleka nkondja wahɔ w’efula oma lo wadielo ayɛ w’Ɔtɛkɛta wa Nzambi? (Enda kiombo yele l’ɔtɛ a dui ɔnɛ: “ Ɛtɛkɛta wa Yeso koka kokimanyiya dia wɛ nshihodia kɛnɛ kadiayɛ.”)

¹⁶ Lo woho wɔtɔnɛ l’ɛtɛkɛta wa Yeso ndo l’ɛnyɛlɔ kande, nyɛsɔ tolowanya akoka aso wa wadielo wa Bible. Sho koka ndowanya eokelo kaso k’avɛsa wa lo Bible lo nɔmbaka, lo mbadiaka la dui di’ɔkɔkɛ, lo mbokaka ambola ndo lo mbɔsaka nɔtɛ ya tomondo. Sho koka nkamba la shɛnɔdi lo nsɛdingola la yambalo tshɛ kɛnɛ kadiaso l’ekanda aso walembetshiya Bible. Sho koka mbeka woho wa kambaka la Bible dimɛna, oyadi kaanga avɛsa wahataleke mbekesanɛ la wɔ, lo nyangaka diangɔ di’oshinga wolo dia lo nyuma l’ɛkɔndɔ wa ngasɔ. Ndo sho koka ntshika di’Ɔtɛkɛta wa Nzambi monga la shɛngiya le so lo monga la dionga dia dimɛna etena kadiaso. Naka sho nsala la wolo dia nkamba l’awui asɔ, kete tayokondja wahɔ efula oma lo wadielo aso wa Bible ndo tayoleka ndjasukanya la Jehowa.​—Os. 119:17, 18; Jak. 4:8.