1. a) Lo awui akɔna wakafɔnaka Jafɛta nde la Hana? (Enda osato wele lo mbɔtwɛlɔ.) b) Ambola akɔna wayotokadimola lo sawo nɛ?

JAFƐTA aki ɔnɔmbɔdi wa dihonga ndo ɔndɔshi wa ta wa wolo. Hana aki womoto laki l’okitshakitsha, lakayakiyanyaka dikambo di’omɛnde ndo dia luudu lande. Vɔ akɔ ahende wakatɛmɔlaka Jehowa. Koko vɔ wakafɔnaka lo dui dikina nto. Jafɛta nde la Hana wakatshike dɔkɔlɔkɔ le Jehowa ndo onto l’onto akakotsha dɔkɔlɔkɔ diande la kɔlamelo tshɛ. Vɔ wekɔ bɛnyɛlɔ di’amɛna efula le apami ndo wamato wasɔna dia ntshika alɔkɔlɔkɔ le Jehowa ɛlɔ kɛnɛ. Nyɛsɔ tɔsɛdingole ekadimwelo lo ambola asato anɛ: Dɔkɔlɔkɔ kɛdikɛdi na? Lande na kele ntshika dɔkɔlɔkɔ le Nzambi ekɔ dui di’ohomba? Wetshelo akɔna wakokaso nkondja oma le Jafɛta nde la Hana?

2, 3. a) Dɔkɔlɔkɔ kɛdikɛdi na? b) Kakɔna kata Afundelo lo dikambo dia ntshika alɔkɔlɔkɔ le Nzambi?

² Lo Bible, dɔkɔlɔkɔ ekɔ daka di’ohomba diatshika onto le Nzambi. Ɛnyɛlɔ, onto ɔmɔtshi mbeyaka ndaka Jehowa dia nde ayosala dui dimɔtshi, nkimɔ woshasha ɔmɔtshi, nkamba yoho mɔtshi y’olimu, kana ntshika dia nsala awui amɔtshi. Anto sɔnaka dia ntshika alɔkɔlɔkɔ lo nkamba la lotshungɔ la nsɔna. Ndooko onto latshutshuyawɔ dia ntshika dɔkɔlɔkɔ. Koko etena kasɔna onto dia nsala dui sɔ, Jehowa mbɔsaka dɔkɔlɔkɔ diande oko daka di’ohomba diahomba nɛmiyama ndo kotshama. Lo Bible, dɔkɔlɔkɔ diekɔ ohomba oko etshibelo. Etshibelo ekɔ ɛtɛkɛta watshiba onto dia nsala  kana diaha nsala dui dimɔtshi. (Eta. 14:22, 23; Hɛb. 6:16, 17) Kakɔna kata Bible lo dikambo dia woho wahombaso mbɔsa alɔkɔlɔkɔ aso le Nzambi la nɛmɔ?

³ Lo Ɛlɛmbɛ wa Mɔsɛ, sho mbadiaka ɔnɛ: Naka pami kɛmɔtshi ambotshika dɔkɔlɔkɔ le Jehowa, “nde pombaka nkotsha ɛtɛkɛta ande. Nde pombaka nsala kɛnɛ tshɛ kakandatshike dɔkɔlɔkɔ dia nsala.” (Wal. 30:2) L’ɔkɔngɔ diko Sɔlɔmɔna akafunde ate: “Etena tshɛ katshikayɛ dɔkɔlɔkɔ le Nzambi, totshimbatshimbake dia dikotsha, nɛ dia nde hangɛnangɛna akanga wa dinginya. Kotsha dɔkɔlɔkɔ diakayatshike.” (Ond. 5:4) Yeso aketsha dia ntshika dɔkɔlɔkɔ le Nzambi ekɔ ohomba efula etena kakandate ate: “[Wakatɛ] anto wa lo nshi y’edjedja ɔnɛ: ‘Totshikake dɔkɔlɔkɔ aha la dikotsha, wɛ pombaka nkotsha alɔkɔlɔkɔ watshikayɛ la ntondo ka Jehowa.’”—Mat. 5:33.

4. a) Lande na kele ntshika dɔkɔlɔkɔ le Nzambi ekɔ dui di’ohomba efula? b) Wetshelo akɔna wakondjaso oma le Jafɛta nde la Hana?

⁴ Mbokɛmaka hwe dia sho pombaka mbɔsa daka tshɛ diatshikaso le Jehowa la nɛmɔ di’efula. Kɛnɛ kasalaso la alɔkɔlɔkɔ aso mongaka la shɛngiya lo diɔtɔnganelo diasaso la nde. Davidɛ akɛnya dui sɔ hwe etena kakandambola ate: “Akɔna akoka mbidɛ lo dikona dia Jehowa, ndo akoka memala lo dihole diande di’ekila?” Oma laasɔ nde akakadimola lo mbuta ɔnɛ Jehowa ayetawɔ onto tshɛ “lahatotshibaka etshibelo ka kashi.” (Os. 24:3, 4) Dɔkɔlɔkɔ diakɔna diakatshike Jafɛta nde la Hana onto l’onto? Onde aki dui dia wɔdu le wɔ dia kotsha alɔkɔlɔkɔ awɔ?

5. Dɔkɔlɔkɔ diakɔna diakatshike Jafɛta? Etombelo akɔna wakayala?

⁵ Jafɛta akatshike dɔkɔlɔkɔ le Jehowa etena kakinde suke la tɔlɔsha ase Amɔna. Wodja ɔsɔ waki andɔshi w’ekambi wa Nzambi. (Emb. 10:7-9) Jafɛta akalɔmbɛ Jehowa dia nde tɔlɛndja ndo nde akatshike dɔkɔlɔkɔ ate: “Naka wɛ nkimɔ ase Amɔna lo anya ami, kete onto tshɛ layotomba oma lo soko dia luudu lami dia ndjohomana la mi lam’ayomokalola la ki oma le ase Amɔna ayonga laki Jehowa.” Nzambi akakadimola dɔmbɛlɔ dia Jafɛta ndo nde akookimanyiya dia nde mbidja otshumba lo ta. Etena kakakalola Jafɛta lakande, ɔnande la womoto lakandalangaka akatombe dia ndjohomana la nde. Nde mbakahombe monga “laki Jehowa.” (Emb. 11:30-34) Kakɔna kakalembetshiyaka dui sɔ le nde?

6. a) Lande na kele komonga dui dia wɔdu le Jafɛta nde la ɔnande dia kotsha dɔkɔlɔkɔ diakandatshike le Nzambi? b) Wetshelo akɔna wakondjaso oma lo Eohwelo k’Ɛlɛmbɛ 23:21, 23 ndo Osambo 15:4 lo dikambo dia alɔkɔlɔkɔ?

⁶ Dia nkotsha dɔkɔlɔkɔ diakatshike she, ɔna Jafɛta la womoto akahombe ntshɔ dia tokambɛka Jehowa lo tena tshɛ lo tabɛrnaklɛ. Onde Jafɛta akatshike dɔkɔlɔkɔ sɔ aha la nkana yimba lɔkɔ dimɛna? Keema. Lo mɛtɛ, ondo Jafɛta akeyaka dia ɔnande la womoto akakoke monga onto la ntondo lakahombe ndjohomana la nde. Koko oyadi nde akeyaka kana bu, nkotsha dɔkɔlɔkɔ diakandatshike le Jehowa komonga dui dia wɔdu oyadi le Jafɛta kana le ɔnande. Etena kakawɛnyi Jafɛta, nde akate dia nde ambowata asolo. Ɔnande akatshu “dia tolela emuma kande.” Lande na? Jafɛta komonga ndooko l’ɔna pami ndo l’etena kɛsɔ tshɔi y’ɔnande la womoto takandahombe tshukama kana mbota. Lokombo la nkumbo kaki Jafɛta lakahombe nkomɛ. Koko Jafɛta nde la ɔnande la womoto wakeye dia dui dimɔtshi di’ohomba efula dioleki nsaki yawɔ diakendanaka la dikambo sɔ. Jafɛta akate ate: “Dimi lakatshike dɔkɔlɔkɔ le Jehowa ndo . . . dimi halakoke nkalola ɛkɔngɔkɔngɔ.” Ɔnande la womoto akate ate: “Onsale kɛnɛ kakayalake.” (Emb. 11:35-39) Jafɛta nde la ɔnande waki anto wa kɔlamelo waki kokanyiya ndooko lushi dia mbitola dɔkɔlɔkɔ diakawatshike le Nzambi, kaanga mbakidiɔ  wolo efula dikotsha.—Adia Eohwelo k’Ɛlɛmbɛ 23:21, 23; Osambo 15:4.

7. a) Dɔkɔlɔkɔ diakɔna diakatshike Hana, ndo lande na? Ngande wakayoyala akambo le nde? b) Dɔkɔlɔkɔ diakatshike Hana akadialembetshiyaka le Samuɛlɛ? (Enda nɔtɛ ka l’ɛse ka dikatshi.)

⁷ Hana nde lawɔ akatshike dɔkɔlɔkɔ le Jehowa etena kakinde la lɔkɔnyɔ efula lo lɔsɛnɔ. Nde aki ɔkɛtshi nɛ dia nde kokokaka mbota, ndo wakawɔlaka ndo wakɔtɛngaka l’ɔtɛ wa dikambo sɔ. (1 Sa. 1:4-7, 10, 16) Nde akatɛ Jehowa woho wakandayaokaka ndo nde akalake daka nɛ: “Jehowa kanga lolembelembe le, naka wɛ menda sui di’okambi ayɛ ko mbohɔmi, ndo naka wɛ hohe okambi ayɛ ko wɛ ambosha okambi ayɛ ɔna pami, kete dimi layowokimɔ le yɛ wɛ Jehowa nshi tshɛ ya lɔsɛnɔ lande ndo ɛrɛswara hawetaki l’ɔtɛ ande.” * (Enda nɔtɛ ka l’ɛse ka dikatshi.) (1 Sa. 1:11) Jehowa akoke dɔmbɛlɔ dia Hana ndo ɔnɔnyi wakayele, Hana akote ɔna pami, Samuɛlɛ. Hana aki l’ɔngɛnɔngɛnɔ efula! Koko Hana kombohɛ dɔkɔlɔkɔ diakandatshike le Nzambi. Lam’akotɔ ɔnande, nde akate ate: “Oma le Jehowa kakamɔɔlɔmbɛ.”—1 Sa. 1:20.

8. a) Onde aki dui dia wɔdu dia Hana nkotsha dɔkɔlɔkɔ diande? b) Ngande wakohola Osambo 61 ɛnyɛlɔ k’ɔlɔlɔ kaki Hana?

⁸ Etena kakayala Samuɛlɛ l’ɛnɔnyi oko esato, Hana akasale paka oko wakandalake Jehowa. Nde akatɔlɛ Samuɛlɛ le Eli Ɔlɔmbɛdi a laadiko lo tabɛrnaklɛ ka la Shilo ndo akate ate: “L’ɔtɛ w’ɔna ɔnɛ kakamalɔmbaka ko Jehowa ambombisha kɛnɛ kakamɔɔlɔmbɛ. Wonya ɔnɛ, dimi lawɔ lambookimɔ le Jehowa. Nde ambokimɔma le Jehowa lo nshi tshɛ ya lɔsɛnɔ lande.” (1 Sa. 1:24-28) Oma ko etena kɛsɔ, Samuɛlɛ akatshikalaka lo tabɛrnaklɛ. Bible mbutaka dia “Samuɛlɛ akatatetemalaka mbola la ntondo ka Jehowa.” (1 Sa. 2:21) Komonga dui dia wɔdu le Hana dia nde nkotsha dɔkɔlɔkɔ diande. Dui sɔ nembetshiyaka dia Hana kokoka mbetsha lushi tshɛ kaamɛ la ɔnande la nɛmɔ lakandalangaka efula. Takandahombe mɛna woho wakatolaka ɔna. Koko Hana akɔshi dɔkɔlɔkɔ diakandatshike le Jehowa la nɛmɔ. Nde aketawɔ ndjahombia awui waki ohomba le nde l’oyango wa nkotsha daka diakandalake Nzambi.—1 Sa. 2:1, 2; adia Osambo 61:1, 5, 8.

9. Kakɔna kayangaso nsɛdingola?

⁹ Etena kɛnɛ kambotoshihodia dia ntshika dɔkɔlɔkɔ le Jehowa ekɔ dui di’ohomba efula, nyɛsɔ tɔsɛdingole ambola anɛ: Weho akɔna w’alɔkɔlɔkɔ wakokaso ntshika ɛlɔ kɛnɛ? Ngande wahombaso ndjashikikɛ dia nkotsha alɔkɔlɔkɔ akɔ?

10. Dɔkɔlɔkɔ diakɔna dioleki ohomba diakoka Okristo ntshika? Dui sɔ alembetshiyadiɔ?

¹⁰ Dɔkɔlɔkɔ dioleki ohomba diakoka Okristo ntshika ele nɛ dia nkimɔ lɔsɛnɔ lande le Jehowa. Lo dɔmbɛlɔ di’onto ndaamɛ, onto tshikaka dɔkɔlɔkɔ dia nkamba la lɔsɛnɔ lande lo kambɛka Nzambi pondjo pondjo oyadi kakɔna kayotomba. Yeso akate dia sho ‘ndjasɛka,’ mbuta ate sho tshikaka dɔkɔlɔkɔ dia mbetsha Jehowa la ntondo, koko aha shoamɛ. (Mat. 16:24) Oma ko lushi lɔsɔ sho mongaka “anto waki Jehowa.” (Rɔmɔ 14:8) Sho mbɔsaka ndjakimɔ kaso la nɛmɔ. Sho ndjaokaka oko omembi w’esambo lakate ate: “Kakɔna kayomosha Jehowa l’ɔtɛ w’ɛlɔlɔ tshɛ wakandansalɛ? Dimi layokotsha alɔkɔlɔkɔ wakamatshike le Jehowa la ntondo k’anto ande tshɛ.”—Os. 116:12, 14.

11. Kakɔna kakete lushi lakayabatizama?

¹¹ Onde wɛ akayakimɔ le Jehowa ndo akɛnya ndjakimɔ kayɛ lo sɛkɛ lo batizama lo ashi? Naka wɛ akasale dui sɔ, kete ekɔ dimɛna efula! Onde wɛ mbohɔka etena kakambola ɔnangɛso lakashaka sawo dia batisimu dia kana wɛ akayakimɔ le Jehowa ndo wɛ shihodiaka dia “ndjakimɔ  ndo batisimu kayɛ mɛnyaka dia wɛ aya Ɔmɛnyi wa Jehowa”? Etena kakayakadimola wate eelo, onto tshɛ laki laawɔ akeye dia wɛ akakimɔ lɔsɛnɔ layɛ ndo akakotsha kɛnɛ kalɔmbama dia batizama oko okambi wa Jehowa. Wɛ akangɛnyangɛnya Jehowa efula!

12. a) Ambola akɔna wahombaso ndjaoka? b) Waonga akɔna wakatokeketsha Petero dia sho monga la wɔ?

¹² Etena kakayabatizama, wɛ akalake Jehowa dia wɛ ayokamba la lɔsɛnɔ layɛ dia mbokambɛ ndo ayosala kɛnɛ tshɛ kakokayɛ nsala dia ndjela ɛlɛmbɛ ande. Koko batisimu ekɔ tsho etatelo. Lam’atete nshi, onto tshɛ la l’atei aso pombaka ntetemala ndjasɛdingola. Sho koka ndjambola ɔnɛ: ‘Ngande wambohama diɔtɔnganelo diasami la Jehowa ntatɛ lushi lakamabatizama? Onde lekɔ lo ntetemala mbokambɛ la otema ami tshɛ? (Kɔl. 3:23) Onde dimi nɔmbaka mbala la mbala? Onde dimi mbadiaka Bible lushi tshɛ? Onde dimi haletsha lo nsanganya ya l’etshumanelo? Onde dimi sambishaka mbala la mbala lo ndjela akoka ami? Kana onde dimi lamboshisha yema y’ohetoheto yaki la mi l’akambo asɔ?’ Ɔpɔstɔlɔ Petero akatɔhɛmɔla dia waale wekɔ dia sho ndjonga tosuwasuwa l’olimu wakambɛso Jehowa. Sho koka mbewɔ dikambo sɔ naka sho mbidja welo dia mpama lo mbetawɔ, ewo, ekikelo, ndo omamemelo le Nzambi.—Adia 2 Petero 1:5-8.

13. Kɔkɔna kahomba Okristo wakayakimɔ ndo wakabatizama mbeya?

 ¹³ Kam’atshikaso dɔkɔlɔkɔ dia kambɛ Jehowa, hatokoke nkalola ɛkɔngɔkɔngɔ. Onto lambohekɔ kambɛ Jehowa kana lambohekɔ dia nsɛna oko Okristo hakoke ndjota pondjo l’ɔkɔngɔ dia nde kondjakimɔ mɛtɛ le Nzambi ndo dia batisimu kande hetawɔma. * (Enda nɔtɛ ka l’ɛse ka dikatshi.) Naka onto lakayakimɔ le Jehowa ambosala mpɛkato ka woke, nde pombaka mbikoya la Jehowa ndo la etshumanelo. (Rɔmɔ 14:12) Sho hatolange monga oko anto wele Yeso akawatɛ ate: “Wɛ ambotshika ngandji kaki la yɛ ntondo.” Koko sho nangaka nde mbuta lo dikambo diaso ate: “Dimi mbeyaka etsha ayɛ ndo ngandji kayɛ ndo mbetawɔ kayɛ ndo olimu ayɛ ndo ekikelo kayɛ, ndo ɔnɛ etsha ayɛ wa nshi nyɛ wamboleka wa lo nshi ya ntondo.” (Ɛny. 2:4, 19) Sho nangaka ngɛnyangɛnya Jehowa ndo nsɛna l’ohetoheto tshɛ lo yoho yɔtɔnɛ la ndjakimɔ kaso.

14. Ele dɔkɔlɔkɔ dia hende dioleki ohomba diakoka onto ntshika? Lande na?

¹⁴ Dɔkɔlɔkɔ dia hende dioleki ohomba diakoka onto ntshika ele dɔkɔlɔkɔ dia diwala. Diwala ekɔ ekila. Jehowa mbɔsaka dia dɔkɔlɔkɔ dia diwala ekɔ dikambo di’ohomba efula. Etena katshika otshuki la otshukami alɔkɔlɔkɔ awɔ, vɔ tshikaka daka la ntondo ka Jehowa ndo ka wanɛ tshɛ wele laawɔ. Vɔ ndakaka dia mbokana ngandji, nangana ndo nɛmiyana lam’asawɔ edja tshɛ kayowotshikala la lɔsɛnɔ kaamɛ la nkɛtɛ lo ndjela yɛdikɔ yaki Nzambi ya diwala. Mbeyaka monga ko anto akina hawokambe la tɔtɛkɛta tɔsɔ, koko vɔ tshikaka dɔkɔlɔkɔ la ntondo ka Nzambi. Etena katshikawɔ alɔkɔlɔkɔ asɔ, vɔ mongaka wadi l’omi. Diwala ekɔ dimama diahomba ntshikala lɔsɛnɔ l’otondo. (Eta. 2:24; 1 Kɔr. 7:39) Yeso akate ate: “Onto atokakitolake kɛnɛ kakamamatanya Nzambi.” Anto akɔ ahende watshukana hawohombe mfɔnya dia naka awui hawete dimɛna lo diwala diawɔ, kete vɔ koka ndjaka diwala.—Makɔ 10:9.

15. Lande na kele Akristo hawohombe mbɔsa diwala woho wadiɔsa ase andja ɔnɛ?

¹⁵ Lo mɛtɛ, oko wele ndooko onto lele kokele, mbele ndooko diwala diele kokele. Diɔ diakɔ diatotɛ Bible ɔnɛ anto tshɛ watshukana “wayonga la asui” lo tena dimɔtshi. (1 Kɔr. 7:28) Ɛlɔ kɛnɛ l’andja ɔnɛ, anto efula wekɔ la kanyi ya kɔlɔ lo kɛnɛ kendana la diwala. Vɔ mbutaka dia naka awui hawete dimɛna lo diwala, kete vɔ pombaka ndjaka diwala diawɔ. Koko aha ngasɔ mbɔsa apami la wamato w’Akristo diwala. Vɔ mbeyaka dia vɔ wakatshike dɔkɔlɔkɔ diawɔ dia diwala la ntondo ka Nzambi. Naka vɔ mbitola dɔkɔlɔkɔ sɔ, kete ayonga oko vɔ wakookesaka ndo Nzambi petshaka akanga wa kashi. (Lɛw. 19:12; Tok. 6:16-19) Atshukanyi w’Akristo pombaka mbohɔka ɛtɛkɛta waki ɔpɔstɔlɔ Pɔɔlɔ ɛnɛ: “Onde wɛ kelekama le wadi? Toyangake dia ntshungɔ.” (1 Kɔr. 7:27) Pɔɔlɔ akakoke mbuta ngasɔ nɛ dia nde akeyaka dia Jehowa petshaka odiakelo wa diwala wa lo yoho ya lokeso.—Mal. 2:13-16.

16. Kakɔna kata Bible lo dikambo dia odiakelo wa diwala ndo okakitɔnelo?

¹⁶ Yeso aketsha dia ɔkɔkɔ ɔtɔi wetawɔma l’Afundelo dia ndjaka diwala ele naka olonganyi ɔmɔtshi ambosala loseka ko olonganyi okina ambɔsa yɛdikɔ yaha mbodimanyiya. (Mat. 19:9; Hɛb. 13:4) Ko kayotota lo dikambo dia nkakitɔna la olonganyi? Kɛnɛ kata Bible kekɔ hwe ndo lo dikambo sɔ. (Adia 1 Kɔrɛtɔ 7:10, 11.) Ndooko ɔkɔkɔ wetawɔma l’Afundelo di’onto nkakitɔna la olonganyi ande. Koko lo tena dimɔtshi, ekɔ akambo amɔtshi wakoka nkonya Okristo  dia nde ndjaoka dia ekɔ ohomba nkakitɔna la olonganyi ande. Ɛnyɛlɔ, amɔtshi mbeyaka monga la eshikikelo dia lɔsɛnɔ lawɔ kana diɔtɔnganelo diasawɔ la Jehowa diayonga lo waale wamboleka naka vɔ ntetemala mbidjasɛ la olonganyi wakɔmana kana wele ɔpɔsta. * (Enda nɔtɛ ka l’ɛse ka dikatshi.)

17. Kakɔna kakoka atshukanyi w’Akristo nsala dia diwala diawɔ nomba?

¹⁷ Naka atshukanyi amɔtshi wambotshɔ le dikumanyi dia l’etshumanelo dia toyanga alako wendana la woho wa ndowanya diwala diawɔ, dikumanyi koka mbambola dia kana vɔ wakende vidɛo ya Ngandji ka mɛtɛ kɛdikɛdi na? ndo wakeke biukubuku Nkumbo kayɛ koka monga l’ɔngɛnɔngɛnɔ. Dihomɔ sɔ mɛnyaka atɔndɔ wa lo Bible wakoka nkimanyiya dia diwala nkeketala. Atshukanyi amɔtshi wakate ɔnɛ: “Ntatɛ etena kakatamɛ mbeka biukubuku nyɛ, taya l’ɔngɛnɔngɛnɔ w’efula lo diwala diaso.” Kadiyɛso kɛmɔtshi kaya ɛnɔnyi 22 lo diwala akafɔnyaka dia diwala diande diaki suke la mvɔ. Oma laasɔ nde akende vidɛo yakɔ. Nde mbutaka ate: “Sho akɔ ahende takabatizama, koko onto l’onto aki la nsaki y’otshikitanyi la y’osekande. Vidɛo nyɛ yakaye mɛtɛ l’etena kahombama! Kakianɛ tosala akambo dimɛna oko atshukanyi.” Mbokɛmaka hwe dia naka wadi l’omi nkamba l’atɔndɔ waki Jehowa lo diwala diawɔ, kete diɔtɔnganelo dia lam’asawɔ diayoleka nkeketala ndo wayoleka monga l’ɔngɛnɔngɛnɔ.

18, 19. a) Kakɔna kasala ambutshi efula w’Akristo? b) Kakɔna kakokaso mbuta lo dikambo dia wanɛ wele l’olimu wa laande wa lo tena tshɛ?

¹⁸ Oma l’etatelo, takatɛkɛtshi dikambo dia alɔkɔlɔkɔ wakatshike Jafɛta nde la Hana. L’ɔtɛ w’alɔkɔlɔkɔ asɔ, ɔna womoto laki Jafɛta ndo ɔna pami laki Hana wakakambe la nsɛnɔ yawɔ dia kambɛ Jehowa lo toho ta laande. Ambutshi efula w’Akristo wa nshi nyɛ wekɔ lo nkeketsha anawɔ dia nkamba olimu wa lo tena tshɛ ndo ndjasha tshɛ l’olimu wakambɛwɔ Nzambi. Ndo sho tshɛ koka mbisha lonya lo nkeketsha ɛlɔngɔlɔngɔ l’esekaseka ɛsɔ dia vɔ ntetemala l’olimu awɔ.—Emb. 11:40; Os. 110:3.

¹⁹ Ɛlɔ kɛnɛ, anto oko 67 000 wekɔ ekambi wa laande wa lo tena tshɛ w’Ɛmɛnyi wa Jehowa wa l’andja w’otondo. Amɔtshi wekɔ lo nkamba lo Bɛtɛlɛ kana l’olimu wa wokelo kana l’olimu wa l’otshimbedi. Akina wekɔ lo nkamba olimu wa wolo oko embetsha wa lo kalasa ya l’okongamelo, ambatshi mboka wa laande, waa misiɔnɛrɛ, ekambi wa lo Mbalasa ya nsanganya ya weke, kana ekambi wa lo kalasa ya Bible. Vɔ tshɛ wakatshike “Dɔkɔlɔkɔ di’okitanyiya ndo wola.” Lo dɔkɔlɔkɔ sɔ vɔ ndakaka dia nkamba olimu wa wolo oseka dihole tshɛ diayowatoma l’olimu wa Jehowa, dia nsɛna lɔsɛnɔ l’ɔsɛlɛngɛ ndo diaha nkamba olimu wa l’emunyi aha la lotshungɔ. Aha anto mbele wa laande koko ɛkɛndɛ awɔ mbɔsama oko wa laande. L’okitshakitsha ndo l’eshikikelo tshɛ, vɔ kotshaka dɔkɔlɔkɔ diawɔ edja tshɛ kewɔ l’olimu wa laande wa lo tena tshɛ.

20. Ngande wahombaso mbɔsa alɔkɔlɔkɔ wakatatshike le Nzambi? Lande na?

²⁰ Lo sawo nɛ, tambɔsɛdingola alɔkɔlɔkɔ asato wakokaso ntshika le Nzambi. Ondo wɛ ambotshikaka alɔkɔlɔkɔ amɔtshi l’atei awɔ. Sho mbeyaka dia sho pombaka mbɔsa alɔkɔlɔkɔ aso la nɛmɔ ndo dia sho pombaka nsala kɛnɛ tshɛ kakokaso nsala dia mbakotsha. (Tok. 20:25) Naka hatokotsha alɔkɔlɔkɔ watshikaso le Jehowa, kete sho mbeyaka ndjodiɛnɛ l’etombelo wa kɔlɔ efula. (Ond. 5:6) Ɔnkɔnɛ nyɛsɔ toyale oko omembi w’esambo lakatɛ Jehowa ate: “Dimi layembɛka lokombo layɛ esambo wa lotombo pondjo pondjo etena kakotshami alɔkɔlɔkɔ ami lushi la lushi.”—Os. 61:8.