Lam’ele sho kahaka ekanda aso walembetshiya Bible ofele, anto fɔnyaka dia ekɔ dimɛna nsangola ekanda akɔ ko mbadja lo sitɛ kina y’Ɛtɛrnɛtɛ kana lo réseau social. Koko, nsala dui sɔ ekɔ mɔnyɔla Atɔndɔ wendana l’okambelo * wa la sitɛ yaso y’Ɛtɛrnɛtɛ ndo dui sɔ diakonge l’etombelo wa kɔlɔ. Oko wotamidiɔ hwe lo Atɔndɔ asɔ, ndooko onto lele la lotshungɔ la “mbidja esato, ekanda, logo, mishiki, foto, tovidɛo kana awui w’oma lo sitɛ kɛnɛ l’Ɛtɛrnɛtɛ (lo sitɛ kakahanya waa fishe, sitɛ kakahanya tovidɛo, réseau social kana sitɛ kina tshɛ).” Lande na kele ekɔ ohomba nshimba awui asɔ?

Diangɔ tshɛ diele lo sitɛ yaso kokamɛ la lotshungɔ l’afundji. Ɛtɔlɔki ndo andɔshi akina salaka la wolo dia nkamba l’ekanda aso lo sitɛ yawɔ y’Ɛtɛrnɛtɛ dia minganyiya Ɛmɛnyi wa Jehowa ndo anto akina. Oyango wele la sitɛ y’Ɛtɛrnɛtɛ shɔ ele dia nkonya ambadi dia monga la taamu. (Os. 26:4; Tok. 22:5) Anto akina kambaka l’awui w’oma lo ekanda aso kana logo laso jw.org dia nsala piblisite, dia nsondja diangɔ diawɔ ndo lo applications wa lo telefonɛ kana wa lo tablɛtɛ. Lo nkokɛ lotshungɔ l’afundji ndo logo laso, sho mongaka la ɔkɔkɔ wetawɔma le lɛɛta wa nshimba anto diaha nkamba la wɔ lo yoho ya kɔlɔ shɔ. (Tok. 27:12) Koko naka la lolango tshɛ sho mbetawɔ di’anto akina, kaanga anangɛso mbidja diangɔ diaso dia l’Ɛtɛrnɛtɛ lo sitɛ kina kana nkamba la logo laso la jw.org dia nsala piblisite ya diangɔ dia nsondja, ondo lɛɛta hatosukɛ  welo wadjaso dia nshimba andɔshi ndo amundji w’okanda.

Telesharjɛ ekanda aso oma l’ahole akina aha oma lo jw.org koka monga waale. Jehowa akasha “ɔhɔmbɔ wa kɔlamelo ndo kɛsɔ” oto ɔkɛndɛ wa mbishaka anto mbo ya ndɛ ya lo nyuma. (Mat. 24:45) “Ɔhɔmbɔ” ɔsɔ kambaka paka la sitɛ yawɔ nyɛ: www.pr418.com, tv.pr418.com, ndo wol.pr418.com dia ntondja mbo ya ndɛ ya lo nyuma. Ndo tekɔ paka la applications esato ɛnɛ: JW Language^®, JW Library^®, ndo JW Library Sign Language^® wakokaso mbidja lo telefɔnɛ kana lo tablɛtɛ. Sho koka monga l’eshikikelo ɔnɛ vɔ hawokambe la diangɔ sɔ dia nsala piblisite ndo diɔ bu l’awui wa l’andja ɔnɛ wa Satana. Naka mbo ya ndɛ ya lo nyuma mbeta oma lo sitɛ kina, kete yɔ koka tshikitanyema.—Os. 18:26; 19:8.

Laadiko dia laasɔ, mbidja ekanda aso lo sitɛ y’Ɛtɛrnɛtɛ yakoka anto mfunda kɔmatɛrɛ, mbishaka ɛtɔlɔki ndo amɔnyɔdi akina diaaso dia mfunda awui wakonya anto di’aha ndjaɛkɛ l’okongamelo wa Jehowa. Anangɛso amɔtshi wakayatambiya lo mbidjana taamu l’Ɛtɛrnɛtɛ, dui dialeka mbisha lokombo la Jehowa sɔnyi. Ɛtɛrnɛtɛ bu dihole dia dimɛna dia “mbetsha la memakana tshɛ wanɛ wahetawɔ wetshelo.” (2 Tim. 2:23-25; 1 Tim. 6:3-5) Akɛnama nto dia awui wa kashi wa lo réseau social ndo sitɛ y’Ɛtɛrnɛtɛ yakasalema lo lokombo l’okongamelo, la Olui-walɔmbɔla ndo ase Olui-walɔmbɔla. Koko, ndooko ose Olui-walɔmbɔla lele la sitɛ kande hita k’Ɛtɛrnɛtɛ kana lele wonya tshɛ lo réseau social.

Ntoma anto lo jw.org kimanyiyaka dia dianganya “lokumu l’ɔlɔlɔ.” (Mat. 24:14)Dihomɔ dia l’Ɛtɛrnɛtɛ dialongolaso dia nkamba la diɔ l’olimu aso w’esambishelo diekɔ lo tatetemala nɔngɔswama. Sho nangaka dia onto tshɛ nkondja wahɔ oma lɔkɔ. Ɔnkɔnɛ, oko wadiɛnya Atɔndɔ wendana l’okambelo wa la dihomɔ sɔ, wɛ koka tomɛ onto okanda aso ɔmɔtshi l’Ɛtɛrnɛtɛ kana mbotomɛ liɛ la ɛngɔ kɛmɔtshi kele lo jw.org. Naka sho tomaka anto wɛnya nsaki lo sitɛ yaso y’Ɛtɛrnɛtɛ yeyama, kete tekɔ lo mbakimanyiya dia monga la diɔtɔnganelo la “ɔhɔmbɔ wa kɔlamelo ndo kɛsɔ,” mbuta ate djui yaamɛ y’Akristo wa mɛtɛ watosha mbo ya ndɛ ya lo nyuma.