1, 2. a) Lo yoho yakɔna yafɔna andja wa kɔlɔ ɔnɛ la otshi wa kɔlɔ efula wayanga ndjakema? (Enda osato wele lo mbɔtwɛlɔ.) b) Ngande wayoyaoka onto tshɛ la l’olongo ndo la la nkɛtɛ l’ɔkɔngɔ wa dikongɛ dia kɔlɔ nɛ ndanyema?

OHƆSA dia wɛ ekɔ lo mɛna dikambo nɛ: Otshi wa kɔlɔ efula ekɔ lo ndjakɛndakɛnda lo ɔsɛsɛ wa lokanu ndo alami wele kaamɛ la nde wekɔ lo mbelɛ ɔnɛ: “Enda odo ayakɛndakɛnda!” Lande na katawɔ ngasɔ? Kaanga mbele otshi wa kɔlɔ efula ɔsɔ eke la lɔsɛnɔ ndo mɛnamaka dia ekɔ la yoonge ya dimɛna, wamboofundɛ nyɔi ndo nde ayanga ndjakema. Ekɔ oko nde amboshilaka mvɔ. *—Enda nɔtɛ ka l’ɛse ka dikatshi.

² Andja wa kɔlɔ wasɛnaso ɔnɛ fɔnaka la otshi wa kɔlɔ efula ɔsɔ waya suke la ndjakema. Bible mbutaka ɔnɛ: “Andja ɔnɛ . . . wekɔ lo teete.” (1 Jni. 2:17) Jehowa akɔshi yɛdikɔ dia dikongɛ nɛ diayokomɛ keema edja, ɔnkɔnɛ diɔ diayanga nkomɛ ndooko onyake. Koko otshikitanu w’efula wekɔ lam’asa ekomelo ka dikongɛ nɛ la odiakelo w’otshi wa kɔlɔ efula ɔsɔ. Anto  amɔtshi mbeyaka mfɔnya dia kilombo k’otshi wa kɔlɔ ɔsɔ komonga la losembwe ndo vɔ mbeyaka ntona yɛdikɔ shɔ, walongamɛ dia nde hatodiakema. Koko Jehowa ekɔ shushi ya kokele, ndo yɛdikɔ yande ya ndanya dikongɛ nɛ yekɔ la losembwe la kokele. (Eoh. 32:4) Elanyelo kadiɔ hatotshimbatshimba. L’ɔkɔngɔ wa dikongɛ nɛ ndanyema lo pondjo, onto tshɛ la l’olongo ndo la la nkɛtɛ ayetawɔ dia elombwelo ka Jehowa kaki dimɛna. Ayonga mɛtɛ dimɛna efula!

3. Akambo akɔna anɛi wayeta etena kayoya Diolelo diaki Nzambi?

³ “Andja” wele “wekɔ lo teete” mendanaka la na? Vɔ mendanaka la akambo wa kɔlɔ wasalema lushi la lushi ɛlɔ kɛnɛ. Akambo asɔ tshɛ wayanga mbeta keema edja. Ɔsɔ ekɔ mɛtɛ etenyi kɛmɔtshi ka “lokumu l’ɔlɔlɔ . . . la Diolelo.” (Mat. 24:14) Lo sawo nɛ, tayanga nsɛdingola akambo anɛi wayonyɛma etena kayoya Diolelo diaki Nzambi: Akanga wa kɔlɔ, atshunda wa kɔlɔ, akambo wa kɔlɔ, ndo akambo wetɛ lɔsɛnɔ wolo. Lo dikambo la dikambo, tayɛna 1) shɛngiya yele la wɔ le so ɛlɔ kɛnɛ, 2) kɛnɛ kayosala Jehowa la wɔ, ndo 3) kɛnɛ kayondɔhɛnya la wɔ.

4. Shɛngiya yakɔna yonga la akanga wa kɔlɔ le so ɛlɔ kɛnɛ?

⁴ Akanga wa kɔlɔ wekɔ la shɛngiya yakɔna le so ɛlɔ kɛnɛ? Ɔpɔstɔlɔ Pɔɔlɔ akate dia lo nshi y’ekomelo, “tena dia paa dia wolo mbikikɛ diayoyala.” Oma laasɔ nde akakotsha ate: “Akanga wa kɔlɔ ndo akanga wa lokeso wayoleka mpama lo kɔlɔ.” (2 Tim. 3:1-5, 13) Onde wɛ ambɛnaka akambo asɔ? Efula ka l’atei aso tambodiɛnɛka oma le akanga wa kɔlɔ wele oko asoyanyi wa djawudi, akanga wa kɔngɔdi wahetshana, ndo atshi w’awui wa kɔlɔ efula. Amɔtshi l’atei awɔ hawoshɛ akambo wa kɔlɔ wasalawɔ. Akina sɛmaka dia wekɔ lo nkimanyiya anto, koko lo mɛtɛ vɔ wekɔ akanga wa kɔlɔ. Koko, oyadi kaanga tatadiɛnɛka la dikambo dimɔtshi dia kɔlɔ efula, akanga wa kɔlɔ wekɔ la shɛngiya le so. Sho tataka hemɔ etena kokaso woho wasalɛwɔ ana w’akɛnda, esombe ndo anto akina wahakoke ndjakokɛ akambo la esehe tshɛ. Akanga wa kɔlɔ asɔ wekɔ lo nsala akambo lo yoho yaakonya dia mɛnama oko nyama ya ngala kana oko ɛdiɛngɛ. (Jak. 3:15) Diɛsɛ ko, Ɔtɛkɛta wa Jehowa toshaka elongamelo.

5. a) Diaaso diakɔna dieke la akanga wa kɔlɔ? b) Kakɔna kayokomɛ wanɛ watona ntshikitana?

⁵ Jehowa ayondosala? Ɛlɔ kɛnɛ Jehowa ekɔ lo mbisha akanga wa kɔlɔ diaaso dia ntshikitana. (Isa. 55:7) Kaanga mbele dikongɛ nɛ diayanga ndanyema keema edja, vɔ watalomboshama kilombo k’ekomelo. Ko kakɔna kayokomɛ wanɛ watona ntshikitana ndo wasukɛ dikongɛ nɛ polo l’etena kayoya mfɔnu ka woke? Jehowa akalake dia minya akanga wa kɔlɔ tshɛ oma la nkɛtɛ. (Adia Osambo 37:10.) Ɛlɔ kɛnɛ, anto efula wambeka woho wa mbishɛ akambo wa kɔlɔ wasalawɔ, ndo tena efula vɔ hawolongola dilanya. (Jɔbɔ 21:7, 9) Koko Bible toholaka ɔnɛ: “Washo wa Nzambi mendaka mboka y’onto, ndo Nde mɛnaka wanya ande tshɛ. Wodjima kana dɛdi dia yɔɔ keema lɛnɛ akoka ndjashɛ atshi wa kɔlɔ.” (Jɔbɔ 34:21, 22) Ɔnkɔnɛ ndooko woho wakoka onto ndjashɛ la ntondo ka Jehowa. Nde koka mɛna oseka dikambo tshɛ diasala  akanga wa kɔlɔ. L’ɔkɔngɔ w’Aramangɛdɔna, tayoshishima ahole wakiwɔ, koko hatotowaɛna nto. Vɔ wayonyɛma lo pondjo!—Os. 37:12-15.

6. Waa na wayotshikala etena kayonyɛma akanga wa kɔlɔ, ndo lande na kele ɔsɔ ekɔ lokumu l’ɔlɔlɔ?

⁶ Waa na wayotshikala etena kayonyɛma akanga wa kɔlɔ? Jehowa ndakaka ate: “Akanga wa memakana wayokita nkɛtɛ, ndo vɔ wayɔngɛnangɛnaka heyama la wɔladi w’efula.” Yema l’ɛse l’osambo akɔ waamɛ, sho mbadiaka ɔnɛ: “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.” (Os. 37:11, 29) Waa na wele “akanga wa memakana” ndo “anto w’ɛlɔlɔ”? Akanga wa memakana ele anto wele l’okitshakitsha wetshama oma le Jehowa ndo wookitanyiya. Anto w’ɛlɔlɔ ele wanɛ walanga nsala kɛnɛ kata Jehowa ɔnɛ kekɔ ɔlɔlɔ. Lo andja wa nshi nyɛ, anto wa kɔlɔ ndeka anto w’ɛlɔlɔ efula. Koko l’andja w’oyoyo, akanga wa memakana la anto w’ɛlɔlɔ ato mbayonga, ndo vɔ mbayetɛ nkɛtɛ paradiso!

7. Atshunda wa kɔlɔ wekɔ la shɛngiya yakɔna le so ɛlɔ kɛnɛ?

⁷ Atshunda wa kɔlɔ wekɔ la shɛngiya yakɔna le so ɛlɔ kɛnɛ? Akambo efula wa kɔlɔ wasalema l’andja ɛlɔ kɛnɛ hawoye oma le anto koko oma lo atshunda. Atshunda w’ɛtɛmwɛlɔ wekɔ lo kesa miliyɔ y’anto. Ɛnyɛlɔ, vɔ mbutaka kashi lo kɛnɛ kendana la woho wele Nzambi, vɔ mbutaka dia hatokoke ndjaɛkɛ lo Bible, ndo vɔ kesaka anto lo dikambo dia nshi yayaye y’anto ndo ya nkɛtɛ. Mandji ya kɔlɔ tondjaka ata, awui wa kɔngɔdi ndo vɔ pɛnyahɛnyaka ase wola ndo wanɛ waha l’ekokelo. Mandji shɔ talekaka ngɔna ndo monga la wolo lo monga la shɔnɔdi kana lo ndɛ etshimba. Kɔpanyi ya lokaki ndanyaka hiɛlɛlɛ, ndanyaka diangɔ diakatongama ndo kondjaka wahɔ oma le anto kele anto yema tshitshɛ tsho wonge ɛngɔnyi. Mbokɛmaka hwe dia, atshunda wa kɔlɔ mbele l’onongo w’efula k’asui wele la so l’andja ɛlɔ kɛnɛ.

8. Kakɔna kata Bible kayokomɛ atshunda wɛnama le anto efula oko wekɔ la wolo ɛlɔ kɛnɛ?

⁸ Jehowa ayondosala? Mfɔnu ka woke kayotatɛ etena kayɔlɔsha ewandji wa pɔlitikɛ atshunda w’ɛtɛmwɛlɔ wa kashi tshɛ, wele Bible mbaɔsaka oko womoto la numba lelamɛ ɔnɛ Babilɔna ka Woke. (Ɛny. 17:1, 2, 16; 18:1-4) Atshunda w’ɛtɛmwɛlɔ asɔ wayolanyema tshɛ lo tshɛ. Ko kakɔna kayokomɛ atshunda akina tshɛ wa kɔlɔ? Bible mbaɛdikaka la akona ndo asɛnga nɛ dia vɔ wekɔ lo mɛnama oko wekɔ la wolo ndo wekɔ nge. (Adia Ɛnyɛlɔ 6:14.) Koko tɔ kotshaka dia mandji ndo atshunda akina tshɛ wahasukɛ Diolelo diaki Nzambi wayolanyema. Ɔsɔ ayonga etenyi k’ekomelo ka mfɔnu ka woke. (Jɛr. 25:31-33) L’ɔkɔngɔ wa laasɔ, atshunda wa kɔlɔ hawotonga nto!

9. Lande na kakokaso monga l’eshikikelo dia nkɛtɛ k’oyoyo kayokongɛma dimɛna?

⁹ Kakɔna kayɔhɛna atshunda wa kɔlɔ? L’ɔkɔngɔ wa Aramangɛdɔna, onde tshunda dimɔtshi diayoyala la nkɛtɛ? Bible mbutaka ɔnɛ: “Lo ndjela daka diande, sho tekɔ lo nkonga olongo w’oyoyo ndo nkɛtɛ k’oyoyo, lɛnɛ ayongaka losembwe.” (2 Pet. 3:13) Olongo w’edjedja ndo nkɛtɛ y’edjedja ele mandji ya kɔlɔ ndo anto walɔmbɔlawɔ. L’ɔkɔngɔ wa vɔ minyɛma, kakɔna kayowahɛna? “Olongo w’oyoyo ndo nkɛtɛ  k’oyoyo.” Olongo w’oyoyo mendanaka la lowandji l’oyoyo, Diolelo diokengami la Yeso Kristo nde la anto 144 000 wayolɛ kaamɛ la nde. Nkɛtɛ k’oyoyo mendanaka la anto wayɔlɔmbwama oma le Diolelo diaki Nzambi. Yeso nde la wanɛ wayolɛ kaamɛ la nde wayokoya lo yoho ya kokele Jehowa Nzambi, lele Nzambi kaha la ofukutanu. (1 Kɔr. 14:33) Ɔnkɔnɛ, “nkɛtɛ k’oyoyo” kayokongɛma dimɛna. Apami w’amɛna wayonga dia nkokɛ diangɔ. (Os. 45:16) Apami asɔ wayɔlɔmbwama oma le Kristo la anto 144 000. Ohokanyiya yema etena kayɔhɛnyama atshunda tshɛ wa kɔlɔ la tshunda ɔtɔi diele kaamɛ diahongaki kɔlɔ pondjo!

10. Weho akɔna w’akambo wa kɔlɔ waleka salema lɛnɛ odjashiyɛ, ndo ngande wewɔ la shɛngiya le yɛ ndo le nkumbo kayɛ?

¹⁰ Akambo wa kɔlɔ wekɔ la shɛngiya yakɔna le so ɛlɔ kɛnɛ? Tekɔ lo nsɛna lo andja woludi la awui wa mindo, akambo waha la losembwe ndo awui wa ngala. Awui wa tɔkɛnyɔ salaka dia awui asɔ mɛnama oko wekɔ amɛna etena kɔnyɔlawɔ ɛlɛmbɛ waki Jehowa wendana la ɔlɔlɔ la kɔlɔ. (Isa. 5:20) Lo yoho ya laande ambutshi pombaka nsala la wolo dia nkokɛ anawɔ oma lo tɔsɛngiya ta kɔlɔ ta ngasɔ. Lo mɛtɛ, Akristo wa mɛtɛ tshɛ pombaka nsala la wolo dia nkokɛ diɔtɔnganelo diasawɔ la Jehowa lo andja ɔnɛ wahalɛmiya ɛlɛmbɛ waki Nzambi.

11. Wetshelo akɔna wakondjaso oma lo woho wakalanya Jehowa Sɔdɔma la Ngɔmɔra?

¹¹ Jehowa ayondosala la akambo wa kɔlɔ? Tende kɛnɛ kakasale Jehowa l’ɔtɛ w’akambo wa kɔlɔ wakasalemaka l’osomba wa Sɔdɔma la Ngɔmɔra. (Adia 2 Petero 2:6-8.) Lɔta aki onto ɔlɔlɔ, ndo nde la nkumbo kande wakadiɛnɛ efula l’ɔtɛ w’akambo tshɛ wa kɔlɔ wakasalaka anto wakaadinge. Jehowa akalanya ɛtshi ka kɛtɛ kɛsɔ k’otondo dia nkomiya akambo wa kɔlɔ wakasalemaka lɛkɔ. Koko nde akatshikɛ akanga wa kɔlɔ wele ɛlɔ kɛnɛ “ɛnyɛlɔ.” Oko wakakomiya Jehowa akambo wa mindo tshɛ lo etena kɛsɔ, nde ayanga nkomiya ndo wa nshi nyɛ etena kayondolanya dikongɛ nɛ.

12. Naa akambo amɔtshi wakombolayɛ tosala etena kayonyɛma dikongɛ nɛ?

¹² Kakɔna kayɔhɛna akambo wa kɔlɔ? Lo andja w’oyoyo, tayonga l’akambo efula wa nsala washa ɔngɛnɔngɛnɔ. Ɛnyɛlɔ, tayokadimola nkɛtɛ paradiso ndo tayoka mvudu dikambo diaso shoamɛ ndo dia wakiso wa ngandji. Ndo nto, tayolongola miliyɔ y’anto wayolwama ndo tayowaetsha akambo wendana la Jehowa ndo kɛnɛ tshɛ kamondosalɛ anto. (Isa. 65:21, 22; Ets. 24:15) L’etena kɛsɔ, tayonga l’akambo efula wa nsala wayotoshaka ɔngɛnɔngɛnɔ ndo wayotombolaka Jehowa!

13. Etombelo akɔna wele la ɔtɔmbɔkwɛlɔ wa lo Ɛdɛna?

¹³ Akambo wetɛ lɔsɛnɔ wolo wekɔ la shɛngiya yakɔna le so ɛlɔ kɛnɛ? Andja woludi la akanga wa kɔlɔ, atshunda wa kɔlɔ ndo akambo wa kɔlɔ wambetɛ lɔsɛnɔ wolo. Sho tshɛ diɛnɛka la akambo wele oko ata, wola, kɔngɔdi, hemɔ ndo nyɔi. Akambo wetɛ lɔsɛnɔ wolo asɔ wakatatɛ nɛ dia Satana, Adama ndo Eva wakatɔmbɔkwɛ Jehowa. Ndo sho tshɛ tekɔ lo diɛnɛ l’ɔtɛ w’ɔtɔmbɔkwɛlɔ awɔ.

14. Jehowa ayondosala la akambo wetɛ lɔsɛnɔ wolo?

 ¹⁴ Jehowa ayondosala la akambo wetɛ lɔsɛnɔ wolo? Tɔsɛdingole bɛnyɛlɔ dimɔtshi. Jehowa ekɔ lo ndaka dia nkomiya ata tshɛ. (Adia Osambo 46:8, 9.) Nde ayonya hemɔ. (Isa. 33:24) Nde ayonya nyɔi lo pondjo. (Isa. 25:8) Nde ayokomiya wola. (Os. 72:12-16) Ndo Jehowa ayonya akambo akina tshɛ wa kɔlɔ wetɛ lɔsɛnɔ wolo ɛlɔ kɛnɛ. Nde ayonya ndo shɛngiya ya kɔlɔ ya Satana la ɛdiɛngɛ ande!—Ɛf. 2:2.

15. Naa akambo amɔtshi wayonyɛma lo pondjo l’ɔkɔngɔ w’Aramangɛdɔna?

¹⁵ Ohokanyiya yema woho wayonga lɔsɛnɔ lo andja waha la ata, hemɔ ndo nyɔi! Asɔlayi, ekoma, ndo akambo watohola ta hawotonga. Hatotonga l’ohomba wa pitadi, adɔkɔtɛlɛ, enganga, ahole wa momba edo, kana waombo. Akambo wa kɔlɔ hawotonga, ɔnkɔnɛ hatotonga l’ohomba w’apulushi, w’anto watolama, kana wa nkanga luudu kana nsapi! Akambo wa kɔlɔ asɔ tshɛ wetɛ lɔsɛnɔ wolo watokiyanya efula wayonyɛma lo pondjo.

16, 17. a) Ngande wayoyaoka wanɛ wayoka lo Aramangɛdɔna? Sha ɛnyɛlɔ. b) Ngande wakokaso ndjashikikɛ dia tayotshikala l’ɔkɔngɔ wa andja w’omusu ɔnɛ minyɛma?

¹⁶ Ngande wayonga lɔsɛnɔ etena kayonyɛma akambo wetɛ lɔsɛnɔ wolo? Ekɔ wolo nkanyiya. Tambɔsɛna la akambo wetɛ lɔsɛnɔ wolo edja efula lo yɛdikɔ yele hatoyoleka mɛna paa k’efula katoshawɔ. Ɛnyɛlɔ, anto wadjasɛ suke la dihole diemala kawolo tena efula mbeyaka monga ko hawoyoka londjo la kawolo. Ndo anto wodjashi suke la dihole diakashawɔ mindo mbeyaka monga ko hawoyoka nsolo ka mindo yakɔ. Koko etena kayonya Jehowa akambo tshɛ wetɛ lɔsɛnɔ wolo, ayonga dui dia dimɛna efula!

¹⁷ Kakɔna kayɔhɛna ekiyanu tshɛ wele la so ɛlɔ kɛnɛ? Osambo 37:11 mbutaka ɔnɛ: “Vɔ wayɔngɛnangɛnaka heyama la wɔladi w’efula.” Ande ekeketshelo kele la so lo mbeya dia kɛsɔ mbalanga Jehowa le so lee! Lo nshi ya paa nyɛ, sala kɛnɛ tshɛ kakokayɛ nsala dia ntshikala suke suke la Jehowa ndo la okongamelo ande. Elongamelo kayɛ ka lo nshi yayaye kekɔ ohomba efula, ɔnkɔnɛ kanyiyaka efula dikambo diatɔ, yashikikɛ dia tɔ kekɔ dui dia mɛtɛ le yɛ, ndo tɛ anto akina dikambo diatɔ. (1 Tim. 4:15, 16; 1 Pet. 3:15) Lo ntsha ngasɔ mbakokayɛ ndjashikikɛ dia etena kayokomɛ dikongɛ nɛ, wɛ ayotshikala la lɔsɛnɔ ndo ayongaka l’ɔngɛnɔngɛnɔ pondjo pondjo!