L’ANDJA w’otondo ɔnɔnyi wetshi, nunu di’apami wakasɔnama dia monga dikumanyi l’ekambi wakimanyiya l’atei w’Ɛmɛnyi wa Jehowa. Naka wɛ ekɔ l’atei w’anangɛso wa ngandji asɔ, kete aha la taamu wɛ ekɔ lo ngɛnangɛna diɛsɛ di’oyoyo di’olimu sɔ.

Koko ondo wɛ koka ndjakiyanya yema. Jason, ekumanyi keke ɔlɔngɔlɔngɔ mbutaka ate: “Etena kakamasɔnama mbala ka ntondo, lakoke dia laki l’ɛkɛndɛ efula wa nkotsha.” Mɔsɛ la Jɛrɛmiya wakayaoke dia vɔ komonga l’akoka etena kakawalongola ɛkɛndɛ w’eyoyo oma le Jehowa. (Eto. 4:10; Jɛr. 1:6) Naka wɛ ekɔ lo ndjaoka woho akɔ waamɛ, ngande wakokayɛ nkandola dui sɔ ndo ntetemala mpama? Tɔsɛdingole ɛnyɛlɔ ka Timɔte, ombeki w’Okristo.​—Ets. 16:1-3.

Ondo Timɔte aki l’ɛnɔnyi dikumi l’ɛmɔtshi kana aki eke kodikotshaka ɛnɔnyi 20 l’ɛmɔtshi etena kakɔlɔmbɛ ɔpɔstɔlɔ Pɔɔlɔ dia tawotshindɛka lo nkɛndɔ. L’etatelo, oko wakinde ɔlɔngɔlɔngɔ, ondo Timɔte kondjaɛkɛ le nde ndamɛ ndo mbeyaka monga ko nde akengengaka dia nsala awui wendana l’ɔkɛndɛ ande w’oyoyo. (1 Tim. 4:11, 12; 2 Tim. 1:1, 2, 7) Koko, l’ɔkɔngɔ w’ɛnɔnyi dikumi, Pɔɔlɔ akatɛ etshumanelo ka la Filipɛ ate: “Dimi lekɔ lo nongamɛ le Nkumadiɔndjɔ Yeso dia nyotomɛ Timɔte keema edja . . . Nɛ dia dimi ndooko la onto okina lele la dionga diele oko nde.”​—Flpɛ. 2:19, 20.

Kakɔna kakakimanyiya Timɔte dia monga ekumanyi k’oshika? Ɛsɔ tɔsɛdingole wetshelo esamalo wakokayɛ nkondja oma l’ɛnyɛlɔ kande.

1. Nde akayakiyanyaka mɛtɛ dikambo di’anto. Pɔɔlɔ akatɛ anangɛso wa la Filipɛ ate: “[Timɔte a]yoyakiyanya l’otema ɔtɔi dikambo dianyu.” (Flpɛ. 2:20) Lo mɛtɛ, Timɔte akayakiyanyaka lo dikambo di’anto. Nde akalangaka dia vɔ ndjasukanya la Jehowa ndo la lolango tshɛ nde akayasha tshɛ lo dikambo diawɔ.

Ewɔ monga oko shufɛlɛ ya bisi yatɛkɛtawɔ lo yokedi mɔtshi yayakiyanya dia nkoma la wonya lɛnɛ atemalaka bisi lo dihole dia ndjakiyanya dia mɛmba anto. William, laya ekumanyi ɛnɔnyi ndekana 20 ndo kalɛmiyama, akasha apami weke kasɔnama dako nɛ: “Nyoke anangɛso ngandji. Nyoyasha lo ehomba awɔ lo dihole dia ndjashaka paka l’awui w’okongamelo.”

2. Nde aketshaka wahɔ wa lo nyuma lo dihole dia ntondo. Dia mɛnya otshikitanu waki lam’asa ɛnyɛlɔ ka Timɔte la k’anto akina, Pɔɔlɔ akate ate: “Anto akina tshɛ wekɔ lo nyanga wahɔ awɔ hita, koko aha wa Yeso Kristo.” (Flpɛ. 2:21) Pɔɔlɔ akafundaka awui asɔ oma la Rɔmɔ. Nde akɛnyi di’anangɛso wa lɛkɔ wakalekaka ndjasha l’awui awɔ. Lo yɛdikɔ mɔtshi, vɔ kondjashaka dia nkamba olimu. Koko aha ngasɔ mbaki Timɔte! Etena kakandakondjaka waaso wa nsambisha lokumu l’ɔlɔlɔ, dionga diande diaki oko dia Isaya lakate ate: “Dimi ɔnɛ, ontome!”​—Isa. 6:8.

Ngande wakokayɛ monga la wɛdimo lam’asa ɛkɛndɛ ayɛ la ɛkɛndɛ wa lo nyuma? Dui dia ntondo ele, etsha awui woleki ohomba lo dihole dia ntondo. Pɔɔlɔ akate ate: “Ny[o]shikikɛ akambo woleki ohomba.” (Flpɛ. 1:10) Etsha awui wetsha  Nzambi lo dihole dia ntondo lo dihole dia ntondo. Dui dia hende ele, onga la lɔsɛnɔ l’ɔsɛlɛngɛ. Nya kɛnɛ tshɛ kakoshishiyɛ wenya ndo wolo. Pɔɔlɔ akakeketsha Timɔte ate: “Lawɔ nsaki y’ɛlɔngɔlɔngɔ, koko wesa losembwe, mbetawɔ, ngandji, wɔladi.”​—2 Tim. 2:22.

3. Nde akakambaka olimu w’ekila efula. Pɔɔlɔ akohola ase Filipɛ ate: “Nyu mbeyaka dia ndamɛ [Timɔte] akɛnya dia nde kokaka ndo nde akakambe kaamɛ la mi oko ɔna nde la she dia ntɔla lokumu l’ɔlɔlɔ otsha la ntondo.” (Flpɛ. 2:22) Timɔte komonga kanga nɛndɛ. Nde akakambe efula kaamɛ la Pɔɔlɔ ndo dui sɔ diakakeketsha dimama dia ngandji dia lam’asawɔ.

Ɛlɔ kɛnɛ olimu hawohombama l’okongamelo wa Nzambi. Olimu ɔsɔ mbishaka ɔngɛnɔngɛnɔ wa mɛtɛ ndo koka ndeka kosukanya l’anangɛso l’akadiyɛso. Ɔnkɔnɛ, yadjɛ oyango wa mongaka tena tshɛ “la akambo efula wa nsala l’olimu wa Nkumadiɔndjɔ.”​—1 Kɔr. 15:58.

4. Nde akakambaka la wetshelo wakandeke. Pɔɔlɔ akafundɛ Timɔte ate: “Wɛ akayele dimɛna dimɛna wetshelo ami, yoho yami ya lɔsɛnɔ, eyango wele la mi, mbetawɔ kami, solo dia lotutsha diele la mi, ngandji kami, ekikelo kami.” (2 Tim. 3:10) Lam’ele Timɔte akakambaka la kɛnɛ kakandekaka, nde akakotsha kɛnɛ kalɔmbama dia mɛmba ɛkɛndɛ wa weke.​—1 Kɔr. 4:17.

Onde wɛ ekɔ la ɔngɛnyi wele ekumanyi kambohokɔ akambo kakokayɛ ndjela ɛnyɛlɔ kande? Naka bu, lande na kahayayange onto ɔmɔtshi? Tom, laya ekumanyi ɛnɔnyi efula mbohɔka ate: “Ekumanyi kɛmɔtshi kambohokɔ akambo akayasha le mi ndo akandowanya dimɛna. Dimi lakɔlɔmbaka alako mbala la mbala ndo lakakambaka la wɔ. Dui sɔ diakafudia wɛkamu ami esadi eto.”

5. Nde akatetemala ndjalowanya. Pɔɔlɔ akakeketsha Timɔte ate: “[Yalowanya] lo ndjadjɛ oyango wa mamema Nzambi.” (1 Tim. 4:7) Ɔkɛnyi wa tɔkɛnyɔ mbeyaka monga la ombetsha, koko nde pombaka ndjalowanya nto ndamɛ. Pɔɔlɔ akatɛ Timɔte ate: “Otetemale ndjasha lo wadielo wa lo sɛkɛ, lo olakelo ndo lo wetshelo. . . . Okanake yimba l’akambo asɔ. Oyashake tshɛ lɔkɔ dia ohamelo ayɛ mɛnama hwe le anto tshɛ.”​—1 Tim. 4:13-15.

Wɛ lawɔ pombaka ntetemala ndowanya akoka ayɛ. Tetemala mpama lo nyuma ndo tetemala ndjela ɛlɔmbwɛlɔ w’eyoyo washa okongamelo. Ndo nto, ewɔ dia ndeka ndjaɛkɛ le yɛ, ondo lo mfɔnya dia wɛ ekɔ la diewo di’efula diakokayɛ nkandola dui tshɛ aha la nsala eyangelo w’eshika. L’ɛnyɛlɔ ka Timɔte, “oyalamake ndo odjake yimba lo wetshelo ayɛ.”​—1 Tim. 4:16.

6. Nde akayaɛkɛka lo nyuma ka Jehowa. Lo nkana yimba la esambishelo ka Timɔte, Pɔɔlɔ akawohola ate: “Lama diangɔ dia nɛmɔ sɔ diakawakosha lo tshimbo ya nyuma k’ekila kele le so.” (2 Tim. 1:14) Dia nama olimu ande, Timɔte akahombe ndjaɛkɛ lo nyuma ka Nzambi.

Donald, laya ekumanyi ɛnɔnyi akumi akate ate: “Apami wakasɔnama pombaka mbɔsa diɔtɔnganelo diasawɔ la Nzambi la nɛmɔ di’efula. Wanɛ wasala dui sɔ wayɔkɛndakɛndaka ‘oma lo wolo otsha lo wolo.’ Naka vɔ nɔmba nyuma ka Nzambi ndo nkɛnɛmɔla olowa atɔ, kete vɔ wayonga ɔtshɔkɔ wa mɛtɛ le anangɛwɔ.”​—Os. 84:7; 1 Pe. 4:11.

Ekɔ dui di’ekeketshelo efula dia mɛna anangɛso efula w’eyoyo wambɔsɔnama, wele oko wɛ watahame lo nyuma. Jason, lakatatɛkɛtshi la diko mbutaka ate: “Etena kakamonge ekumanyi, lakeke akambo efula ndo lakaleke monga l’eshikikelo. Kakianɛ lɔngɛnangɛna ɔkɛndɛ ami ndo lekɔ lo mbɔɔsa oko diɛsɛ dia laande!”

Onde wɛ ayotetemala mpama lo nyuma? Yadjɛ oyango wa nkondja wetshelo oma le Timɔte. Oma laasɔ wɛ lawɔ ayonga tshondo y’ɔtshɔkɔ le ekambi wa Nzambi.