1, 2. a) Lande na kaki lɔhɔmbɔ ndo lotshungɔ awui w’ohomba lo nshi y’ɔpɔstɔlɔ Pɔɔlɔ? b) Onto akɔna akate Pɔɔlɔ lele Kiɔkɔ ya lotshungɔ la mɛtɛ?

AKRISTO wa lo ntambe ka ntondo waki lo diolelo dia Rɔmɔ lɛnɛ aki anto l’otako efula l’ɔtɛ w’ɛlɛmbɛ, losembwe ndo lotshungɔ laki lawɔ. Koko, diolelo diaki la wolo w’efula sɔ diakayaɛkɛka le mfumbe dia nsala elimu efula wa wolo. Lo yoho mɔtshi, onto 1 lo anto 3 wa lo diolelo dia Rɔmɔ aki mfumbe. Mbokɛmaka hwe dia, lɔhɔmbɔ ndo lotshungɔ aki awui w’ohomba le anto, mbidja ndo Akristo.

² Ɔpɔstɔlɔ Pɔɔlɔ akafunde awui wendana la lotshungɔ mbala efula. Koko nde kosalaka la wolo dia nkandola ekakatanu wa l’andja ɔnɛ, dui diakalangaka anto efula wa l’etena kɛsɔ nsala. Lo dihole dia nsala ngasɔ, Pɔɔlɔ la asekande Akristo wakasale la wolo dia mbetsha anto lokumu l’ɔlɔlɔ lendana la Diolelo diaki Nzambi ndo mbakimanyiya dia nshihodia ohomba wele l’oshinga w’etshungwelo wa Kristo Yeso. Pɔɔlɔ akatɛ asekande Akristo onto lele Kiɔkɔ ya lotshungɔ la mɛtɛ. Nde akafunde ate: “Jehowa  ekɔ Nyuma, ndo lɛnɛ ele nyuma kaki Jehowa, lotshungɔ lekɔ.”​—2 Kɔr. 3:17.

3, 4. a) Kakɔna kakate Pɔɔlɔ lo avɛsa wele la ntondo ka 2 Kɔrɛtɔ 3:17? b) Ahombaso nsala dia monga la lotshungɔ l’oma le Jehowa?

³ Lo mukanda ande wa hende otsha le ase Kɔrɛtɔ, Pɔɔlɔ akate kɛnɛ kakakomɛ Mɔsɛ etena kakandaholɔ oma lo Dikona dia Sinayi l’ɔkɔngɔ wa nde monga la ntondo ka ondjelo wa Jehowa. Esase wakatombaka l’elungi kande! Etena kakɛnyi ase Isariyɛlɛ Mɔsɛ, vɔ wakoke wɔma, ko nde akafɛ dihɔndɔ di’okombɔ l’elungi kande. (Eto. 34:29, 30, 33; 2 Kɔr. 3:7, 13) Pɔɔlɔ akalembetshiya ate: “Koko etena kakadimɔ onto otsha le Jehowa, okombɔ ɔsɔ mimɔka.” (2 Kɔr. 3:16) Kakɔna kakalange Pɔɔlɔ mbuta?

⁴ Takeke lo sawo dietshi dia Jehowa, Otungi wa diangɔ tshɛ oto mbele la lotshungɔ la tshɛ lo tshɛ lele bu l’elelo. Diakɔ diele, mbokɛmaka hwe dia lotshungɔ lekɔ la ntondo ka Jehowa ndo “lɛnɛ ele nyuma kaki Jehowa.” Koko Pɔɔlɔ akate dia naka sho nangaka monga la lotshungɔ lɔsɔ, sho pombaka nkadimɔ otsha le Jehowa. Dui sɔ nembetshiyaka dia sho pombaka monga la diɔtɔnganelo la nde. Etena kaki ase Isariyɛlɛ l’oswe wa shɛnga, vɔ wakɛnaka akambo woho wɛna anto koko aha woho wɛna Jehowa. Aki oko vɔ waki la okombɔ lo timba ndo l’etema awɔ. Vɔ wakalange nkamba la lotshungɔ l’oyoyo lakawakondja dia nkotsha nsaki yawɔ hita.​—Hɛb. 3:8-10.

5. a) Lotshungɔ la ngande lasha nyuma ka Jehowa? b) Ngande weyaso ɔnɛ onto koka monga mfumbe kana lo lokanu ndo ntetemala monga la lotshungɔ lasha Jehowa? c) Ambola akɔna wahombaso nkadimola?

⁵ Lotshungɔ lasha nyuma kaki Jehowa ndeka lotshungɔ laya oma lo ntshungɔ oma lo lɔhɔmbɔ. Nyuma kɛsɔ mbishaka lotshungɔ l’efula ndeka lɔnɛ lakoka anto mbisha. Tɔ koka totshungola oma lo lɔhɔmbɔ la pɛkato la nyɔi ndo oma lo lɔhɔmbɔ la ɔtɛmwɛlɔ wa kashi ndo mbekelo yawɔ. (Rɔmɔ 6:23; 8:2) Ande woho wele lotshungɔ lɔsɔ dimɛna lee! Kaanga onto lele mfumbe kana lele lo lokanu koka monga la lotshungɔ lɔsɔ. (Eta. 39:20-23) Kadiyɛso Nancy Yuen ndo ɔnangɛso Harold King wakadjama lo lokanu l’edja k’ɛnɔnyi efula l’ɔtɛ wa mbetawɔ kawɔ, koko vɔ wakatetemala monga la lotshungɔ lɔsɔ. Wɛ koka menda kɛnɛ katawɔ lo dikambo dia awui wakahomana lawɔ lo JW Télédifusion. (Ɔtɔ lam’ofundjiwɔ INTERVIEWS ET TÉMOIGNAGES > L’ENDURANCE DANS L’ÉPREUVE.) Tayanga nkadimola ambola ahende anɛ: Ngande wakokaso mɛnya dia lotshungɔ laso lekɔ la nɛmɔ efula le so? Ndo ngande wakokaso nkamba la lotshungɔ laso la lomba?

6. Ngande wakɛnya ase Isariyɛlɛ dia vɔ komonga la lowando l’ɔtɛ wa lotshungɔ lakawasha Jehowa?

⁶ Etena kalongolaso woshasha wa nɛmɔ, sho mongaka la lowando le onto lotoshawɔ. Koko, ase Isariyɛlɛ komonga la lowando l’ɔtɛ wa lotshungɔ lakawasha Jehowa. Ngɔndɔ ngana tsho l’ɔkɔngɔ wa Jehowa mbatshungola oma l’Edjibito, vɔ wakatatɛ nkombola mbo ya ndɛ ndo dinɔnɔ diakawanɔka lɛkɔ. Vɔ wakangunanguna l’ɔtɛ wa mana, mbuta ate mbo ya ndɛ yakawashaka Jehowa. Vɔ wakakombola ndo dia nkalola l’Edjibito! Le wɔ, “nse, kɔkɔmbrɛ, pastɛkɛ, atungudu w’akatshi, atungudu w’ekama ndo atungudu wa hayi” waki ohomba efula ndeka lotshungɔ lakawasha Jehowa la mbɔtɛmɔla. Aha la taamu, Jehowa akawaomalɛ efula. (Emb. 11:5, 6, 10; 14:3, 4) Dui sɔ diekɔ wetshelo w’ohomba efula le so.

7. Ngande wakakambe Pɔɔlɔ la dako diande diele lo 2 Kɔrɛtɔ 6:1, ndo ngande wakokaso nsala woho akɔ waamɛ?

 ⁷ Pɔɔlɔ akahɛmɔla Akristo tshɛ diaha monga anto wele bu la lowando l’ɔtɛ wa lotshungɔ latosha Jehowa lo tshimbo y’Ɔnande Yeso Kristo. (Adia 2 Kɔrɛtɔ 6:1.) Pɔɔlɔ komonga kokele, nde aki mfumbe ka pɛkato la nyɔi ndo dui sɔ diakonyangiyaka efula. Koko, nde akate ate: “Nzambi losaka lo tshimbo ya Yeso Kristo Nkumɛso!” Lande na kakandate dui sɔ? Pɔɔlɔ akalembetshiya asekande Akristo ate: “Nɛ dia ɔlɛmbɛ wa nyuma kasha lɔsɛnɔ kaamɛ la Kristo Yeso wakanyotshungola oma lo ɔlɛmbɛ wa pɛkato la nyɔi.” (Rɔmɔ 7:24, 25; 8:2) L’ɛnyɛlɔ ka Pɔɔlɔ, hatohombe pondjo mbohɛ dia Jehowa akatotshungola oma lo lɔhɔmbɔ la pɛkato la nyɔi. Oshinga w’etshungwelo tokimanyiyaka dia kambɛ Nzambi kaso la nkum’otema ka pudipudi ndo dui sɔ toshaka ɔngɛnɔngɛnɔ wa mɛtɛ.​—Os. 40:8.

8, 9. a) Ɔhɛmwɛlɔ akɔna wakasha Petero lo kɛnɛ kendana la woho wahombaso kambaka la lotshungɔ laso? b) Ngande wakoka onto nkamba la lotshungɔ lande lo yoho ya kɔlɔ?

⁸ Hatohombe mbuta tsho dia tekɔ la lowando le Jehowa, koko sho pombaka monga la yewo diaha nkamba la lotshungɔ laso lo yoho ya kɔlɔ. Ɛnyɛlɔ, ɔpɔstɔlɔ Petero akatɔhɛmɔla diaha nkamba la lotshungɔ laso oko yɛkɛ nɛndɛ dia nsala awui wa kɔlɔ. (Adia 1 Petero 2:16.) Ɔhɛmwɛlɔ ɔsɔ toholaka kɛnɛ kakakomɛ ase Isariyɛlɛ l’oswe wa shɛnga. Ɛlɔ kɛnɛ sho lawɔ tamboleka monga l’ohomba w’ɔhɛmwɛlɔ ɔsɔ. Satana l’andja ande wekɔ lo ntondja diangɔ di’amɛna efula dia ndɔta, dia ndɛ, dia nnɔ ndo dia nkɛnya. Anto wasala piblisite kambaka l’anto w’elangala dia tokonya dia sho nsomba diangɔ dieso mɛtɛ bu l’ohomba. Mbeyaka monga dui dia wɔdu efula kesama oma le andja ɔnɛ dia nkamba la lotshungɔ laso lo yoho ya kɔlɔ.

⁹ Dako dia Petero mendanaka ndo l’awui akina woleki ohomba efula wa lo lɔsɛnɔ, ɛnyɛlɔ kalasa yayotɔsɔna kana olimu. Ɛnyɛlɔ, ɛlɔngɔlɔngɔ l’esekaseka wa nshi nyɛ sɛngiyamaka dia nsala la wolo dia mbetawɔma l’inivɛrsite woleki amɛna. Anto efula mbatɛka dia naka vɔ mbɔtɔ kalasa ya laadiko, kete wayokondja elimu w’amɛna, falanga efula ndo wayɔlɛmiyama. Anto asɔ mbeyaka mbatɛ awui wɛnama oko wanɛ walongola apɔlɔmɛ l’inivɛrsite wayokondja falanga efula ndeka wanɛ walongola apɔlɔmɛ wa sekɔndɛrɛ. Mbɔtɔ kalasa ya laadiko mbeyaka mɛnama oko kanyi yoleki dimɛna le ɛlɔngɔlɔngɔ etena kahombawɔ mbɔsa yɛdikɔ yayonga la shɛngiya lo lɔsɛnɔ l’otondo. Ko kakɔna kahombawɔ mbohɔka vɔ la ambutshi awɔ?

10. Ahombaso mbohɔka etena kɔsaso tɛdikɔ l’awui aso hita?

¹⁰ Anto amɔtshi mbeyaka mfɔnya ɔnɛ lam’ele awui asɔ mendanaka l’onto ndamɛ, vɔ wekɔ la lotshungɔ la nsala kɛnɛ kalangawɔ edja tshɛ kele dui sɔ hakiyanya nkum’otema kawɔ. Vɔ mbeyaka nkamba l’ɛtɛkɛta wa Pɔɔlɔ ɛnɛ: “Lande na kahomba lotshungɔ lami nomboshama oma le nkum’otema k’onto okina?” (1 Kɔr. 10:29) Kaanga mbeso la lotshungɔ la mbɔsa tɛdikɔ taso tendana la kalasa ndo olimu, sho pombaka mbohɔ dia lotshungɔ laso lekɔ l’elelo ndo ɔnɛ tɛdikɔ tshɛ tɔsaso mongaka l’etombelo ɛmɔtshi. Diakɔ diakate Pɔɔlɔ ate: “Akambo tshɛ mbetawɔmaka, koko aha akambo tshɛ mbele la wahɔ. Akambo tshɛ mbetawɔmaka, koko aha akambo tshɛ mbakeketsha.” (1 Kɔr. 10:23) Diakɔ diele kaanga mbeso la lotshungɔ la mbɔsa tɛdikɔ l’awui aso hita, aha kɛnɛ kalangaso mboleki ohomba.

11. Lande na kakatotshungola Jehowa?

¹¹ Etena kakatɔhɛmɔla Petero diaha nkamba la lotshungɔ laso lo yoho ya kɔlɔ, nde akatokeketsha dia sho nkamba la lɔ “oko ɛhɔmbɔ wa Nzambi.” Diakɔ diele Jehowa akakambe la Yeso dia totshungola oma lo lɔhɔmbɔ la pɛkato la nyɔi l’oyango wa sho mbokambɛ lɔsɛnɔ laso l’otondo.

12. Ɛnyɛlɔ kakɔna kakatotshikɛ Nɔa nde l’ase nkumbo kande?

¹² Yoho yoleki dimɛna ya nkamba la lotshungɔ laso ele nkamba la wenya ndo wolo aso dia kambɛ Jehowa tshɛ lo tshɛ. Nsala dui sɔ ayotokokɛ diaha mbetawɔ dia eyango wa l’andja ɔnɛ ndo nsaki yaso monga awui woleki ohomba lo nsɛnɔ yaso. (Ngal. 5:16) Tokanyiya kɛnɛ kakasale Nɔa nde la ase nkumbo kande. Vɔ wakasɛnaka l’andja wakalole l’awui wa ngala ndo wa mindo. Koko vɔ kondjatambiya l’eyango ndo l’awui wakasalaka anto wakadinge. Vɔ wakasɔnɛ dia ndjasha l’olimu wakawasha Jehowa dia nsala. Vɔ wakasale waato, wakatshumanya mbo ya ndɛ dikambo diawɔ ndo dia waa nyama ndo wakewola anto akina lo kɛnɛ kendana la Mvula k’elola. “Nɔa akasale kɛnɛ tshɛ kakawodjangɛ Nzambi. Nde akasale kɛnɛ kakandawotɛ tshɛ lo tshɛ.” (Eta. 6:22) Etombelo waki la dui sɔ ele, Nɔa nde l’ase nkumbo kande wakake l’ekomelo k’andja ɔsɔ.​—Hɛb. 11:7.

13. Kakɔna kakatodjangɛ Jehowa dia nsala?

¹³ Kakɔna katodjangɛ Jehowa dia nsala ɛlɔ kɛnɛ? Oko wakidiɔ lo dikambo di’ambeki wa Yeso, sho mbeyaka dia Nzambi akatodjangɛ dia nsambisha. (Adia Luka 4:18, 19.) Ɛlɔ kɛnɛ, Satana ambetɛ anto efula totshungu ndo vɔ hawoshihodia dia vɔ wekɔ mfumbe y’ɔtɛmwɛlɔ wa kashi, lomombo la l’emunyi ndo awui wa pɔlitikɛ. (2 Kɔr. 4:4) L’ɛnyɛlɔ ka Yeso, tekɔ la diɛsɛ dia nkimanyiya anto akina dia mbeya ndo ntɛmɔla Jehowa Nzambi kasha lotshungɔ. (Mat. 28:19, 20) Nsambisha anto akina bu dui dia wɔdu. L’ahole amɔtshi, anto hawoyasha dia mbeya Nzambi ndo amɔtshi momalaka etena k’asambishaso. Koko lam’ele Jehowa akatodjangɛ dia nsambisha, sho pombaka ndjambola ɔnɛ: ‘Onde dimi  koka nkamba la lotshungɔ lami dia ndeka ndjasha l’olimu wa Jehowa?’

14, 15. Yɛdikɔ yakɔna yakɔshi Ɛmɛnyi wa Jehowa efula? (Enda osato wele lo mbɔtwɛlɔ.)

¹⁴ Ekɔ dui di’ekeketshelo woho wele Ɛmɛnyi wa Jehowa efula wakashihodia di’ekomelo ka dikongɛ nɛ kamboleka nsukana ndo wakɔsɛ yɛdikɔ ya mbetɛ lɔsɛnɔ lawɔ ɔsɛlɛngɛ ko ntatɛ olimu w’ombatshi mboka. (1 Kɔr. 9:19, 23) Amɔtshi wekɔ ambatshi mboka lo ngelo yawɔ, koko akina monɔka lo tshumanelo diele l’ohomba w’ekimanyielo. Lo ɛnɔnyi etanu wetshi, anto ndekana 250 000 wakatatɛ olimu w’ombatshi mboka ndo kakianɛ, aya ambatshi mboka wa pondjo ndekana 1 100 000. Ande ɔngɛnɔngɛnɔ lo woho wakamba anto efula la lotshungɔ lawɔ dia kambɛ Jehowa lo yoho shɔ lee!—Os. 110:3.

¹⁵ Kakɔna kawakimanyiya dia nkamba la lotshungɔ lawɔ la lomba? Tɔshi ɛnyɛlɔ ka John nde la Judith, wanɛ wakakambe lo wedja efula lo ɛnɔnyi 30 wambeta. Vɔ mbutaka dia etena kakatatɛ Kalasa k’ambatshi mboka lo 1977, wakakeketshaka ambeki dia monɔ ndo tokamba lɛnɛ akiwɔ l’ohomba efula w’ekimanyielo. Dia nkotsha oyango ɔsɔ John nde la Judith wakahombe monga la lɔsɛnɔ l’ɔsɛlɛngɛ. Diakɔ diele John akatshikitanyaka olimu ande. L’ekomelo, vɔ wakatshu tosambisha lo wodja okina. Kakɔna kakaakimanyiya dia ntondoya ekakatanu, ɛnyɛlɔ mbeka ɔtɛkɛta w’oyoyo, ndjaekesanyiya la mbekelo y’eyoyo ndo dihole di’oyoyo? Vɔ wakalɔmbɛ Jehowa ndo wakayaɛkɛ le nde dia mbakimanyiya. Ngande wakawayaoke lo kɛnɛ kendana la kambɛ Jehowa lo yoho shɔ l’ɛnɔnyi ɛsɔ tshɛ? John mbutaka ate: “Lakayaokaka dia lakayasha tshɛ lo olimu woleki dimɛna wakimi kombeyaka ndo wakimi takambaka. Jehowa akaleke monga onto la mɛtɛ mɛtɛ le mi oko ombutshi wa ngandji. Kakianɛ lamboleka nshihodia kɛnɛ kalembetshiya Jakɔba 4:8 diata ɔnɛ: ‘Nyoyasukanya la Nzambi, ko nde ayoyasukanya la nyu.’ Lakeyaka dia lakakondja kɛnɛ kakamatayangaka, mbuta ate lɔsɛnɔ la dimɛna lele l’oyango.”

16. Ngande wakakambe nunu di’anto la lotshungɔ lawɔ la lomba?

¹⁶ L’ɛnyɛlɔ ka John la Judith, anto amɔtshi mongaka ambatshi mboka l’etena k’otale. L’ɔtɛ w’awui wele la wɔ, anto akina mongaka ambatshi mboka paka lo tshanda mɔtshi. Ndo anto efula wekɔ lo ndjakimɔ la lolango dia nkamba olimu wa wokelo wasalema l’andja w’otondo. Ɛnyɛlɔ, anangɛso l’akadiyɛso oko 27 000 wakatshu tokimanyiya lo wokelo wa mbalasa kalɔmbɔla olimu w’Ɛmɛnyi wa Jehowa wa l’andja w’otondo la Warwick, New York. Amɔtshi wakatshu l’edja ka mingu hiende, akina l’edja ka ngɔndɔ mɔtshi ndo akina nto l’edja k’ɔnɔnyi kana ndekana. Efula k’anangɛso l’akadiyɛso asɔ wakayahondja dia tokamba la Warwick. Vɔ wekɔ bɛnyɛlɔ di’amɛna efula di’anto wakakambe la lotshungɔ lawɔ dia ntombola Jehowa, Nzambi kasha lotshungɔ!

17. Akokaso nongamɛ l’asolo walomɔlomɔ naka sho nkamba la lotshungɔ laso la lomba oma ko kakianɛ?

¹⁷ Tekɔ la lowando l’efula lo woho weyaso Jehowa ndo l’ɔtɛ weso la lotshungɔ laya lo mbɔtɛmɔla. Ɔnkɔnɛ, nyɛsɔ tɛnya oma lo kɛnɛ kasɔnaso dia lotshungɔ lɔsɔ lekɔ la nɛmɔ efula le so. Lo dihole dia nkamba la lɔ lo yoho ya kɔlɔ, nyɛsɔ tokambe la lɔ dia kambɛ Jehowa tshɛ lo tshɛ lo ndjela akoka aso. Paka lo nsala ngasɔ mbakokaso ndjɔngɛnangɛna la ɛtshɔkɔ wakalake Jehowa etena kayokotshama prɔfɛsiya kɛnɛ: “Ditongami diɔ lawɔ diayotshungɔ oma lo lɔhɔmbɔ l’ɛhɔndɛlɔ ndo diayonga la lotshungɔ la lotombo la ana wa Nzambi.”​—Rɔmɔ 8:21.