1, 2. a) Kakɔna kakate Elifazɛ ndo Bilidadɛ lo kɛnɛ kendana la woho wɔsa Nzambi olimu aso? b) Kakɔna kakate Jehowa lo dikambo sɔ?

AMBETA ɛnɔnyi efula, apami asato wakatshu dia tosawola la Jɔbɔ, okambi wa Nzambi wa kɔlamelo. Ɔmɔtshi l’atei awɔ, Elifazɛ ose Temana akambola Jɔbɔ ambola amɔtshi w’ohomba anɛ: “Onde onto koka monga ohomba le Nzambi? Onde onto lele la yimba koka monga la wahɔ le nde? Onde Kanga-Wolo-Tshɛ mbidjaka yimba lo woho weyɛ ɔlɔlɔ, kana onde nde kondjaka ɛngɔ kɛmɔtshi l’ɔtɛ wayelayɛ mboka k’olowanyi?” (Jɔbɔ 22:1-3) Elifazɛ akafɔnyaka dia okadimwelo ele ndooko. Oma laasɔ, pami kekina l’atei awɔ, Bilidadɛ ose Shua akakotsha ate: Anto hawokoke monga la losembwe la ntondo ka Nzambi.—Adia Jɔbɔ 25:4.

² Elifazɛ nde la Bilidadɛ wakahembe dia nkonya Jɔbɔ lo mfɔnya ɔnɛ welo wakandadjaka dia kambɛ Jehowa waki anyanya. Apami asɔ wakalange dia Jɔbɔ mbetawɔ dia sho bu la nɛmɔ le Nzambi oleki lombudi, lokuso kana ɔsɔhɔ. (Jɔbɔ 4:19; 25:6) Onde vɔ wakataka akambo asɔ l’ɔtɛ wakiwɔ l’okitshakitsha? (Jɔbɔ 22:29) Ekɔ mɛtɛ dia Jehowa ekɔ woke wa mamba ndo sho tekɔ totshitshɛ naka sho ndjaɛdika la nde. Naka sho monga lo shɔdi ya dikona kana nengɛ lo didishi di’aviyɔ, tayɛna woho weso totshitshɛ ndo anyanya efula. Ko onde ngasɔ  mbayaoka Jehowa lo welo wadjaso dia mbokambɛ ndo olimu wa wolo wakambaso dikambo dia Diolelo? Ndooko! Jehowa akatɛ Elifazɛ, Bilidadɛ ndo Zɔfara pami ka sato dia vɔ waki lo mbuta kashi. Oma laasɔ, Nzambi akate dia nde akangɛnangɛnaka Jɔbɔ ndo akawelɛ ɔnɛ “okambi ami.” (Jɔbɔ 42:7, 8) Ɔnkɔnɛ sho koka monga l’eshikikelo dia anto wele bu kokele koka “monga ohomba le Nzambi.”

3. Kakɔna kakate Elihu lo kɛnɛ kendana la welo wadjaso dia kambɛ Jehowa? Kakɔna kakandalange mbuta?

³ Ɔlɔngɔlɔngɔ wakawelɛka Elihu akahokamɛka sawo dia l’asa Jɔbɔ la apami asato asɔ. Etena kakashile sawo diakɔ, Elihu akambola Jɔbɔ lo dikambo dia Jehowa ate: “Naka wɛ ekɔ la losembwe, kakɔna kawoshayɛ; kakɔna kalongolande oma le yɛ?” (Jɔbɔ 35:7) Onde Elihu nde lawɔ akalange mbuta dia welo wadjaso dia nkambɛ Nzambi wekɔ anyanya? Ndooko. Jehowa komingola Elihu, oko wakandangola apami akina asɔ. Elihu akashaka kanyi yotshikitanyi. Nde akataka dia Jehowa bu l’ohomba wa sho mbɔtɛmɔla. Jehowa ekɔ tshɛ lo tshɛ. Ndooko kɛnɛ kakokaso nsala dia mbokonya ɔngɔnyi kana wolo woleki. Lo mɛtɛ, waonga tshɛ w’amɛna kana akoka tshɛ wele la so ndja oma le Nzambi ndo nde mɛnaka woho wakambaso la wɔ.

4. Ngande wayaoka Jehowa etena kokaso anto akina kɛtshi?

⁴ Etena kɛnyaso ngandji ka kɔlamelo le wanɛ watɛmɔla Jehowa, nde mbɔsaka etsha aso ɛsɔ oko otondo ande ndamɛ mbasalɛso. Sho mbadiaka lo Tokedi 19:17 ɔnɛ: “Onto loka mbolambola kɛtshi ekɔ lo nsɔndja Jehowa diangɔ, ndo Nde ayowofuta l’ɔtɛ wa kɛnɛ kasalande.” Jehowa mɛnaka mɛtɛ etena tshɛ kokaso anto akina kɛtshi. Ndo kaanga mbende Otungi w’andja, Jehowa sɔnaka dia mbɔsa etsha aso oko tekɔ lo mbɔsɔndja diangɔ ndo nde sɔmbɔlaka la weshasha efula wa diambo. Yeso y’Ɔna Nzambi akashikikɛ dui sɔ.—Adia Luka 14:13, 14.

5. Ambola akɔna wayangaso nsɛdingola?

⁵ Lo nshi y’edjedja, Jehowa akalɔmbɛ omvutshi Isaya dia nde monga onyimpala ande ndo dia mbokambɛ lo yoho ya laande. (Isa. 6:8-10) Isaya aketawɔ la lolango ndo akate ate: “Dimi ɔnɛ, ontome!” Ɛlɔ kɛnɛ nto, Jehowa mbishaka anto wa kɔlamelo diaaso dia mbisha lonya lo olimu ande. Nunu di’ekambi wa Jehowa wekɔ lo mɛnya dia wekɔ la yimba yakɔ yaamɛ yaki la Isaya. La lolango tshɛ vɔ wekɔ lo mbetawɔ ɛkɛndɛ dia kambɛ Jehowa lo toho ndo ahole efula wotshikitanyi ndo dia ndɔshana l’akambo ndo l’ehemba wa wolo. Koko onto ɔmɔtshi mbeyaka mbuta ate: ‘Dimi ngɛnangɛnaka diaaso dia ndjakimɔ la lolango l’olimu wa Jehowa, ko onde mɛtɛ kɛnɛ kasalami kekɔ ohomba? Oyadi dimi monga kana bu, shi Jehowa ayosala tshɛ dia olimu ande salema?’ Onde wɛ amboyaokaka ngasɔ lushi lɔmɔtshi? Nyɛsɔ tɔsɛdingole awui amɔtshi wa lo lɔsɛnɔ l’ekambi wa Jehowa ehende wa lo nshi yakete, Dɛbɔra nde la Baraka, wakoka tokimanyiya dia nkadimola lo ambola asɔ.

6. Lande na kakadiɛnamaka dia asɔlayi waki Jabina wakakoke nɛndja ase Isariyɛlɛ esadi eto?

⁶ Baraka aki ɔndɔshi w’ata ɔmɔtshi w’ose Isariyɛlɛ ndo Dɛbɔra aki omvutshi wa womoto. L’edja k’ɛnɔnyi 20, Jabina nkumekanga k’ase Kanana “akahɛnyahɛnya ase Isariyɛlɛ wolo.” Asɔlayi waki Jabina waki ngala ndo esehe efula diakɔ diele ase Isariyɛlɛ waki lo tongelongelo waki la wɔma wa ntomba kaanga oma lo mvudu yawɔ. Asɔlayi waki Jabina waki la pusupusu ya ta 900 yaki la mbolo ya mpɛmɔ, koko ase Isariyɛlɛ komonga la dihomɔ dia ta diawɔ hita dia ndɔsha kana dia ndjakokɛ.—Emb. 4:1-3, 13; 5:6-8. * (Enda nɔtɛ ka l’ɛse ka dikatshi.)

7, 8. a) Awui akɔna wakatɛ Jehowa Baraka ntondo? b) Ngande wakalɛndja ase Isariyɛlɛ asɔlayi waki Jabina? (Enda osato wele lo mbɔtwɛlɔ.)

 ⁷ Lo mbɛdika la asɔlayi waki Jabina, akɛnamaka dia ase Isariyɛlɛ waki wɔdu ndo wakakoke nɛndjama esadi eto. Koko Jehowa akadjangɛ Baraka lo tshimbo ya Dɛbɔra omvutshi wa womoto ate: “Tshɔka otsha lo Dikona dia Tabɔra ndo ɔsa apami nunu dikumi (10 000) oma l’atei w’aseka Nafɛtali la aseka Zebuluna kele tshɔka kaamɛ la wɔ. Dimi layokela Sisɛra owandji w’asɔlayi waki Jabina kaamɛ la pusupusu yande ya ta ndo asɔlayi ande l’okidi w’ashi wa la Kishɔna ko dimi layowokimɔ lo anya ayɛ.”—Emb. 4:4-7.

⁸ Wakalɔmbɛ dia anto ndjakimɔ la lolango, ko apami 10 000 wakatshumana lo Dikona dia Tabɔra. Oma laasɔ, Baraka nde la apami ande wakatshu dia tɔlɔsha asɔlayi wa andɔshi awɔ lo dihole diakawelɛka ɔnɛ Tanaka. (Adia Embadi 4:14-16.) Onde Jehowa akakimanyiya ase Isariyɛlɛ? Eelo. Mvula ngembe kakalɔ la shashimoya ko dihole dia ta dia womu diakayala lɔtɛkɛ loto. Dui sɔ diakayala lo wahɔ w’ase Isariyɛlɛ. Baraka akatshanya asɔlayi waki Sisɛra etale ka kilɔmɛtrɛ 24 lo mboka k’otondo k’otsha lo dihole diakawelɛka ɔnɛ Harɔshɛta. Dihole dimɔtshi lo mboka, pusupusu ka ta kaki Sisɛra kakakundama lo lɔtɛkɛ. Nde akaholɔ ko akalawɔ otsha la Zananima, ondo suke la Kɛdɛshɛ. Lɛkɔ Sisɛra akatoyashɛ lo luudu la dipɛma laki womoto ɔmɔtshi lokombo lande Jaɛlɛ. Sisɛra akalɛmbɛ ko akalale djɔ esadi. Etena kakinde lo djɔ, la dihonga tshɛ Jaɛlɛ akoodiake. (Emb. 4:17-21) Jehowa akakimanyiya ase Isariyɛlɛ dia vɔ nɛndja atunyi awɔ! * (Enda nɔtɛ ka l’ɛse ka dikatshi.)

9. Wetshelo akɔna wakondjaso lo Embadi 5:20, 21 lo dikambo dia ta dia la Sisɛra?

⁹ Sho mbekaka awui efula wendana la akambo wɔkɔndwami lo Embadi tshapita 4 lo mbadia tshapita yayela. Embadi 5:20, 21 totɛka ɔnɛ: “Tɔɔtɔ takalɔsha oma l’olongo; tɔ takalɔsha Sisɛra oma lɛnɛ atshimbatɔ. Ɔkɛdi wa Kishɔna wakaakɛdia.” Onde dui sɔ nembetshiyaka dia andjelo wakakimanyiya ase Isariyɛlɛ lo ta, kana onde dui sɔ nembetshiyaka dia diangɔ dimɔtshi dia wetsho diakakɔka oma l’olongo? Bible halembetshiya. Koko sho koka mfɔnya dia Jehowa akashimbɛ ekambi ande lo ndɔsha mvula ngembe lo dihole ndo lo wonya wahombama, diaha pusupusu ya ta 900 nkɛndakɛnda dimɛna. Lo Embadi 4:14, 15, sho mbadiaka mbala shato dia Jehowa mbakalongolaka lotombo l’ɔtɛ w’otshumba w’ase Isariyɛlɛ. L’atei w’ase Isariyɛlɛ 10 000 wakayakimɔ la lolango, ndooko onto lakakoke nongola lotombo l’ɔtɛ w’otshumba ɔsɔ.

10, 11. Merɔzɛ akitɔ? Lande na kakatadjama mananu?

¹⁰ Kakianɛ, nyɛsɔ tɔsɛdingole dikambo dimɔtshi di’ohomba efula. L’ɔkɔngɔ w’ase Isariyɛlɛ mbidja otshumba, Dɛbɔra nde la Baraka wakatombola Jehowa l’esambo. Vɔ wakembe vate: “Ondjelo wa Jehowa akate ate: ‘Nyodje Merɔzɛ mananu, ɛɛ, nyodje anto wa lɔkɔ mananu, nɛ dia vɔ kondja dia ndjokimanyiya Jehowa, dia ndjokimanyiya Jehowa l’ase wolo.’”—Emb. 5:23.

¹¹ Merɔzɛ akitɔ mɛtɛ? Sho bu l’eshikikelo. Koko mananu ka Merɔzɛ kakatɔ efula woho wele awui tshɛ wendana la tɔ wakashishɔ. Mbeyaka monga ko Merɔzɛ aki osomba wele anto wa lɔkɔ kondjakimɔ la lolango dia tosha Baraka lonya lo ta. Lam’ele anto 10 000 wakayakimɔ la lolango dia tɔlɔsha ase Kanana, ase Merɔzɛ wakahombe mbeya dia wekɔ l’ohomba w’anto wayakimɔ la lolango. Kana Merɔzɛ akakoke monga osomba wele Sisɛra akalawɔ lɔkɔ etena kakandatalawɔka Baraka. Mbeyaka monga ko ase Merɔzɛ waki la diaaso dia minda Sisɛra koko vɔ kosala dui sɔ. Ohokanyiya woho wakawɛnaka ɔndɔshi w’ata w’okonda ɔsɔ atalawɔ lo toshinga tawɔ dia nkokɛ lɔsɛnɔ lande! Vɔ wakakoke nsala dui dimɔtshi di’ohomba dia nsukɛ sangwelo dia Jehowa. Otowosala dui sɔ, tshike nde otaafuta. Koko etena kakiwɔ la diɛsɛ dia nsala dui dimɔtshi lo dikambo dia Jehowa, vɔ  kosala ndooko dikambo. Mɛnamaka dia ase Merɔzɛ wakatshikitana efula la Jaɛlɛ, lakasale akambo la dihonga tshɛ.—Emb. 5:24-27.

12. Waonga akɔna wotshikitanyi waki la anto wɛnama lo Embadi 5:9, 10? Dui sɔ pombaka monga la shɛngiya yakɔna le so?

¹² Lo Embadi 5:9, 10, sho mɛnaka dia dionga dia anto 10 000 wakayakimɔ la lolango diakatshikitana efula la dionga dia wanɛ waki kondjakimɔ la lolango. Dɛbɔra nde la Baraka wakaandola “kɔmanda ya lo Isariyɛlɛ, wanɛ wakatshu la lolango lawɔ kaamɛ l’anto.” Vɔ wakatshikitana efula la “ambahemi wa mponda ya dikɛsɛkɛsɛ,” wakafɔnyaka ɔnɛ vɔ wekɔ anto w’ohomba efula wahakoke ndjakimɔ la lolango. Vɔ tɛkɛtaka dikambo di’anto asɔ oko wanɛ “wodjashi laadiko dia tapi y’amɛna,” ndo “wanɛ wakɛndakɛnda lo otadimbo,” wangɛnangɛna la lɔsɛnɔ la dimɛna. Otshikitanyi la wɔ, wanɛ wakayakimɔ la lolango waketawɔ ntshɔ la Baraka lo ta lo tokonakona taki l’ave ta la Tabɔra ndo lo okidi w’ɔsɛlɔ wa Kishɔna. Wakatɛ wanɛ wakalangaka lɔsɛnɔ la wɔdu ɔnɛ: “Nyokane yimba!” Vɔ wakahombe mbidja yimba ndo nkana yimba lo dikambo dia waaso wakawahandja lo ntona dia ndjakimɔ la lolango l’olimu wa Jehowa. Ɛlɔ kɛnɛ, sho lawɔ pombaka nsɛdingola dionga diaso hita lo kɛnɛ kendana la kambɛ Nzambi.

13. Ngande wakatshikitana dionga dia dioho dia Rubɛna, Danɛ ndo Ashɛrɛ la dia Zebuluna ndo Nafɛtali?

¹³ Anto 10 000 wakayakimɔ la lolango waki la diaaso dia mɛna vɔamɛ woho wasala Jehowa akambo oko wende Omboledi-Waheme-Tshɛ. Vɔ wakakoke mbutɛ anto akina dikambo diakɔ etena kakawatɛkɛtaka dia “akambo w’ɛlɔlɔ waki Jehowa.” (Emb. 5:11) Koko, dioho dia Rubɛna, Danɛ ndo Ashɛrɛ wakaleke ndjasha dikambo dia ɛngɔnyi awɔ hita, ɛnyɛlɔ oko dongalonga diawɔ, masuwa awɔ ndo abongo awɔ oleki kɛnɛ kakawasalaka l’olimu wa Jehowa. (Emb. 5:15-17) Koko aha waoho tshɛ mbaki ngasɔ. Dioho dia Zebuluna ndo dia Nafɛtali “wakadje nsɛnɔ yawɔ lo waale la ntondo ka nyɔi” dia nsukɛ Dɛbɔra nde la Baraka. (Emb. 5:18) Sho koka nkondja wetshelo w’ohomba oma lo waonga wotshikitanyi asɔ lo kɛnɛ kendana la ndjakimɔ la lolango.

14. Ngande wɛnyaso dia tekɔ lo nsukɛ lowandji laki Jehowa ɛlɔ kɛnɛ?

¹⁴ Ɛlɔ kɛnɛ, sho hatosukɛ lowandji la Jehowa lo ndɔ ta. Koko sho mɛnyaka osukɔ aso  lo nsambisha la dihonga ndo l’ohetoheto tshɛ. Nshi nyɛ mbamboleka monga ohomba w’anto ndjakimɔ la lolango l’olimu wa Jehowa. Miliyɔ y’anangɛso l’akadiyɛso ndo ɛlɔngɔlɔngɔ wekɔ lo ndjakimɔ la lolango lo toho totshikitanyi t’olimu wa lo tena tshɛ. Ɛnyɛlɔ, efula wekɔ ambatshi mboka, wekɔ lo nkamba lo Bɛtɛlɛ, wekɔ lo mbika Mbalasa ya Diolelo, ndo wekɔ lo ndjakimɔ la lolango lo nsanganya ya weke. Dikumanyi dimɔtshi wekɔ lo nkamba olimu wa wolo lo Kɔmite ka diɔtɔnganelo la pitadi ndo lo nɔngɔsɔla nsanganya ya weke. Sho koka monga l’eshikikelo dia Jehowa ngɛnangɛnaka woho wayakimɔso la lolango dia mbokambɛ lo yoho tshɛ yahombama ndo dia nde hatohɛ welo wadjaso.—Hɛb. 6:10.

15. Ngande wakokaso monga l’eshikikelo dia hatoshisha osalosalo aso l’olimu wa Jehowa?

¹⁵ Sho pombaka nsɛdingola dionga diaso hita lo kɛnɛ kendana la ndjakimɔ la lolango. Sho koka ndjambola ɔnɛ: ‘Onde dimi tshikaka dia anto akina nkamba olimu efula? Onde dimi ndekaka ndjasha dia nkondja diangɔ dia l’emunyi lo dihole dia kambɛ Jehowa? Kana onde dimi mbokoyaka mbetawɔ ndo dihonga diaki la Baraka, Dɛbɔra, Jaɛlɛ ndo anto 10 000 wakayakimɔ la lolango lo nkamba la kɛnɛ tshɛ kele la mi dia kambɛ Jehowa? Onde dimi kanaka yimba dia monɔ l’osomba okina kana lo wodja okina dia tokondja falanga efula ndo tonga la lɔsɛnɔ la dimɛna? Naka ngasɔ, onde lekɔ lo nɔmba Jehowa lo kɛnɛ kendana la shɛngiya yayonga la wonwelo ɔsɔ lo nkumbo kami ndo l’etshumanelo?’ * (Enda nɔtɛ ka l’ɛse ka dikatshi.)

16. Kaanga mbele Jehowa ekɔ la ɛngɔ tshɛ, kakɔna kakokaso mbosha?

¹⁶ Jehowa toshaka nɛmɔ dia mamba lo mbetawɔ dia sho nsukɛ lowandji lande. Ntatɛ oma lo nshi ya Adama la Eva, Diabolo nangaka dia anto mbeta lo wedi ande dia ndɔsha Jehowa. Koko etena kasukɛso lowandji laki Jehowa, sho mɛnyaka Satana hwe lo wedi akɔna weso. Mbetawɔ ndo kɔlamelo yaso totshutshuyaka dia sho ndjakimɔ la lolango l’olimu wa Jehowa, ndo dui sɔ mboshaka ɔngɛnɔngɛnɔ w’efula. (Tok. 23:15, 16) Nzambi kaso koka nkamba la osukɔ aso wa la kɔlamelo ndo okitanyiya aso dia nkadimola lo diɔnyɔ diaki Satana. (Tok. 27:11) Okitanyiya aso ekɔ ɛngɔ kɛmɔtshi kakokaso mbisha Jehowa kele ohomba le nde ndo kawosha ɔngɛnɔngɛnɔ w’efula.

17. Kakɔna katetsha Embadi 5:31 lo kɛnɛ kendana la kɛnɛ kayotomba lo nshi yayaye?

¹⁷ Keema edja, onto tshɛ la la nkɛtɛ ayɔngɛnangɛna lowandji la Jehowa oleki mandji nkina tshɛ. Ande woho wakongɛso etena kɛsɔ lee! Sho ndjaokaka oko Dɛbɔra la Baraka, wanɛ wakembe ɔnɛ: “Jehowa le, atunyi ayɛ tshɛ walanyeme, koko wanɛ wakolanga wayale oko wonya lam’ahotɔwɔ la lotombo lawɔ.” (Emb. 5:31) Dui sɔ diayosalema etena kayokomiya Jehowa andja wa kɔlɔ waki Satana ɔnɛ. Etena kayotatɛ ta dia Aramangɛdɔna, Jehowa hatonga l’ohomba w’anto wayakimɔ la lolango dia ndanya atunyi. Koko, sho ‘tayotshikala ki’ ko ‘mɛna panda kayotosha Jehowa.’ (2 Ɛk. 20:17) Etena kakatakonge dui sɔ, tekɔ la waaso wa diambo efula wa nsukɛ lowandji la Jehowa la dihonga ndo l’ohetoheto.

18. Wahɔ akɔna wakoka anto akina nkondja oma lo yimba yayɛ ya ndjakimɔ la lolango?

¹⁸ Dɛbɔra nde la Baraka wakatatɛ memba osambo w’otshumba dia ntombola Jehowa koko aha anto. Vɔ wakembe ɔnɛ: “Lam’ele anto wakayakimɔ la lolango, nyotombole Jehowa!” (Emb. 5:1, 2) Woho akɔ waamɛ mbele, etena kakambɛso Jehowa lo yoho tshɛ yahombama, anto akina nto mbeyaka keketshama dia ‘ntombola Jehowa!’